ᠭᠦᠢ ᠶᠢᠨ ᠴᠢᠰᠤ ᠪᠠᠨ ᠳᠤᠰᠤᠭᠠᠭᠰᠠᠨ

ᠭᠦᠯ ᠤᠨ ᠣᠯᠠ ᠪᠠᠨ ᠰᠢᠷᠣᠢ᠌ᠳᠠᠭᠤᠯᠤᠭᠰᠠᠨ

ᠳᠤᠭᠤᠷᠠᠢ ᠤᠨ ᠣᠷᠤᠮ ᠶᠢᠡᠷ ᠥᠨᠦᠰᠦᠭᠦᠯᠦᠭ᠍ᠰᠡᠨ

ᠳᠤᠨᠤᠳᠠᠰᠤᠨ ᠤ ᠨᠢᠯᠪᠣᠰᠤ ᠪᠠᠷ ᠠᠷᠭᠠᠳᠠᠭᠤᠯᠤᠭᠰᠠᠨ

ᠨᠤᠳᠤᠭ ᠤᠨ ᠮᠢᠨᠢ ᠰᠢᠷᠤᠢ

ᠰᠢᠷᠭᠠᠯ ᠨᠠᠷᠠᠨ ᠤ ᠢᠯᠴᠢ ᠰᠢᠩᠭᠡᠰᠦᠳᠡᠢ

ᠰᠢᠯᠡᠭᠡᠭ᠍ᠰᠡᠨ ᠭᠦᠯᠦᠰᠤᠨ ᠤ ᠦᠨᠦᠷ ᠬᠠᠩᠬᠤᠯᠠᠭᠠᠰᠤᠳᠠᠢ

ᠣᠯᠠᠷᠢᠯ ᠤᠨ ᠳᠦᠷᠪᠠᠨ ᠠᠭᠠᠯᠢ ᠡᠭᠡᠯᠵᠢᠯᠡᠭᠡᠰᠦᠳᠡᠢ

ᠣᠳᠤᠮ ᠳᠠᠮᠵᠢᠭᠰᠠᠨ ᠪᠠᠭᠤᠷᠢ ᠳᠠᠮᠠᠭᠠᠯᠠᠭᠠᠰᠤᠳᠠᠢ

ᠨᠤᠳᠤᠭ ᠤᠨ ᠮᠢᠨᠢ ᠰᠢᠷᠤᠢ

ᠠᠷᠭᠠᠰᠤᠨ ᠤ ᠦᠨᠡᠰᠤ ᠰᠢᠭ᠌ ᠪᠣᠳᠠᠷᠠᠭ᠎ᠠ ᠦᠭᠡᠶ

ᠠᠶᠠᠨ ᠤ ᠳᠤᠭᠤᠰᠤ ᠰᠢᠭ ᠵᠠᠮᠬᠠᠷᠠᠭ᠎ᠠ ᠦᠭᠡᠶ

ᠠᠯᠠᠭ ᠴᠡᠴᠡᠭᠡᠰ ᠶᠢᠡᠨ ᠊ᠭ᠍‍ᠬᠢᠷᠳᠦᠭᠡ ᠦᠭᠡᠶ

ᠠᠶᠠᠷᠬᠠᠨ ᠨᠡᠭᠦᠳᠡᠯᠯᠡᠵᠤ ᠡᠯᠡᠰᠦᠷᠡᠭᠡ ᠦᠭᠡᠶ

ᠨᠤᠳᠤᠭ ᠤᠨ ᠮᠢᠨᠢ ᠰᠢᠷᠤᠢ

ᠰᠦᠷᠦᠭ᠌ ᠤᠨ ᠳᠤᠯᠠᠭᠠᠨ ᠭᠡᠪᠳᠡᠷᠢ ᠲᠡᠶ

ᠰᠥᠮᠡᠢ᠌ᠭᠦ ᠵᠡᠷᠭᠡᠯᠭᠡᠨ ᠤ ᠬᠤᠨᠢᠶᠠᠰᠤ ᠲᠡᠶ

ᠰᠦᠷᠯᠢᠭ᠌ ᠠᠭᠤᠯᠠ ᠶᠢᠨ ᠨᠦᠮᠦᠷᠢ ᠲᠡᠶ

ᠰᠦᠯᠳᠡ ᠵᠢᠷᠤᠮ ᠤᠨ ᠵᠠᠭᠢᠶᠠᠰᠤ ᠲᠡᠶ

ᠨᠤᠳᠤᠭ ᠤᠨ ᠮᠢᠨᠢ ᠰᠢᠷᠤᠢ

ᠠᠰᠢᠳᠠ ᠣᠷᠤᠰᠢᠬᠤ ᠶᠢᠨ ᠢᠷᠦᠭᠡᠯ ᠲᠡᠶ᠃

ᠠᠵᠠ ᠵᠢᠷᠭᠠᠯ ᠤᠨ ᠵᠦᠩᠨᠠᠯ ᠲᠡᠶ

ᠠᠮᠢᠨ ᠵᠢᠷᠦᠭᠡᠨ ᠤ ᠬᠤᠯᠪᠣᠭ᠎ᠠ ᠲᠡᠶ

ᠠᠷᠪᠠᠨ ᠴᠠᠭᠠᠨ ᠤ ᠳᠠᠮᠪᠠᠷᠠᠯ ᠲᠡᠶ

ᠨᠤᠳᠤᠭ ᠤᠨ ᠮᠢᠨᠢ ᠰᠢᠷᠤᠢ

