☆ ᠰᠤ᠋·ᠦᠨᠡᠨᠴᠢ
ᠵᠤᠪᠠᠯᠠᠩ ᠲᠤᠭᠠᠴᠠᠭᠰᠠᠨ ᠨᠢ
ᠠᠵᠢᠯ ᠡᠴᠡ ᠪᠠᠨ ᠪᠠᠭᠤᠭᠠᠤᠨ ᠭᠡᠷ ᠵᠥᠭ᠌ ᠶᠢᠡᠨ ᠠᠶᠠᠯᠠᠵᠤ ᠪᠠᠢ᠌ᠳᠠᠯᠠ ᠨᠢᠭᠡ ᠠᠯᠪᠠᠨ ᠭᠡᠷ ᠲᠤ ᠬᠠᠮᠳᠤ ᠰᠠᠭᠤᠳᠠᠭ ᠨᠥᠭᠦᠭᠡ ᠵᠠᠯᠠᠭᠤ ᠡᠴᠡ ᠣᠳᠠᠰᠤ ᠢᠷᠡᠭᠦᠯᠪᠡ᠃ ᠰᠠᠨᠠᠭᠠ ᠰᠠᠤᠠᠭᠢᠯ ᠣᠢ᠌ᠮᠤᠷᠠᠵᠤ ᠪᠠᠢ᠌ᠨᠠ᠂ ᠰᠠᠷᠬᠤᠤᠨ ᠭᠦᠡᠳᠡᠷᠴᠤ ᠪᠠᠬᠠᠨ ᠶᠠᠷᠢᠯᠴᠠᠶᠠ ᠭᠡᠵᠤ ᠨᠠᠳᠠ ᠶᠢ ᠣᠷᠢᠯᠠ᠃ ᠵᠠ ᠶᠠᠭᠠᠭᠢᠬᠤᠪ᠂ ᠬᠠᠮᠳᠤ ᠠᠵᠢᠯᠯᠠᠭᠰᠠᠨ ᠭᠡᠳᠤᠨ ᠵᠢᠯ ᠤᠨ ᠬᠠᠢ᠌ᠷᠠ ᠨᠠᠢ᠌ᠷ ᠢ ᠪᠣᠳᠤᠵᠤ᠂ ᠳᠡᠭᠦᠨ ᠤ ᠣᠷᠢᠭᠰᠠᠨ ᠬᠤᠭᠤᠯᠠᠨ ᠭᠡᠷ ᠲᠤ ᠬᠤᠷᠳᠤᠬᠠᠨ ᠰᠢᠭ ᠳᠠᠯᠪᠢᠭᠠᠤᠨ ᠭᠦᠷᠦᠯᠡ᠃ ᠬᠤᠶᠠᠷ ᠫᠢᠯᠠ ᠭᠦᠢᠳᠡᠨ ᠨᠤᠭᠤᠭᠠ ᠥᠷᠦᠭ᠍ᠰᠡᠨ ᠬᠠᠪᠴᠢᠭ ᠰᠢᠷᠡᠭᠡ ᠬᠠᠪᠴᠢᠵᠤ ᠰᠠᠭᠤᠭᠰᠠᠨ ᠪᠢᠳᠠ ᠬᠤᠶᠠᠭᠤᠯᠠ ᠬᠤᠶᠠᠷ ᠳᠤᠮᠤ ᠬᠤᠠᠳᠠᠭᠠ ᠲᠡᠶ ᠠᠷᠢᠭᠢ ᠪᠠᠨ ᠮᠥᠷᠭᠦᠭᠦᠯᠵᠤ ᠭᠡᠳᠤ ᠬᠤᠪᠢᠶᠠᠨ ᠵᠠᠯᠭᠢᠯᠠᠵᠤ ᠪᠠᠷᠠᠬᠤ ᠳᠤ ᠳᠠᠷᠠ ᠨᠥᠭᠦᠷ ᠮᠢᠨᠢ ᠨᠠᠳᠠ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠯᠠ᠂ ᠠᠷᠪᠢᠨ ᠴᠤ ᠵᠤᠪᠠᠯᠠᠩ ᠳᠤᠭᠠᠴᠠᠯᠠ᠁
