☆ ᠪᠣᠷᠵᠢᠭᠢᠨ·ᠮᠥᠩᠭᠡᠤ᠋ᠳᠽᠡᠷ
ᠰᠢᠵᠢᠷ ᠳᠠᠩᠭᠢᠰ ︕ ᠳᠠᠯᠠ ᠶᠢᠨ ᠴᠥᠭᠦᠷᠦᠮ
ᠨᠤᠤᠷᠠᠭᠠᠢ ᠭᠤᠤᠯ ᠤᠨ ᠣᠰᠤᠨ ᠳᠤ
ᠨᠤᠭᠳᠤ ᠬᠠᠵᠠᠭᠠᠷ ᠳᠠᠭᠠᠷᠠᠭᠤᠯᠵᠤ᠂
ᠨᠤᠮᠤᠬᠠᠨ ᠰᠠᠷᠠᠯ ᠮᠤᠷᠢ ᠪᠠᠨ ᠰᠢᠭ
ᠨᠤᠭᠤᠭᠠᠨ ᠳᠠᠯᠠ ᠵᠥᠭ᠌ ᠭᠦᠳᠦᠯᠵᠤ᠂
ᠴᠥᠩᠭᠦᠯ ᠤᠨ ᠬᠤᠩᠬᠤᠷ ᠲᠤ ᠣᠷᠤᠭᠤᠯᠵᠤ
ᠴᠢᠳᠤᠷᠯᠠᠵᠤ ᠠᠪᠣᠭᠠᠤᠨ ᠳᠤᠭᠳᠠᠭᠠᠵᠠᠢ᠂
ᠴᠡᠭᠡ ᠪᠢᠯᠬᠠᠭᠰᠠᠨ ᠬᠤᠠᠳᠠᠭᠠ ᠰᠢᠭ
ᠴᠡᠩᠭᠡᠷ ᠨᠠᠭᠤᠷ ᠨᠢ ᠳᠤᠨᠤᠷᠠᠵᠠᠢ᠂
ᠠᠩᠭᠢᠷ ᠰᠢᠷᠠ ᠭᠠᠯᠠᠭᠤ ᠨᠤᠭᠤᠳ
ᠨᠠᠭᠤᠷ ᠳ᠋ᠤᠨᠢ ᠬᠤᠷᠭᠤᠰᠢᠭᠠᠤᠨ ᠨᠢᠰᠳᠡᠭ᠌ ᠦᠭᠡᠶ ᠭᠡᠨᠡ᠂
ᠠᠯᠳᠠᠨ ᠬᠠᠢ᠌ᠷ ᠲᠡᠶ ᠵᠢᠭᠠᠰᠤ ᠤᠳ ᠨᠢ
ᠢᠷᠮᠡᠭ᠌ ᠲᠤᠨᠢ ᠨᠤᠳᠤᠭᠰᠢᠭᠠᠤᠨ ᠵᠠᠢ᠌ᠳᠠᠳᠠᠭ ᠦᠭᠡᠶ ᠭᠡᠨᠡ᠂
ᠣᠭᠤᠨᠤ ᠰᠢᠷᠠᠭᠴᠢᠨ ᠬᠠᠶᠠ ᠬᠠᠶᠠ
ᠣᠰᠤᠨ ᠳ᠋ᠤᠨᠢ ᠳᠤᠷᠠᠯᠠᠭᠠᠤᠨ ᠡᠷᠭᠢᠴᠡᠳᠡᠭ᠌ ᠭᠡᠨᠡ᠂
ᠠᠭᠤᠯᠠ ᠶᠢᠨ ᠭᠦᠷᠦᠭᠡᠰᠤ ᠠᠷᠪᠠ ᠳᠠᠪᠣ ᠪᠠᠷ
ᠦᠨᠵᠢᠵᠤ ᠬᠤᠨᠤᠭᠠᠤᠨ ᠪᠣᠴᠠᠳᠠᠭ ᠭᠡᠨᠡ᠂
ᠮᠠᠯᠴᠢᠳ ᠤᠨ ᠭᠦᠯᠦᠰᠤ ᠬᠤᠷᠬᠠᠰᠠᠨ
ᠮᠠᠩᠨᠤᠭ ᠳᠠᠯᠠ ᠶᠢᠨ ᠴᠥᠭᠦᠷᠦᠮ ᠡ ︕
ᠮᠢᠨᠤ ᠬᠤᠩᠭ᠋ᠤᠷ ᠤᠨ ᠨᠢᠳᠤ ᠰᠢᠭ
ᠮᠡᠯᠳᠡᠭᠡᠨᠡᠵᠤ᠂ ᠳᠤᠷᠮᠤᠯᠵᠠᠬᠤ ᠳᠠᠩᠭᠢᠰ ᠡ ︕
ᠳᠠᠯᠠ ᠶᠢᠨ ᠮᠠᠯᠴᠢᠳ ᠤᠨ ᠠᠮᠢᠳᠤᠷᠠᠯ ᠳᠤ
ᠳᠠᠷᠠᠭ ᠪᠣᠯᠵᠤ ᠭᠦᠭᠡᠰᠦᠷᠡᠪᠠᠤ ᠭᠡᠪᠠᠯ᠂
ᠪᠠᠶᠠᠨ ᠰᠠᠷᠠᠭᠤᠯ ᠳᠠᠯᠠ ᠨᠤᠳᠤᠭ ᠤᠨ ᠶᠢᠡᠨ
ᠪᠠᠳᠠᠷᠠᠯ ᠪᠣᠯᠵᠤ ᠴᠡᠩᠭᠡᠷᠯᠡᠪᠠᠤ ᠭᠡᠪᠠᠯ
ᠵᠢᠭᠠᠰᠤ᠂ ᠮᠡᠯᠡᠭᠡᠢ ᠶᠢᠨ ᠳᠡᠭᠡᠵᠢ ᠶᠢ ᠨᠢ
ᠵᠢᠩᠰᠠ ᠵᠡᠷᠭᠡᠳᠡᠳ ᠵᠤᠭᠤᠭᠯᠠᠭᠰᠠᠨ ᠡᠴᠡ ᠪᠢᠰᠢ᠂
