☆ ᠯ·ᠣᠳᠤᠨ
ᠨᠢᠯᠪᠣᠰᠤᠨ ᠳᠠᠭᠠᠨ ᠬᠠᠳᠠᠭᠰᠠᠨ ᠴᠠᠭᠠᠨ ᠨᠠᠭᠤᠷ
ᠭᠦᠪᠠᠭᠡᠨ ᠳᠡᠭᠡᠷᠡᠭᠢ ᠰᠢᠷᠢᠭᠢ ᠪᠠᠨ ᠵᠥᠰᠦᠭᠦᠯᠵᠤ
ᠴᠠᠭᠠᠨ ᠨᠠᠭᠤᠷ ᠭᠤᠤᠯ ᠡᠴᠡ ᠪᠠᠨ ᠬᠠᠳᠠᠪᠠ︕
ᠭᠦᠭ᠍ᠰᠢᠳ ᠳᠡᠭᠡᠳᠦᠰ ᠤᠨ ᠭᠦᠯᠦᠰᠤ ᠰᠢᠩᠭᠡᠭ᠍ᠰᠡᠨ
ᠭᠦᠷᠦᠰᠤᠨ ᠤ ᠠᠷᠢᠭᠤᠨ ᠰᠢᠷᠤᠢ ᠪᠠᠨ ᠭᠡᠷᠴᠢᠭᠦᠯᠵᠤ
ᠴᠠᠭᠠᠨ ᠨᠠᠭᠤᠷ ᠴᠠᠭᠠᠨᠠ ᠡᠴᠡ ᠪᠠᠨ ᠰᠢᠷᠭᠡᠪᠡ︕
ᠵᠤᠯᠠᠢ ᠶᠢ ᠨᠢ ᠦᠨᠦᠰᠤᠨ ᠪᠠᠯᠴᠢᠳᠡᠭ᠌
ᠵᠠᠭᠤᠨ ᠲᠦᠮᠡᠨ ᠰᠥᠷᠦᠭ᠌ ᠶᠢᠡᠨ ᠥᠭᠡᠢ᠌ᠯᠡᠵᠤ
ᠴᠠᠭᠠᠨ ᠨᠠᠭᠤᠷ ᠬᠤᠭᠤᠯᠠᠢ ᠳᠠᠭᠠᠨ ᠵᠠᠩᠭᠢᠷᠠᠨᠠ︕
ᠵᠢᠷᠦᠭᠡ ᠨᠢ ᠪᠣᠯᠤᠭᠰᠠᠨ ᠳᠠᠪᠤᠨ ᠳᠤᠯᠤᠭᠠᠢ ᠪᠠᠨ ᠬᠠᠷᠠᠵᠤ
ᠴᠠᠭᠠᠨ ᠨᠠᠭᠤᠷ ᠵᠡᠭᠦᠳᠤᠨ ᠳᠡᠭᠡᠨ ᠶᠤᠤᠯᠠᠨᠠ ︕
ᠦᠨᠦᠴᠢᠨ ᠳᠤᠭᠤᠰᠤ ᠳᠡᠭ᠍ᠳᠡᠭᠡᠵᠤ ᠥᠵᠡᠭᠡ ᠦᠭᠡᠶ
ᠢᠳᠡᠭᠡᠨ ᠰᠢᠷᠭᠠᠯ ᠳᠠᠷᠠᠰᠤ ᠪᠠᠨ ᠰᠠᠨᠠᠵᠤ
ᠴᠠᠭᠠᠨ ᠨᠠᠭᠤᠷ ᠨᠢᠯᠪᠣᠰᠤᠨ ᠳᠠᠭᠠᠨ ᠬᠠᠳᠠᠨᠠ ︕
ᠥᠮᠡᠭᠡᠢ ᠣᠳᠤᠭᠠᠨ ᠳᠤ ᠊ᠭ᠍ᠬᠢᠷᠳᠦᠭᠡ ᠦᠭᠡᠶ
ᠣᠰᠤᠨ ᠭᠦᠭᠡ ᠳᠡᠭ᠍ᠷᠢ ᠪᠠᠨ ᠮᠥᠷᠦᠭᠡᠳᠴᠤ
ᠴᠠᠭᠠᠨ ᠨᠠᠭᠤᠷ ᠨᠢᠭᠦᠯ ᠳᠡᠭᠡᠨ ᠬᠠᠬᠠᠨᠠ︕
ᠬᠠᠵᠠᠭᠤ ᠪᠠᠷ ᠨᠢ ᠣᠷᠤᠰᠳᠠᠭ ᠬᠠᠷᠠ ᠭᠤᠤᠯ