《ᠠᠢ ᠳ᠋ᠠ᠂ ᠠᠯᠠᠭ ᠬᠤᠷᠸᠠ ᠶᠢᠨ ᠠᠮᠢᠳᠤᠷᠠᠯ ᠭᠡᠵᠤ ᠠᠷᠭᠠ ᠦᠭᠡᠶ ᠵᠤᠪᠠᠯᠠᠩ ᠲᠡᠶ ᠯᠠ ᠶᠤᠮ ᠪᠠᠢ᠌ᠨᠠ᠃ ᠠᠷᠠᠤᠨ ᠤᠨ ᠪᠠᠭᠰᠢ ᠪᠣᠯᠵᠤ ᠠᠷᠪᠠᠭᠠᠤᠨ ᠵᠢᠯ ᠪᠣᠯᠤᠯᠠ᠃ ᠣᠯᠠᠨ ᠭᠡᠦᠭᠡᠤᠨ ᠤᠨ ᠳᠤᠮᠳᠠ ᠣᠩᠰᠢᠵᠤ ᠪᠢᠴᠢᠵᠤ ᠵᠦᠳᠡᠷᠡᠯᠠ᠃ ᠣᠯᠤᠭᠰᠠᠨ ᠵᠢᠭᠠᠬᠠᠨ ᠵᠤᠭᠤᠰ ᠶᠢᠡᠷ ᠶᠢᠡᠨ ᠣᠯᠤᠭᠠᠢ ᠬᠤᠳᠤᠭᠤᠳᠤ ᠪᠠᠨ ᠳᠦᠭᠦᠷᠭᠡᠯᠡ᠃ ᠣᠷᠴᠢᠮ ᠤᠨ ᠵᠢᠯ ᠡᠴᠡ ᠬᠠᠷᠢᠨ ᠴᠠᠯᠢᠩ ᠭᠦᠯᠦᠰᠤ ᠨᠡᠮᠡᠭ᠍ᠳᠡᠯᠡ᠃ ᠣᠠᠳᠤᠷᠤᠯ ᠠᠮᠢᠳᠤᠷᠠᠯ ᠰᠠᠢ᠌ᠵᠢᠷᠠᠨᠠ ᠭᠡᠵᠤ ᠥᠨᠡᠭᠡᠷ ᠶᠡᠭᠡ ᠪᠠᠶᠠᠷᠯᠠᠯᠠ᠃ ᠣᠷᠢᠳᠤ ᠵᠢᠯ ᠪᠢ ᠣᠷᠤᠭ ᠤᠨ ᠪᠠᠳᠤᠯᠠᠪᠣᠷᠢ ᠪᠠᠨ ᠠᠪᠴᠤ ᠬᠤᠯᠠ ᠡᠴᠡ ᠢᠷᠡᠭ᠍ᠰᠡᠨ ᠦᠬᠢᠨ ᠲᠡᠶ ᠬᠤᠷᠢᠮᠯᠠᠵᠤ ᠬᠠᠮᠳᠤ ᠰᠠᠭᠤᠭᠰᠠᠨ ᠶᠤᠮ᠃ ᠬᠤᠵᠢᠮ ᠤᠨ ᠠᠮᠢᠳᠤᠷᠠᠯ᠂ ᠬᠤᠪᠢᠨ ᠤ ᠣᠢ᠌ᠯᠠᠰ ᠭᠡᠵᠤ ᠴᠢᠷᠮᠠᠢ᠌ᠵᠤ ᠳᠠᠮᠠᠴᠠᠵᠤ ᠶᠠᠪᠣᠭᠰᠠᠨ ᠶᠤᠮ᠃ ᠠᠪᠣᠭᠰᠠᠨ ᠪᠦᠰᠡᠭᠦᠢ ᠮᠢᠨᠢ ᠠᠵᠢᠯ ᠦᠭᠡᠶ ᠴᠤ ᠠᠮᠢᠳᠤᠷᠠᠯ ᠣᠠᠳᠤᠷᠤᠯᠭᠠ ᠳᠤ ᠮᠢᠨᠢ ᠳᠤᠰᠠᠯᠠᠵᠤ ᠪᠠᠢ᠌ᠭᠰᠠᠨ ᠶᠤᠮ᠃ ᠠᠭᠠᠰᠢ ᠵᠠᠩ ᠨᠢ ᠮᠠᠭᠤ ᠴᠤ ᠠᠮᠢ ᠬᠤᠪᠢ ᠭᠡᠤᠨ ᠴᠢᠷᠮᠠᠢ᠌ᠳᠠᠭ ᠪᠠᠢ᠌ᠭᠰᠠᠨ ᠶᠤᠮ᠁》