ᠵᠠᠬᠠ ᠪᠠᠷ ᠨᠢ ᠰᠠᠭᠤᠭᠰᠠᠨ ᠮᠠᠯᠴᠢᠳ
ᠵᠢᠭᠠᠬᠠᠨ ᠴᠤ ᠣᠯᠵᠤ ᠭᠦᠷᠳᠡᠭ᠍ᠰᠡᠨ ᠦᠭᠡᠶ ᠭᠡᠨᠡ᠂
ᠭᠡᠯᠳᠡᠭᠡ᠂ ᠮᠥᠷᠭᠦ᠂ ᠵᠢᠭᠠᠰᠤ ᠶᠢ ᠨᠢ
ᠭᠡᠳᠦᠭᠡᠨ ᠭᠦᠮᠦᠰ ᠡᠵᠡᠯᠡᠭ᠍ᠰᠡᠨ ᠡᠴᠡ ᠪᠢᠰᠢ᠂
ᠭᠦᠪᠠᠭᠡ ᠶᠢ ᠨᠢ ᠳᠠᠭᠠᠭᠰᠠᠨ ᠮᠠᠯᠴᠢᠳ
ᠭᠡᠰᠢᠭ᠌ ᠶᠢ ᠨᠢ ᠣᠯᠵᠤ ᠠᠮᠠᠰᠠᠭᠰᠠᠨ ᠦᠭᠡᠶ ᠭᠡᠨᠡ᠂
ᠥᠩᠭᠡ ᠶᠢᠨ ᠪᠣᠳᠤᠭ ᠳᠦᠷᠭᠢᠯ ᠦᠭᠡᠶ
ᠦᠨᠳᠦᠷ ᠳᠡᠭ᠍ᠷᠢ ᠲᠡᠶ ᠢᠵᠢᠯᠭᠡᠨ᠂
ᠨᠤᠳᠤᠭ ᠤᠨ ᠭᠦᠮᠦᠰ ᠤᠨ ᠰᠡᠳᠭᠢᠯ ᠰᠢᠭ᠌
ᠨᠤᠮᠤᠬᠠᠨ ᠳᠤᠯᠭᠢᠨ ᠴᠥᠭᠦᠷᠦᠮ ᠡ ︕
ᠮᠤᠩᠭ᠋ᠤᠯ ᠣᠷᠤᠨ ᠳᠠᠭᠠᠨ ᠭᠡᠷᠡᠭ᠍ᠴᠡᠭᠡ ᠲᠡᠶ ᠪᠣᠯ
ᠮᠥᠩᠭᠦᠨ ᠠᠶᠠᠭᠠᠨ ᠳᠠᠭᠠᠨ ᠪᠢᠯᠬᠠᠭ ︕
ᠮᠠᠯᠴᠢᠨ ᠠᠷᠠᠤᠨ ᠳᠠᠭᠠᠨ ᠭᠡᠷᠡᠭ᠌ ᠦᠭᠡᠶ ᠪᠣᠯ
ᠮᠠᠩᠬᠠᠨ ᠴᠥᠩᠭᠦᠯ ᠳᠡᠭᠡᠨ ᠰᠢᠷᠭᠡᠭ᠌ ︕
ᠠᠳᠠᠷ ᠳᠠᠯᠠ ᠳᠠᠭᠠᠨ ᠠᠰᠢᠭ ᠲᠡᠶ ᠪᠣᠯ
ᠠᠯᠳᠠᠨ ᠬᠤᠠᠳᠠᠭᠠᠨ ᠳᠠᠭᠠᠨ ᠠᠰᠠᠬᠠᠷᠠᠭ᠂
ᠠᠷᠠᠤᠨ ᠲᠦᠮᠡᠨ ᠳᠡᠭᠡᠨ ᠭᠡᠷᠡᠭ᠍ᠴᠡᠭᠡ ᠦᠭᠡᠶ ᠪᠣᠯ
ᠠᠮᠠᠰᠠᠷ ᠨᠢ ᠰᠡᠳᠡᠷᠡᠭᠡᠳ ᠥᠶᠡᠷᠯᠡᠭ᠌ ︕
ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶᠢᠭ ᠄ ᠪᠠᠭᠡᠵᠢᠩ ᠬᠤᠳᠠ ᠶᠢᠨ ᠨᠠᠢ᠌ᠷᠠᠯᠳᠤ ᠨᠠᠢ᠌ᠷᠠᠮᠳᠠᠬᠤ ᠰᠦᠮᠡ 12 ᠨᠤᠮᠸᠷ
ᠵᠤᠬᠢᠶᠠᠭᠴᠢ᠄ ᠪᠣᠷᠵᠢᠭᠢᠨ·ᠮᠥᠩᠭᠡᠤ᠋ᠳᠽᠡᠷ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 2918
ᠴᠠᠭ᠄ 2009 ᠤᠨ ᠤ 12 ᠰᠠᠷᠠ ᠶᠢᠨ 08
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