☆ ᠯ·ᠣᠳᠤᠨ
《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠢ ᠡᠯᠡ ᠴᠠᠭ ᠦᠶᠡ ᠶᠢᠨ ᠬᠠᠷᠠᠭᠠᠰᠤ ᠡᠴᠡ ᠠᠪᠤᠨ ᠰᠢᠡᠵᠢᠭᠦ ᠨᠢ
ᠨᠢᠭᠡ ᠄ ᠦᠩ ᠵᠤᠵᠠᠭᠠᠨ ᠰᠤᠶᠤᠯ ᠤᠨ ᠭᠦᠷᠦᠰᠤ ᠰᠢᠷᠤᠢ
ᠲ᠋ᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠠᠷᠠᠤᠨ ᠤᠨ ᠳᠠᠭᠤᠤ 《ᠣᠨᠠᠭᠠᠨ ᠪᠠᠭᠠᠬᠠᠨ ᠭᠡᠭᠡᠷ》 ᠳᠤ 《ᠵᠥᠯᠭᠡᠨ ᠳᠤᠮᠳᠠ ᠪᠠᠨ ᠣᠷᠭᠤᠨᠠ ᠴᠡᠴᠡᠭ᠌ / ᠵᠢᠷᠦᠭᠡᠨ ᠳᠤᠮᠳᠠ ᠪᠠᠨ ᠡᠩᠭᠦᠷᠡᠢ᠌ᠯᠡᠨᠡ ᠡᠵᠢ/ ᠡᠯᠡᠰᠤᠨ ᠳᠤᠮᠳᠠ ᠪᠠᠨ ᠣᠷᠭᠤᠨᠠ ᠴᠡᠴᠡᠭ᠌/ ᠡᠯᠢᠭᠡᠨ ᠳᠤᠮᠳᠠ ᠪᠠᠨ ᠦᠰᠭᠡᠨᠡ ᠡᠵᠢ》 ᠭᠡᠳ ᠳᠠᠭᠤᠯᠠᠳᠠᠭ᠃ ᠡᠪᠠᠰᠤ ᠣᠷᠭᠤᠮᠠᠯ᠂ ᠭᠦᠷᠦᠰᠤ ᠰᠢᠷᠤᠢ᠂ ᠡᠵᠢ ᠦᠷᠡ ᠬᠠᠷᠢᠯᠴᠠᠨ ᠰᠢᠳᠤᠯᠴᠠᠨ ᠠᠭᠤᠰᠤᠯᠴᠠᠨ ᠣᠷᠤᠰᠢᠳᠠᠭ ᠪᠠᠢ᠌ᠭᠠᠯᠢ ᠳᠡᠯᠡᠭᠡᠢ᠂ ᠭᠦᠮᠤᠨ ᠨᠡᠢ᠌ᠭᠡᠮ ᠤᠨ ᠶᠤᠰᠤ ᠶᠢ ᠡ᠊ᠨᠳᠡ ᠡᠪᠳᠡᠢ᠌ᠭᠡᠨ ᠵᠣᠢ᠌ᠷᠯᠠᠨ ᠥᠵᠡᠭᠦᠯᠵᠡᠢ᠃ ᠭᠦᠳᠡᠭᠡ ᠶᠢᠨ ᠪᠣᠷᠤ ᠳᠤᠭᠤᠰᠤᠨ ᠳᠤᠮᠳᠠ ᠭᠡᠭᠡᠷᠡ ᠶᠢᠨ ᠰᠠᠯᠭᠢ ᠪᠠᠷ ᠭᠤᠶᠠᠳᠠᠭᠤᠯᠵᠤ ᠮᠠᠯ᠂ ᠨᠠᠷᠠ᠂ ᠪᠠᠯᠴᠢᠭᠡᠷ ᠭᠤᠷᠪᠠ ᠪᠠᠨ ᠬᠠᠷᠢᠭᠤᠯᠤᠨ ᠶᠠᠪᠣᠭᠠ ᠡᠩ ᠤᠨ ᠠᠷᠠᠤᠨ ᠤᠨ ᠰᠡᠳᠭᠢᠯ ᠣᠶᠤᠨ ᠡᠴᠡ ᠡᠢ᠌ᠮᠦᠷᠭᠦ ᠰᠢᠯᠦᠭᠯᠢᠭ᠌ ᠪᠠᠶᠠᠨ ᠠᠬᠤᠢ᠂ ᠣᠶᠠᠩᠭ᠋ᠠᠯᠠᠭ ᠰᠠᠨᠠᠭᠠ ᠣᠷᠭᠤᠨ ᠭᠠᠷᠴᠤ ᠪᠠᠢ᠌ᠭᠰᠠᠨ ᠢ ᠪᠣᠳᠤᠬᠤ ᠳᠤ ᠭᠠᠢ᠌ᠬᠠᠨ ᠪᠢᠰᠢᠷᠠᠮᠠᠷ᠃ ᠣᠳᠤ ᠭᠦᠷᠳᠡᠯᠡ ᠠᠮᠠ ᠪᠠᠷ ᠣᠯᠠᠮᠵᠢᠯᠠᠭᠳᠠᠨ ᠳᠠᠭᠤᠯᠠᠭᠳᠠᠨ ᠢᠷᠡᠭ᠍ᠰᠡᠨ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠠᠷᠠᠤᠨ ᠤᠨ ᠳᠠᠭᠤᠤ᠂ ᠢᠷᠦᠭᠡᠯ ᠮᠠᠭᠳᠠᠭᠠᠯ᠂ ᠪᠠᠭᠠᠳᠤᠷᠯᠢᠭ ᠳᠤᠤᠯᠢ᠂ ᠢᠨᠠᠭ ᠤᠨ ᠳᠠᠭᠤᠤ ᠪᠦᠷ ᠳᠠᠷᠠ ᠶᠠᠩᠵᠤ ᠪᠠᠷ ᠶᠢᠡᠨ ᠠᠷᠠᠤᠨ ᠤᠨ ᠠᠮᠠᠨ ᠰᠤᠶᠤᠯ᠂ ᠠᠮᠠᠨ ᠢᠷᠠᠭᠤ ᠨᠠᠢ᠌ᠷᠠᠭ ᠪᠣᠯᠬᠤ ᠶᠤᠮ᠃ ᠮᠦᠨᠴᠤ ᠦᠨᠦᠳᠤᠷ ᠤᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠦᠩ ᠰᠢᠮᠡᠯᠢᠭ᠌ ᠭᠦᠷᠦᠰᠤ ᠰᠢᠷᠤᠢ᠂ ᠡᠭᠦᠰᠦᠯ ᠭᠦᠭ᠍ᠵᠢᠯ ᠤᠨ ᠣᠯᠠ ᠰᠠᠭᠤᠷᠢ ᠪᠣᠯᠬᠤ ᠨᠢ ᠭᠠᠷᠴᠠᠭᠠ ᠦᠭᠡᠶ᠃ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠠᠷᠠᠤᠨ ᠤᠨ ᠳᠠᠭᠤᠤ ᠳᠤ ᠬᠠᠭᠠᠨ ᠨᠤᠶᠠᠤᠨ᠂ ᠠᠪᠣ᠂ ᠡᠭᠡ ᠨᠤᠳᠤᠭ᠂ ᠱᠠᠰᠢᠨ ᠨᠤᠮ᠂ ᠭᠦᠮᠤᠨ ᠪᠠᠢ᠌ᠭᠠᠯᠢ᠂ ᠠᠮᠢᠳᠠᠨ ᠪᠣᠳᠠᠰ᠂ ᠮᠠᠯ ᠠᠬᠤᠢ᠂ ᠠᠵᠤ ᠠᠮᠢᠳᠤᠷᠠᠯ᠂ ᠬᠠᠢ᠌ᠷᠠ ᠳᠤᠷᠠᠯᠠᠯ᠂ ᠵᠠᠩ ᠰᠤᠶᠤᠯ ᠶᠢᠡᠷ ᠰᠡᠳᠦᠪᠯᠡᠭ᠍ᠰᠡᠨ ᠳᠠᠭᠤᠤ ᠮᠠᠰᠢ ᠠᠷᠪᠢᠨ ᠪᠣᠢ᠃ ᠳᠡᠭᠡᠭᠡᠳ ᠳᠠᠭᠤᠤ ᠶᠢᠨ ᠥᠭᠡ ᠨᠢ ᠤᠳᠬᠠ ᠭᠦᠨ᠂ ᠠᠭᠤᠯᠭᠠ ᠡᠯᠪᠠᠭ᠌᠂ ᠭᠡᠯᠡ ᠭᠡᠯᠡᠯᠭᠡ ᠪᠣᠷᠤᠭᠵᠢᠭᠤᠨ ᠶᠡᠷᠦᠮᠳᠡᠭ᠌ ᠪᠠᠭᠳᠠᠭᠠᠮᠵᠢ ᠰᠠᠢ᠌ᠳᠠᠢ ᠮᠦᠷᠳᠡᠭᠡᠨ ᠵᠤᠭᠢᠬᠤ ᠣᠷᠠᠯᠢᠭ ᠤᠨ ᠪᠣᠯᠪᠠᠰᠤᠷᠠᠯ ᠳᠤ ᠭᠦᠷᠦᠭ᠍ᠰᠡᠨ ᠪᠠᠢ᠌ᠳᠠᠭ᠃ 《ᠠᠴᠢᠳᠤ ᠳᠡᠭᠡᠳᠤ ᠪᠣᠭᠳᠠ》 ᠭᠡᠮᠡᠭᠦ ᠳᠠᠭᠤᠤ ᠳᠤ 《ᠠᠭᠤᠯᠠᠨ ᠳᠡᠭᠡᠷᠡ ᠪᠠᠨ ᠣᠷᠭᠤᠭᠰᠠᠨ/ ᠣᠯᠠᠭᠠᠨ ᠽᠠᠠᠳᠠᠨ ᠯᠠ ᠰᠢᠭᠤᠢ/ ᠡᠪᠦᠯ ᠬᠠᠪᠣᠷ ᠤᠨ ᠯᠠ ᠰᠠᠯᠭᠢᠨ ᠳᠤ ᠨᠢ/ ᠦᠶᠡ ᠶᠢᠨ ᠨᠢᠭᠡ ᠯᠠ ᠨᠠᠢ᠌ᠭᠤᠨᠠ》 ᠭᠡᠳ ᠳᠠᠭᠤᠯᠠᠨᠠ᠃ ᠳᠠᠭᠤᠤ ᠶᠢ ᠨᠢ ᠰᠤᠨᠤᠰᠬᠤ ᠡᠴᠡ ᠡᠮᠦᠨᠡ ᠥᠭᠡ ᠶᠢ ᠨᠢ ᠣᠩᠰᠢᠭᠠᠤᠨ ᠰᠠᠭᠤᠬᠤ ᠳᠤ ᠰᠡᠳᠭᠢᠯ ᠬᠠᠢ᠌ᠯᠤᠭᠤᠯᠤᠮᠠ ᠮᠦᠷᠦᠭᠡᠳᠦᠯ ᠤᠨ ᠠᠶᠠᠰ ᠵᠥᠩᠳᠡᠭᠡᠨ ᠵᠢᠷᠦᠭᠡᠨ ᠡᠴᠡ ᠣᠭᠵᠤᠷᠠᠭᠠᠤᠨ ᠠᠪᠳᠠᠭ ᠨᠢ ᠰᠤᠨᠢᠨ᠃ ᠮᠤᠩᠭ᠋ᠤᠯᠴᠤᠳ ᠶᠠᠭᠠᠭᠢᠵᠤ ᠪᠠᠢ᠌ᠭᠠᠯᠢ ᠣᠷᠴᠢᠨ ᠲᠡᠶ ᠪᠠᠨ ᠰᠡᠳᠭᠢᠯ ᠶᠢᠡᠷ ᠶᠢᠡᠨ ᠨᠠᠢ᠌ᠯᠠᠨ ᠠᠭᠤᠰᠳᠠᠭ ᠪᠠᠢ᠌ᠭᠰᠠᠨ ᠤ ᠨᠠᠷᠢᠨ ᠨᠢᠭᠤᠴᠠ ᠡ᠊ᠨᠳᠡ ᠪᠠᠶᠠᠯᠠᠯ ᠶᠢᠡᠨ ᠣᠯᠵᠤ ᠪᠠᠢ᠌ᠭᠠ᠃ ᠵᠢᠯ ᠤᠨ ᠳᠦᠷᠪᠠᠨ ᠣᠯᠠᠷᠢᠯ ᠳᠤ ᠪᠠᠢ᠌ᠭᠠᠯᠢ ᠳᠡᠯᠡᠭᠡᠢ ᠲᠡᠶ ᠪᠠᠨ ᠠᠮᠢᠨ ᠬᠠᠢ᠌ᠷᠠ ᠨᠢᠭᠡᠳᠡᠢ ᠶᠠᠪᠣᠳᠠᠭ ᠨᠡᠭᠦᠳᠡᠯᠴᠢᠨ ᠤ ᠵᠢᠷᠦᠭᠡ ᠰᠡᠳᠭᠢᠯ᠂ ᠪᠢᠯᠢᠭ᠌ ᠣᠶᠤᠨ ᠡᠴᠡ ᠡᠢ᠌ᠮᠦᠷᠭᠦ ᠰᠤᠩᠭᠤᠳᠠᠭ ᠪᠠᠳᠠᠭ ᠦᠪᠡᠷ ᠶᠢᠡᠨ ᠢᠪᠢᠯᠤᠨ ᠠᠰᠬᠠᠷᠠᠳᠠᠭ ᠪᠠᠢ᠌ᠭᠰᠠᠨ ᠨᠢ ᠣᠢ᠌ᠯᠠᠭᠠᠮᠵᠢᠳᠠᠢ᠃
