☆ ᠪᠣᠤ ᠵᠢᠨᠵᠣᠸᠠᠩᠽᠢ
ᠨᠣᠲᠤᠭ ᠤᠨ ᠵᠠᠮ ᠮᠢᠨᠢ
ᠨᠢᠳᠦ ᠠᠨᠢᠨ ᠨᠤᠢᠷᠰᠤᠬᠤ ᠶᠢᠨ ᠬᠤᠷᠤᠮᠬᠠᠨ
ᠨᠤᠲᠤᠭ ᠤᠨ ᠵᠠᠮ ᠮᠢᠨᠢ ᠨᠡᠳᠡᠪᠡᠯᠵᠡᠭᠡᠳ ᠢᠷᠡᠨᠡ
ᠵᠢᠷᠤᠭ ᠰᠢᠬ ᠵᠢᠷᠪᠢᠯᠵᠡᠨ ᠰᠦᠮᠡᠯᠵᠡᠭᠡᠳ
ᠵᠢᠷᠦᠬᠡ ᠰᠡᠳᠭᠢᠯ ᠳᠦ ᠮᠢᠨᠢ ᠰᠣᠯᠤᠩᠭᠣᠷᠠᠭᠠᠳ ᠢᠷᠡᠨᠡ ᠡ︕
ᠪᠠᠭᠠ ᠶᠢᠨ ᠦᠶᠡ ᠶᠢᠨ ᠢᠨᠢᠶᠡᠳᠦ ᠪᠠ ᠨᠢᠯᠪᠤᠰᠤ ᠪᠠᠨ
ᠪᠤᠷᠣ ᠵᠠᠮ ᠳᠤ ᠪᠠᠨ ᠰᠠᠴᠤᠵᠤ ᠯᠠ ᠶᠠᠪᠤᠯᠠ ᠪᠢ
ᠭᠠᠴᠢᠭ ᠪᠠ ᠵᠢᠷᠭᠠᠯᠠᠩ ᠲᠠᠢ ᠤᠷᠳᠦ ᠠᠶᠠᠨ ᠳᠤ ᠪᠠᠨ
ᠭᠠᠰᠢᠭᠤᠨ ᠪᠠ ᠰᠢᠬᠢᠷᠯᠢᠭ᠌ ᠡᠴᠡ ᠠᠮᠲᠠᠯᠠᠵᠤ ᠯᠠ ᠶᠠᠪᠣᠯᠠ ᠪᠢ᠃
ᠦᠯᠦᠭᠡᠢ ᠨᠤᠲᠤᠭ ᠤᠨ ᠪᠤᠷᠤᠬᠠᠨ ᠵᠠᠮ ᠴᠤ
ᠦᠨᠢ ᠡᠭᠦᠷᠢᠳᠡ ᠶᠢᠨ ᠤᠯᠠ ᠮᠥᠷ ᠪᠤᠯᠤᠭᠰᠠᠨ
ᠦᠩᠭᠡᠷᠡᠭᠰᠡᠨ ᠦ ᠲᠡᠷᠡ ᠬᠦ ᠰᠢᠷᠠ ᠬᠣᠨᠣᠭ ᠤᠳ ᠴᠤ
ᠡᠪᠴᠢᠭᠦᠦ ᠴᠡᠭᠡᠵᠢᠨ ᠦ ᠮᠢᠨᠢ ᠤᠶᠠᠩᠭᠠ ᠡᠭᠡᠰᠢᠭ ᠪᠤᠯᠤᠭᠰᠠᠨ︕
ᠤᠷᠠᠩᠬᠠᠢ ᠬᠤᠪᠴᠠᠰᠤ ᠲᠠᠢ ᠦᠶᠡᠷᠬᠡᠭᠰᠡᠨ ᠦᠴᠦᠭᠡᠳᠦᠷᠬᠡᠨ
ᠣᠷᠢᠬᠠᠨ ᠰᠠᠯᠬᠢᠨ ᠢᠶᠠᠷ ᠢᠯᠪᠢᠭᠦᠯᠵᠦ ᠯᠠ ᠠᠶᠠᠯᠠᠯᠠ
ᠡᠪᠡᠰᠦ ᠴᠡᠴᠡᠭ ᠲᠠᠢ ᠵᠠᠮ ᠤᠨ ᠢᠶᠠᠨ ᠬᠠᠵᠠᠭᠤ ᠪᠠᠷ
ᠢᠨᠢᠶᠡᠳᠦ ᠪᠠᠷ ᠪᠢᠯᠬᠠᠭᠰᠠᠨ ᠬᠠᠪᠤᠷ ᠢ ᠬᠦᠭᠡᠭᠡᠯᠡ᠃
ᠲᠤᠷᠭᠠᠨ ᠲᠡᠪᠡᠯ ᠲᠠᠢ ᠲᠤᠷᠨᠢᠭᠰᠠᠨ ᠦᠨᠦᠳᠦᠷᠬᠡᠨ
