ᠬᠤᠩᠭ᠋ᠤᠷ ᠨᠠᠮᠤᠷ ᠢ ᠬᠠᠮᠳᠤ ᠳᠤᠭᠤᠯᠤᠭᠰᠠᠨ ᠶᠢᠡᠨ ᠳᠤᠷᠠᠰᠴᠤ

ᠬᠤᠯᠠ ᠶᠢᠨ ᠪᠦᠰᠡᠭᠦᠢ ᠳᠤ ᠡᠨᠡ ᠰᠢᠯᠦᠭ᠌ ᠢ ᠪᠢᠴᠢᠯ᠎ᠠ

ᠠᠭᠰᠤᠮ ᠬᠠᠷ᠎ᠠ ᠮᠤᠷᠢᠳᠠᠢ ᠬᠤᠯᠠ ᠶᠢᠨ ᠨᠠᠢ᠌ᠷᠠᠭᠴᠢ

ᠠᠢ᠌ᠯ ᠤᠨ ᠬᠠᠷ᠎ᠠ ᠨᠢᠳᠤᠨ ᠪᠦᠰᠡᠭᠦᠢ ᠳᠡᠭᠦᠨ ᠲᠡᠶ

ᠡᠯᠡᠰᠤᠨ ᠳᠤᠯᠤᠭᠠᠢ ᠳᠡᠭᠡᠷ᠎ᠡ ᠠᠭᠤᠯᠵᠠᠨ᠎ᠠ ᠭᠡᠮᠡᠨ

ᠡᠨᠡ ᠯᠠ ᠨᠠᠰᠤᠨ ᠳᠠᠭᠠᠨ ᠣᠭᠳᠤ ᠪᠣᠳᠤᠵᠤ ᠵᠡᠭᠦᠳᠦᠯᠡᠭᠡ ᠦᠭᠡᠶ ᠶᠠᠪᠣᠯ᠎ᠠ᠁

ᠬᠠᠳᠠ ᠬᠠᠷᠠᠯᠠᠨ ᠴᠠᠰᠤᠨ ᠤ ᠠᠭᠤᠷ ᠳᠡᠭᠡᠭᠦ ᠰᠢᠭ᠌

ᠬᠤᠨᠢ ᠪᠠᠯᠴᠢᠭᠡᠤᠨ ᠡᠯᠡᠰᠤᠨ ᠳᠤᠯᠤᠭᠠᠢ ᠶᠢ ᠣᠷᠢᠶᠠᠬᠤ ᠳᠤ

ᠥᠵᠦᠭᠦᠷ ᠨᠢ ᠵᠠᠯᠭᠠᠯᠳᠤᠮᠠᠷ ᠵᠠᠢ ᠳᠡᠭᠡᠷ᠎ᠡ ᠬᠤᠶᠠᠭᠤᠯᠠ

ᠥᠵᠡᠭᠡ ᠳᠠᠨᠢᠭ᠎ᠠ ᠦᠭᠡᠶ ᠠᠳᠠᠯ᠎ᠠ ᠬᠠᠷᠠᠴᠠ ᠮᠥᠷᠭᠦᠯᠳᠤᠨ ᠣᠴᠠᠷᠠᠯ᠎ᠠ

ᠢᠵᠢᠯᠢ ᠬᠠᠷ᠎ᠠ ᠮᠤᠷᠢ ᠨᠢ ᠡᠯᠡᠰᠤᠨ ᠳᠡᠭᠡᠷ᠎ᠡ ᠳᠦᠷᠭᠡᠨ᠎ᠡ

ᠢᠷᠠᠢ᠌ᠭᠰᠠᠨ ᠰᠥᠷᠦᠭ᠌ ᠨᠢ ᠡᠯᠡᠰᠤᠨ ᠳᠡᠭᠡᠷ᠎ᠡ ᠪᠦᠮᠪᠦᠯᠵᠡᠨ᠎ᠡ

ᠢᠳᠠᠷ ᠬᠤᠶᠠᠷ ᠬᠠᠷᠢ ᠨᠢ ᠡᠯᠡᠰᠤᠨ ᠳᠡᠭᠡᠷ᠎ᠡ ᠳᠤᠨᠢᠷᠬᠠᠨ᠎ᠠ

ᠢᠴᠢᠮᠡᠳᠡᠭᠡᠢ ᠵᠠᠩ ᠨᠢ ᠡᠯᠡᠰᠤᠨ ᠳᠡᠭᠡᠷ᠎ᠡ ᠬᠠᠭᠠᠷᠠᠯ᠎ᠠ