ᠲ᠋ᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠳᠤᠮᠳᠠ ᠳᠡᠭᠡᠷᠡ ᠳᠤᠷᠠᠳᠤᠭᠰᠠᠨ ᠠᠷᠠᠤᠨ ᠤᠨ ᠳᠠᠭᠤᠤ ᠡᠴᠡ ᠭᠠᠳᠠᠨᠠ ᠪᠠᠰᠠ 《ᠪᠠᠶᠠᠨ ᠰᠦᠩ ᠤᠨ ᠢᠷᠦᠭᠡᠯ》 ᠪᠠ 《ᠬᠠᠨ ᠴᠡᠩᠭᠡᠯ》 ᠭᠡᠮᠡᠭᠦ ᠠᠷᠠᠤᠨ ᠤᠨ ᠠᠮᠠᠨ ᠰᠤᠶᠤᠯ ᠤᠨ ᠣᠭᠢ᠂ ᠠᠮᠠᠨ ᠢᠷᠠᠭᠤ ᠨᠠᠢ᠌ᠷᠠᠭ ᠤᠨ ᠰᠤᠳᠤ ᠪᠣᠯᠤᠭᠰᠠᠨ ᠬᠤᠤᠰ ᠪᠦᠳᠦᠭᠡᠯ ᠪᠣᠢ᠃ 《ᠪᠠᠶᠠᠨ ᠰᠦᠩ ᠤᠨ ᠢᠷᠦᠭᠡᠯ》 ᠨᠢ ᠭᠡᠳᠥᠢᠪᠠᠷ ᠴᠤᠯᠤ ᠢᠷᠦᠭᠡᠯ ᠮᠠᠭᠳᠠᠭᠠᠯ ᠤᠨ ᠰᠢᠠᠵᠢ ᠲᠡᠶ ᠪᠣᠯᠪᠠᠴᠤ ᠮᠦᠨ ᠵᠤᠭᠢᠬᠤ ᠣᠶᠠᠩᠭ᠋ᠠᠯᠢᠭ ᠪᠠᠶᠠᠨ ᠰᠠᠨᠠᠭᠠ ᠭᠢᠭᠡᠳ ᠰᠢᠯᠦᠭᠯᠢᠭ᠌ ᠮᠦᠷ ᠪᠠᠳᠠᠭ ᠨᠠᠪᠴᠢᠨ ᠰᠢᠩᠭᠡᠭ᠍ᠰᠡᠨ ᠪᠠᠢ᠌ᠳᠠᠭ᠃ ᠢᠷᠦᠭᠡᠯ ᠳᠤ 《ᠣᠭᠳᠠᠷᠭᠤᠢ ᠶᠢᠨ ᠨᠠᠷᠠᠨ ᠰᠠᠷᠠᠨ ᠤ / ᠭᠡᠷᠡᠯ ᠨᠢ ᠬᠤᠯᠪᠣᠭᠠ ᠲᠡᠶ ᠪᠠᠢ᠌ᠳᠠᠭ / ᠣᠢ ᠰᠢᠭᠤᠢ ᠮᠤᠳᠤᠨ ᠤ / ᠦᠨᠳᠦᠰᠦ ᠨᠢ ᠬᠤᠯᠪᠣᠭᠠ ᠲᠡᠶ ᠪᠠᠢ᠌ᠳᠠᠭ》 ᠭᠡᠳ ᠭᠠᠷᠳᠠᠭ᠃ ᠳᠤᠯᠤᠭᠠᠢ ᠰᠡᠭᠦᠯ ᠤᠨ ᠬᠤᠯᠪᠣᠯᠳᠠ᠂ ᠭᠡᠯᠪᠠᠷᠢ ᠪᠦᠳᠦᠴᠡ᠂ ᠠᠢ᠌ᠵᠠᠮ ᠴᠤᠭᠢᠯᠭᠠ ᠨᠢ ᠪᠦᠷ ᠣᠯᠠᠮᠵᠢᠯᠠᠯᠳᠤ ᠮᠤᠩᠭ᠋ᠤᠯ ᠰᠢᠯᠦᠭ᠌ ᠤᠨ ᠥᠩᠭᠡ ᠪᠣᠳᠤᠭ᠂ ᠦᠨᠦᠷ ᠠᠮᠳᠠ ᠪᠠᠷ ᠪᠢᠯᠬᠠᠮᠠ᠃ ᠣᠷᠴᠢᠯᠠᠩ ᠳᠡᠯᠡᠭᠡᠢ᠂ ᠣᠳᠤᠨ ᠭᠠᠷᠠᠭ᠂ ᠣᠷᠭᠤᠮᠠᠯ ᠪᠣᠳᠠᠰ ᠤᠨ ᠳᠠᠯᠳᠠ ᠶᠢᠨ ᠬᠤᠯᠪᠣᠭᠠ ᠶᠢ ᠪᠢᠯᠢᠭ᠌ ᠤᠨ ᠨᠢᠳᠤ ᠪᠠᠷ ᠨᠠᠪᠳᠠ ᠰᠢᠠᠵᠢᠵᠤ᠂ ᠪᠦᠭᠦᠢᠯᠡ ᠴᠤᠭᠴᠠ ᠪᠣᠯᠭᠠᠨ ᠬᠤᠯᠪᠤᠨ ᠴᠢᠳᠠᠭᠰᠠᠨ ᠨᠢ ᠶᠠᠭᠤᠳᠠᠢ ᠭᠠᠢ᠌ᠬᠠᠮᠰᠢᠭ᠃ ᠡᠭᠦᠨ ᠡᠴᠡ ᠥᠵᠡᠭᠦ ᠳᠤ ᠮᠤᠩᠭ᠋ᠤᠯᠴᠤᠳ ᠤᠨ ᠠᠮᠠᠨ ᠰᠤᠶᠤᠯ ᠨᠢ ᠪᠢᠴᠢᠭ᠌ ᠤᠨ ᠰᠤᠶᠤᠯ ᠡᠴᠡ ᠪᠠᠨ ᠡᠮᠤᠨᠡ ᠭᠢᠷᠢ ᠵᠡᠷᠭᠡ ᠭᠦᠭ᠍ᠵᠢᠯ ᠲᠡᠶ ᠪᠠᠢ᠌ᠭᠰᠠᠨ ᠭᠡᠳᠡᠭ᠌ ᠢ ᠮᠠᠳᠠᠵᠤ ᠪᠣᠯᠤᠨᠠ᠃ ᠭᠡᠯᠡ ᠨᠠᠢ᠌ᠷᠠᠭᠤᠯᠭᠠ᠂ ᠨᠠᠷᠢᠨ ᠳᠦᠷᠰᠤᠯᠠᠯ᠂ ᠣᠷᠠᠨ ᠳᠠᠭᠠᠮᠠᠭᠯᠠᠯ ᠶᠢᠡᠷ ᠶᠢᠡᠨ ᠣᠯᠠᠨ ᠳᠤ ᠮᠡᠳᠡᠷᠡᠭ᠍ᠳᠡᠨ ᠭᠠᠢ᠌ᠬᠠᠭᠳᠠᠭᠰᠠᠨ 《ᠬᠠᠨ ᠴᠡᠩᠭᠡᠯ》᠊ᠤᠨ ᠳᠤᠤᠯᠢ ᠪᠣᠯ ᠳᠠᠷᠠ ᠴᠢᠭ᠌ ᠶᠢᠡᠷ ᠶᠢᠡᠨ ᠠᠮᠠᠨ ᠨᠠᠢ᠌ᠷᠠᠭᠯᠠᠯ ᠮᠦᠨ᠃ ᠳᠤᠤᠯᠢ ᠳᠤ ᠭᠠᠷᠴᠤ ᠪᠠᠢ᠌ᠭᠠ ᠵᠠᠷᠢᠮ ᠨᠢᠭᠡᠨ ᠥᠭᠡ ᠶᠢᠨ ᠰᠢᠷᠭᠠᠭᠠᠯᠳᠠ᠂ ᠤᠳᠬᠠ ᠶᠢᠨ ᠠᠭᠰᠢᠭᠠᠯᠳᠠ ᠶᠢ ᠦᠨᠦᠳᠤᠷ ᠤᠨ ᠮᠠᠨᠠᠢ᠌ᠭᠢᠨ ᠤ ᠰᠢᠯᠦᠭ᠍ᠴᠢᠳ ᠴᠤ ᠪᠠᠶᠡᠯᠡᠭᠦᠯᠭᠦ ᠳᠤ ᠭᠦᠴᠢᠷᠳᠡᠨᠡ᠃ 《ᠮᠢᠩᠭ᠋ᠠᠨ ᠭᠦᠮᠤᠨ ᠤ ᠰᠦᠷ ᠢ ᠳᠠᠷᠤᠳᠠᠭ / ᠮᠢᠬᠠᠨ ᠣᠯᠠᠭᠠᠨ ᠴᠢᠷᠠᠢ ᠨᠢ ᠭᠠᠷᠤᠭᠠᠤᠨ/ ᠲᠦᠮᠡᠨ ᠭᠦᠮᠤᠨ ᠤ ᠰᠦᠷ ᠢ ᠳᠠᠷᠤᠳᠠᠭ / ᠳᠦᠭᠦᠭᠡᠢ ᠣᠯᠠᠭᠠᠨ ᠴᠢᠷᠠᠢ ᠨᠢ ᠭᠠᠷᠤᠭᠠᠤᠨ》 ᠭᠡᠮᠡᠨ ᠪᠠᠭᠠᠳᠤᠷ ᠡᠷᠡ ᠶᠢᠨ ᠣᠮᠤᠭ ᠰᠦᠷ᠂ ᠴᠤᠭ ᠵᠠᠯᠢ ᠶᠢ ᠪᠣᠷᠤᠭᠵᠢᠭᠤᠨ ᠡᠩ ᠤᠨ ᠭᠡᠯᠡ ᠪᠠᠷ ᠰᠢᠭᠤᠳ ᠳᠦᠷᠰᠤᠯᠠᠨ ᠥᠵᠡᠭᠦᠯᠦᠭᠡᠳ ᠣᠳᠠᠭᠠᠨ ᠬᠤᠭᠤᠴᠠᠭᠠ ᠡᠵᠡᠭᠦᠢ ᠬᠠᠶᠠᠭᠳᠠᠭᠰᠠᠨ ᠨᠤᠳᠤᠭ ᠪᠠᠯᠴᠢᠭᠡᠷ᠂ ᠡᠪᠠᠰᠤ ᠣᠷᠭᠤᠮᠠᠯ ᠤᠨ ᠪᠠᠢ᠌ᠳᠠᠯ ᠢ 《ᠨᠠᠮᠤᠷ ᠤᠨ ᠶᠢᠡᠨ ᠨᠠᠮᠤᠷᠵᠢᠩ ᠳᠠᠭᠠᠨ ᠢᠷᠠᠪᠠ / ᠨᠠᠷᠢᠨ ᠡᠪᠠᠰᠤᠨ ᠳᠦᠷᠦᠭᠡ ᠰᠢᠭᠦᠷᠡᠵᠤ ᠪᠠᠢ᠌ᠪᠠ / ᠵᠤᠨ ᠤ ᠪᠠᠨ ᠵᠤᠰᠠᠯᠠᠩ ᠳᠠᠭᠠᠨ ᠢᠷᠠᠪᠠ / ᠵᠥᠯᠭᠡ ᠡᠪᠠᠰᠤᠨ ᠳᠦᠷᠦᠭᠡ ᠰᠢᠭᠦᠷᠡᠵᠤ ᠪᠠᠢ᠌ᠪᠠ》 ᠭᠡᠵᠤ ᠰᠢᠷᠭᠠᠭᠠᠮᠠᠯ ᠴᠡᠪᠠᠷᠭᠡᠨ ᠭᠦᠦᠷᠨᠢᠯ ᠤᠨ ᠠᠷᠭᠠ ᠶᠢ ᠭᠡᠷᠡᠭᠯᠡᠨ ᠦᠵᠡᠮᠵᠢ ᠶᠢᠨ ᠳᠤᠳᠤᠷᠠ ᠰᠡᠳᠬᠢᠯᠭᠡ ᠪᠠᠨ ᠡᠪᠳᠡᠢ᠌ᠭᠡᠨ ᠠᠭᠤᠰᠬᠠᠨ ᠰᠢᠯᠦᠭᠯᠡᠵᠡᠢ᠃ ᠡᠩ ᠤᠨ ᠥᠭᠡ ᠪᠠᠷ ᠡᠩ ᠤᠨ ᠪᠣᠰᠤ ᠰᠠᠨᠠᠭᠠ ᠶᠢ ᠭᠠᠷᠭᠠᠵᠤ ᠴᠢᠳᠠᠳᠠᠭ ᠤᠨ ᠠᠮᠢᠳᠤ ᠵᠢᠱᠢᠶᠠ ᠶᠢ ᠡ᠊ᠨᠳᠡ ᠥᠵᠡᠭᠦᠯᠦᠭᠡᠳ ᠦᠭᠭᠦᠭ᠍ᠰᠡᠨ ᠪᠠᠢ᠌ᠨᠠ᠃
《ᠳᠠᠷᠤᠭᠤᠯᠵᠤ ᠭᠦᠷᠦᠭ᠍ᠰᠡᠨ ᠭᠡᠵᠢᠭᠡᠨ ᠴᠢᠨᠢ / ᠳᠠᠯᠤ ᠶᠢᠨ ᠳᠤᠮᠳᠠ ᠪᠠᠨ ᠨᠠᠢ᠌ᠬᠤᠯᠵᠠᠭᠠᠤᠨ / ᠳᠠᠪᠬᠤᠷ ᠴᠤᠬᠤᠷ ᠨᠢᠳᠤ ᠪᠠᠷ ᠵᠢᠠᠨ/ᠲ᠋ᠠᠩᠳᠠ ᠪᠠᠨ ᠨᠠᠮᠠ ᠶᠢ ᠰᠢᠷᠳᠡᠭᠦ ᠰᠢᠭ᠌》 ᠭᠡᠳ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠢᠨᠠᠭ ᠤᠨ ᠳᠠᠭᠤᠤ ᠳᠤ ᠳᠠᠭᠤᠯᠠᠳᠠᠭ᠃ ᠥᠭᠡ ᠭᠡᠯᠡ ᠪᠠᠷ ᠢᠯᠡᠳᠭᠡᠵᠤ ᠦᠯᠦ ᠴᠢᠳᠠᠬᠤ ᠬᠠᠢ᠌ᠷᠠ ᠶᠢᠨ ᠰᠢᠪᠠᠨᠡᠭᠡ᠂ ᠰᠡᠳᠭᠢᠯ ᠤᠨ ᠨᠢᠭᠤᠴᠠ ᠶᠢ ᠢᠩᠭᠢᠵᠤ ᠬᠠᠷᠠᠴᠠ ᠪᠠᠷ ᠨᠢ ᠭᠡᠯᠡᠭᠦᠯᠵᠤ ᠴᠢᠳᠠᠳᠠᠭ ᠡᠷᠳᠡᠮ ᠭᠦᠮᠤᠨ ᠪᠣᠯᠭᠠᠨ ᠳᠤ ᠵᠠᠶᠠᠭᠠᠳᠠᠭ ᠦᠭᠡᠶ ᠪᠠᠢ᠌ᠬᠠ᠃ ᠴᠠᠭ ᠢ ᠠᠮᠵᠢᠨ ᠳᠠᠷᠠ ᠪᠦᠭᠦᠨ ᠢ ᠴᠤᠭᠯᠠᠭᠤᠯᠵᠤ ᠡᠮᠭᠢᠳᠭᠡᠵᠤ ᠴᠢᠳᠠᠭᠰᠠᠨ ᠦᠭᠡᠶ ᠭᠡᠭᠦ ᠡᠴᠡ ᠪᠢᠰᠢ ᠡᠢ᠌ᠮᠦᠷᠭᠦ ᠠᠮᠠᠨ ᠢᠷᠠᠭᠤ ᠨᠠᠢ᠌ᠷᠠᠭ᠂ ᠪᠠᠯᠠᠨ ᠰᠢᠯᠦᠭ᠌ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠠᠷᠠᠤᠨ ᠤᠨ ᠳᠤᠮᠳᠠ ᠴᠤᠬᠤᠮ ᠭᠢᠷᠢ ᠵᠡᠷᠭᠡ ᠳᠡᠯᠭᠡᠷᠡᠨ ᠳᠠᠷᠬᠠᠵᠤ ᠪᠠᠢ᠌ᠭᠰᠠᠨ ᠢ ᠦᠨᠦᠳᠤᠷ ᠳᠦᠰᠦᠭᠡᠯᠡᠭᠦᠶᠡ ᠪᠠᠷᠭᠡ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠵᠣᠢ᠌ᠷ ᠰᠠᠴᠠᠨ ᠥᠭᠡ᠂ ᠳᠤᠮ ᠰᠢᠪᠰᠢᠯᠭᠡ ᠶᠢᠨ ᠥᠭᠡ᠂ ᠣᠨᠢᠰᠤᠭᠠ ᠳᠠᠭᠠᠯᠠᠭᠠ᠂ ᠶᠢᠷᠳᠢᠠᠴᠤ ᠶᠢᠨ ᠭᠤᠷᠪᠠ ᠮᠠᠳᠤ ᠶᠢᠨ ᠵᠣᠢ᠌ᠯᠠᠰ ᠴᠤ ᠳᠡᠭᠡᠳᠤ ᠮᠤᠩᠭ᠋ᠤᠯ ᠳᠤ ᠦᠷᠭᠡᠨ ᠵᠤᠬᠢᠶᠠᠭᠳᠠᠨ ᠳᠡᠯᠭᠡᠷᠡᠵᠤ ᠪᠠᠢ᠌ᠭᠰᠠᠨ ᠮᠦᠷᠳᠡᠭᠡᠨ ᠶᠠᠮᠠᠷᠴᠤ ᠭᠡᠯᠡᠨ ᠤ ᠪᠣᠭᠢᠷᠳᠤᠯ᠂ ᠰᠤᠶᠤᠯ ᠤᠨ ᠬᠠᠮᠠᠭᠤᠷᠠᠯ ᠳᠤ ᠨᠥᠯᠦᠭᠡᠯᠡᠭ᠍ᠳᠡᠭᠡ ᠦᠭᠡᠶ ᠴᠠᠪᠠᠷ ᠶᠠᠩᠵᠤ ᠪᠠᠷ ᠶᠢᠡᠨ ᠣᠯᠠᠮᠵᠢᠯᠠᠭᠳᠠᠨ ᠢᠷᠡᠭ᠍ᠰᠡᠨ ᠨᠢ ᠦᠨᠦᠳᠤᠷ ᠤᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠢ ᠪᠣᠢ ᠪᠣᠯᠭᠠᠨ ᠪᠦᠷᠢᠯᠳᠦᠭᠦᠯᠭᠦ ᠳᠤ ᠪᠠᠶᠠᠨ ᠳᠠᠩᠰᠤᠭ ᠰᠤᠶᠤᠯ ᠤᠨ ᠭᠦᠷᠦᠰᠤ ᠰᠢᠷᠤᠢ ᠬᠠᠩᠭ᠋ᠠᠭᠰᠠᠨ ᠨᠢ ᠳᠠᠮᠵᠢᠭ ᠦᠭᠡᠶ᠃
