☆ ᠭᠦᠭᠡᠪᠢᠷ
ᠨᠠᠮᠠ ᠶᠢ ᠮᠠᠷᠳᠠ
ᠬᠠᠪᠣᠷ ᠤᠨ ᠠᠭᠢ ᠨᠢᠳᠦᠯᠡᠭᠡ ᠦᠭᠡᠶ ᠬᠠᠭᠳᠠᠨ ᠳᠤᠤᠷᠠ ᠪᠠᠨ ᠥᠭᠦᠭ᠍ᠰᠡᠨ ᠰᠢᠭ᠌ ᠮᠠᠷᠳᠠ
ᠬᠠᠷᠠ ᠰᠠᠯᠭᠢᠨ ᠤ ᠳᠤᠭᠤᠰᠤ ᠬᠠᠷᠠᠭᠳᠠᠬᠤ ᠦᠭᠡᠶ ᠪᠣᠯᠳᠠᠯᠠ ᠳᠠᠷᠤᠭᠰᠠᠨ ᠰᠢᠭ ᠮᠠᠷᠳᠠ
ᠵᠤᠨ ᠤ ᠴᠠᠭᠠᠨ ᠡᠭᠦᠯᠡ ᠪᠣᠷᠤᠭᠠᠯᠠᠭᠠ ᠦᠭᠡᠶ ᠭᠡᠢ᠌ᠰᠦᠭ᠍ᠰᠡᠨ ᠰᠢᠭ᠌ ᠮᠠᠷᠳᠠ
ᠵᠤᠯ ᠦᠭᠡᠶ ᠨᠢᠭᠡ ᠦᠷᠡ ᠨᠠᠭᠢᠶᠠᠯᠠᠭᠠ ᠦᠭᠡᠶ ᠬᠠᠳᠠᠭᠰᠠᠨ ᠰᠢᠭ᠌ ᠮᠠᠷᠳᠠ
ᠨᠠᠮᠤᠷ ᠡᠴᠡ ᠡᠷᠳᠡ ᠮᠤᠳᠤᠨ ᠡᠴᠡ ᠨᠢᠭᠡ ᠨᠠᠪᠴᠢ ᠣᠨᠠᠭᠰᠠᠨ ᠰᠢᠭ ᠮᠠᠷᠳᠠ
ᠨᠠᠷᠠᠨ ᠡᠴᠡ ᠡᠮᠤᠨᠡ ᠨᠠᠪᠴᠢᠨ ᠡᠴᠡ ᠮᠥᠭᠦᠯᠢᠭ᠌ ᠰᠢᠭᠦᠳᠡᠷᠢ ᠣᠨᠠᠭᠰᠠᠨ ᠰᠢᠭ ᠮᠠᠷᠳᠠ
ᠡᠪᠦᠯ ᠤᠨ ᠴᠠᠰᠤᠨ ᠳᠤ ᠡᠳᠡᠭᠡᠰᠢ ᠦᠭᠡᠶ ᠭᠦᠯᠳᠡᠭ᠍ᠰᠡᠨ ᠭᠡᠡᠵᠡ ᠡᠪᠠᠰᠤ ᠶᠢ ᠰᠢᠭ᠌ ᠮᠠᠷᠳᠠ
ᠡᠷᠭᠢ ᠭᠠᠩᠭᠠ ᠳᠤ ᠡᠷᠭᠢᠰᠢ ᠦᠭᠡᠶ ᠳᠠᠷᠤᠭᠳᠠᠭᠰᠠᠨ ᠬᠠᠷᠠ ᠬᠠᠮᠬᠤᠤᠯ ᠢ ᠰᠢᠭ ᠮᠠᠷᠳᠠ
ᠨᠠᠮᠠ ᠶᠢ ᠮᠠᠷᠳᠠ
ᠭᠦᠵᠦᠭᠦᠨ ᠳᠤ ᠵᠡᠭᠦᠭ᠍ᠳᠡᠭ᠍ᠰᠡᠨ ᠰᠤᠠᠳᠤᠷ ᠳᠠᠰᠤᠷᠠᠭᠠᠤᠨ ᠭᠡᠭᠡᠭ᠍ᠳᠡᠴᠢᠭᠡᠭ᠍ᠰᠡᠨ ᠰᠢᠭ᠌ ᠮᠠᠷᠳᠠ