ᠭᠡᠷ ᠲᠤ ᠢᠷ᠎ᠠ ᠭᠡᠵᠤ ᠵᠠᠯᠠᠭᠰᠠᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠭᠡᠳᠡᠳᠡᠭ᠌ ᠬᠠᠯᠳᠠᠷ ᠨᠤᠬᠠᠢ ᠪᠠᠨ ᠰᠡᠭᠦᠳᠡᠷ ᠳᠡᠭᠡᠨ ᠬᠤᠷᠢᠭᠰᠠᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠵᠠᠭ ᠶᠢᠡᠨ ᠦᠷᠲᠦᠵᠦ ᠬᠠᠢ᠌ᠷ᠎ᠠ ᠪᠠᠨ ᠰᠢᠪᠠᠨᠡᠭ᠍ᠰᠡᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠵᠠᠪᠰᠠᠷ ᠤᠨ ᠰᠠᠯᠭᠢ ᠶᠢ ᠴᠠᠩᠳᠠᠵᠤ ᠭᠠᠳᠠᠨ᠎ᠠ ᠪᠠᠨ ᠪᠦᠷᠳᠦᠯᠵᠡᠭ᠍ᠰᠡᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠰᠠᠷᠠ ᠦᠭᠡᠶ ᠰᠦᠨᠢ ᠰᠠᠤᠠᠭᠢᠯ ᠳᠤ ᠳᠡᠷᠭᠡᠯᠭᠡᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠰᠠᠢ᠌ᠬᠠᠨ ᠪᠦᠰᠡᠭᠦᠢ ᠲᠡᠶ ᠨᠠᠷᠭᠢᠵᠤ ᠬᠤᠨᠤᠭᠰᠠᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠠᠨᠢᠷ ᠴᠢᠩᠨᠠᠵᠤ ᠰᠤᠴᠢᠭᠰᠠᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠠᠷᠭᠠᠯ ᠣᠳᠤᠭ᠎ᠠ ᠳᠤᠨᠤᠭᠰᠠᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠨᠠᠢ᠌ᠷᠠᠭ ᠤᠨ ᠡᠯᠡᠰᠤᠨ ᠳᠤᠯᠤᠭᠠᠢ ᠰᠢᠯᠦᠭᠯᠡᠵᠤ ᠨᠡᠭᠦᠨ᠎ᠡ