ᠦᠨᠦᠳᠤᠷ ᠳᠡᠭᠡᠳᠤ ᠮᠤᠩᠭ᠋ᠤᠯ ᠳᠤ ᠵᠥᠪᠭᠡᠨ ᠰᠢᠯᠦᠭ᠌ ᠣᠷᠤᠯᠳᠤᠵᠤ ᠪᠠᠢ᠌ᠭᠠ ᠠᠬᠠᠮᠠᠤᠨ᠂ ᠢᠳᠠᠷ᠂ ᠵᠠᠯᠠᠭᠤ ᠭᠦᠮᠦᠰ ᠵᠠᠭᠤ ᠣᠷᠴᠢᠮ ᠪᠣᠢ᠃ ᠰᠢᠯᠦᠭ᠌ ᠤᠨ ᠨᠤᠮ ᠶᠢᠡᠨ ᠨᠢᠭᠡᠨᠲᠡ ᠭᠡᠪᠯᠡᠭᠦᠯᠦᠭ᠍ᠰᠡᠨ ᠪᠣᠶᠤ ᠭᠡᠪᠯᠡᠭᠦᠯᠭᠦ ᠪᠣᠯᠤᠭᠰᠠᠨ᠂ ᠪᠠᠰᠠ ᠨᠡᠢ᠌ᠭᠡᠮ ᠳᠡᠭᠡᠷᠡ ᠵᠤᠭᠢᠬᠤ ᠨᠥᠯᠦᠭᠡ ᠳᠤᠰᠬᠠᠯ ᠭᠠᠷᠭᠠᠭᠰᠠᠨ ᠰᠢᠯᠦᠭ᠍ᠴᠢᠳ ᠴᠤ ᠭᠤᠴᠢᠭᠠᠤᠨ ᠪᠠᠢ᠌ᠨᠠ᠃ ᠭᠦᠮᠤᠨ ᠠᠮᠠ ᠶᠢᠨ ᠬᠠᠷᠢᠴᠠᠯ ᠡᠴᠡ ᠠᠪᠴᠤ ᠥᠵᠡᠭᠦ ᠳᠤ ᠡᠨᠡ ᠳᠤᠭᠠ ᠪᠠᠭᠠ ᠳᠤᠭᠠ ᠪᠢᠰᠢ᠃ ᠡᠷᠳᠡᠮᠳᠡᠳ ᠡᠴᠡ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠢ ᠨᠠᠢ᠌ᠳᠠ ᠮᠤᠩᠭ᠋ᠤᠯ ᠤᠨ ᠢᠷᠠᠭᠤ ᠨᠠᠢ᠌ᠷᠠᠭ ᠤᠨ ᠳᠤᠳᠠᠭᠳᠠᠵᠤ ᠪᠣᠯᠤᠰᠢ ᠦᠭᠡᠶ ᠴᠢᠬᠤᠯᠠ ᠪᠦᠷᠢᠯᠳᠦᠭᠦᠨ ᠭᠡᠮᠡᠨ ᠦᠵᠡᠵᠤ᠂ ᠨᠢᠭᠡᠨᠲᠡ ᠦᠪᠡᠷ ᠤᠨ ᠭᠡᠰᠡᠨ ᠣᠷᠤᠨ ᠪᠠᠢ᠌ᠷᠢ ᠪᠠᠨ ᠣᠯᠤᠯᠠ ᠭᠡᠮᠡᠨ ᠦᠨᠡᠯᠠᠯᠠ᠃ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠪᠢᠴᠢᠭ᠌ ᠤᠨ ᠣᠷᠠᠨ ᠵᠤᠬᠢᠶᠠᠯ ᠪᠣᠢ ᠪᠣᠯᠤᠨ ᠭᠦᠭ᠍ᠵᠢᠭᠡᠳ ᠰᠠᠶᠢ 30 ᠭᠠᠷᠣᠢ᠌ᠬᠠᠨ ᠵᠢᠯ ᠤᠨ ᠨᠢᠭᠤᠷ ᠦᠵᠡᠵᠤ ᠪᠣᠢ᠃ ᠭᠡᠳᠡᠯᠡ ᠡᠢ᠌ᠮᠤ ᠣᠬᠤᠷᠬᠠᠨ ᠬᠤᠭᠤᠴᠠᠭᠠᠨ ᠳᠤᠳᠤᠷᠠ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠮᠠᠰᠢ ᠳᠦᠷᠭᠡᠨ ᠭᠦᠭ᠍ᠵᠢᠨ ᠪᠣᠵᠠᠭᠠᠢ᠌ᠷᠠᠵᠤ ᠣᠷᠤᠨ ᠨᠤᠳᠤᠭ ᠤᠨ ᠥᠩᠭᠡ ᠪᠣᠳᠤᠭ᠂ ᠦᠨᠦᠷ ᠠᠮᠳᠠ᠂ ᠣᠠᠴᠠᠯᠢᠭ ᠶᠢᠡᠷ ᠶᠢᠡᠨ ᠢᠯᠭᠠᠷᠠᠨ ᠦᠪᠡᠷ ᠤᠨ ᠭᠡᠰᠡᠨ ᠣᠷᠤᠨ ᠪᠠᠢ᠌ᠷᠢ ᠪᠠᠨ ᠣᠯᠬᠤ ᠭᠡᠳᠡᠭ᠌ ᠠᠮᠠᠷ ᠦᠭᠡᠶ᠃ ᠡᠭᠦᠨ ᠤ ᠭᠤᠤᠯ ᠨᠢᠭᠤᠴᠠ ᠨᠢ ᠳᠡᠭᠦᠨ ᠤ ᠰᠤᠶᠤᠯ ᠤᠨ ᠭᠦᠷᠦᠰᠤ ᠰᠢᠷᠤᠢ ᠦᠩ ᠵᠤᠵᠠᠭᠠᠨ ᠪᠠᠢ᠌ᠭᠰᠠᠨ ᠳᠤ ᠪᠠᠢ᠌ᠨᠠ᠃ ᠡᠨᠡᠭᠦ ᠰᠤᠶᠤᠯ ᠤᠨ ᠭᠦᠷᠦᠰᠤ ᠰᠢᠷᠤᠢ ᠶᠢ ᠰᠡᠳᠭᠢᠯ ᠣᠶᠤᠨ ᠳᠤ ᠪᠠᠨ ᠠᠴᠢᠶᠠᠯᠠᠵᠤ ᠢᠷᠡᠭ᠍ᠰᠡᠨ ᠣᠬᠠᠭᠠᠠᠳᠤ ᠪᠣᠭᠤᠷᠤᠯ ᠤᠳ ᠤᠨ ᠠᠪᠢᠶᠠᠰ ᠪᠢᠯᠢᠭ᠌ ᠲᠤ ᠪᠠᠢ᠌ᠨᠠ᠃ ᠳᠠᠳᠠᠨ ᠤ ᠠᠪᠢᠶᠠᠰ ᠪᠢᠯᠢᠭ᠌᠂ ᠰᠤᠶᠤᠯ ᠤᠨ ᠵᠤᠷᠢᠭ ᠰᠠᠨᠠᠭᠠ ᠶᠢ ᠭᠠᠵᠠᠷᠳᠠᠭᠤᠯᠤᠯ ᠦᠭᠡᠶ ᠵᠠᠯᠭᠠᠮᠵᠢᠯᠠᠨ ᠠᠪᠴᠤ ᠴᠢᠨᠠᠭᠰᠢ ᠣᠯᠠᠮᠵᠢᠯᠠᠨ ᠭᠦᠭ᠍ᠵᠢᠭᠦᠯᠭᠦ ᠪᠠᠷ ᠪᠢᠯᠢᠭ᠌ ᠤᠨ ᠭᠡᠳᠡ ᠪᠠᠨ ᠴᠠᠭᠢᠭᠰᠠᠨ ᠦᠷᠡ ᠬᠣᠢ᠌ᠴᠢᠰ ᠤᠨ ᠣᠷᠠ ᠡᠷᠳᠡᠮ ᠳᠤ ᠪᠠᠢ᠌ᠨᠠ᠃
ᠲ᠋ᠤᠤᠷᠠ ᠪᠢ ᠠᠳᠠᠯᠢ ᠪᠣᠰᠤ ᠴᠠᠭ ᠦᠶᠡ ᠳᠤ ᠪᠢᠴᠢᠭ᠍ᠳᠡᠭ᠍ᠰᠡᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠢ ᠱᠥᠭᠦᠨ ᠣᠩᠰᠢᠭᠰᠠᠨ ᠦᠪᠡᠷ ᠤᠨ ᠳᠦᠷᠦᠭ᠍ᠳᠡᠯ ᠶᠢᠡᠨ ᠴᠢᠯᠦᠭᠡᠳᠡᠢ ᠳᠡᠯᠭᠡᠯᠡ᠃
ᠬᠤᠶᠠᠷ᠄ ᠠᠩᠬᠠᠨ ᠤ ᠦᠶᠡ ᠶᠢᠨ ᠢᠷᠠᠭᠤ ᠨᠠᠢ᠌ᠷᠠᠭ
ᠲ᠋ᠡᠭᠡᠷᠡ ᠵᠠᠭᠤᠨ ᠤ ᠨᠠᠶᠠᠭᠠᠤᠨ ᠣᠨ ᠤ ᠡᠭᠢᠨ ᠶᠢᠡᠷ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ 《ᠴᠡᠴᠡᠭ᠍ᠳᠤ ᠴᠠᠢ᠌ᠳᠠᠮ》 ᠰᠡᠳᠭᠦᠯ ᠮᠠᠠᠳᠤᠯᠠᠵᠤ᠂ ᠪᠢᠴᠢᠭ᠌ ᠤᠨ ᠣᠷᠠᠨ ᠵᠤᠬᠢᠶᠠᠯ ᠠᠩᠬᠠ ᠡᠭᠢᠯᠡᠨ ᠪᠣᠢ ᠪᠣᠯᠬᠤ ᠳᠤ ᠦᠵᠡᠮᠵᠢ᠂ ᠬᠠᠢ᠌ᠷᠠ᠂ ᠰᠡᠳᠬᠢᠯᠭᠡ ᠭᠤᠷᠮᠤᠰᠤᠯᠠᠨ ᠡᠷᠴᠢᠯᠡᠭ᠍ᠳᠡᠭ᠍ᠰᠡᠨ ᠣᠰᠤᠨ ᠵᠢᠷᠤᠭᠠ ᠰᠢᠯᠦᠭ᠌ ᠶᠢᠡᠷ ᠶᠢᠡᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠳᠤᠷᠭᠠᠨ ᠭᠦᠰᠢᠭᠡ ᠶᠢ ᠢᠷᠠᠭᠰᠠᠨ ᠭᠦᠮᠦᠰ ᠪᠣᠯ ᠴᠢ᠊·ᠪᠦᠷᠢᠡᠪᠠᠶᠡᠷ᠂ ᠰᠡᠷᠡᠡᠭᠡᠷᠡᠯ᠂ ᠳᠤᠭ᠂ 「ᠴᠣᠢ᠌ᠰᠦ᠋ᠷᠤᠩ」᠂ ᠴᠡᠪᠰᠢᠭ᠌᠂ ᠬᠦ᠊·ᠴᠠᠷᠠᠩᠪᠠᠯ᠂ ᠭᠦᠭᠡ᠂ ᠭᠦᠭᠡᠪᠠᠷᠰ᠂ ᠺᠠᠮᠳᠠᠷ᠂ 「ᠵᠠᠩᠮᠠᠷ」᠂ ᠶᠤ᠋·ᠮᠥᠩᠭᠡᠪᠠᠭᠠᠳᠤᠷ᠂ ᠣ·ᠴᠠᠷᠠᠠᠳᠤᠠᠳᠤᠪ᠂ ᠠ᠊·ᠶᠤᠠᠵᠢ᠂ ᠯᠢᠮᠪᠣᠵᠠ᠂ ᠪ᠊·ᠴᠡᠭᠠᠭᠦ᠋ᠤ᠂ ᠪᠠᠶᠠᠰᠬᠠᠯ᠂ ᠴᠦᠩᠺᠠᠷᠵᠠ ᠨᠡᠷ ᠪᠣᠯᠤᠨᠠ᠃ ᠡᠭᠦᠨ ᠡᠴᠡ ᠡᠮᠤᠨᠡ ᠴᠥᠭᠡᠨ ᠭᠡᠳᠤᠨ ᠭᠦᠮᠤᠨ ᠰᠢᠯᠦᠭ᠌ ᠵᠤᠬᠢᠶᠠᠯ ᠶᠢᠡᠨ 《ᠦᠨᠢᠷ ᠴᠡᠴᠡᠭ᠌》 ᠵᠡᠷᠭᠡ ᠮᠤᠵᠢ ᠶᠢᠨ ᠭᠠᠳᠠᠨᠠᠭᠢ ᠰᠡᠳᠭᠦᠯ ᠳᠤ ᠬᠠᠶᠠ ᠨᠢᠭᠡ ᠨᠡᠢ᠌ᠳᠡᠯᠡᠭᠦᠯᠵᠤ ᠪᠠᠢ᠌ᠭᠰᠠᠨ ᠢ ᠭᠠᠷᠭᠠᠪᠠᠯ ᠳᠡᠭᠡᠳᠤ ᠮᠤᠩᠭ᠋ᠤᠯ ᠣᠷᠠᠨ ᠵᠤᠬᠢᠶᠠᠯ ᠶᠢᠡᠨ ᠨᠠᠢ᠌ᠳᠠ ᠮᠤᠩᠭ᠋ᠤᠯᠴᠤᠳ ᠲᠤ ᠪᠠᠨ ᠣᠬᠠᠭᠠᠭᠤᠯᠤᠨ ᠳᠠᠨᠢᠭᠤᠯᠬᠤ ᠣᠬᠠᠮᠰᠠᠷᠳᠤ ᠣᠷᠤᠯᠳᠤᠯᠭᠠ ᠶᠢ ᠭᠢᠵᠤ ᠪᠠᠢ᠌ᠭᠰᠠᠨ ᠭᠦᠮᠤᠨ ᠪᠠᠷᠤᠭ ᠦᠭᠡᠶ ᠶᠤᠮ᠃ ᠳᠡᠭᠡᠳᠤ ᠮᠤᠩᠭ᠋ᠤᠯ ᠳᠤ ᠪᠢᠴᠢᠭ᠌ ᠤᠨ ᠣᠷᠠᠨ ᠵᠤᠬᠢᠶᠠᠯ ᠤᠨ ᠰᠢᠨᠡ ᠠᠭᠤᠷ ᠠᠮᠢᠰᠬᠤᠯ ᠢ ᠠᠪᠴᠢᠷᠠᠭᠰᠠᠨ ᠭᠦᠮᠤᠨ ᠪᠣᠯ ᠴᠢ᠊·ᠪᠦᠷᠢᠡᠪᠠᠶᠡᠷ ᠪᠠᠭᠰᠢ ᠶᠠᠭᠠᠭᠢᠬᠤ ᠠᠷᠭᠠ ᠦᠭᠡᠶ ᠮᠦᠨ᠃ ᠴᠢ᠊·ᠪᠦᠷᠢᠡᠪᠠᠶᠡᠷ ᠪᠠᠭᠰᠢ ᠵᠢᠷᠠᠭᠠᠤᠨ ᠣᠨ ᠤ ᠳᠤᠮᠳᠠᠴᠢ ᠪᠠᠷ ᠬᠦᠬᠡᠨᠠᠭᠤᠷ ᠤᠨ ᠬᠠᠢ᠌ᠰᠢ ᠳᠤ ᠬᠤᠪᠢᠶᠠᠭᠳᠠᠨ ᠢᠷᠠᠵᠤ ᠠᠵᠢᠯᠯᠠᠨ ᠠᠮᠢᠳᠤᠷᠠᠬᠤ ᠳᠤ ᠪᠠᠨ ᠣᠬᠤᠷᠬᠠᠨ ᠭᠡᠳᠤᠨ ᠵᠢᠯ ᠤᠨ ᠬᠤᠭᠤᠷᠤᠠᠳᠤ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠭᠡᠯᠡ ᠰᠤᠶᠤᠯ᠂ ᠵᠠᠩ ᠳᠠᠳᠬᠠᠯ᠂ ᠠᠵᠤ ᠠᠮᠢᠳᠤᠷᠠᠯ ᠳᠤ ᠢᠳᠡᠭᠡᠰᠢᠨ ᠳᠠᠰᠴᠤ 《ᠡᠷᠳᠡᠨᠢᠳᠤ ᠬᠤᠳᠤᠭᠤᠷ》 ᠭᠡᠮᠡᠭᠦ ᠣᠤᠭᠠᠨ ᠰᠢᠯᠦᠭ᠌ ᠶᠢᠡᠨ 《ᠦᠨᠢᠷ ᠴᠡᠴᠡᠭ᠌》 ᠰᠡᠳᠭᠦᠯ ᠳᠤ ᠨᠡᠢ᠌ᠳᠡᠯᠡᠭ᠍ᠰᠡᠨ ᠡᠴᠡ ᠠᠪᠣᠭᠠᠤᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠣᠷᠠᠨ ᠵᠤᠬᠢᠶᠠᠯ》 ᠊ᠤᠨ ᠳᠤᠯᠭᠠ ᠶᠢᠨ ᠴᠢᠯᠠᠭᠤ ᠶᠢ ᠳᠠᠯᠪᠢᠵᠤ᠂ ᠣᠷᠠᠨ ᠵᠤᠬᠢᠶᠠᠯ ᠤᠨ ᠰᠢᠨᠡ ᠭᠠᠷᠴᠤᠳ ᠢ ᠭᠦᠮᠦᠵᠢᠭᠦᠯᠤᠨ ᠳᠠᠭᠠᠭᠤᠯᠬᠤ ᠭᠦᠡᠳᠤ ᠬᠠᠳᠠᠭᠤ ᠮᠦᠷᠳᠡᠭᠡᠨ ᠠᠷᠢᠭᠤᠨ ᠣᠢ᠌ᠯᠠᠰ ᠲᠤ ᠣᠶᠤᠨ ᠣᠬᠠᠭᠠᠨ ᠶᠢᠡᠨ ᠰᠢᠪᠬᠠᠵᠤ ᠶᠠᠪᠣᠵᠠᠢ᠃ ᠴᠢ᠊·ᠪᠦᠷᠢᠡᠪᠠᠶᠡᠷ ᠪᠠᠭᠰᠢ ᠶᠢᠨ ᠰᠢᠯᠦᠭ᠌ ᠴᠠᠭ ᠦᠶᠡ ᠶᠢᠨ ᠢᠮ ᠳᠡᠮᠳᠡᠭ᠌ ᠶᠢᠡᠷ ᠢᠯᠠ᠂ ᠣᠯᠠᠮᠵᠢᠯᠠᠯᠳᠤ ᠮᠤᠩᠭ᠋ᠤᠯ ᠰᠢᠯᠦᠭ᠌ ᠤᠨ ᠣᠳᠤᠮ ᠳᠢᠭ᠌ ᠳᠤᠳᠤ ᠪᠦᠭᠡᠳ ᠥᠡᠳᠦᠷᠯᠢᠭ᠌ ᠨᠤᠳᠤᠭ ᠤᠨ ᠦᠵᠡᠮᠵᠢ ᠪᠣᠳᠤᠭ ᠢ ᠣᠷᠠᠨ ᠳᠦᠷᠰᠦᠯᠢᠭ᠌ ᠥᠵᠡᠭᠦᠯᠵᠤ᠂ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠨᠤᠳᠤᠭ ᠤᠨ ᠶᠠᠷᠢᠶᠠᠨ ᠤ ᠭᠡᠯᠡ ᠶᠢ ᠣᠬᠠᠮᠰᠠᠷ ᠲᠡᠶ ᠵᠠᠷᠤᠳᠠᠭ ᠶᠢᠡᠷ ᠶᠢᠡᠨ ᠣᠠᠴᠠᠯᠢᠭᠳᠠᠨᠠ᠃ ᠣᠯᠠᠮᠵᠢᠯᠠᠯᠳᠤ ᠮᠤᠩᠭ᠋ᠤᠯ ᠰᠢᠯᠦᠭ᠌ ᠤᠨ ᠣᠳᠤᠮ ᠳᠢᠭ᠌ ᠢ ᠳᠠᠭᠤᠷᠢᠶᠠᠵᠤ᠂ ᠦᠵᠡᠮᠵᠢ ᠳᠤ ᠪᠠᠨ ᠬᠠᠢ᠌ᠷᠠ ᠰᠡᠳᠬᠢᠯᠭᠡ ᠪᠠᠨ ᠠᠭᠤᠰᠬᠠᠨ ᠳᠡᠭᠡᠷᠡ ᠨᠢ ᠣᠮᠤᠭᠰᠢᠨ ᠪᠠᠬᠠᠳᠤᠭᠰᠠᠨ ᠰᠡᠳᠭᠢᠯ ᠤᠨ ᠪᠣᠳᠤᠭ ᠳᠠᠭᠠᠷᠠᠭᠤᠯᠬᠤ ᠪᠣᠯ ᠠᠩᠬᠠᠨ ᠤ ᠦᠶᠡ ᠶᠢᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠨᠠᠢ᠌ᠳᠠᠮ ᠣᠠᠴᠠᠯᠢᠭ ᠶᠤᠮ᠃ ᠴᠠᠭ ᠦᠶᠡ᠂ ᠨᠡᠢ᠌ᠭᠡᠮ ᠠᠬᠤᠢ᠂ ᠪᠠᠢ᠌ᠭᠠᠯᠢ ᠣᠷᠴᠢᠨ ᠨᠢ ᠳᠠᠳᠠᠨ ᠳᠤ ᠶᠠᠭᠤ ᠨᠢᠭᠡ ᠶᠢᠨ ᠲᠦᠯᠦᠭᠡ ᠵᠤᠪᠠᠨᠢᠬᠤ᠂ ᠪᠣᠭᠢᠨᠢᠳᠤᠬᠤ᠂ ᠰᠠᠨᠠᠭᠠᠰᠢᠷᠠᠬᠤ᠂ ᠡᠮᠵᠡᠭᠯᠡᠭᠦ ᠰᠡᠳᠬᠢᠯᠭᠡ ᠶᠢ ᠳᠠᠮᠠᠢ ᠳᠦᠷᠦᠭᠦᠯᠳᠡᠭ᠌ ᠦᠭᠡᠶ ᠪᠠᠢ᠌ᠭᠰᠠᠨ ᠪᠣᠯᠤᠭᠠᠤᠨ ᠳᠠᠷᠠ ᠪᠢᠯᠠ ᠦᠦ᠂ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠲᠤ ᠨᠢ ᠭᠤᠨᠢᠭ ᠤᠨ ᠠᠶᠠᠰ᠂ ᠭᠤᠳᠤᠷᠠᠯ ᠤᠨ ᠥᠩᠭᠡ ᠪᠠᠷᠤᠭ ᠬᠠᠷᠠᠭᠳᠠᠬᠤ ᠦᠭᠡᠶ᠃ ᠬᠠᠷᠢᠨ ᠵᠣᠢ᠌ᠷᠯᠠᠯ ᠳᠦᠷᠰᠤᠯᠠᠯ᠂ ᠠᠳᠠᠯᠢᠳᠬᠠᠯ ᠬᠠᠷᠢᠴᠠᠭᠤᠯᠤᠯ᠂ ᠪᠠᠯᠭᠡᠳᠡᠯ ᠤᠨ ᠠᠷᠭᠠ ᠶᠢ ᠴᠢᠳᠠᠮᠠᠭ ᠭᠡᠷᠡᠭᠯᠡᠨ ᠨᠤᠳᠤᠭ ᠣᠰᠤ᠂ ᠰᠠᠢ᠌ᠨ ᠰᠠᠢ᠌ᠬᠠᠨ ᠠᠮᠢᠳᠤᠷᠠᠯ ᠶᠢᠡᠨ ᠪᠠᠬᠠᠳᠤᠨ ᠮᠠᠭᠳᠠᠬᠤ᠂ ᠨᠡᠢ᠌ᠭᠡᠮ ᠤᠨ ᠭᠦᠭ᠍ᠵᠢᠯ ᠬᠤᠪᠢᠷᠠᠯ ᠳᠤ ᠪᠠᠶᠠᠰᠤᠨ ᠣᠮᠤᠭᠰᠢᠬᠤ᠂ ᠠᠪᠣ ᠡᠵᠢ ᠶᠢᠨ ᠠᠴᠢ ᠬᠠᠢ᠌ᠷᠠ ᠶᠢ ᠳᠤᠷᠠᠰᠤᠨ ᠰᠠᠨᠠᠭᠠᠯᠵᠠᠬᠤ᠂ ᠵᠠᠯᠠᠭᠤ ᠨᠠᠰᠤ ᠭᠢᠭᠡᠳ ᠬᠠᠢ᠌ᠷᠠ ᠳᠤᠷᠠᠯᠠᠯ ᠶᠢᠡᠨ ᠣᠶᠠᠩᠭ᠋ᠠᠯᠠᠨ ᠰᠢᠯᠦᠭᠯᠡᠭᠦ ᠨᠢ ᠪᠦᠭᠦᠢᠯᠡ ᠢᠷᠠᠭᠤ ᠨᠠᠢ᠌ᠷᠠᠭ ᠤᠨ ᠭᠢᠨᠢ ᠭᠤᠤᠯ ᠰᠡᠳᠦᠪᠯᠡᠭᠦᠨ᠂ ᠭᠦᠭ᠌ ᠠᠶᠠᠰ ᠪᠣᠯᠵᠤ ᠪᠠᠢ᠌ᠭᠰᠠᠨ ᠪᠠᠢ᠌ᠨᠠ᠃
ᠴᠢ᠊·ᠪᠦᠷᠢᠡᠪᠠᠶᠡᠷ ᠤᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠨᠤᠳᠤᠭ》᠂ 《ᠰᠠᠷᠯᠤᠭ ᠭᠦᠯᠦᠭᠯᠡᠭ᠍ᠰᠡᠨ ᠮᠠᠮᠪᠠ》᠂ ᠰᠡᠷᠡᠡᠭᠡᠷᠡᠯ ᠤᠨ 《ᠭᠦᠭᠡ ᠪᠠᠭᠤᠷᠢ》᠂ 《ᠳᠤᠭᠯᠠᠮ ᠤᠨ ᠭᠡᠷ》᠂ ᠳᠤᠭ ᠤᠨ 《ᠨᠠᠢ᠌ᠵᠢ ᠮᠢᠨᠢ᠂ ᠴᠠᠰᠤᠳᠤ ᠬᠠᠢ᠌ᠷᠬᠠᠨ ᠶᠢᠡᠷ ᠠᠶᠠᠯᠠᠪᠠᠤ》᠂ 《ᠭᠡᠦᠭᠡᠨ ᠤ ᠭᠦᠷᠡᠩ》᠂ 「ᠴᠣᠢ᠌ᠰᠦ᠋ᠷᠤᠩ」 ᠊ᠤᠨ 《ᠵᠢᠭᠦᠷ ᠣᠷᠭᠤᠭᠰᠠᠨ ᠠᠶᠠᠠᠴᠢᠨ》᠂ 《ᠴᠠᠢ᠌ᠳᠠᠮ ᠨᠤᠳᠤᠭ ᠤᠨ ᠣᠯᠠᠭᠠᠨ ᠰᠤᠬᠠᠢ》᠂ ᠬᠦ᠊·ᠴᠠᠷᠠᠩᠪᠠᠯ ᠤᠨ 《ᠢᠨᠠᠭ ᠤᠨ ᠰᠢᠵᠢᠮ》᠂ ᠴᠡᠪᠰᠢᠭ᠌ ᠤᠨ 《ᠠᠶᠠᠯᠠᠯ ᠤᠨ ᠰᠠᠢ᠌ᠬᠠᠨ》᠂ ᠺᠠᠮᠳᠠᠷ ᠤᠨ 《ᠬᠠᠢ᠌ᠷᠠ ᠪᠠ ᠰᠠᠷᠠ》᠂ ᠵᠠᠩᠮᠠᠷ ᠤᠨ 《ᠪᠢ ᠪᠣᠯ ᠨᠢᠭᠡ ᠰᠢᠷᠭᠡᠭ᠌ ᠡᠪᠠᠰᠤ》᠂ ᠣ·ᠴᠠᠷᠠᠠᠳᠤᠠᠳᠤᠪ ᠤᠨ 《ᠨᠠᠮᠤᠷᠵᠢᠩ ᠤᠨ ᠰᠦᠨᠢ》᠂ ᠪᠠ᠊·ᠴᠡᠭᠠᠭᠦ᠋ᠤ ᠶᠢᠨ 《ᠬᠤᠳᠠ ᠳᠤ ᠪᠠ ᠭᠦᠳᠡᠭᠡ ᠳᠤ》᠂ ᠯᠢᠮᠪᠣᠵᠠ ᠶᠢᠨ 《ᠨᠠᠰᠤᠨ ᠤ ᠨᠤᠳᠤᠭ》᠂ ᠠ᠊·ᠶᠤᠠᠵᠢ ᠶᠢᠨ 《ᠳᠡᠭᠡᠵᠢ ᠪᠠᠨ ᠡᠷᠭᠦᠨᠡ》᠂ ᠶᠤ᠋·ᠮᠥᠩᠭᠡᠪᠠᠭᠠᠲᠤᠷ ᠤᠨ 《ᠪᠠᠭᠤᠴᠠ》 (1982 ᠣᠨ) ᠵᠡᠷᠭᠡ ᠪᠦᠳᠦᠭᠡᠯ ᠤᠳ ᠢ ᠳᠤᠷᠠᠳᠴᠤ ᠪᠣᠯᠬᠤ ᠶᠤᠮ᠃ ᠣᠴᠢᠷ ᠨᠢ ᠠᠩᠬᠠ ᠡᠭᠢᠯᠡᠨ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠣᠷᠤᠯᠳᠤᠵᠤ ᠪᠠᠢ᠌ᠭᠠ ᠰᠢᠨᠡ ᠭᠠᠷᠴᠤᠳ ᠤᠨ ᠬᠤᠪᠢ ᠳᠤ ᠭᠡᠯᠡᠭᠦ ᠳᠤ ᠨᠠᠯᠢᠶᠠᠤᠨ ᠵᠥᠭᠡᠷ ᠴᠢᠨᠠᠷᠯᠢᠭ ᠪᠢᠴᠢᠵᠤ ᠪᠠᠢ᠌ᠭᠰᠠᠨ ᠨᠢ ᠢᠯᠡᠭᠡᠨ ᠪᠠᠢ᠌ᠨᠠ᠃ ᠭᠦᠮᠤᠨ ᠳᠤ ᠪᠠᠢ᠌ᠳᠠᠭ ᠶᠠᠭᠤᠮᠠ ᠨᠠᠳᠠ ᠴᠤ ᠪᠠᠢ᠌ᠬᠤ ᠶᠤᠰᠤᠳᠠᠢ ᠭᠡᠮᠡᠨ ᠪᠢᠷ ᠶᠢᠡᠨ ᠢᠷᠯᠠᠨ ᠪᠢᠯᠢᠭ᠌ ᠶᠢᠡᠨ ᠬᠤᠷᠴᠠᠯᠠᠭᠠᠤᠨ ᠪᠣᠰᠤᠭᠰᠠᠨ ᠳᠠᠷᠠ ᠶᠡᠭᠡ ᠵᠤᠷᠢᠭ ᠣᠬᠠᠭᠠᠨ᠂ ᠭᠦᠰᠡᠯ ᠢᠳᠡᠭᠡᠯ᠂ ᠣᠷᠤᠯᠳᠤᠯᠭᠠ ᠴᠢᠷᠮᠠᠢ᠌ᠯᠭᠠ ᠳᠤ ᠨᠢ ᠮᠥᠩᠭᠡ ᠴᠠᠰᠤᠳᠤ ᠠᠭᠤᠯᠠᠰ ᠨᠢ ᠭᠦᠷᠳᠡᠯᠡ ᠣᠶᠠᠷᠠᠨ ᠳᠤᠭᠳᠤᠯᠵᠤ ᠬᠠᠢ᠌ᠯᠤᠨ ᠣᠷᠤᠰᠤᠮᠠᠷ ᠪᠣᠯᠵᠤ ᠪᠠᠢ᠌ᠭᠰᠠᠨ ᠪᠢᠯᠠ ᠦᠦ ⁉