ᠬᠤᠷᠤᠭᠤᠨ ᠳᠤ ᠭᠤᠶᠤᠭᠳᠠᠭᠰᠠᠨ ᠪᠦᠯᠡᠵᠡᠩ ᠬᠤᠭᠤᠷᠠᠭᠠᠤᠨ ᠭᠡᠭᠡᠭ᠍ᠳᠡᠴᠢᠭᠡᠭ᠍ᠰᠡᠨ ᠰᠢᠭ᠌ ᠮᠠᠷᠳᠠ
ᠬᠠᠰ ᠰᠢᠭ ᠬᠤᠪᠣᠷᠬᠠᠨ ᠡᠷᠳᠡᠨᠢ ᠪᠠᠢ᠌ᠯᠠ ᠴᠤ ᠭᠡᠮᠭᠡᠷᠡᠭᠡᠳ ᠭᠡᠭᠡᠭ᠍ᠳᠡᠴᠢᠭᠡᠭ᠍ᠰᠡᠨ ᠰᠢᠭ᠌ ᠮᠠᠷᠳᠠ
ᠬᠠᠮᠢᠭᠠ ᠡᠴᠡ ᠴᠤ ᠳᠠᠭᠢᠭᠠᠳ ᠣᠯᠬᠤ ᠦᠭᠡᠶ ᠬᠠᠴᠢᠨ ᠶᠢᠡᠷ ᠭᠡᠭᠡᠭ᠍ᠳᠡᠴᠢᠭᠡᠭ᠍ᠰᠡᠨ ᠰᠢᠭ᠌ ᠮᠠᠷᠳᠠ
ᠨᠠᠮᠠ ᠶᠢ ᠮᠠᠷᠳᠠ
ᠨᠠᠭᠤᠷ ᠤᠨ ᠳᠤᠩᠭ᠋ᠠᠯᠠᠭ ᠣᠰᠤᠨ ᠰᠢᠷᠭᠢᠭᠡᠳ ᠬᠠᠳᠠᠴᠢᠬᠠᠭᠰᠠᠨ ᠰᠢᠭ ᠮᠠᠷᠳᠠ
ᠨᠤᠭᠤᠰᠤ ᠭᠠᠯᠠᠭᠤ ᠨᠢ ᠳᠠᠭᠢᠭᠠᠤᠨ ᠢᠷᠡᠭᠦ ᠦᠭᠡᠶ ᠶᠠᠪᠣᠴᠢᠬᠠᠭᠰᠠᠨ ᠰᠢᠭ ᠮᠠᠷᠳᠠ
ᠬᠤᠭᠤᠷ ᠤᠨ ᠬᠤᠶᠠᠷ ᠣᠳᠠᠰᠤᠨ ᠤ ᠨᠢᠭᠡ ᠨᠢ ᠳᠠᠰᠤᠷᠠᠴᠢᠬᠠᠭᠰᠠᠨ ᠰᠢᠭ ᠮᠠᠷᠳᠠ
ᠬᠤᠩᠭ᠋ᠤᠷ ᠵᠥᠭᠡᠯᠡᠨ ᠠᠶᠠ ᠨᠢ ᠨᠢᠭᠡᠮᠦᠰᠤᠨ ᠳᠠᠭᠯᠠᠷᠠᠴᠢᠬᠠᠭᠰᠠᠨ ᠰᠢᠭ ᠮᠠᠷᠳᠠ
ᠨᠠᠮᠠ ᠶᠢ ᠮᠠᠷᠳᠠ ᠡ
ᠮᠠᠷᠳᠠᠬᠤ ᠳᠤ ᠪᠠᠨ
ᠨᠢᠳᠤᠨ ᠳᠤ ᠪᠠᠨ ᠨᠢᠯᠪᠣᠰᠤ ᠦᠭᠡᠶ ᠮᠠᠷᠳᠠ
ᠨᠣᠢ᠌ᠷᠤᠨ ᠳᠤ ᠪᠠᠨ ᠵᠡᠭᠦᠳᠤ ᠦᠭᠡᠶ ᠮᠠᠷᠳᠠ
ᠨᠠᠷᠠ ᠲᠡᠶ ᠵᠢᠰᠤ ᠲᠡᠶ ᠳᠦᠷᠢ ᠲᠡᠶ ᠨᠢ