ᠨᠠᠷᠠᠨ ᠤ ᠡᠯᠡᠰᠤᠨ ᠳᠤᠯᠤᠭᠠᠢ ᠰᠢᠷᠭᠠᠯᠳᠤᠵᠤ ᠨᠡᠭᠦᠨ᠎ᠡ

ᠪᠠᠭᠤᠷᠢ ᠶᠢᠨ ᠡᠯᠡᠰᠤᠨ ᠳᠤᠯᠤᠭᠠᠢ ᠨᠤᠳᠤᠭ ᠰᠠᠭᠢᠨ᠎ᠠ

ᠪᠢᠳᠠ ᠬᠤᠶᠠᠷ ᠤᠨ ᠡᠯᠡᠰᠤᠨ ᠳᠤᠯᠤᠭᠠᠢ ᠪᠣᠯᠵᠤᠵᠤ ᠨᠡᠭᠦᠨ᠎ᠡ

ᠴᠢᠮ᠎ᠠ ᠶᠢ ᠠᠮᠠᠷᠠᠭ ᠶᠢᠡᠨ ᠭᠡᠵᠤ ᠡ᠊ᠨᠳᠡᠭᠦᠷᠡᠵᠤ ᠵᠡᠭᠦᠳᠦᠯᠡᠭ᠍ᠰᠡᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠴᠢᠮ᠎ᠠ ᠳᠤ ᠢᠨᠠᠭ ᠤᠨ ᠰᠢᠯᠦᠭ᠌ ᠪᠢᠴᠢᠭᠦ ᠳᠤ ᠭᠠᠷᠴᠠᠭ ᠨᠢ ᠬᠠᠭᠤᠴᠢᠷᠠᠭᠰᠠᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠴᠢᠮ᠎ᠠ ᠲᠡᠶ ᠵᠤᠯᠭᠠᠵᠤ ᠭᠦᠭᠡᠷᠦᠭᠦ ᠳᠤ ᠮᠠᠯ ᠨᠢ ᠨᠡᠢ᠌ᠯᠡᠭ᠍ᠰᠡᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠴᠢᠮ᠎ᠠ ᠡᠴᠡ ᠬᠤᠯᠠᠳᠠᠬᠤ ᠳᠤ ᠣᠢ᠌ᠳᠤᠵᠤ ᠭᠠᠭᠴᠠᠭᠠᠷᠳᠠᠭᠰᠠᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠬᠠᠢ᠌ᠷ᠎ᠠ ᠶᠢᠨ ᠭᠢᠯᠢ ᠶᠢ ᠭᠡᠷᠴᠢᠵᠤ ᠳᠠᠪᠠᠭᠰᠠᠨ ᠡᠯᠡᠰᠤᠨ ᠳᠤᠯᠤᠭᠠᠢ

ᠬᠠᠨᠢ ᠶᠢᠨ ᠰᠠᠤᠠᠭᠢᠯ ᠢ ᠪᠣᠯᠠᠵᠤ ᠰᠢᠭᠤᠷᠳᠠᠭ ᠦᠭᠡᠶ ᠡᠯᠡᠰᠤᠨ ᠳᠤᠯᠤᠭᠠᠢ

ᠬᠠᠢ᠌ᠷ᠎ᠠ ᠶᠢ ᠬᠤᠶᠠᠷ ᠬᠤᠪᠢᠶᠠᠵᠤ ᠴᠢᠳᠠᠳᠠᠭ ᠦᠭᠡᠶ ᠡᠯᠡᠰᠤᠨ ᠳᠤᠯᠤᠭᠠᠢ

ᠬᠠᠷ᠎ᠠ ᠪᠠᠷ ᠳᠠᠰᠤᠭᠰᠠᠨ ᠴᠤ ᠠᠮᠠᠷᠠᠭᠯᠠᠵᠤ ᠪᠣᠯᠳᠠᠭ ᠦᠭᠡᠶ ᠡᠯᠡᠰᠤᠨ ᠳᠤᠯᠤᠭᠠᠢ

ᠡᠮᠭᠡᠨᠢᠨ ᠳᠠᠭᠤᠯᠠᠵᠤ ᠡᠭᠡ ᠨᠤᠳᠤᠭ ᠶᠢᠡᠨ ᠵᠤᠷᠢᠬᠤ ᠳᠤ

ᠡᠭᠡᠰᠢᠭ᠌ ᠤᠨ ᠠᠶ᠎ᠠ ᠪᠠᠷ ᠰᠢᠭᠤᠷᠠᠭᠰᠠᠨ ᠮᠢᠨᠤ ᠡᠯᠡᠰᠤᠨ ᠳᠤᠯᠤᠭᠠᠢ᠁

ᠡᠮᠵᠡᠭ᠍‍ᠭᠡᠨ ᠵᠢᠷᠦᠭᠡᠨ ᠤ ᠪᠣᠷᠠᠠᠳᠠᠭ ᠢ ᠳᠠᠰᠤᠴᠢᠵᠤ ᠪᠣᠢ᠌ᠯᠠᠭᠰᠠᠨ

ᠡᠩᠭᠦᠷᠡᠢ ᠰᠤᠪᠳᠠᠭ ᠣᠶᠠᠷᠠᠮ᠎ᠠ ᠶᠢᠨ ᠮᠢᠨᠢ ᠡᠯᠡᠰᠤᠨ ᠳᠤᠯᠤᠭᠠᠢ᠁