ᠰᠢᠭᠤᠷᠭᠠᠨ ᠳᠤ ᠳᠠᠭᠤᠭᠳᠠᠵᠤ ᠭᠡᠢ᠌ᠰᠦᠭᠡ ᠦᠭᠡᠶ

ᠰᠢᠭᠦᠳᠡᠷᠢ ᠪᠠᠨ ᠭᠤᠳᠤᠭᠠᠵᠤ ᠭᠠᠩᠳᠠᠭ᠎ᠠ ᠦᠭᠡᠶ

ᠳᠡᠷᠯᠢᠭ᠌ ᠳ᠋ᠤᠨᠢ ᠰᠢᠷᠠᠯᠳᠤᠵᠤ ᠨᠠᠭᠠᠯᠳᠤᠭ᠎ᠠ ᠦᠭᠡᠶ

ᠳᠠᠷᠰᠠᠯᠠᠵᠤ ᠨᠤᠳᠤᠭ ᠡᠴᠡ ᠪᠠᠨ ᠣᠷᠪᠠᠭ᠎ᠠ ᠦᠭᠡᠶ

ᠨᠤᠳᠤᠭ ᠤᠨ ᠮᠢᠨᠢ ᠰᠢᠷᠤᠢ

ᠡᠮᠨᠢᠭ᠌ ᠨᠢ ᠳᠤᠭᠤᠯᠠᠬᠤ ᠳᠤ ᠭᠤᠮᠤᠳᠠᠭ᠎ᠠ ᠦᠭᠡᠶ

ᠡᠷᠴᠢ ᠪᠠᠨ ᠰᠢᠯᠭᠠᠬᠤ ᠳᠤ ᠵᠠᠭᠤᠨᠠᠷᠠᠭ᠎ᠠ ᠦᠭᠡᠶ

ᠥᠩᠭᠡ ᠦᠵᠡᠮᠵᠢ ᠨᠢ ᠬᠤᠭᠤᠴᠢᠷᠠᠭ ᠦᠭᠡᠶ

ᠦᠩ ᠰᠢᠮᠯᠢᠭ᠌ ᠶᠢᠡᠨ ᠠᠯᠳᠠᠭ᠎ᠠ ᠦᠭᠡᠶ

ᠨᠤᠳᠤᠭ ᠤᠨ ᠮᠢᠨᠢ ᠰᠢᠷᠤᠢ

ᠨᠡᠭᠦᠳᠡᠯ ᠤᠨ ᠮᠦᠷ ᠨᠢ ᠪᠠᠯᠠᠷᠠᠭ᠎ᠠ ᠦᠭᠡᠶ

ᠨᠢᠴᠦᠭᠦᠷᠡᠵᠤ ᠬᠠᠯᠴᠠᠭᠠᠢ᠌ᠷᠠᠭᠠᠤᠨ ᠡᠮᠵᠢᠭ᠍ᠯᠡᠭᠡ ᠦᠭᠡᠶ

ᠣᠳᠤᠮ ᠶᠢᠡᠨ ᠮᠠᠷᠳᠠᠵᠤ ᠪᠢᠯᠳᠠᠤᠴᠢᠯᠠᠭ᠎ᠠ ᠦᠭᠡᠶ

ᠣᠷᠭᠤᠮᠠᠯ ᠨᠢ ᠦᠨᠳᠦᠰᠦ ᠳᠠᠰᠤᠷᠠᠭ᠎ᠠ ᠦᠭᠡᠶ

ᠨᠤᠳᠤᠭ ᠤᠨ ᠮᠢᠨᠢ ᠰᠢᠷᠤᠢ

ᠮᠤᠩᠭ᠋ᠤᠯ ᠭᠤᠯᠤᠮᠳᠠ ᠶᠢᠨ ᠭᠡᠷᠢᠶᠡᠰ ᠥᠪᠯᠡᠭᠡᠰᠦᠳᠡᠢ

ᠮᠤᠷᠢᠳᠠᠨ ᠵᠠᠶᠠᠭᠠᠨ ᠤ ᠳᠠᠪᠢᠯᠠᠩ ᠳᠡᠭᠡᠳᠦᠯᠡᠭᠡᠰᠦᠳᠡᠢ

ᠡᠯᠦᠡᠴᠡ ᠳᠡᠭᠡᠳᠦᠰ ᠤᠨ ᠰᠦᠨᠠᠰᠤ ᠣᠷᠤᠰᠢᠭᠠᠰᠤᠳᠠᠢ

ᠡᠷᠳᠡ ᠣᠷᠢᠳᠠ ᠶᠢᠨ ᠳᠤᠮᠤᠭ ᠰᠢᠪᠠᠨᠡᠭᠡᠰᠦᠳᠡᠢ

ᠨᠤᠳᠤᠭ ᠤᠨ ᠮᠢᠨᠢ ᠰᠢᠷᠤᠢ

ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶ‍ᠢᠭ᠄ ᠪᠠᠶᠠᠠᠭᠤᠤᠯ ᠵᠸᠤ ᠶᠢᠨ ᠾᠸᠵᠢᠩ ᠰᠢᠶᠠᠨ