ᠨᠡᠮᠡᠭᠡᠰᠤ ᠬᠠᠯᠠᠭᠠᠰᠤ ᠦᠭᠡᠶ ᠡᠮᠦᠰᠭᠡᠯ ᠲᠡᠶ ᠨᠢ
ᠨᠢᠭᠡ ᠴᠤ ᠥᠯᠡᠳᠡᠭ᠍ᠰᠡᠨ ᠶᠠᠭᠤᠮᠠ ᠥᠭᠡᠢ
ᠨᠡᠭᠡᠵᠤ ᠰᠠᠨᠠᠯ ᠦᠭᠡᠶ ᠨᠢᠭᠡᠮᠦᠰᠤᠨ ᠮᠠᠷᠳᠠ
ᠨᠠᠮᠠ ᠶᠢ ᠮᠠᠷᠳᠠ ᠡ
ᠮᠠᠷᠳᠠᠬᠤ ᠳᠤ ᠪᠠᠨ
ᠡᠪᠦᠯ ᠵᠤᠨ ᠢ ᠮᠢᠨᠢ ᠬᠠᠪᠣᠷ ᠲᠡᠶ ᠨᠠᠮᠤᠷ ᠲᠡᠶ ᠨᠢ ᠮᠠᠷᠳᠠ
ᠡᠳᠦᠷ ᠰᠦᠨᠢ ᠶᠢ ᠮᠢᠨᠢ ᠥᠷᠯᠦᠭᠡ ᠲᠡᠶ ᠦᠳᠡᠰᠢ ᠲᠡᠶ ᠨᠢ ᠮᠠᠷᠳᠠ
ᠥᠴᠦᠭᠡᠳᠦᠷ ᠣᠷᠵᠢᠳᠤᠷ ᠢ ᠮᠢᠨᠢ ᠦᠨᠦ ᠲᠡᠶ ᠮᠠᠷᠭᠠᠰᠢ ᠲᠡᠶ ᠨᠢ ᠮᠠᠷᠳᠠ
ᠥᠰᠦᠭ᠍ᠰᠡᠨ ᠪᠣᠰᠤᠭᠰᠠᠨ ᠢ ᠮᠢᠨᠢ ᠥᠳᠡᠯᠭᠦ ᠲᠡᠶ ᠥᠭᠦᠭᠦ ᠲᠡᠶ ᠨᠢ ᠮᠠᠷᠳᠠ
ᠭᠤᠮᠤᠳᠠᠭᠰᠠᠨ ᠪᠠᠢ᠌ᠪᠠᠯ ᠪᠠᠶᠠᠰᠤᠭᠰᠠᠨ ᠲᠡᠶ ᠪᠠᠨ
ᠭᠤᠯᠤᠭᠰᠠᠨ ᠪᠠᠢ᠌ᠪᠠᠯ ᠳᠤᠭᠤᠭᠰᠠᠨ ᠲᠡᠶ ᠪᠠᠨ
ᠭᠠᠭᠴᠠᠬᠠᠨ ᠶᠠᠭᠤ ᠴᠤ ᠥᠯᠡᠳᠡᠭᠡᠯ ᠥᠭᠡᠢ
ᠭᠠᠵᠠᠷ ᠤᠨ ᠮᠤᠬᠤᠷ ᠲᠤ ᠭᠦᠷᠳᠡᠯᠡ ᠮᠠᠷᠳᠠ
ᠨᠠᠮᠠ ᠶᠢ ᠮᠠᠷᠳᠠ ᠡ
ᠮᠠᠷᠳᠠᠬᠤ ᠳᠤ ᠪᠠᠨ
ᠥᠷᠭᠦᠯᠵᠢ ᠪᠠᠢ᠌ᠳᠠᠭ ᠢᠨᠢᠶᠠᠳᠤ ᠪᠠᠨ
ᠦᠪᠯᠠᠵᠤ ᠮᠥᠩᠭᠡᠷᠡᠭᠦᠯᠵᠤ ᠮᠠᠷᠳᠠ
ᠦᠨᠡᠠᠴᠢ ᠴᠠᠭᠠᠨ ᠰᠠᠨᠠᠭᠠ ᠪᠠᠨ