ᠡ᠊ᠨᠳᠡ ᠭᠦᠷᠳᠡᠯᠡ ᠶᠠᠷᠢᠭᠠᠤᠨ ᠢᠷᠡᠭᠦ ᠳᠤ ᠨᠠᠢ᠌ᠵᠠ ᠶᠢᠨ ᠮᠢᠨᠢ ᠳᠠᠭᠤ ᠬᠤᠭᠤᠯᠠᠢ ᠰᠥᠭᠡᠩᠭᠡᠢ᠌ᠳᠦᠭ᠍ᠰᠡᠨ ᠪᠠᠢ᠌ᠪᠠ᠃ ᠨᠢᠳᠤᠨ ᠵᠤᠪᠭᠢᠨ ᠳᠤ ᠨᠢ ᠪᠦᠷ ᠨᠢᠯᠪᠣᠰᠤ ᠭᠡᠷᠡᠯᠳᠦᠴᠢᠭᠡᠭ᠍ᠰᠡᠨ ᠪᠠᠢ᠌ᠪᠠ᠃ ᠰᠠᠤᠠᠭᠢᠯ ᠤᠨ ᠥᠭᠡ ᠶᠢ ᠨᠢ ᠰᠤᠨᠤᠰᠴᠤ ᠰᠠᠨᠠᠭᠠ ᠮᠢᠨᠢ ᠳᠠᠩᠴᠤ ᠣᠶᠠᠷᠠᠪᠠ᠃ ᠰᠠᠷᠬᠤᠤᠨ ᠠᠷᠢᠭᠢ ᠶᠢ ᠨᠢ ᠰᠢᠮᠠᠵᠤ ᠥᠷᠭᠦᠯᠵᠢᠯᠡᠨ ᠶᠠᠷᠢᠬᠤ ᠶᠢ ᠨᠢ ᠰᠤᠨᠤᠰᠤᠯᠠ᠃
《ᠡᠨ ᠴᠡᠭᠡᠭᠡᠤᠨ᠂ ᠠᠮᠢᠳᠤᠷᠠᠯ ᠭᠡᠵᠤ ᠠᠶᠤᠮᠠᠷ ᠵᠤᠪᠠᠯᠠᠩ ᠲᠡᠶ ᠶᠤᠮ ᠡ᠂ ᠠᠪᠣᠭᠰᠠᠨ ᠡᠭᠡᠨᠡᠷ ᠲᠡᠭᠡᠨ ᠵᠦᠪ ᠦᠭᠡᠶ ᠪᠣᠯ ᠠᠷᠭᠠ ᠦᠭᠡᠶ ᠵᠤᠪᠠᠳᠠᠭ ᠶᠤᠮ ᠪᠠᠢ᠌ᠨᠠ᠃》 ᠭᠡᠵᠤ ᠶᠠᠷᠢᠬᠤ ᠳᠤ ᠨᠥᠭᠦᠷ ᠤᠨ ᠮᠢᠨᠢ ᠨᠢᠯᠪᠣᠰᠤ ᠴᠤᠪᠣᠷᠠᠴᠢᠬᠠᠭᠰᠠᠨ ᠪᠠᠢ᠌ᠯᠠ᠃ ᠬᠤᠠᠳᠠᠭᠠ ᠲᠡᠶ ᠠᠷᠢᠭᠢᠨ ᠳᠤ ᠨᠢ ᠳᠤᠰᠤᠯᠠᠴᠢᠬᠠᠭᠰᠠᠨ ᠪᠠᠢ᠌ᠯᠠ᠃ ᠨᠢᠯᠪᠣᠰᠤ ᠲᠡᠶ ᠠᠷᠢᠭᠢ ᠪᠠᠨ ᠨᠠᠳᠠ ᠲᠡᠶ ᠮᠥᠷᠭᠦᠭᠦᠯᠵᠤ ᠦᠪᠡᠷ ᠶᠢᠡᠨ ᠭᠦᠴᠦᠳᠡᠢ ᠨᠢᠭᠡ ᠭᠦᠡᠳᠡᠷᠡᠭ᠍ᠰᠡᠨ ᠶᠢᠡᠨ ᠵᠠᠯᠭᠠᠵᠤ᠄
《ᠴᠠᠯᠢᠩ ᠭᠦᠯᠦᠰᠤ ᠴᠤ ᠨᠡᠮᠡᠭ᠍ᠳᠡᠯᠡ᠂ ᠴᠠᠭ ᠲᠠᠭᠠᠨ ᠥᠭ᠍ᠳᠡᠭ᠌ ᠴᠤ ᠪᠣᠯᠤᠯᠠ᠃ ᠭᠡᠳᠡᠯᠡ ᠡᠳ᠋ ᠳᠠᠸᠠᠷ᠂ ᠢᠳᠠᠰᠢ ᠨᠤᠭᠤᠭᠠ ᠶᠢᠨ ᠦᠨᠡ ᠬᠠᠩᠰᠢ ᠪᠠᠰᠠ ᠳᠠᠭᠢᠨ ᠶᠢᠡᠷ ᠥᠰᠴᠢᠭᠡᠯᠡ᠃ ᠢᠯᠠᠩᠭ᠋ᠤᠶᠠ ᠭᠡᠷ ᠪᠠᠢ᠌ᠰᠢᠩ ᠤᠨ ᠦᠨᠡ ᠥᠰᠦᠭᠡᠤᠨ᠂ ᠳᠡᠩᠭᠡᠭᠡ ᠪᠠᠨ ᠪᠠᠷᠠᠭᠰᠠᠨ ᠪᠢᠳᠠᠨᠤᠰ ᠲᠤ ᠳᠠᠷᠠ ᠬᠤᠯᠠ ᠳᠡᠭ᠍ᠷᠢ ᠣᠢ᠌ᠷᠠ ᠭᠡᠰᠡᠨ ᠰᠢᠭ᠌ ᠶᠠᠭᠤᠮᠠ ᠪᠣᠯᠴᠢᠬᠠᠯᠠ᠃ ᠵᠠ ᠶᠠᠭᠠᠭᠢᠬᠤᠪ᠂ ᠠᠢ᠌ᠯ ᠭᠡᠷ ᠭᠡᠭ᠍ᠴᠢ ᠶᠠᠭᠤᠨ ᠤ ᠣᠷᠢᠳᠠ ᠭᠡᠷ ᠣᠷᠤᠨ ᠶᠢᠡᠨ ᠳᠤᠪᠭᠢᠨᠠᠭᠤᠯᠬᠤ ᠴᠢᠬᠤᠯᠠ ᠲᠡᠶ᠃ ᠨᠠᠳᠠ ᠰᠢᠭ ᠬᠤᠶᠠᠷ ᠭᠠᠵᠠᠷ ᠭᠡᠷ ᠳᠦᠷᠢᠶᠠᠰᠤᠯᠠᠵᠤ ᠰᠠᠭᠤᠭᠠᠤᠨ ᠪᠠᠢ᠌ᠵᠤ ᠪᠣᠯᠬᠤ ᠦᠭᠡᠶ ᠯᠠ ᠪᠢᠵᠠ᠃ ᠠᠪᠣ ᠡᠵᠢ ᠶᠢᠨ ᠳᠡᠮᠵᠢᠯᠭᠡ ᠪᠠᠷ ᠦᠨᠦ ᠵᠢᠯ ᠠᠷᠪᠠᠨ ᠭᠡᠳᠤᠨ ᠲᠦᠮᠡᠨ ᠳᠦᠭᠦᠷᠢᠭ᠌ ᠤᠨ ᠠᠰᠠᠷ ᠵᠠᠭᠢᠶᠠᠯᠠᠪᠠ᠃ ᠦᠪᠡᠷ ᠶᠢᠡᠨ ᠪᠠᠰᠠ ᠵᠤᠭᠤᠰ ᠵᠢᠭᠡᠯᠡᠯᠡ᠂ ᠵᠢᠭᠡᠯᠡᠭ᠍ᠰᠡᠨ ᠵᠤᠭᠤᠰ ᠤᠨ ᠣᠷᠤᠨ ᠳᠤ ᠴᠠᠯᠢᠩ ᠤᠨ ᠺᠠᠷᠲ᠋ ᠪᠠᠨ ᠳᠠᠷᠤᠯᠠ᠃ ᠵᠠ ᠳᠡᠭᠡᠭᠡᠤᠨ ᠵᠢᠯ ᠰᠢᠬᠠᠮ ᠴᠠᠯᠢᠩ ᠤᠨ ᠪᠠᠷᠠ ᠬᠠᠷᠠᠭᠰᠠᠨ ᠦᠭᠡᠶ᠃ ᠦᠪᠡᠷ ᠶᠢᠡᠨ ᠪᠠᠰᠠ ᠳᠠᠮᠠᠭᠢ ᠳᠠᠳᠠᠨᠠ᠂ ᠥᠷᠦᠭᠡᠯ ᠡᠴᠡ ᠨᠢᠭᠤᠵᠤ ᠬᠠᠮᠤᠭ ᠤᠨ ᠭᠢᠮᠳᠠ ᠳᠠᠮᠠᠭᠢ ᠶᠢ ᠠᠪᠴᠤ ᠳᠠᠳᠠᠳᠠᠭ ᠪᠣᠯᠤᠯᠠ᠃ ᠭᠠᠷ ᠣᠳᠠᠰᠤᠨ ᠳᠤ ᠰᠥᠢᠦᠡᠭᠡᠯ ᠳᠤᠰᠢᠶᠠᠨᠠ᠂ ᠮᠤᠲ᠋ᠤᠷ ᠳᠡᠷᠭᠡᠨ ᠳᠤ ᠳᠤᠰᠤ ᠨᠠᠮᠠᠨᠡ᠃ ᠠᠢ᠌ᠯ ᠭᠡᠷ ᠤᠨ ᠪᠠᠭᠠ ᠪᠠᠭᠤᠷᠠᠢ ᠵᠠᠷᠤᠯᠭᠠ ᠪᠠᠰᠠ ᠭᠠᠷᠤᠭᠠᠤᠨ ᠢᠷᠡᠴᠢᠭᠡᠨᠡ᠃ ᠡᠨᠡ ᠠᠢ᠌ᠯ ᠤᠨ ᠬᠤᠷᠢᠮ᠂ ᠳᠠᠷᠠ ᠠᠢ᠌ᠯ ᠤᠨ ᠭᠡᠦᠭᠡᠤᠨ ᠤᠨ ᠨᠠᠢ᠌ᠷ ᠭᠡᠤᠨ ᠣᠷᠢᠯᠭᠠ ᠵᠠᠯᠠᠯᠭᠠ ᠪᠠᠰᠠ ᠳᠠᠰᠤᠷᠠᠬᠤ ᠦᠭᠡᠶ᠃ ᠳᠡᠭᠡᠷᠡ ᠡᠴᠡ ᠪᠠᠰᠠ ᠭᠡᠨᠡᠳᠲᠡ ᠭᠡᠨᠡᠳᠲᠡ ᠰᠢᠯᠭᠠᠯᠳᠠ ᠡᠨᠡ ᠳᠠᠷᠠ ᠭᠡᠤᠨ ᠵᠤᠭᠤᠰ ᠬᠤᠷᠢᠶᠠᠨᠠ᠃ ᠢᠩᠭᠢᠭᠦ ᠳᠤ ᠪᠢ ᠡ᠊ᠨᠳᠡ ᠳᠠᠠᠳᠠ ᠡᠴᠡ ᠵᠤᠭᠤᠰ ᠵᠤᠭᠠ ᠠᠷᠭᠠᠯᠠᠵᠤ ᠡᠪᠯᠡᠭᠦᠯᠤᠨᠡ᠃ ᠴᠤᠬᠤᠮ ᠵᠡᠭᠦᠨ ᠭᠡᠷᠡᠮ ᠶᠢᠡᠨ ᠪᠠᠭᠤᠯᠭᠠᠵᠤ ᠪᠠᠷᠠᠭᠤᠨ ᠭᠡᠷᠡᠮ ᠶᠢᠡᠨ ᠪᠣᠰᠬᠠᠵᠤ ᠶᠠᠪᠣᠯᠠ ᠰᠢᠤ᠁》
ᠡᠨᠡ ᠨᠥᠭᠦᠷ ᠤᠨ ᠣᠶᠠᠷᠠᠯᠳᠠᠢ ᠥᠭᠡᠨ ᠳᠤ ᠮᠢᠨᠤ ᠨᠢᠯᠪᠣᠰᠤ ᠴᠤ ᠮᠡᠯᠳᠡᠷᠡᠴᠢᠭᠡᠯᠡ᠃ ᠦᠨᠡᠨ ᠶᠢᠡᠨ ᠳᠤᠭᠠᠴᠠᠭᠰᠠᠨ ᠥᠭᠡᠰ ᠤᠳ ᠨᠢ ᠨᠠᠳᠠ ᠥᠯᠢᠭᠡᠷ ᠶᠤᠮᠰᠢᠭ ᠰᠠᠨᠠᠭᠳᠠᠯᠠ᠃ ᠦᠵᠡᠵᠤ ᠪᠠᠢ᠌ᠳᠠᠯᠠ ᠠᠷᠢᠭᠢᠨ ᠯᠤᠩᠬᠤ ᠬᠤᠭᠤᠰᠤᠷᠠᠵᠤ ᠪᠠᠰᠠ ᠨᠢᠭᠡ ᠶᠢ ᠵᠠᠳᠠᠯᠤᠯᠠ᠃ ᠦᠶᠡ ᠶᠢᠨ ᠨᠠᠢ᠌ᠵᠠ ᠶᠢᠨ ᠦᠪᠡᠷ ᠤᠨ ᠵᠤᠪᠠᠯᠠᠩ ᠶᠢᠡᠨ ᠥᠷᠭᠦᠯᠵᠢᠯᠡᠨ ᠳᠤᠭᠠᠴᠠᠬᠤ ᠶᠢ ᠰᠤᠨᠤᠰᠤᠯᠠ᠃