ᠲᠤᠯᠠᠭᠠᠬᠠᠨ ᠨᠠᠷᠠᠨ ᠢᠶᠠᠷ ᠲᠠᠭᠠᠯᠠᠬᠠᠭᠤᠯᠵᠤ ᠯᠠ ᠵᠠᠮᠨᠠᠯᠠ
ᠴᠠᠷᠳᠠᠮᠠᠯ ᠰᠢᠷᠳᠡᠮᠡᠯ ᠲᠠᠢ ᠵᠠᠮ ᠤᠨ ᠢᠶᠠᠨ ᠲᠡᠷᠭᠡᠳᠡᠭᠦᠷ
ᠴᠡᠩᠭᠡᠯ ᠢᠶᠡᠷ ᠲᠦᠭᠦᠷᠡᠭᠰᠡᠨ ᠨᠠᠮᠤᠷ ᠢ ᠤᠭᠲᠤᠯᠠ᠃
ᠰᠣᠯᠤᠩᠭᠠᠷᠠᠨ ᠮᠤᠷᠤᠢᠯᠵᠠᠭᠰᠠᠨ ᠨᠤᠲᠣᠭ ᠤᠨ ᠵᠠᠮ ᠮᠢᠨᠢ
ᠰᠦᠨᠢ ᠶᠢᠨ ᠵᠡᠭᠦᠳᠦᠨ ᠳᠦ ᠦᠨᠢᠲᠡ ᠲᠤᠰᠬᠠᠭᠳᠠᠨᠠ
ᠰᠦᠮᠡᠯᠵᠡᠨ ᠨᠡᠲᠡᠪᠡᠯᠵᠡᠭᠰᠡᠨ ᠠᠭᠤᠯᠠ ᠣᠰᠤ ᠮᠢᠨᠢ
ᠰᠡᠳᠭᠢᠯ ᠵᠢᠷᠦᠭᠡᠨ ᠳᠦ ᠡᠭᠦᠷᠢᠳᠡ ᠬᠤᠨᠤᠭᠰᠢᠨᠠ ᠡ︕
ᠨᠤᠢᠷ ᠠᠴᠠ ᠰᠡᠷᠡᠵᠦ ᠡᠪᠡᠰᠢᠶᠡᠨ ᠰᠤᠨᠢᠶᠠᠬᠤ ᠶᠢᠨ ᠠᠭᠱᠠᠨᠠ
ᠨᠤᠲᠤᠭ ᠤᠨ ᠵᠠᠮ ᠮᠢᠨᠢ ᠵᠤᠷᠠᠢᠭᠠᠳ ᠢᠷᠡᠨᠡ
ᠲᠠᠨᠢᠯ ᠲᠠᠰᠤᠯ ᠭᠤᠪᠢ ᠲᠠᠯᠠ ᠮᠢᠨᠢ
ᠲᠠᠷᠢᠬᠢ ᠤᠶᠣᠨ ᠳᠤ ᠮᠢᠨᠢ ᠵᠢᠷᠪᠢᠯᠵᠡᠭᠡᠳ ᠢᠷᠡᠨᠡ ᠡ︕
ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶ᠋ᠢᠭ᠄ ᠵᠠᠯᠠᠢᠳ ᠬᠤᠰᠢᠭᠤᠨ ᠤ ᠠᠷᠪᠠᠠᠭᠡᠷ ᠭᠤᠣᠯ ᠰᠤᠷᠭᠠᠭᠤᠯᠢ
ᠵᠤᠬᠢᠶᠠᠭᠴᠢ᠄ ᠪᠣᠤ ᠵᠢᠨᠵᠣᠸᠠᠩᠽᠢ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 10606
ᠴᠠᠭ᠄ 2023 ᠤᠨ ᠤ 03 ᠰᠠᠷᠠ ᠶᠢᠨ 31
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