ᠬᠠᠳᠠᠭᠰᠠᠨ ᠨᠠᠭᠤᠷ ᠶᠢᠡᠨ ᠣᠮᠳᠠᠯᠠᠬᠤ ᠭᠡᠵᠤ
ᠡᠷᠭᠢ ᠪᠠᠨ ᠳᠠᠪᠠᠨ ᠴᠠᠯᠭᠢᠯᠠᠪᠠ︕
ᠬᠠᠶᠠᠭᠠᠨ ᠳᠤ ᠨᠢ ᠳᠤᠨᠤᠷᠠᠳᠠᠭ ᠣᠯᠠᠭᠠᠨ ᠪᠣᠯᠠᠭ
ᠬᠠᠢ᠌ᠷᠠᠨ ᠵᠠᠶᠠᠭᠠᠨ ᠳᠤ ᠨᠢ ᠰᠥᠭᠦᠳᠴᠤ
ᠡᠭᠢᠨ ᠡᠴᠡ ᠪᠠᠨ ᠪᠣᠯᠠᠩᠭᠢᠷᠳᠤᠪᠠ︕
ᠴᠡᠴᠡᠭ᠌ ᠶᠢᠡᠷ ᠰᠢᠭᠤᠷᠳᠠᠭ ᠴᠡᠴᠡᠭ᠍ᠳᠤ ᠳᠠᠪᠠ
ᠰᠢᠷᠭᠢᠭ᠍ᠰᠡᠨ ᠨᠠᠭᠤᠷ ᠤᠨ ᠬᠣᠢ᠌ᠨᠠ ᠡᠴᠡ ᠬᠠᠷᠠᠮᠰᠠᠵᠤ
ᠴᠡᠴᠡᠭ᠌ ᠨᠢ ᠭᠦᠷᠳᠡᠯᠡ ᠳᠤᠳᠠᠭᠤ ᠳᠡᠯᠭᠡᠷᠡᠨᠡ︕
ᠵᠤᠨ ᠳᠠᠭᠠᠨ ᠨᠤᠭᠤᠭᠠᠷᠠᠳᠠᠭ ᠵᠠᠭᠤᠨ ᠬᠠᠷᠭᠠᠢ᠌ᠳᠤ
ᠵᠠᠭᠤᠷᠮᠠᠭ ᠨᠠᠰᠤᠳᠤ ᠨᠠᠭᠤᠷ ᠤᠨ ᠳᠦᠯᠦᠭᠡ ᠭᠠᠰᠠᠯᠵᠤ
ᠬᠠᠷᠭᠠᠢ ᠨᠢ ᠪᠣᠯᠪᠠᠴᠤ ᠣᠷᠣᠢ᠌ᠳᠠᠵᠤ ᠨᠠᠪᠴᠢᠯᠠᠨᠠ︕
ᠭᠡᠴᠡᠭᠦᠤ ᠶᠢᠨ ᠡᠮᠨᠢᠭ᠌ ᠤᠷᠭᠢᠯ ᠤᠳ
ᠭᠡᠮᠰᠢᠯ ᠤᠨ ᠮᠠᠨᠠᠨ ᠳᠤ ᠳᠦᠭᠡᠷᠡᠵᠤ
ᠭᠡᠭᠡᠷᠡ ᠶᠢᠨ ᠰᠠᠯᠭᠢᠨ ᠳᠤ ᠡᠯᠡᠭ᠍ᠳᠡᠪᠡ︕
ᠭᠦᠭᠡ ᠰᠠᠢ ᠶᠢᠨ ᠴᠢᠯᠠᠭᠤᠳ
ᠭᠦᠮᠦᠰ ᠤᠨ ᠥᠢᠮᠡᠭᠡᠨ ᠳᠤ ᠠᠪᠳᠠᠵᠤ
ᠭᠦᠩᠭᠡᠨ ᠭᠤᠨᠢᠭ ᠲᠤ ᠢᠳᠡᠭ᠍ᠳᠡᠪᠡ︕
ᠴᠠᠭ ᠲᠠᠭᠠᠨ ᠪᠣᠷᠤᠭᠠᠯᠠᠳᠠᠭ ᠴᠠᠭᠠᠨ ᠠᠮᠠᠨ
ᠪᠣᠷᠤᠭᠠᠨ ᠦᠭᠡᠶ ᠭᠠᠩᠳᠠᠨᠠ︕
ᠣᠷᠭᠤᠴᠠ ᠪᠠᠶᠠᠨ ᠣᠰᠤᠨ ᠡᠭᠢᠨ