《ᠣᠳᠤ ᠭᠡᠳᠥᠢᠪᠠᠷ ᠠᠰᠠᠷ ᠵᠠᠭᠢᠶᠠᠯᠠᠭᠰᠠᠨ ᠴᠤ ᠵᠠᠰᠠᠵᠤ ᠴᠢᠮᠡᠭᠡ ᠦᠭᠡᠶ᠃ ᠪᠢᠳᠠ ᠮᠦᠨ ᠬᠤᠶᠠᠷ ᠭᠠᠵᠠᠷ ᠭᠡᠷ ᠳᠦᠷᠢᠶᠠᠰᠤᠯᠠᠵᠤ ᠣᠷᠤᠩᠨᠠᠨᠠ᠃ ᠳᠦᠷᠢᠶᠠᠰᠤᠨ ᠭᠡᠷ ᠤᠨ ᠮᠥᠩᠭᠦ ᠶᠢ ᠪᠠᠰᠠ ᠠᠷᠭᠠᠯᠠᠵᠤ ᠦᠭᠭᠦ ᠴᠢᠬᠤᠯᠠ ᠲᠡᠶ᠃ ᠠᠰᠠᠷ ᠠᠪᠣᠭᠰᠠᠨ ᠵᠤᠭᠤᠰ ᠪᠠᠰᠠ ᠳᠤᠳᠠᠴᠢᠬᠠᠯᠠ ᠭᠡᠤᠨ ᠣᠳᠠᠰᠤ ᠢᠷᠠᠨᠡ᠃ ᠡᠭᠡᠨᠡᠷ ᠪᠠᠰᠠ ᠨᠠᠳᠠ ᠶᠢ ᠵᠤᠭᠤᠰ ᠣᠯᠵᠤ ᠥᠭ᠌ ᠭᠡᠤᠨ ᠰᠢᠬᠠᠮᠳᠠᠭᠤᠯᠤᠨᠠ᠃ ᠡᠭᠡᠨᠡᠷ ᠮᠢᠨᠢ ᠣᠳᠤ ᠳᠡᠭᠡᠷᠡ ᠶᠠᠮᠠᠷᠴᠤ ᠠᠵᠢᠯ ᠭᠢᠵᠤ ᠦᠭᠡᠶ᠂ ᠲᠡᠭᠡᠬᠦᠯᠡᠷ ᠪᠢ ᠪᠦᠰᠡᠭᠦᠢ ᠪᠠᠨ ᠪᠠᠭᠠ ᠰᠠᠭᠠ ᠠᠵᠢᠯ ᠣᠯᠤᠭᠠᠤᠨ ᠭᠢᠴᠢᠭᠡ᠂ ᠰᠠᠷᠠ ᠶᠢᠨ ᠳᠠᠪᠣ ᠭᠤᠷᠪᠠᠨ ᠵᠠᠭᠤ ᠴᠤ ᠪᠣᠯᠤᠭ᠂ ᠦᠪᠡᠷ ᠤᠨ ᠰᠤᠯᠠ ᠵᠠᠷᠤᠬᠤ ᠵᠤᠭᠤᠰ ᠶᠢᠡᠨ ᠠᠷᠭᠠᠯᠠᠵᠤ ᠪᠠᠢ ᠭᠡᠵᠤ ᠰᠠᠨᠠᠭᠤᠯᠤᠭᠰᠠᠨ ᠶᠤᠮ᠃ ᠮᠢᠨᠤ ᠬᠠᠵᠠᠭᠤ ᠳᠤ ᠮᠠᠵᠢᠶᠠᠩ ᠤᠨ ᠫᠦᠰᠡ ᠨᠡᠭᠡᠭᠡᠨᠡ ᠭᠡᠵᠤ ᠪᠠᠢ᠌ᠭᠰᠠᠨ ᠢ ᠨᠢ ᠪᠢ ᠵᠥᠪᠰᠢᠶᠡᠷᠡᠭ᠍ᠰᠡᠨ ᠦᠭᠡᠶ᠃ ᠳᠡᠭᠡᠭᠡᠤᠨ ᠬᠤᠰᠢᠭᠤ ᠲᠦᠪ ᠣᠷᠤᠵᠤ ᠠᠵᠢᠯ ᠣᠯᠵᠤ ᠭᠢᠨᠡ ᠭᠡᠤᠨ ᠭᠠᠷᠤᠭᠰᠠᠨ ᠶᠤᠮ᠃ ᠭᠡᠳᠤ ᠬᠤᠨᠤᠭ ᠤᠨ ᠳᠠᠷᠠᠭᠠ ᠨᠢ ᠳ᠋ᠦᠩᠱᠸᠩ ᠳᠤ ᠪᠠᠢ᠌ᠨᠠ ᠭᠡᠵᠤ ᠪᠠᠢ᠌ᠯᠠ᠃ ᠰᠡᠭᠦᠯᠳᠡᠵᠤ ᠢᠷᠡᠭᠡᠤᠨ ᠪᠢᠳᠠᠨ ᠤ ᠣᠳᠠᠰᠤ ᠪᠦᠷ ᠨᠡᠪᠳᠡᠷᠡᠭᠦ ᠪᠠᠨ ᠪᠣᠯᠢᠭᠰᠠᠨ᠃ ᠴᠤᠬᠤᠮ ᠶᠠᠭᠤ ᠭᠢᠵᠤ ᠶᠠᠭᠠᠭᠢᠵᠤ ᠪᠠᠢ᠌ᠭᠠ ᠪᠣᠯ ᠭᠡᠵᠤ ᠰᠠᠨᠠᠭᠠᠰᠢᠷᠠᠨ ᠭᠠᠷ ᠣᠳᠠᠰᠤ ᠪᠠᠷ ᠮᠡᠳᠡᠭᠡ ᠣᠯᠠᠠᠳᠠ ᠶᠠᠪᠣᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠢᠭᠤ ᠰᠤᠷᠠᠭ ᠦᠭᠡᠶ᠃ ᠰᠠᠷᠠ ᠶᠢᠨ ᠳᠠᠷᠠᠭᠠ ᠰᠤᠷᠠᠭ ᠢ ᠨᠢ ᠰᠤᠨᠤᠰᠬᠤ ᠳᠤ ᠳᠠᠭᠤᠤ ᠶᠢᠨ ᠳᠢᠩᠭᠢᠮ᠂ ᠠᠷᠢᠭᠢᠨ ᠮᠤᠬᠤᠯᠠᠭ ᠶᠢᠡᠷ ᠭᠡᠰᠦᠵᠤ ᠵᠤᠭᠤᠰ ᠣᠯᠳᠠᠭ ᠭᠡᠨᠡ᠃ ᠨᠠᠷᠠ ᠨᠢ ᠴᠤ ᠣᠯᠠᠨ ᠶᠠᠩᠵᠤ ᠪᠠᠷ ᠬᠤᠪᠢᠷᠠᠭᠰᠠᠨ ᠪᠠᠢ᠌ᠨᠠ᠃ ᠳᠠᠨᠢᠵᠤ ᠮᠡᠳᠡᠭᠦ ᠦᠭᠡᠶ ᠵᠠᠯᠠᠭᠤᠰ ᠴᠤ ᠳᠠᠭᠢᠨ ᠳᠠᠭᠢᠨ ᠣᠳᠠᠰᠤ ᠢᠷᠠᠵᠤ ᠳᠠᠭᠤᠳᠠᠭᠠᠤᠨ ᠪᠠᠢ᠌ᠳᠠᠭ ᠢ ᠨᠢ ᠮᠠᠳᠠᠯᠠ᠃ ᠣᠵᠠᠭᠤᠷ ᠤᠨ ᠬᠠᠨᠢᠯᠠᠭᠰᠠᠨ ᠵᠠᠯᠠᠭᠤ ᠲᠡᠶ ᠪᠠᠨ ᠴᠤ ᠥᠷᠭᠦᠯᠵᠢ ᠬᠠᠷᠢᠴᠠᠳᠠᠭ ᠢ ᠨᠢ ᠮᠠᠳᠠᠯᠠ᠁ ᠡᠳᠡᠭᠡᠷ ᠣᠯᠠᠨ ᠢ ᠮᠡᠳᠡᠭᠡᠤᠨ ᠪᠢ ᠡᠭᠡᠨᠡᠷ ᠲᠡᠭᠡᠨ ᠰᠥᠷᠡᠭᠡᠢ ᠭᠤᠮᠤᠳᠠᠯᠠ᠂ ᠡᠯᠢᠭᠡ ᠵᠢᠷᠦᠭᠡ ᠮᠢᠨᠢ ᠡᠮᠭᠡᠨᠢᠵᠤ ᠵᠤᠪᠠᠯᠠᠩ ᠤᠨ ᠳᠤᠮᠳᠠ ᠰᠢᠨᠠᠯᠠᠵᠤ ᠪᠠᠢ᠌ᠨᠠ᠃ ᠬᠠᠳᠠᠮ ᠤᠨ ᠭᠡᠷ ᠲᠤ ᠣᠳᠠᠰᠤᠳᠠᠵᠤ ᠬᠠᠮᠤᠭ ᠣᠴᠢᠷ ᠢ ᠮᠡᠳᠡᠭ᠍ᠳᠡᠭ᠍ᠰᠡᠨ ᠶᠤᠮ᠂ ᠬᠠᠨᠢᠯᠠᠬᠤ ᠶᠢᠨ ᠵᠠᠶᠠᠭᠠ ᠦᠭᠡᠶ ᠶᠤᠮ ᠪᠣᠯ ᠰᠠᠯᠵᠤ ᠠᠮᠠᠷᠠᠬᠤ ᠯᠠ ᠶᠤᠮ ᠪᠠ ᠁》
