☆ ᠳ᠋·ᠲᠦᠮᠡᠠᠰᠠᠩ
ᠬᠠᠪᠣᠷ ᠤᠨ ᠭᠠᠯᠠᠭᠤ
ᠨᠠᠢ᠌ᠷᠠᠭ ᠤᠨ ᠴᠡᠩᠭᠡᠷ ᠬᠠᠭᠤᠳᠠᠰᠤᠨ ᠳᠡᠭᠡᠭᠦᠷ ᠴᠢ
ᠰᠢᠯᠦᠭ᠌ ᠤᠨ ᠨᠢᠭᠡᠨ ᠮᠦᠷ ᠮᠠᠳᠤ
ᠥᠩᠭᠡᠷᠡᠨᠡ ᠡ
ᠭᠠᠩᠭ᠋ᠠᠷ ᠭᠤᠩᠭ᠋ᠠᠷ ᠠᠶᠠᠯᠭᠤ
ᠴᠠᠷᠴᠠᠭᠤ ᠭᠦᠷᠦᠰᠤ ᠪᠦᠯᠢᠶᠡᠰᠭᠡᠵᠤ
ᠭᠠᠵᠠᠷ ᠤᠨ ᠰᠢᠮᠠ ᠡᠷᠢᠨ
ᠡᠪᠠᠰᠤᠨ ᠤ ᠦᠨᠳᠦᠰᠦ ᠨᠤᠭᠦᠳ
ᠭᠦᠶᠦᠨᠡ ᠡ
ᠣᠶᠠᠬᠠᠨ ᠬᠤᠩᠭ᠋ᠤᠷ ᠳᠠᠭᠤᠨ ᠶᠢᠡᠷ
ᠠᠭᠤᠯᠠ ᠳᠠᠯᠠ
ᠡᠪᠦᠯ ᠤᠨ ᠵᠡᠭᠦᠳᠤᠨ ᠡᠴᠡ ᠪᠠᠨ ᠰᠠᠷᠠᠵᠤ
ᠣᠷᠭᠤᠬᠤ ᠶᠢᠨ ᠰᠠᠢ᠌ᠬᠠᠨ ᠭᠦᠰᠡᠯ
ᠣᠷᠳᠤ ᠶᠢᠨ ᠨᠢᠭᠡᠨ ᠮᠥᠷᠦᠭᠡᠳᠦᠯ ᠮᠠᠳᠤ
ᠴᠤᠬᠤᠯᠵᠠᠨᠠ ᠡ
ᠬᠤᠨ ᠤ ᠡᠯᠢᠭᠡ ᠦᠨᠦᠰᠤᠨ
ᠰᠠᠯᠭᠢᠨ ᠤ ᠭᠦᠯ ᠪᠣᠭᠵᠤᠷᠠᠵᠤ
ᠵᠠᠯᠠ ᠳᠠᠳᠠᠭᠰᠠᠨ ᠨᠡᠭᠦᠳᠡᠯ ᠤᠨ ᠮᠦᠷ ᠶᠢᠡᠷ
ᠰᠠᠩᠭᠢ ᠳᠠᠳᠠᠭᠰᠠᠨ ᠬᠤᠷᠠ ᠶᠢᠨ ᠠᠮᠢᠰᠬᠤᠯ
ᠣᠢ᠌ᠷᠠᠳᠤᠨᠠ ᠡ
ᠭᠦᠷᠦᠰᠢ ᠦᠭᠡᠶ ᠭᠢᠵᠠᠭᠠᠷ ᠲᠤ ᠳᠡᠭᠦᠯᠢᠭᠦ ᠭᠡᠰᠡᠨ
ᠬᠡᠦᠬᠡᠳ ᠠᠬᠤᠢ ᠶᠢᠨ ᠵᠡᠭᠦᠳᠤ ᠭᠦᠪᠦᠷᠡᠭᠦᠯᠵᠤ
ᠬᠤᠩᠭ᠋ᠤᠷ ᠪᠠᠭᠠ ᠶᠢᠨ ᠳᠤᠷᠭᠠᠨ ᠪᠠᠢ᠌ᠭᠠᠯᠢ ᠳᠤ
ᠬᠤᠷᠤᠮᠬᠠᠨ ᠵᠠᠭᠤᠷᠠ ᠨᠠᠮᠢ᠋ᠢ
ᠪᠣᠴᠠᠭᠠᠨᠠ ᠡ
ᠪᠠᠭᠤᠵᠤ ᠵᠤᠰᠠᠬᠤ ᠪᠠᠨ ᠶᠠᠭᠠᠭᠢᠯᠠ ᠭᠡᠵᠤ
ᠪᠣᠭᠤᠷᠤᠯ ᠡᠵᠢ ᠶᠢᠨ ᠵᠠᠢ᠌ᠷᠳᠠᠢ ᠨᠢᠳᠤ
ᠮᠢᠩᠭ᠋ᠠ ᠮᠢᠩᠭ᠋ᠠᠨ ᠬᠠᠪᠣᠷ ᠢ ᠳᠤᠭᠤᠯᠵᠤ ᠢᠷᠡᠭ᠍ᠰᠡᠨ
ᠮᠢᠨᠤ ᠨᠤᠳᠤᠭ ᠤᠨ ᠦᠨᠦᠴᠢᠨ ᠨᠠᠭᠤᠷ