ᠴᠢ᠊·ᠪᠦᠷᠢᠡᠪᠠᠶᠡᠷ ᠪᠠᠭᠰᠢ ᠶᠢᠨ ᠰᠢᠯᠦᠭ᠌ ᠲᠤ ᠦᠰᠴᠤ ᠳᠦᠷᠦᠭ᠍ᠰᠡᠨ ᠦᠪᠣᠷ ᠮᠤᠩᠭ᠋ᠤᠯ ᠨᠤᠳᠤᠭ ᠶᠢᠡᠨ ᠪᠢᠰᠢ᠂ ᠠᠵᠢᠯᠯᠠᠵᠤ ᠠᠮᠢᠳᠤᠷᠠᠭᠰᠠᠨ ᠳᠡᠭᠡᠳᠤ ᠮᠤᠩᠭ᠋ᠤᠯ ᠨᠤᠳᠤᠭ ᠶᠢᠡᠨ ᠮᠠᠭᠳᠠᠨ ᠣᠶᠠᠩᠭ᠋ᠠᠯᠠᠭᠰᠠᠨ ᠰᠢᠯᠦᠭ᠌ ᠤᠳ ᠵᠥᠩᠳᠡᠭᠡᠨ ᠪᠣᠢ᠃ ᠦᠪᠡᠷ ᠤᠨ ᠨᠤᠳᠤᠭ ᠶᠢᠡᠨ ᠰᠠᠨᠠᠬᠤ ᠦᠭᠡᠶ ᠭᠦᠮᠤᠨ ᠭᠡᠵᠤ ᠬᠠᠮᠢᠭᠠ ᠪᠠᠢ᠌ᠬᠤ ᠪᠣᠢ᠂ ᠨᠠᠩ ᠴᠤ ᠦᠪᠡᠷ ᠤᠨ ᠨᠤᠳᠤᠭ ᠡᠴᠡ ᠪᠠᠨ ᠰᠠᠯᠵᠤ᠂ ᠭᠦᠮᠤᠨ ᠤ ᠨᠤᠳᠤᠭ ᠲᠤ ᠢᠷᠡᠭ᠍ᠰᠡᠨ ᠭᠦᠮᠤᠨ ᠳᠤ ᠪᠦᠷ ᠭᠡᠴᠡᠭᠦᠤ ᠡ᠃ ᠭᠡᠭᠦ ᠳᠤ ᠴᠢ᠊·ᠪᠦᠷᠢᠡᠪᠠᠶᠡᠷ ᠶᠢᠨ ᠬᠠᠢ᠌ᠷᠠ ᠰᠡᠳᠭᠢᠯ᠂ ᠣᠶᠤᠨ ᠪᠣᠳᠤᠯ ᠭᠡᠳᠥᠢᠨᠡᠢ ᠳᠠᠷᠠ ᠪᠦᠭᠦᠨ ᠡᠴᠡ ᠬᠠᠯᠢᠨ ᠭᠠᠷᠴᠤ ᠨᠠᠩ ᠬᠤᠯᠠ᠂ ᠨᠠᠩ ᠦᠷᠭᠡᠨ᠂ ᠨᠠᠩ ᠦᠨᠳᠦᠷ ᠲᠤ ᠳᠡᠭᠦᠯᠢᠨ ᠪᠣᠳᠤᠯ ᠤᠨ ᠭᠢᠵᠠᠭᠠᠷ ᠶᠢᠡᠨ ᠳᠠᠪᠠᠵᠤ ᠰᠡᠳᠭᠢᠯ ᠤᠨ ᠭᠢᠯᠢ ᠪᠠᠨ ᠳᠠᠯᠠᠵᠤ ᠴᠢᠳᠠᠵᠠᠢ᠃ ᠨᠤᠳᠤᠭ ᠭᠢᠯᠢ ᠲᠡᠶ ᠴᠤ ᠰᠡᠳᠭᠢᠯ ᠳᠤ ᠭᠢᠯᠢ ᠪᠠᠢ᠌ᠬᠤ ᠦᠭᠡᠶ᠃ ᠳᠡᠭᠡᠭᠡᠳ ᠭᠢᠯᠢ ᠦᠭᠡᠶ ᠨᠤᠳᠤᠭ ᠶᠢᠡᠨ ᠭᠦᠮᠤᠨ ᠬᠠᠷᠠ ᠵᠠᠶᠠᠭᠠᠳᠤ ᠦᠪᠡᠷ ᠶᠢᠡᠨ ᠬᠠᠰᠢᠵᠤ ᠦᠵᠡᠯ ᠣᠬᠠᠮᠰᠠᠷ᠂ ᠣᠶᠤᠨ ᠰᠠᠨᠠᠭᠠ ᠪᠠᠨ ᠬᠤᠷᠢᠭᠰᠠᠨ ᠭᠡᠷᠡᠭ᠌᠃ ᠴᠢ᠊·ᠪᠦᠷᠢᠡᠪᠠᠶᠡᠷ ᠪᠠᠭᠰᠢ ᠡᠢ᠌ᠮᠦᠷᠭᠦ ᠨᠢᠳᠤᠨ ᠳᠤ ᠥᠵᠡᠭ᠍ᠳᠡᠭᠦ ᠦᠭᠡᠶ ᠨᠠᠷᠢᠨ ᠭᠢᠯᠢ ᠳᠤ ᠰᠡᠳᠭᠢᠯ ᠣᠶᠤᠨ ᠶᠢᠡᠨ ᠬᠤᠷᠢᠭᠠ ᠦᠭᠡᠶ᠂ ᠬᠠᠷᠢᠨ ᠬᠠᠢ᠌ᠷᠠ ᠭᠦᠰᠡᠯ ᠶᠢᠡᠷ ᠶᠢᠡᠨ ᠵᠢᠭᠦᠷ ᠭᠢᠵᠤ ᠠᠶᠠᠨ ᠤ ᠰᠢᠪᠠᠭᠤ ᠰᠢᠭ ᠨᠢᠰᠤᠨ ᠭᠠᠷᠴᠠᠢ᠃ 《ᠠᠭᠯᠠᠭ ᠥᠡᠳᠦᠷᠯᠢᠭ᠌᠂ ᠬᠠᠨ ᠬᠠᠢ᠌ᠷᠬᠠᠨ᠂ ᠨᠤᠶᠠᠨ ᠰᠠᠷᠢᠳᠠᠭ / ᠠᠪᠣᠷᠭᠤ ᠳᠦᠷᠢ ᠪᠠᠷ ᠳᠡᠭ᠍ᠷᠢ ᠶᠢ ᠪᠠᠭᠠᠨᠠᠳᠠᠵᠤ ᠬᠠᠨᠠᠢ᠌ᠨ ᠵᠤᠭᠰᠤᠭᠰᠠᠨ/ ᠠᠭᠤᠯᠠ ᠨᠢᠷᠤᠭᠤ᠂ ᠮᠦᠩᠭᠦᠨ ᠰᠡᠵᠢᠭᠦᠷ᠂ ᠮᠦᠰᠤᠳᠤ ᠣᠷᠭᠢᠯ / ᠠᠯᠳᠠᠨ ᠨᠠᠷᠠᠨ ᠳᠤ ᠭᠢᠯᠪᠠᠭᠠ ᠰᠠᠴᠤᠷᠠᠵᠤ ᠡᠡᠯᠡᠰᠭᠢᠨ ᠪᠦᠵᠢᠭᠯᠡᠭ᠍ᠰᠡᠨ/ ᠡᠨᠡ ᠪᠣᠯ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠨᠤᠳᠤᠭ / ᠡᠭᠡ ᠣᠯᠤᠰ ᠤᠨ ᠪᠠᠷᠠᠭᠤᠨ ᠬᠣᠢ᠌ᠳᠤ ᠥᠡᠳᠦᠷᠯᠢᠭ᠌ ᠡ ︕》 ᠭᠡᠮᠡᠨ ᠰᠢᠯᠦᠭᠯᠡᠭ᠍ᠰᠡᠨ ᠨᠢ ᠪᠣᠢ᠃ ᠦᠵᠡᠮᠵᠢ ᠪᠣᠯᠤᠨ ᠰᠡᠳᠬᠢᠯᠭᠡ᠂ ᠣᠶᠠᠩᠭ᠋ᠠᠯᠠᠯ ᠭᠢᠭᠡᠳ ᠭᠦᠦᠷᠨᠢᠯ ᠬᠠᠷᠢᠯᠴᠠᠨ ᠠᠭᠤᠰᠤᠯᠴᠠᠨ ᠣᠭᠰᠠᠷᠠᠭᠤᠯᠤᠯ ᠣᠷᠤᠯᠠᠭᠤᠯᠤᠯ ᠵᠡᠷᠭᠡᠴᠡᠭᠡᠳ ᠰᠡᠳᠭᠢᠯ ᠵᠢᠷᠦᠭᠡ᠂ ᠣᠶᠤᠨ ᠰᠠᠨᠠᠭᠠᠨ ᠳᠤ ᠰᠥᠡᠳᠡᠷᠯᠡᠭ᠍ᠰᠡᠨ ᠬᠠᠢ᠌ᠷᠠ ᠶᠢᠨ ᠥᠡᠳᠦᠷᠯᠢᠭ᠌ ᠢ ᠱᠤᠭᠤᠨ ᠪᠣᠰᠬᠠᠪᠠ᠃ ᠠᠢ᠌ᠵᠢᠮ ᠴᠤᠭᠢᠯᠭᠠ᠂ ᠤᠳᠬᠠ ᠶᠢᠨ ᠳᠠᠯᠠᠯᠳᠠ᠂ ᠳᠠᠪᠳᠠᠯᠳᠠ ᠨᠢ ᠠᠷᠭᠠ ᠦᠭᠡᠶ ᠳ᠋·ᠨᠠᠴᠤᠭᠳᠤᠷᠵᠢ ᠶᠢᠨ 《ᠮᠢᠨᠤ ᠨᠤᠳᠤᠭ》 ᠊ᠢ ᠰᠠᠨᠠᠭᠳᠠᠭᠤᠯᠤᠨᠠ᠃ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠨᠤᠳᠤᠭ ᠲᠤ ᠢᠷᠠᠵᠤ ᠥᠩᠭᠡᠷᠡᠭᠡ ᠦᠭᠡᠶ ᠭᠦᠮᠤᠨ ᠴᠤ ᠴᠢ᠊·ᠪᠦᠷᠢᠡᠪᠠᠶᠡᠷ ᠪᠠᠭᠰᠢ ᠶᠢᠨ ᠰᠢᠯᠦᠭ᠌ ᠪᠦᠳᠦᠭᠡᠯ ᠡᠴᠡ ᠥᠡᠳᠦᠷᠯᠢᠭ᠌ ᠨᠤᠳᠤᠭ ᠤᠨ ᠰᠦᠷᠯᠢᠭ᠌ ᠶᠡᠭᠡᠮᠰᠦᠭ᠌᠂ ᠦᠪᠡᠷᠮᠢᠴᠠ ᠦᠵᠡᠮᠵᠢ᠂ ᠠᠭᠤᠷ ᠠᠮᠢᠰᠬᠤᠯ ᠢ ᠣᠢ᠌ᠯᠠᠭᠠᠨ ᠠᠪᠬᠤ ᠳᠤ ᠵᠤᠪᠠᠬᠤ ᠶᠠᠭᠤᠮᠠ ᠦᠭᠡᠶ᠃ ᠰᠢᠯᠦᠭ᠌ ᠪᠦᠳᠦᠭᠡᠯ ᠶᠢᠡᠷ ᠶᠢᠡᠨ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠨᠤᠳᠤᠭ ᠣᠰᠤ᠂ ᠠᠵᠤ ᠠᠮᠢᠳᠤᠷᠠᠯ᠂ ᠵᠠᠩ ᠳᠠᠳᠬᠠᠯ᠂ ᠭᠡᠯᠡ ᠰᠤᠶᠤᠯ ᠢ ᠭᠠᠳᠠᠭᠰᠢ ᠰᠠᠨᠠᠭᠠᠴᠢᠯᠭᠠ ᠲᠡᠶ ᠣᠬᠠᠭᠤᠯᠤᠨ ᠰᠤᠷᠳᠠᠯᠴᠢᠯᠠᠵᠤ ᠪᠠᠢ᠌ᠭᠰᠠᠨ ᠣᠬᠠᠮᠰᠠᠷᠳᠤ ᠣᠷᠤᠯᠳᠤᠯᠭᠠ ᠴᠢ᠊·ᠪᠦᠷᠢᠡᠪᠠᠶᠡᠷ ᠪᠠᠭᠰᠢ ᠶᠢᠨ ᠰᠢᠯᠦᠭ᠌ ᠵᠤᠬᠢᠶᠠᠯ ᠤᠨ ᠶᠠᠰᠤ ᠴᠢᠮᠦᠭᠡᠨ ᠳᠤ ᠣᠷᠤᠳᠠᠯᠠ ᠰᠢᠩᠭᠡᠵᠤ ᠪᠠᠢ᠌ᠨᠠ᠃
ᠰᠡᠷᠡᠡᠭᠡᠷᠡᠯ ᠪᠠᠭᠰᠢ ᠶᠢᠨ ᠮᠡᠳᠡᠯᠭᠡ ᠪᠣᠯᠪᠠᠰᠤᠷᠠᠯ᠂ ᠣᠷᠠ ᠠᠪᠢᠶᠠᠰ᠂ ᠭᠡᠯᠡ ᠭᠡᠯᠡᠯᠭᠡ ᠠᠯᠢ ᠳᠠᠯᠠ ᠡᠴᠡ ᠨᠢ ᠠᠪᠴᠤ ᠥᠵᠡᠭ᠍ᠰᠡᠨ ᠴᠤ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠨᠢ ᠵᠤᠭᠢᠬᠤ ᠣᠷᠠᠯᠢᠭ ᠤᠨ ᠪᠣᠯᠪᠠᠰᠤᠷᠠᠯ ᠳᠤ ᠭᠦᠷᠴᠤ ᠪᠠᠢ᠌ᠭᠰᠠᠨ ᠨᠢ ᠢᠯᠡᠭᠡᠨ᠃ ᠳᠡᠭᠦᠨ ᠤ ᠣᠯᠠᠩᠭᠢ ᠪᠦᠳᠦᠭᠡᠯ ᠭᠡᠯᠡ ᠨᠠᠢ᠌ᠷᠠᠭᠤᠯᠭᠠ ᠰᠠᠢ᠌ᠳᠠᠢ᠂ ᠰᠢᠷᠭᠠᠭᠠᠯᠳᠠ ᠳᠤᠩᠭ᠋ᠠᠯᠠᠭ᠂ ᠰᠡᠳᠬᠢᠯᠭᠡ ᠦᠨᠡᠠᠴᠢ᠂ ᠰᠠᠳᠤᠪ ᠴᠢᠯᠦᠭᠡᠳᠡᠢ᠂ ᠤᠳᠬᠠ ᠰᠠᠷᠠᠭᠤᠯ ᠵᠡᠷᠭᠡ ᠣᠠᠴᠠᠯᠢᠭ ᠲᠡᠶ᠃ ᠰᠡᠷᠡᠡᠭᠡᠷᠡᠯ ᠪᠠᠭᠰᠢ ᠶᠢᠨ ᠪᠢᠴᠢᠭ᠍ᠰᠡᠨ 《ᠳᠤᠭᠯᠠᠮ ᠤᠨ ᠭᠡᠷ》 ᠪᠣᠯ ᠳᠡᠭᠡᠳᠤ ᠮᠤᠩᠭ᠋ᠤᠯ ᠳᠤ ᠬᠠᠮᠤᠭ ᠠᠩᠬᠠ ᠨᠡᠢ᠌ᠳᠡᠯᠡᠭ᠍ᠳᠡᠭ᠍ᠰᠡᠨ ᠭᠦᠦᠷᠨᠢᠯ ᠨᠠᠢ᠌ᠷᠠᠭᠯᠠᠯ ᠮᠦᠨ᠃ ᠨᠠᠢ᠌ᠷᠠᠭᠯᠠᠯ ᠳᠤ ᠭᠠᠷᠴᠤ ᠪᠠᠢ᠌ᠭᠠ ᠳᠤᠰᠤᠷᠬᠠᠭ ᠱᠠᠩᠳᠠᠭᠤᠨ ᠨᠤᠳᠤᠭ ᠤᠨ ᠭᠡᠯᠡᠯᠭᠡ᠂ ᠣᠷᠠᠨ ᠳᠦᠷᠰᠤᠯᠠᠯ᠂ ᠨᠠᠷᠢᠨ ᠵᠢᠷᠤᠭᠯᠠᠯ ᠨᠢ ᠳᠤᠰ ᠪᠦᠳᠦᠭᠡᠯ ᠶᠢᠡᠨ ᠬᠤᠪᠢ ᠶᠢᠨ ᠭᠠᠳᠠᠨᠠ ᠠᠮᠳᠠᠷᠬᠠᠭ ᠮᠦᠷᠳᠡᠭᠡᠨ ᠱᠥᠯᠦᠷᠭᠡᠭ᠌ ᠪᠣᠯᠭᠠᠨ ᠣᠩᠰᠢᠭᠴᠢᠳ ᠤᠨ ᠳᠠᠭᠠᠰᠢᠶᠠᠯ ᠳᠤ ᠭᠦᠷᠭᠡᠵᠡᠢ᠃ ᠨᠠᠢ᠌ᠷᠠᠭᠯᠠᠯ ᠤᠨ ᠡᠭᠢᠨ ᠳᠤ 《ᠰᠠᠭᠢᠰ ᠰᠠᠭᠢᠰ ᠨᠠᠮᠤᠷ ᠤᠨ ᠵᠢᠪᠠᠷ᠂ ᠭᠠᠩᠬᠤᠰ ᠭᠠᠩᠬᠤᠰ ᠰᠢᠷᠭᠠᠯ ᠡᠪᠠᠰᠤ᠂ ᠢᠷᠠᠰ ᠢᠷᠠᠰ ᠳᠠᠯᠠ ᠶᠢᠨ ᠰᠦᠷᠦᠭ᠌᠂ ᠭᠠᠩᠭ᠋ᠠᠷ ᠭᠤᠩᠭ᠋ᠤᠷ ᠭᠠᠯᠠᠭᠤᠨ ᠰᠢᠪᠠᠭᠤ ᠁》 ᠭᠡᠮᠡᠭᠦ ᠭᠦᠳᠡᠯᠭᠡᠭᠡᠡᠳᠤ ᠳᠦᠷᠰᠤᠯᠠᠯ ᠪᠣᠢ᠃ ᠣᠶᠠᠷᠠᠭᠤᠨ ᠳᠤᠭᠳᠤᠯᠤᠩᠭ᠋ᠤᠢ ᠠᠳᠠᠯᠠ ᠪᠠᠨ ᠭᠦᠨ ᠳᠠᠯᠳᠠ ᠮᠦᠷᠦᠭᠡᠳᠦᠯ ᠤᠨ ᠠᠶᠠᠰ ᠨᠡᠪᠴᠢᠭ᠍ᠰᠡᠨ ᠡᠢ᠌ᠮᠦᠷᠭᠦ ᠪᠢᠴᠢᠯᠭᠡ ᠨᠢ ᠣᠩᠰᠢᠭᠴᠢᠳ ᠶᠢᠡᠨ ᠡᠷᠭᠡ ᠦᠭᠡᠶ ᠨᠢᠭᠡ ᠵᠣᠢ᠌ᠯ ᠤᠨ ᠣᠶᠠᠷᠠᠨ ᠰᠠᠨᠠᠭᠠᠰᠢᠷᠠᠭᠰᠠᠨ ᠪᠠᠢ᠌ᠳᠠᠯ ᠳᠤ ᠭᠦᠳᠦᠯᠤᠨ ᠣᠷᠤᠭᠤᠯᠳᠠᠭ ᠨᠢ ᠵᠢᠭ᠍ᠳᠡᠢ᠃ ᠵᠤᠬᠢᠶᠠᠭᠴᠢ ᠨᠠᠮᠤᠷ ᠤᠨ ᠪᠠᠢ᠌ᠭᠠᠯᠢ ᠪᠠᠨ ᠥᠵᠡᠭᠡᠳ ᠰᠡᠳᠭᠢᠯ ᠨᠢ ᠣᠶᠠᠷᠠᠨ ᠳᠤᠭᠳᠤᠯᠬᠤ ᠪᠠᠷ ᠪᠢᠷ ᠤᠨ ᠥᠵᠦᠭᠦᠷ ᠨᠢ ᠴᠤ ᠳᠠᠭᠠᠭᠠᠤᠨ ᠣᠶᠠᠷᠠᠨ ᠵᠢᠷᠢᠯᠵᠡᠭᠡᠳ ᠪᠠᠢ᠌ᠭᠰᠠᠨ ᠭᠡᠮᠡᠷ᠃ ᠶᠠᠷᠤᠨᠢ ᠰᠡᠷᠡᠡᠭᠡᠷᠡᠯ ᠪᠠᠭᠰᠢ ᠶᠢᠨ ᠪᠦᠭᠦᠢᠯᠡ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠤᠨ ᠭᠠᠳᠠᠷ ᠳᠤᠳᠤᠷ ᠬᠠᠯᠢᠰᠤᠨ ᠳᠤ ᠪᠦᠰᠡᠭᠦᠢ ᠭᠦᠮᠤᠨ ᠤ ᠨᠠᠷᠢᠨ ᠮᠠᠳᠠᠷᠠᠮᠵᠢ᠂ ᠨᠠᠮ ᠮᠦᠷᠦᠭᠡᠳᠦᠯ᠂ ᠭᠦᠨ ᠰᠠᠨᠠᠭᠠᠰᠢᠷᠠᠯ ᠤᠨ ᠨᠤᠭᠤᠭᠠᠨ ᠪᠣᠳᠤᠭ ᠨᠠᠭᠠᠯᠳᠤᠨ ᠬᠠᠳᠠᠭᠠᠤᠨ ᠰᠢᠯᠦᠭ᠌ ᠢ ᠨᠢ ᠣᠯᠠᠮ ᠥᠩᠭᠡᠯᠢᠭ᠌ ᠪᠣᠯᠭᠠᠵᠠᠢ᠃ ᠳᠠᠷᠠ ᠮᠦᠷᠳᠡᠭᠡᠨ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠢᠨᠠᠭ ᠤᠨ ᠳᠠᠭᠤᠤ᠂ ᠵᠣᠢ᠌ᠷ ᠰᠠᠴᠠᠨ ᠥᠭᠡᠰ ᠡᠴᠡ ᠵᠤᠭᠢᠬᠤ ᠣᠷᠠᠯᠢᠭ ᠤᠨ ᠰᠢᠮᠠ ᠭᠦᠷᠳᠡᠵᠤ᠂ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠲᠤ ᠪᠠᠨ ᠪᠦᠳᠦᠭᠡᠯᠴᠢ ᠪᠠᠷ ᠠᠰᠢᠭᠯᠠᠵᠤ ᠪᠠᠢ᠌ᠭᠰᠠᠨ ᠨᠢ ᠣᠢ᠌ᠯᠠᠭᠠᠮᠵᠢᠳᠠᠢ᠃ ᠨᠠᠢ᠌ᠷᠠᠭᠯᠠᠯ ᠳᠤ 《ᠵᠡᠭᠦᠳᠤ ᠪᠠᠷ ᠥᠵᠡᠭ᠍ᠰᠡᠨ ᠣᠷᠴᠢᠯᠠᠩ / ᠰᠠᠢ᠌ᠬᠠᠨ ᠪᠠᠢ᠌ᠭᠠᠤᠨ ᠶᠠᠭᠠᠭᠢᠬᠤ ᠪᠣᠢ ︖ / ᠵᠤᠯ ᠦᠭᠡᠶ ᠬᠤᠶᠠᠷ ᠤᠨ ᠢᠨᠠᠭ / ᠠᠷᠢᠭᠤᠨ ᠪᠠᠢ᠌ᠭᠠᠤᠨ ᠶᠠᠭᠠᠭᠢᠬᠤ ᠪᠣᠢ ︖》 ᠭᠡᠮᠡᠭᠦ ᠦᠪᠡᠷ ᠤᠨ ᠬᠤᠪᠢ ᠵᠠᠶᠠᠭᠠᠨ ᠳᠤ ᠪᠠᠨ ᠭᠤᠳᠤᠷᠠᠨ ᠭᠤᠨᠢᠵᠤ᠂ ᠨᠡᠢ᠌ᠭᠡᠮ ᠤᠨ ᠳᠡᠭ᠍ᠰᠢ ᠪᠣᠰᠤ ᠳᠤ ᠳᠤᠷᠠ ᠥᠭᠡᠢ᠌ᠴᠡᠭ᠍ᠰᠡᠨ ᠪᠠᠳᠠᠭ ᠪᠣᠢ᠃ ᠡᠨᠡ ᠨᠢ ᠶᠠᠭ 《ᠴᠠᠰᠤᠳᠤ ᠴᠠᠭᠠᠨ ᠠᠭᠤᠯᠠ ᠶᠢ ᠨᠢ / ᠴᠠᠪᠴᠢᠬᠤ ᠶᠢᠨ ᠪᠢᠰᠢ ᠶᠠᠭᠠᠭᠢᠬᠤ ᠪᠣᠢ ︖ / ᠴᠠᠭᠠᠨᠠ ᠪᠠᠨ ᠭᠦᠮᠤᠨ ᠲᠡᠶ ᠴᠢᠮᠠ ᠶᠢ / ᠠᠯᠪᠠᠳᠠᠬᠤ ᠶᠢᠨ ᠪᠢᠰᠢ ᠶᠠᠭᠠᠭᠢᠬᠤ ᠪᠣᠢ ︖》 ᠭᠡᠳ ᠳᠠᠭᠤᠯᠠᠳᠠᠭ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠢᠨᠠᠭ ᠤᠨ ᠳᠠᠭᠤᠤ ᠲᠡᠶ ᠤᠳᠬᠠ ᠤᠢ᠌ᠷᠠᠳᠤᠨ ᠰᠠᠨᠠᠭᠠ ᠳᠠᠭᠠᠷᠠᠵᠤ᠂ ᠪᠢᠴᠢᠯᠭᠡ ᠢᠵᠢᠯᠰᠢᠵᠤ ᠪᠠᠢ᠌ᠭᠠ᠃ ᠳᠡᠭᠡᠭᠡᠳ ᠰᠢᠭᠤᠳ ᠠᠯᠢ ᠨᠢ ᠭᠡᠳ ᠵᠢᠭᠠᠴᠢᠬᠠᠵᠤ ᠴᠢᠳᠠᠬᠤ ᠦᠭᠡᠶ ᠪᠦᠭᠦᠢᠯᠡ ᠨᠡᠢ᠌ᠭᠡᠮ ᠤᠨ ᠭᠡᠮ ᠠᠯᠳᠠᠭᠳᠠᠯ ᠪᠣᠯᠤᠭᠰᠠᠨ ᠡᠷᠭᠡ ᠠᠰᠢᠭ᠂ ᠥᠩᠭᠡ ᠳᠠᠯᠠ᠂ ᠭᠦᠮᠤᠨ ᠮᠦᠰᠤ ᠶᠢ ᠬᠤᠷᠴᠠ ᠪᠢᠷ ᠶᠢᠡᠷ ᠳᠠᠳᠠᠯᠠᠨ ᠥᠵᠡᠭᠦᠯᠦᠭ᠍ᠰᠡᠨ ᠨᠢ ᠪᠢᠰᠢᠷᠡᠭᠦᠰᠢᠳᠡᠢ᠃ ᠳᠤᠰ ᠨᠠᠢ᠌ᠷᠠᠭᠯᠠᠯ ᠳᠤ ᠬᠤᠪᠢ ᠶᠢᠨ ᠠᠳᠠᠭᠠᠷᠬᠠᠯ ᠵᠢᠳᠦᠭᠡᠷᠭᠡᠯ ᠡᠴᠡ ᠪᠣᠯᠤᠭᠠᠤᠨ ᠬᠠᠮᠳᠤ ᠨᠠᠢ᠌ᠵᠠ ᠶᠢᠨ ᠶᠢᠡᠨ ᠠᠮᠢ ᠨᠠᠰᠤ ᠶᠢ ᠭᠦᠷᠳᠡᠯᠡ ᠬᠤᠷᠤᠭᠠᠵᠤ᠂ ᠠᠮᠠᠷᠠᠭ ᠬᠤᠤᠰ ᠢ ᠠᠮᠢᠳᠤ ᠪᠠᠷ ᠬᠠᠭᠠᠴᠠᠭᠤᠯᠤᠭᠰᠠᠨ ᠳᠡᠭ᠍ᠷᠢ ᠳᠤᠯᠤᠮᠠ ᠶᠠᠯᠠ ᠨᠢᠭᠦᠯ ᠭᠢᠴᠢᠭᠡᠭᠡᠳ ᠨᠤᠶᠠᠨ ᠡᠴᠢᠭᠡ ᠶᠢᠨ ᠶᠢᠡᠨ ᠥᠩᠭᠡ ᠪᠠᠷ ᠶᠠᠮᠠᠷᠴᠤ ᠬᠠᠤᠯᠢ ᠶᠢᠨ ᠬᠠᠷᠢᠭᠤᠴᠠᠯᠭᠠ ᠳᠤ ᠣᠨᠠᠯ ᠦᠭᠡᠶ ᠥᠩᠭᠡᠷᠡᠵᠤ ᠪᠠᠢ᠌ᠭᠠ ᠦᠨᠡᠨ ᠪᠠᠢ᠌ᠳᠠᠯ ᠢ ᠵᠢᠷᠤᠭᠯᠠᠨ ᠥᠵᠡᠭᠦᠯᠵᠡᠢ᠃ ᠡᠢ᠌ᠮᠦᠷᠭᠦ ᠪᠠᠢ᠌ᠳᠠᠯ ᠮᠠᠨ ᠤ ᠬᠠᠵᠠᠭᠤ ᠬᠠᠪᠢ ᠪᠠᠷ ᠣᠳᠤ ᠴᠤ ᠮᠦᠨ ᠣᠷᠤᠰᠢᠭᠰᠠᠭᠠᠷ ᠪᠣᠢ᠃ ᠡᠨᠡ ᠬᠠᠷᠠᠭᠠᠰᠤ ᠡᠴᠡ ᠠᠪᠤᠨ ᠥᠵᠡᠭᠦ ᠳᠤ ᠰᠡᠷᠡᠡᠭᠡᠷᠡᠯ ᠪᠠᠭᠰᠢ᠂ ᠮᠠᠨ ᠤ ᠨᠢᠳᠤᠨ ᠳᠤ ᠥᠵᠡᠭ᠍ᠳᠡᠨ ᠪᠠᠢ᠌ᠭᠠ ᠭᠡᠵᠢᠶᠡ ᠴᠤ ᠵᠠᠰᠠᠷᠠᠳᠠᠭ ᠦᠭᠡᠶ ᠨᠡᠢ᠌ᠭᠡᠮ ᠤᠨ ᠭᠡᠮ ᠠᠷᠬᠠᠭ ᠢ ᠨᠠᠢ᠌ᠷᠠᠭ ᠤᠨ ᠰᠤᠷ ᠶᠢᠡᠷ ᠳᠠᠰᠢᠭᠤᠷᠳᠠᠨ ᠥᠵᠡᠭᠦᠯᠵᠤ᠂ ᠳᠤᠩᠭ᠋ᠠᠨ ᠰᠡᠳᠭᠢᠭᠦᠰᠢᠳᠡᠢ ᠰᠠᠳᠤᠪ ᠤᠨ ᠥᠵᠦᠭᠦᠷ ᠬᠠᠶᠠᠭᠰᠠᠨ ᠶᠢᠡᠷ ᠵᠤᠭᠰᠤᠬᠤ ᠦᠭᠡᠶ ᠴᠢᠨᠠᠭᠰᠢᠯᠠᠪᠠᠯ ᠨᠠᠢ᠌ᠷᠠᠭᠯᠠᠯ ᠤᠨ ᠶᠢᠡᠨ ᠠᠮᠢ ᠨᠠᠰᠤ᠂ ᠦᠨᠡ ᠦᠷᠳᠡᠭ᠌ ᠢ ᠵᠠᠭᠤᠨ ᠡᠴᠡ ᠵᠠᠭᠤᠨ ᠳᠠᠪᠠᠳᠠᠯᠠ ᠣᠷᠳᠤᠳᠬᠠᠨ ᠥᠡᠳᠦᠷᠵᠢᠭᠦᠯᠵᠤ ᠴᠢᠳᠠᠭᠰᠠᠨ ᠭᠡᠵᠤ ᠦᠵᠡᠨᠡ᠃