ᠨᠠᠢ᠌ᠵᠠ ᠮᠠᠨᠢ ᠵᠤᠪᠠᠯᠠᠩ ᠶᠢᠡᠨ ᠨᠠᠳᠠ ᠳᠤ ᠨᠠᠷᠢᠨ ᠳᠤᠭᠠᠴᠠᠭᠠᠤᠨ ᠪᠠᠷᠠᠬᠤ ᠳᠤ ᠬᠤᠶᠠᠷ ᠨᠢᠳᠤ ᠨᠢ ᠣᠯᠠᠢ᠌ᠭᠠᠤᠨ ᠡᠭᠡᠷ ᠳᠠᠳᠠᠴᠢᠬᠠᠭᠰᠠᠨ ᠪᠠᠢ᠌ᠪᠠ᠃ ᠬᠤᠶᠠᠷ ᠫᠢᠯᠠ ᠨᠤᠭᠤᠭᠠ ᠬᠤᠭᠤᠰᠤᠷᠠᠬᠤ ᠵᠥᠭ᠌ ᠲᠡᠭᠡᠨ ᠬᠠᠠᠳᠤᠵᠤ᠂ ᠬᠤᠶᠠᠷ ᠯᠤᠩᠬᠤ ᠠᠷᠢᠭᠢ ᠬᠤᠷᠤᠭᠤ ᠥᠯᠡᠳᠡᠭᠡᠤᠨ ᠪᠠᠢ᠌ᠪᠠ᠃ ᠬᠤᠶᠠᠷ ᠰᠤᠭᠳᠤᠭᠤ ᠴᠢᠷᠦᠯᠴᠡᠭᠡᠤᠨ ᠬᠤᠭᠤᠯᠠᠨ ᠭᠡᠷ ᠡᠴᠡ ᠭᠠᠷᠬᠤ ᠳᠤ ᠬᠤᠯᠠ ᠶᠢᠨ ᠳᠡᠭ᠍ᠷᠢ ᠶᠢᠨ ᠣᠳᠤᠳ ᠯᠠ ᠪᠢᠳᠠᠨ ᠢ ᠪᠠᠰᠤᠭᠰᠠᠨ ᠰᠢᠭ ᠠᠨᠢᠪᠠᠯᠵᠠᠨᠠ᠃
ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶᠢᠭ ᠄ ᠣᠷᠳᠤᠰ ᠬᠤᠳᠠ ᠶᠢᠨ ᠬᠠᠩᠭᠢᠨ ᠬᠤᠰᠢᠭᠤᠨ ᠤ ᠭᠦᠭᠡᠮᠦᠳᠤ ᠰᠤᠷᠭᠠᠭᠤᠯᠢ
ᠵᠤᠬᠢᠶᠠᠭᠴᠢ᠄ ᠰᠤ᠋·ᠦᠨᠡᠨᠴᠢ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠨᠠᠢᠷᠠᠭᠤᠯᠤᠯᠳᠠᠷᠤᠮ᠄ 6163
ᠴᠠᠭ᠄ 2010 ᠤᠨ ᠤ 01 ᠰᠠᠷᠠ ᠶᠢᠨ 04
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