ᠪᠠᠷᠠ ᠳᠠᠰᠤᠷᠠᠳᠠᠯᠠ ᠴᠢᠨᠢ
ᠮᠠᠯᠮᠠᠷᠠᠨᠠ ᠡ
ᠳᠡᠷᠳᠡᠭᠡ ᠠᠯᠤᠰ ᠡᠴᠡ ᠰᠢᠪᠠᠭᠤᠳ ᠢᠷᠡᠭᠦ ᠪᠠᠷ
ᠳᠦᠷᠪᠡᠨ ᠴᠠᠭ ᠤᠨ ᠨᠡᠭᠦᠳᠡᠯ ᠶᠢᠡᠨ ᠰᠠᠨᠠᠵᠤ
ᠵᠢᠭᠦᠷ ᠲᠡᠶ ᠪᠣᠯᠬᠤ ᠪᠠᠷ ᠴᠢᠯᠦᠭᠡᠳᠡᠢ ᠶᠤᠮ ᠳ᠋ᠠ ᠭᠡᠵᠤ
ᠮᠠᠨ ᠤ ᠠᠢ᠌ᠯ ᠤᠨ ᠮᠠᠯᠴᠢᠨ ᠠᠪᠣ
ᠬᠠᠰᠢᠶᠠᠨ ᠤ ᠪᠠᠨ ᠳᠡᠷᠭᠡᠳᠡ
ᠪᠣᠳᠤᠯᠭᠠᠰᠢᠷᠠᠨᠠ ᠡ
ᠥᠩᠭᠡ ᠨᠢ ᠣᠩᠭ᠋ᠤᠭᠰᠠᠨ ᠬᠠᠭᠤᠴᠢᠨ ᠳᠠᠪᠠᠯ ᠲᠡᠶ ᠴᠤ
ᠥᠷᠭᠡᠨ ᠳᠡᠯᠡᠭᠡᠢ ᠳᠤ ᠬᠠᠨᠠᠭᠠᠷᠬᠠᠨ ᠪᠠᠢ᠌ᠷᠢ ᠲᠡᠶ
ᠮᠤᠳᠤ ᠰᠢᠪᠠᠭᠤᠳ ᠤᠨ ᠳᠤᠤᠯᠢ ᠬᠠᠢ᠌ᠯᠠᠭᠰᠠᠨ
ᠮᠤᠩᠭ᠋ᠤᠯ ᠨᠠᠷᠠ ᠲᠡᠶ ᠰᠥᠷᠯᠢᠭ᠌ ᠠᠭᠤᠯᠠᠰ
ᠬᠠᠪᠣᠷ ᠤᠨ ᠶᠢᠡᠨ ᠵᠡᠷᠭᠡᠯᠭᠡᠨ ᠳᠤ
ᠭᠦᠷᠡᠩᠳᠦᠨᠡ ᠡ
ᠣᠷᠤᠢ ᠳᠡᠭᠡᠭᠦᠷ
ᠣᠨ ᠵᠢᠯ ᠤᠨ ᠣᠷᠤᠰᠬᠠᠯ
ᠭᠢᠯᠠᠯᠵᠠᠨ ᠥᠩᠭᠡᠷᠡᠨᠡ
ᠳᠡᠭ᠍ᠷᠢ ᠶᠢᠨ ᠴᠡᠭᠡᠯ ᠶᠢᠡᠷ
ᠳᠠᠷᠠ ᠬᠤᠯᠠ ᠶᠢᠨ ᠰᠤᠷᠠᠭ
ᠴᠠᠢ᠌ᠯᠵᠠᠨ ᠥᠩᠭᠡᠷᠡᠨᠡ
ᠰᠥ᠋ ᠠᠩᠭᠢᠯᠬᠤ
ᠦᠳᠦᠨ ᠴᠠᠭᠠᠨ ᠳᠤᠷᠠᠳᠬᠠᠯ
ᠭᠡᠢ᠌ᠰᠤᠨ ᠥᠩᠭᠡᠷᠡᠨᠡ
ᠭᠦ ᠠᠷᠢᠯᠬᠤ
ᠠᠭᠤᠵᠢᠮ ᠳᠡᠨᠢᠭᠦᠨ ᠢᠰᠭᠡᠷᠦᠯ
ᠣᠶᠠᠰᠤᠨ ᠥᠩᠭᠡᠷᠡᠨᠡ
ᠳᠤᠷᠭᠠ ᠶᠢᠨ ᠮᠠᠳᠤ ᠭᠦᠨ ᠴᠡᠩᠭᠡᠷ ᠶᠢᠡᠷ
ᠳᠤᠭᠤᠰᠤ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠶ ᠡᠩᠨᠡᠷᠡᠯ
ᠥᠡᠳᠡᠭᠡᠨ ᠴᠠᠭᠠᠨ ᠥᠩᠭᠡᠷᠡᠨᠡ
ᠳᠤᠮᠤᠭ ᠤᠨ ᠮᠠᠳᠤ ᠢᠳᠠ ᠰᠢᠳᠢ ᠪᠠᠷ
ᠳᠤᠭ ᠨᠢ ᠬᠠᠷᠠᠭᠳᠠᠬᠤ ᠦᠭᠡᠶ ᠬᠤᠰᠢᠭᠤᠷᠠᠯ
ᠳᠡᠭ᠍ᠷᠢ ᠶᠢᠨ ᠴᠡᠷᠢᠭ᠌ ᠥᠩᠭᠡᠷᠡᠨᠡ
ᠨᠢᠭᠡᠨ ᠵᠠᠭᠤᠨ ᠤ ᠳᠡᠭᠦᠰᠭᠡᠯ ᠮᠠᠳᠤ ᠥᠩᠭᠡᠷᠡᠨᠡ
ᠨᠢᠭᠤᠴᠠ ᠳᠤᠪᠴᠢᠶᠠᠨ ᠊ᠤ ᠥᠷᠭᠦᠯᠵᠢᠯᠡᠯ ᠮᠠᠳᠤ ᠥᠩᠭᠡᠷᠡᠨᠡ
ᠳᠤᠤᠷᠯᠠᠭᠳᠠᠰᠢ ᠦᠭᠡᠶ ᠡᠷᠭᠡ ᠴᠢᠯᠦᠭᠡ
ᠳᠠᠢ᠌ᠯᠤᠭᠳᠠᠰᠢ ᠦᠭᠡᠶ ᠨᠡᠭᠦᠳᠡᠯ ᠵᠤᠰᠠᠯ
ᠭᠠᠯᠠᠭᠤᠳ ᠥᠩᠭᠡᠷᠡᠨᠡ
ᠭᠠᠭᠴᠠ ᠭᠠᠭᠴᠠ ᠪᠠᠷ ᠪᠢᠰᠢ
ᠰᠥᠷᠦᠭ᠌ ᠰᠥᠷᠦᠭ᠌ ᠶᠢᠡᠷ ᠥᠩᠭᠡᠷᠡᠨᠡ
ᠭᠠᠩᠭ᠋ᠠᠷ ᠭᠤᠩᠭ᠋ᠠᠷ ᠠᠶᠠᠯᠭᠤ ᠨᠢ
ᠵᠢᠷᠦᠭᠡᠨ ᠳᠡᠭᠡᠷᠡ ᠦᠯᠠᠳᠠᠨᠠ ᠡ
ᠨᠠᠢ᠌ᠯᠠᠵᠤ ᠣᠷᠤᠭᠰᠢᠯᠠᠬᠤ ᠨᠢᠭᠡᠳᠦᠯ
ᠳᠦᠭᠡᠷᠢᠵᠤ ᠳᠠᠰᠤᠷᠠᠬᠤ ᠬᠠᠭᠠᠴᠠᠯ
ᠳᠡᠦᠭᠡ ᠶᠢᠨ ᠭᠢᠴᠢᠶᠠᠯ ᠢ
ᠰᠠᠠᠰᠠᠷ ᠲᠤ ᠵᠢᠷᠤᠭᠯᠠᠵᠤ
ᠳᠢᠪ ᠠᠯᠤᠰ ᠢ ᠡᠪᠭᠡᠭ᠍ᠰᠡᠨ ᠭᠦᠯᠦᠭ᠌ ᠤᠨ ᠳᠦᠪᠠᠷᠭᠡᠨ ᠢ
ᠣᠰᠤ ᠠᠭᠠᠷ ᠤᠨ ᠴᠡᠩᠭᠡᠷ ᠳᠤᠯᠭᠢᠶᠠᠨ ᠶᠢᠡᠷ
ᠣᠬᠠᠭᠠᠠᠳᠤ ᠭᠦᠮᠤᠨ ᠤ ᠪᠣᠳᠤᠯ ᠳᠤ
ᠰᠤᠨᠤᠷᠳᠠᠭᠤᠯᠤᠨᠠ ᠡ᠃
ᠵᠤᠬᠢᠶᠠᠭᠴᠢ᠄ ᠳ᠋·ᠲᠦᠮᠡᠠᠰᠠᠩ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 2631
ᠴᠠᠭ᠄ 2008 ᠤᠨ ᠤ 12 ᠰᠠᠷᠠ ᠶᠢᠨ 23
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