ᠣᠷᠭᠤᠮᠠᠯ ᠦᠭᠡᠶ ᠬᠠᠯᠴᠠᠭᠠᠢ᠌ᠷᠠᠨᠠ︕
ᠬᠠᠷᠢ ᠳᠤ ᠠᠯᠳᠠᠭᠰᠠᠨ ᠵᠢᠷᠦᠭᠡᠨ ᠠᠭᠤᠯᠠ
ᠵᠡᠮᠳᠡᠭ᠌ ᠪᠣᠯᠤᠭᠰᠠᠨ ᠨᠠᠭᠤᠷ ᠶᠢᠡᠨ ᠬᠠᠷᠠᠵᠤ
ᠰᠢᠷᠬᠠᠨ ᠳᠤ ᠨᠢ ᠰᠢᠨᠠᠯᠪᠠ︕
ᠬᠠᠷᠠᠵᠤ ᠰᠠᠭᠤᠭᠰᠠᠨ ᠡᠮᠡᠭᠡᠨ ᠬᠠᠳᠠ
ᠵᠤᠯᠭᠠᠷᠠᠵᠤ ᠣᠨᠠᠯᠠᠭᠰᠠᠨ ᠴᠡᠴᠡᠭ᠌ ᠶᠢᠡᠨ ᠢᠯᠪᠢᠵᠤ
ᠡᠯᠢᠭᠡᠨ ᠡᠴᠡ ᠪᠠᠨ ᠡᠮᠳᠡᠷᠡᠪᠡ︕
ᠨᠤᠳᠤᠭ ᠶᠢᠡᠨ ᠰᠠᠭᠢᠭᠰᠠᠨ ᠪᠣᠭᠤᠷᠤᠯᠴᠤᠳ ᠤᠨ
ᠬᠤᠭᠤᠯᠠᠢ ᠳᠠᠪᠠᠬᠤ ᠦᠭᠡᠶ ᠳᠡᠭᠡᠭᠯᠡᠭᠦ
ᠭᠠᠭᠴᠠ ᠪᠠᠯᠭᠤᠮ ᠭᠠᠰᠢᠭᠤᠨ ᠣᠰᠤ ᠴᠠᠭᠠᠨ ᠨᠠᠭᠤᠷ ᠡ︕
ᠨᠠᠭᠤᠷ ᠶᠢᠡᠨ ᠡᠷᠭᠡᠭᠡᠳ ᠵᠤᠰᠠᠳᠠᠭ ᠮᠠᠯᠴᠢᠳ ᠤᠨ
ᠨᠢᠳᠤᠨ ᠳᠤᠳᠤᠷᠠ ᠳᠤᠨᠤᠬᠤ
ᠨᠢᠭᠡ ᠳᠤᠰᠤᠯ ᠬᠠᠢ᠌ᠷᠠ ᠶᠢᠨ ᠨᠢᠯᠪᠣᠰᠤ ᠴᠤ ᠴᠠᠭᠠᠨ ᠨᠠᠭᠤᠷ ᠡ︕
ᠴᠡᠴᠡᠭ᠌ ᠳᠡᠭᠡᠭᠦᠷ ᠨᠢ ᠭᠦᠯ ᠨᠢᠴᠦᠭᠦᠨ ᠵᠢᠷᠡᠢ᠌ᠭ᠍ᠰᠡᠨ
ᠭᠦᠭᠡᠷᠦᠭᠦᠨ ᠴ᠍ᠦᠪᠤᠭᠤ ᠵᠠᠯᠠᠭᠤᠴᠤᠳ ᠤᠨ
ᠰᠡᠳᠭᠢᠯ ᠡᠴᠡ ᠠᠷᠴᠢᠭᠳᠠᠭᠰᠠᠨ ᠰᠡᠷᠢᠭᠦᠨ ᠵᠤᠰᠠᠯᠠᠩ ᠴᠠᠭᠠᠨ ᠨᠠᠭᠤᠷ ᠡ︕
ᠴᠡᠩᠭᠡᠷ ᠣᠰᠤᠨ ᠳᠤ ᠨᠢ ᠵᠢᠰᠤ ᠪᠠᠨ ᠳᠤᠯᠢᠳᠠᠳᠠᠭ
ᠭᠦᠳᠡᠭᠡ ᠶᠢᠨ ᠪᠣᠷᠤᠭᠵᠢᠭᠤᠨ ᠪᠦᠰᠡᠭᠦᠢᠴᠦᠳ ᠊ᠤᠨ