ᠥᠯᠡᠳᠡᠭᠡᠵᠤ ᠬᠠᠢ᠌ᠷᠠᠯᠠᠵᠤ ᠮᠠᠷᠳᠠ
ᠥ ᠦᠭᠡᠶ ᠰᠡᠳᠭᠢᠯ ᠳᠤ ᠪᠠᠨ
ᠭᠦ ᠰᠠᠭᠤᠯᠭᠠᠯ ᠦᠭᠡᠶ ᠮᠠᠷᠳᠠ
ᠭᠡᠰᠡᠨ ᠨᠠᠷᠠ ᠶᠢ
ᠡᠷᠭᠢᠵᠤ ᠭᠡᠯᠡᠭᠦ ᠦᠭᠡᠶ ᠮᠠᠷᠳᠠ
ᠡ᠊ᠨᠳᠡ ᠪᠠᠢ᠌ᠭᠠ ᠬᠤᠭᠤᠰᠤᠨ ᠢ
ᠡᠭᠦᠷᠢᠳᠡ ᠨᠥᠭᠦᠭᠦ ᠦᠭᠡᠶ ᠮᠠᠷᠳᠠ
ᠭᠡᠨ ᠳᠤ ᠴᠤ ᠪᠢ ᠭᠡᠯᠡᠭᠡ ᠦᠭᠡᠶ ᠴᠤ
ᠭᠡᠵᠢᠶᠡ ᠴᠤ ᠮᠢᠨᠤ ᠮᠠᠷᠳᠠᠳᠠᠭ ᠥᠭᠡᠢ
ᠬᠡ ᠵᠠᠩ ᠢ ᠪᠠᠨ ᠯᠠ ᠠᠪᠴᠤ
ᠭᠡᠭᠦᠳᠡᠭ᠌ ᠴᠡᠭᠡᠵᠢᠨ ᠳᠤ ᠮᠢᠨᠢ ᠮᠥᠩᠭᠡᠷᠡᠵᠤ ᠮᠠᠷᠳᠠᠡ
ᠨᠠᠮᠠ ᠶᠢ
ᠨᠡᠭᠡᠯᠳᠡ ᠥᠭᠡᠢ
ᠨᠢᠭᠡᠮᠦᠰᠤᠨ
ᠮᠠᠷᠳᠠᠴᠢᠬᠠ ᠡ ︕
2009.11.03
ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶᠢᠭ ᠄ ᠣᠯᠠᠭᠠᠠᠬᠠᠳᠠ ᠬᠤᠳᠠ ᠣᠩᠨᠢᠭᠤᠳ ᠬᠤᠰᠢᠭᠤ
ᠵᠤᠬᠢᠶᠠᠭᠴᠢ᠄ ᠭᠦᠭᠡᠪᠢᠷ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 2630
ᠴᠠᠭ᠄ 2009 ᠤᠨ ᠤ 12 ᠰᠠᠷᠠ ᠶᠢᠨ 11
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