ᠪᠣᠳᠤᠯ ᠳᠤ ᠴᠠᠯᠭᠢᠭᠰᠠᠨ ᠪᠣᠷᠤ ᠭᠤᠨᠢᠭ ᠴᠤ ᠴᠠᠭᠠᠨ ᠨᠠᠭᠤᠷ ᠡ︕
ᠬᠠᠷᠢ ᠳᠤ ᠦᠭᠭᠦᠭ᠍ᠰᠡᠨ ᠬᠠᠢ᠌ᠷᠠᠳᠤ ᠭᠡᠦᠭᠡᠨ ᠴᠠᠭᠠᠨ ᠨᠠᠭᠤᠷ ᠡ︕
ᠬᠠᠭᠠᠴᠠᠭᠠᠤᠨ ᠮᠠᠷᠳᠠᠰᠢ ᠦᠭᠡᠶ ᠬᠠᠢ᠌ᠷᠠᠨ ᠪᠠᠯᠴᠢᠭᠡᠷ ᠴᠤ ᠴᠠᠭᠠᠨ ᠨᠠᠭᠤᠷ ᠡ︕
ᠬᠠᠯᠠᠭᠤᠨ ᠵᠢᠷᠦᠭᠡᠨ ᠳᠤ ᠡᠭᠦᠷᠢᠳᠡ ᠡᠷᠢᠭ᠍ᠳᠡᠭᠦ
ᠮᠤᠩᠭ᠋ᠤᠯ ᠭᠠᠵᠠᠷ ᠤᠨ ᠮᠥᠭᠦᠯᠢᠭ᠌ ᠰᠢᠷᠤᠢ ᠴᠠᠭᠠᠨ ᠨᠠᠭᠤᠷ ᠡ︕
ᠬᠠᠷᠠᠴᠠᠨ ᠡᠴᠡ ᠮᠢᠨᠢ ᠬᠤᠯᠠᠳᠠᠵᠤ ᠴᠢᠳᠠᠬᠤ ᠦᠭᠡᠶ
ᠬᠠᠵᠠᠭᠤ ᠳᠤ ᠥᠵᠡᠭ᠍ᠳᠡᠭᠡᠳ ᠵᠤᠪᠠᠭᠠᠬᠤ
ᠮᠤᠬᠤᠷ ᠭᠢᠳᠤᠭᠠ ᠶᠢᠨ ᠢᠯᠠ ᠰᠢᠷᠬᠠ ᠴᠤ ᠴᠠᠭᠠᠨ ᠨᠠᠭᠤᠷ ᠡ︕
ᠴᠠᠭᠠᠨ ᠨᠠᠭᠤᠷ ᠮᠢᠨᠢ
ᠴᠠᠪᠴᠢᠯᠠᠬᠤ ᠨᠢᠳᠤᠨ ᠡᠴᠡ
ᠴᠠᠰᠢ ᠪᠦᠮᠪᠦᠷᠢᠭᠦ ᠦᠭᠡᠶ ᠬᠠᠳᠠᠬᠤ
ᠨᠢᠭᠡ ᠳᠤᠰᠤᠯ ᠨᠢᠯᠪᠣᠰᠤ ᠶᠤᠮ ᠡ︕
2007 ᠣᠨ ᠤ 7 ᠰᠠᠷᠠ ᠶᠢᠨ 22 ᠊ᠤᠨ ᠥᠷᠯᠦᠭᠡ ᠪᠢᠴᠢᠪᠠ᠃
ᠵᠤᠬᠢᠶᠠᠭᠴᠢ᠄ ᠯ·ᠣᠳᠤᠨ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 2927
ᠴᠠᠭ᠄ 2009 ᠤᠨ ᠤ 05 ᠰᠠᠷᠠ ᠶᠢᠨ 03
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