ᠲ᠋ᠤᠭ ᠪᠣᠯᠤᠨ「ᠴᠣᠢ᠌ᠰᠦ᠋ᠷᠤᠩ」 ᠬᠤᠶᠠᠷ ᠨᠥᠭᠦᠷ ᠪᠣᠯ ᠵᠠᠯᠠᠭᠤ ᠨᠠᠰᠤ᠂ ᠡᠷᠳᠡᠮ ᠠᠪᠢᠶᠠᠰ᠂ ᠭᠦᠯᠦᠰᠤ ᠭᠦᠴᠤ ᠪᠠᠨ ᠪᠦᠷ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠤᠳᠬᠠ ᠰᠤᠶᠤᠯ ᠤᠨ ᠣᠢ᠌ᠯᠠᠰ ᠲᠤ ᠬᠠᠷᠠᠮ ᠦᠭᠡᠶ ᠡᠷᠭᠦᠭ᠍ᠰᠡᠨ ᠠᠬᠠᠮᠠᠤᠨ ᠰᠤᠶᠤᠯ ᠤᠨ ᠵᠢᠳᠭᠦᠯᠳᠡᠳ ᠶᠤᠮ᠃ ᠦᠨᠦᠳᠤᠷ ᠤᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠣᠷᠠᠨ ᠵᠤᠬᠢᠶᠠᠯ》 ᠊ᠤᠨ ᠭᠦᠭ᠍ᠵᠢᠯ ᠪᠣᠵᠠᠭᠠᠢ᠌ᠷᠠᠯ ᠳᠤ ᠡᠨᠡ ᠬᠤᠶᠠᠷ ᠭᠦᠮᠤᠨ ᠤ ᠭᠦᠴᠤ ᠭᠦᠯᠦᠰᠤ᠂ ᠣᠶᠤᠨ ᠣᠬᠠᠭᠠᠨ ᠰᠢᠩᠭᠡᠭ᠍ᠰᠡᠨ ᠭᠡᠳᠡᠭ᠌ ᠢ ᠥᠭᠡᠢ᠌ᠰᠭᠡᠭᠦ ᠠᠷᠭᠠ ᠦᠭᠡᠶ᠃ ᠳᠠᠷᠠ ᠬᠤᠶᠠᠭᠤᠯᠠ 《ᠴᠡᠴᠡᠭ᠍ᠳᠤ ᠴᠠᠢ᠌ᠳᠠᠮ》 ᠰᠡᠳᠭᠦᠯ ᠳᠤ ᠨᠠᠢ᠌ᠷᠠᠭᠤᠯᠤᠭᠴᠢ ᠪᠣᠯᠤᠭᠰᠠᠨ ᠡᠳᠦᠷ ᠡᠴᠡ ᠦᠪᠡᠷ ᠤᠨ ᠣᠢ᠌ᠯᠠᠰ ᠶᠢᠡᠨ ᠦᠷᠡᠭ᠍ᠳᠡᠭᠦᠯᠵᠤ᠂ ᠵᠠᠯᠭᠠᠮᠵᠢ ᠬᠣᠢ᠌ᠴᠢ ᠦᠶᠡ ᠶᠢᠨ ᠭᠢᠨ ᠢ ᠭᠦᠮᠦᠵᠢᠭᠦᠯᠭᠦ ᠳᠤ ᠪᠦᠭᠦ ᠰᠠᠨᠠᠭᠠ ᠣᠬᠠᠭᠠᠨ ᠶᠢᠡᠨ ᠳᠠᠢ᠌ᠴᠢᠯᠠᠨ ᠠᠵᠢᠯᠯᠠᠭᠰᠠᠨ ᠪᠠᠢ᠌ᠨᠠ᠃ ᠳᠡᠭᠦᠨ ᠶᠢᠡᠷ ᠵᠤᠭᠰᠤᠬᠤ ᠦᠭᠡᠶ ᠳᠤᠬᠠᠢ ᠶᠢᠨ ᠦᠶᠡᠰ ᠳᠠᠷᠠ ᠬᠤᠶᠠᠭᠤᠯᠠ ᠶᠢᠨ ᠪᠢᠴᠢᠨ ᠣᠷᠤᠯᠳᠤᠵᠤ ᠪᠠᠢ᠌ᠭᠰᠠᠨ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠴᠤ ᠦᠪᠡᠷ ᠦᠪᠡᠷ ᠤᠨ ᠥᠩᠭᠡ ᠠᠶᠠᠰ ᠶᠢᠡᠷ ᠶᠢᠡᠨ ᠢᠯᠭᠠᠷᠠᠨ ᠳᠡᠦᠭᠡ ᠶᠢᠨ ᠬᠠᠭᠤᠳᠠᠰᠤᠨ ᠳᠤ ᠦᠯᠠᠳᠠᠵᠠᠢ᠃ ᠭᠡᠯᠡ ᠭᠡᠯᠡᠯᠭᠡ ᠴᠠᠪᠠᠷ ᠠᠮᠢᠳᠤᠯᠢᠭ᠂ ᠤᠶᠠᠩᠭᠠ ᠰᠡᠳᠬᠢᠯᠭᠡ ᠦᠨᠡᠨ ᠪᠣᠷᠤᠭᠵᠢᠭᠤᠨ᠂ ᠤᠳᠬᠠ ᠰᠠᠨᠠᠭᠠ ᠢᠯᠠ ᠴᠠᠭᠠᠨ ᠪᠠᠢ᠌ᠬᠤ ᠪᠣᠯ ᠪᠦᠷ ᠬᠤᠶᠠᠭᠤᠯᠠ ᠶᠢᠨ ᠰᠢᠯᠦᠭ᠌ ᠤᠨ ᠶᠡᠷᠦᠩᠭᠡᠢ ᠣᠠᠴᠠᠯᠢᠭ ᠪᠠᠢ᠌ᠵᠤ᠂ ᠠᠯᠪᠠ ᠪᠠᠷ ᠰᠢᠬᠠᠵᠤ ᠭᠠᠷᠭᠠᠭᠰᠠᠨ ᠮᠦᠷ ᠪᠠᠳᠠᠭ ᠬᠠᠷᠠᠭᠳᠠᠬᠤ ᠦᠭᠡᠶ ᠪᠦᠭᠡᠳ ᠪᠦᠷ ᠡᠭᠡ ᠨᠤᠳᠤᠭ᠂ ᠡᠵᠢ ᠠᠪᠣ᠂ ᠣᠭᠰᠠᠭᠠ ᠶᠠᠰᠤᠳᠠᠨ᠂ ᠠᠷᠠᠤᠨ ᠲᠦᠮᠡᠨ ᠳᠤ ᠪᠠᠨ ᠡᠷᠭᠦᠭ᠍ᠰᠡᠨ ᠦᠨᠡᠠᠴᠢ ᠦᠷᠡ ᠶᠢᠨ ᠰᠡᠳᠭᠢᠯ ᠬᠠᠢ᠌ᠷᠠ ᠶᠢᠨ ᠰᠥ᠋ ᠶᠤᠮ᠃ ᠡᠨᠡ ᠬᠤᠶᠠᠷ ᠠᠬᠠᠮᠠᠤᠨ ᠰᠤᠶᠤᠯ ᠤᠨ ᠵᠢᠳᠭᠦᠯᠳᠡᠨ ᠤ ᠪᠢᠴᠢᠭ᠍ᠰᠡᠨ ᠰᠢᠯᠦᠭ᠌᠂ ᠠᠰᠬᠠᠭᠰᠠᠨ ᠭᠦᠯᠦᠰᠤ᠂ ᠭᠠᠷᠭᠠᠭᠰᠠᠨ ᠨᠥᠯᠦᠭᠡ ᠪᠦᠷ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠠᠯᠳᠠ ᠭᠦᠷᠦᠰᠦᠨᠡ ᠮᠥᠩᠭᠡ ᠰᠢᠩᠭᠡᠭᠦ ᠶᠤᠰᠤᠳᠠᠢ ︕
ᠶᠤ᠋·ᠮᠥᠩᠭᠡᠪᠠᠭᠠᠲᠤᠷ ᠪᠣᠯ ᠳᠡᠭᠡᠳᠤ ᠮᠤᠩᠭ᠋ᠤᠯ ᠳᠤ ᠬᠠᠮᠤᠭ ᠤᠨ ᠳᠦᠷᠦᠭᠦᠤ ᠪᠢᠷ ᠠᠳᠬᠤᠨ ᠪᠣᠰᠤᠭᠰᠠᠨ ᠠᠬᠠᠮᠠᠤᠨ ᠮᠠᠯᠴᠢᠨ ᠢᠷᠠᠭᠤ ᠨᠠᠢ᠌ᠷᠠᠭᠴᠢ ᠪᠣᠯᠤᠨᠠ᠃ ᠭᠦᠭᠡ ᠳᠡᠭ᠍ᠷᠢ ᠯᠠ ᠡᠨᠡ ᠭᠦᠤ ᠪᠠᠨ ᠵᠦᠪ ᠳᠠᠨᠢᠵᠤ᠂ ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠡᠴᠡ ᠨᠢ ᠪᠣᠴᠠᠭᠠᠨ ᠮᠠᠯᠴᠢᠨ ᠪᠣᠯᠭᠠᠭᠠᠤᠨ ᠣᠤᠭᠠᠯ ᠰᠤᠶᠤᠯ ᠤᠨ ᠭᠦᠷᠦᠰᠤ ᠲᠡᠶ ᠨᠢ ᠮᠥᠩᠭᠡ ᠬᠤᠯᠪᠣᠭᠰᠠᠨ ᠪᠠᠢ᠌ᠵᠤ ᠳᠠᠭᠠᠷᠠᠨᠠ᠃ ᠦᠭᠡᠶ ᠪᠣᠯ ᠳᠡᠭᠦᠨ ᠤ ᠰᠡᠳᠭᠢᠯ ᠣᠶᠤᠨ ᠡᠴᠡ ᠵᠥᠩᠳᠡᠭᠡᠨ ᠠᠰᠬᠠᠷᠠᠭᠠᠤᠨ ᠪᠠᠢ᠌ᠳᠠᠭ ᠠᠮᠢᠳᠤ ᠪᠣᠷᠤᠭᠵᠢᠭᠤᠨ ᠨᠤᠳᠤᠭ ᠤᠨ ᠭᠡᠯᠡ᠂ ᠴᠠᠪᠠᠷ ᠮᠤᠩᠭ᠋ᠤᠯ ᠰᠡᠳᠭᠢᠭᠦᠢ᠂ ᠴᠤᠯᠤ ᠪᠠᠢ᠌ᠭᠠᠯᠢᠯᠢᠭ ᠣᠬᠠᠮᠰᠠᠷ ᠠᠯᠢ ᠭᠡᠳᠥᠢᠨᠡᠢ ᠭᠡᠭᠡᠭ᠍ᠳᠡᠨ ᠬᠠᠶᠠᠭᠳᠠᠭᠰᠠᠨ ᠪᠠᠢ᠌ᠬᠠ ᠳ᠋ᠠ᠃ ᠨᠠᠩ ᠴᠤ 《ᠺᠠᠳ᠋ᠷ ᠮᠥᠩᠭᠡᠪᠠᠭᠠᠲᠤᠷ》 (ᠨᠤᠳᠤᠭ ᠤᠨ ᠠᠷᠠᠤᠨ ᠡᠴᠡ ᠨᠠᠭᠠᠳᠴᠤ ᠬᠠᠢ᠌ᠷᠠᠯᠭᠰᠠᠨ ᠬᠤᠴᠢ ᠳᠠᠭᠤᠳᠠᠯᠭᠠ) ᠮᠠᠨᠢ ᠦᠨᠡᠨ ᠺᠠᠳ᠋ᠷ ᠪᠣᠯᠴᠢᠬᠠᠭᠰᠠᠨ ᠪᠣᠯ ᠠᠵᠢᠯ ᠠᠯᠪᠠᠨ ᠳᠤ ᠪᠠᠨ ᠶᠠᠭᠠᠷᠠᠵᠤ᠂ ᠣᠠᠳᠤᠤ ᠵᠣᠢ᠌ᠯ ᠳᠤ ᠰᠠᠨᠠᠭᠠ ᠪᠣᠳᠤᠯ ᠨᠢ ᠬᠤᠪᠢᠶᠠᠭᠳᠠᠭᠠᠤᠨ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠣᠷᠤᠯᠳᠤᠬᠤ ᠪᠠᠢ᠌ᠭᠰᠠᠨ ᠡᠰᠡᠭᠦ ᠶᠢ ᠭᠡᠨ ᠮᠠᠳᠠᠯᠠ᠃ ᠶᠠᠭᠤ ᠴᠤ ᠭᠡᠰᠡᠨ ᠳᠠᠷᠠ ᠭᠤᠸᠠᠢ ᠣᠯᠤᠰ ᠤᠨ ᠪᠣᠳᠠᠭᠠ ᠢᠳᠡᠭᠦ ᠵᠠᠶᠠᠭᠠ ᠳᠤᠳᠠᠭᠰᠠᠨ ᠴᠤ ᠣᠤᠭᠠᠯ ᠰᠤᠶᠤᠯ ᠤᠨ ᠭᠦᠨ ᠭᠦᠷᠦᠰᠤᠨ ᠳᠤ ᠴᠢᠯᠠᠭᠤ ᠰᠢᠭ ᠰᠢᠭᠢᠳᠴᠤ᠂ ᠰᠤᠶᠤᠯ ᠤᠨ ᠪᠣᠭᠢᠷᠳᠤᠯ ᠡᠴᠡ ᠵᠠᠢ᠌ᠯᠠᠵᠤ ᠴᠢᠳᠠᠭᠰᠠᠨ ᠨᠢ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠠᠵᠠ ᠪᠣᠶᠠᠨ ᠭᠡᠮᠡᠨ ᠭᠡᠯᠡᠵᠤ ᠪᠣᠯᠤᠮᠠᠷ᠃ ᠳᠠᠷᠠ ᠭᠤᠸᠠᠢ ᠳᠡᠭᠡᠳᠤ ᠮᠤᠩᠭ᠋ᠤᠯ ᠳᠤ ᠬᠠᠮᠤᠭ ᠳᠦᠷᠦᠭᠦᠤ ᠪᠢᠷ ᠪᠠᠷᠢᠭᠰᠠᠨ ᠮᠠᠯᠴᠢᠨ ᠢᠷᠠᠭᠤ ᠨᠠᠢ᠌ᠷᠠᠭᠴᠢ ᠳᠠᠳᠤᠢ ᠦᠭᠡᠶ ᠮᠦᠨ ᠬᠠᠮᠤᠭ ᠤᠨ ᠣᠳᠠᠭᠠᠨ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠣᠷᠤᠯᠳᠤᠭᠰᠠᠨ ᠭᠦᠮᠤᠨ ᠶᠤᠮ᠃ ᠳᠠᠷᠠ ᠭᠤᠸᠠᠢ ᠨᠢᠭᠡᠨᠲᠡ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠠᠩᠬᠠᠨ ᠤ ᠦᠶᠡ᠂ ᠳᠤᠮᠳᠠᠴᠢ ᠦᠶᠡ᠂ ᠰᠢᠨᠡ ᠦᠶᠡ ᠭᠡᠮᠡᠭᠦ ᠭᠤᠷᠪᠠᠨ ᠱᠠᠳᠤ ᠦᠶᠡ ᠶᠢ ᠠᠵᠢᠭ ᠦᠭᠡᠶ ᠥᠩᠭᠡᠷᠡᠭᠡᠭᠡᠳ ᠪᠣᠢ᠃ ᠠᠩᠬᠠᠨ ᠤ ᠦᠶᠡ ᠶᠢᠨ ᠰᠢᠯᠦᠭ᠌ ᠲᠤ ᠪᠠᠨ ᠳᠠᠷᠠ ᠭᠤᠸᠠᠢ ᠣᠶᠠᠩᠭ᠋ᠠᠯᠠᠬᠤ ᠪᠠ ᠭᠦᠦᠷᠨᠢᠭᠦ ᠶᠢ ᠣᠶᠠᠯᠳᠤᠭᠤᠯᠤᠨ ᠪᠣᠳᠤᠯ ᠰᠡᠳᠭᠢᠭ᠍ᠳᠡᠯ ᠶᠢᠡᠨ ᠰᠢᠭᠤᠳ ᠢᠯᠡᠳᠭᠡᠭᠦ ᠶᠢ ᠡᠷᠭᠢᠮᠯᠡᠵᠤ ᠪᠠᠢ᠌ᠭᠰᠠᠨ ᠪᠣᠯ ᠳᠤᠮᠳᠠᠴᠢ ᠦᠶᠡ ᠶᠢᠨ ᠨᠠᠢ᠌ᠷᠠᠭ ᠲᠤ ᠪᠠᠨ ᠨᠠᠷᠢᠨ ᠳᠦᠷᠰᠤᠯᠠᠯ ᠢ ᠣᠬᠠᠮᠰᠠᠷ ᠲᠡᠶ ᠵᠠᠷᠤᠵᠤ ᠪᠣᠳᠠᠳᠤ ᠠᠬᠤᠢ ᠳᠤ ᠰᠡᠳᠭᠢᠯ ᠶᠢᠡᠨ ᠠᠭᠤᠰᠬᠠᠬᠤ ᠶᠢ ᠠᠩᠬᠠᠷᠴᠤ ᠡᠭᠢᠯᠡᠵᠡᠢ᠃ ᠳᠡᠭᠦᠨ ᠤ ᠨᠠᠶᠠᠭᠠᠤᠨ ᠣᠨ ᠤ ᠡᠭᠢᠨ ᠶᠢᠡᠷ ᠪᠢᠴᠢᠭ᠍ᠰᠡᠨ 《ᠵᠢᠷᠦᠭᠡᠨ ᠤ ᠮᠢᠨᠢ ᠳᠠᠭᠤᠤ》 ᠭᠡᠭᠦ ᠰᠢᠯᠦᠭ᠌ ᠪᠠ ᠶᠡᠷᠡᠭᠡᠳ ᠣᠨ ᠳᠤ ᠣᠷᠤᠵᠤ ᠢᠷᠡᠭᠡᠳ ᠪᠢᠴᠢᠭ᠍ᠰᠡᠨ 《ᠭᠡᠭᠡᠷᠡ ᠵᠢᠷᠭᠠᠵᠤ ᠯᠠ ᠬᠤᠨᠤᠳᠠᠭ ᠶᠤᠮ》 ᠭᠡᠭᠦ ᠰᠢᠯᠦᠭ᠌ ᠲᠤ ᠳᠡᠭᠡᠷᠡᠭᠢ ᠪᠠᠢ᠌ᠳᠠᠯ ᠢᠪ ᠢᠯᠠ ᠬᠠᠷᠠᠭᠳᠠᠵᠤ ᠪᠣᠢ᠃
ᠰᠢᠨᠡ ᠵᠠᠭᠤᠨ ᠳᠤ ᠠᠯᠬᠤᠨ ᠣᠷᠤᠵᠤ ᠢᠷᠡᠭᠡᠳ ᠶᠤ᠋·ᠮᠥᠩᠭᠡᠪᠠᠭᠠᠲᠤᠷ ᠭᠤᠸᠠᠢ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠲᠤ ᠪᠠᠨ ᠬᠤᠯᠪᠤᠨ ᠪᠣᠳᠤᠯᠳᠠ᠂ ᠣᠷᠠᠨ ᠳᠠᠭᠠᠮᠠᠭᠯᠠᠯ᠂ ᠰᠠᠨᠠᠭᠠ ᠳᠦᠷᠢ ᠶᠢᠨ ᠪᠢᠴᠢᠯᠭᠡ ᠶᠢᠨ ᠠᠷᠭᠠ ᠶᠢ ᠣᠬᠠᠮᠰᠠᠷ ᠲᠡᠶ ᠭᠡᠷᠡᠭᠯᠡᠨ ᠰᠢᠯᠦᠭ᠌ ᠶᠢᠡᠨ ᠡᠷᠴᠢᠮᠵᠢᠭᠦᠯᠦᠭ᠍ᠰᠡᠨ ᠵᠢᠱᠢᠶᠠ ᠮᠤᠩ ᠦᠭᠡᠶ᠃ 《ᠪᠦᠭᠡᠷᠡᠭ᠌ ᠤᠨ ᠬᠠᠷᠠ》᠂ 《ᠡᠪᠦᠳᠦᠭ᠌》 ᠵᠡᠷᠭᠡ ᠰᠢᠯᠦᠭ᠌ ᠤᠳ ᠭᠡᠯᠡ ᠭᠡᠯᠡᠯᠭᠡ᠂ ᠣᠷᠠᠯᠢᠭ ᠤᠨ ᠪᠣᠯᠪᠠᠰᠤᠷᠠᠯ ᠵᠡᠷᠭᠡ ᠳᠠᠯᠠ ᠪᠠᠷ ᠵᠤᠭᠢᠬᠤ ᠠᠮᠵᠢᠯᠳᠠ ᠣᠯᠤᠭᠰᠠᠨ ᠭᠡᠮᠡᠨ ᠦᠵᠡᠵᠤ ᠪᠣᠯᠤᠨᠠ᠃ 《ᠪᠦᠭᠡᠷᠡᠭ᠌ ᠤᠨ ᠬᠠᠷᠠ》 ᠭᠡᠮᠡᠭᠦ ᠰᠢᠯᠦᠭ᠌ ᠲᠤ 《ᠪᠦᠭᠡᠷᠡᠭ᠌ ᠤᠨ ᠬᠠᠷᠠ ᠰᠢᠷᠢᠯᠳᠦᠭ᠍ᠰᠡᠨ ᠵᠤᠭᠳᠤᠷ ᠶᠢᠡᠨ / ᠰᠠᠮᠨᠠᠨ ᠰᠠᠮᠨᠠᠨ ᠪᠦᠭᠡᠯᠡᠭᠦ ᠳᠤ / ᠵᠠᠮ ᠤᠨ ᠬᠤᠯᠠ ᠳᠤ ᠱᠠᠯᠠ ᠶᠢᠨ ᠴᠢᠯᠠᠭᠤ ᠱᠠᠷᠭᠢᠨᠠ》 ᠭᠡᠭᠦ ᠮᠦᠷ ᠪᠣᠢ᠃ ᠳᠡᠮᠡᠭᠡᠨ ᠶᠠᠪᠣᠳᠠᠭ ᠵᠠᠮ ᠶᠢᠡᠷ ᠶᠢᠡᠨ ᠪᠦᠭᠡᠯᠡᠵᠤ ᠰᠠᠭᠤᠬᠤ ᠳᠤ ᠭᠦᠳᠡᠭᠡ ᠳᠤ ᠱᠠᠯᠠ ᠶᠢᠨ ᠴᠢᠯᠠᠭᠤ ᠱᠠᠷᠭᠢᠷᠠᠳᠠᠭ ᠨᠢ ᠶᠠᠭᠤ ᠪᠣᠢ ︖ ᠠᠮᠢᠳᠠᠨ ᠪᠠᠢ᠌ᠭᠠᠯᠢ ᠶᠢᠨ ᠳᠠᠯᠳᠠ ᠶᠢᠨ ᠬᠤᠯᠪᠣᠭᠠ ᠭᠡᠵᠤ ᠯᠠ ᠡᠨᠡ ᠪᠠᠢ᠌ᠬᠠ ᠡ᠃ ᠡᠨᠡᠭᠦ ᠳᠠᠯᠳᠠ ᠶᠢᠨ ᠬᠤᠯᠪᠣᠭᠠ ᠶᠢ ᠰᠡᠳᠭᠢᠯ ᠣᠶᠤᠨ ᠳᠤ ᠪᠠᠨ ᠵᠡᠷᠭᠡ ᠮᠡᠳᠡᠷᠡᠭᠦ ᠨᠠᠷᠢᠨ ᠮᠠᠳᠠᠷᠠᠮᠵᠢ ᠰᠢᠯᠦᠭ᠍ᠴᠢ ᠶᠢᠨ ᠪᠢᠷ ᠢ ᠢᠷᠯᠠᠵᠤ᠂ ᠰᠠᠷᠠᠯ ᠤᠨ ᠥᠵᠦᠭᠦᠷ ᠡᠴᠡ ᠨᠢ ᠴᠢᠮᠭᠢᠵᠠᠢ᠃ 《ᠡᠯᠡᠰᠤ ᠶᠢ ᠬᠤᠳᠣᠢ᠌ᠯᠭᠠᠭᠰᠠᠨ ᠮᠦᠷ ᠨᠢ ᠵᠡᠭᠡᠷᠡ ᠶᠢᠨ ᠭᠡᠪᠳᠡᠷᠢ ᠪᠠᠢ᠌ᠯᠠ / ᠡᠯᠢᠭᠡᠳᠡᠵᠤ ᠭᠡᠪᠳᠡᠭ᠍ᠰᠡᠨ ᠣᠷᠤᠨ ᠨᠢ ᠳᠦᠭᠦᠷᠢᠭ᠌ ᠤᠨ ᠬᠤᠳᠤᠭᠤᠷ ᠪᠠᠢ᠌ᠯᠠ》 ᠭᠡᠳ ᠴᠢᠨᠠᠭᠰᠢ ᠤᠳᠬᠠ ᠪᠠᠨ ᠳᠡᠯᠭᠡᠨ ᠰᠠᠨᠠᠭᠠ ᠪᠠᠨ ᠳᠤᠳᠤᠳᠬᠠᠨᠠ᠃ ᠡᠯᠡᠰᠤᠨ ᠳᠡᠭᠡᠭᠦᠷ ᠭᠦᠶᠦᠭ᠍ᠰᠡᠨ ᠳᠡᠮᠡᠭᠡᠨ ᠤ ᠮᠦᠷ ᠨᠢ ᠵᠡᠭᠡᠷᠡ ᠶᠢᠨ ᠭᠡᠪᠳᠡᠷᠢ ᠪᠣᠯᠳᠠᠭ ᠭᠡᠭᠦ ᠣᠷᠠᠨ ᠳᠠᠭᠠᠮᠠᠭᠯᠠᠯ᠂ ᠡᠯᠢᠭᠡᠳᠡᠵᠤ ᠭᠡᠪᠳᠡᠭ᠍ᠰᠡᠨ ᠣᠷᠤᠨ ᠡᠴᠡ ᠨᠢ ᠳᠡᠷᠭᠡᠯ ᠪᠦᠳᠤᠨ ᠵᠣᠢ᠌ᠯ ᠢ ᠰᠠᠳᠭᠢᠨ ᠣᠯᠤᠭᠰᠠᠨ ᠬᠤᠯᠪᠤᠨ ᠪᠣᠳᠤᠯᠳᠠ ᠨᠢ ᠳᠤᠰ ᠰᠢᠯᠦᠭ᠌ ᠶᠢᠡᠨ ᠣᠯᠠᠮ ᠭᠤᠪᠠᠢ ᠡᠷᠭᠢᠮᠰᠦᠭ᠌ ᠠᠳᠠᠯᠠ ᠪᠣᠷᠤᠭᠵᠢᠭᠤᠨ ᠭᠡᠭᠡᠮᠰᠦᠭ᠌ ᠪᠣᠯᠭᠠᠵᠠᠢ᠃
ᠶᠤ᠋·ᠮᠥᠩᠭᠡᠪᠠᠭᠠᠲᠤᠷ ᠭᠤᠸᠠᠢ ᠶᠢᠨ ᠣᠢ᠌ᠭᠠ ᠦᠭᠡᠶ ᠰᠡᠳᠭᠢᠯ ᠶᠢᠡᠷ ᠭᠤᠴᠢ ᠭᠠᠷᠤᠢ ᠵᠢᠯ ᠣᠷᠤᠯᠳᠤᠭᠰᠠᠨ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠨᠢ ᠬᠤᠶᠠᠷ ᠴᠤ ᠨᠤᠮ ᠭᠠᠷᠭᠠᠬᠤ ᠳᠤ ᠪᠠᠷᠳᠠᠮ ᠭᠦᠢᠴᠡᠨᠡ᠃ ᠭᠡᠪᠠᠴᠤ ᠳᠠᠷᠠ ᠭᠤᠸᠠᠢ ᠨᠤᠮ ᠭᠠᠷᠭᠠᠬᠤ ᠭᠡᠵᠤ ᠶᠠᠭᠠᠷᠠᠭᠠ ᠦᠭᠡᠶ᠂ ᠪᠠᠰᠠ ᠴᠤ ᠵᠤᠭᠤᠰ ᠮᠦᠩᠭᠦ ᠠᠪᠬᠤ ᠭᠡᠵᠤ ᠵᠠᠰᠠᠭ ᠤᠨ ᠴᠢᠷᠠᠢ ᠬᠠᠷᠠᠭᠠ ᠦᠭᠡᠶ᠃ ᠳᠤᠪ ᠳᠤᠭᠤᠢ ᠭᠡᠳᠤᠨ ᠮᠠᠯ ᠶᠢᠡᠨ ᠳᠠᠭᠠᠵᠤ᠂ ᠭᠦᠳᠡᠭᠡ ᠶᠢᠨ ᠴᠠᠪᠠᠷ ᠠᠭᠠᠷ ᠲᠤ ᠡᠪᠦᠳᠦᠭ᠌ ᠳᠡᠭᠡᠷᠡ ᠪᠠᠨ ᠰᠢᠯᠦᠭ᠌ ᠶᠢᠡᠨ ᠳᠠᠳᠠᠯᠠᠵᠤ ᠶᠠᠪᠣᠭᠠ᠃
ᠭᠤᠷᠪᠠ ᠄ ᠳᠤᠮᠳᠠᠴᠢ ᠦᠶᠡ ᠶᠢᠨ ᠢᠷᠠᠭᠤ ᠨᠠᠢ᠌ᠷᠠᠭ
ᠲ᠋ᠡᠭᠡᠷᠡ ᠵᠠᠭᠤᠨ ᠤ ᠨᠠᠶᠠᠭᠠᠤᠨ ᠣᠨ ᠤ ᠰᠡᠭᠦᠯᠴᠢ ᠶᠡᠷᠡᠭᠡᠳ ᠣᠨ ᠤ ᠡᠭᠢᠨ ᠤ ᠴᠠᠭ ᠦᠶᠡ ᠶᠢ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠦᠷᠨᠢᠯᠳᠠ ᠶᠢᠨ ᠬᠤᠭᠤᠴᠠᠭᠠ ᠭᠡᠵᠤ ᠪᠣᠯᠤᠨᠠ᠃ ᠡᠨᠡ ᠦᠶᠡ ᠪᠣᠯᠵᠤ ᠢᠷᠡᠭᠡᠳ ᠰᠢᠯᠦᠭ᠍ᠴᠢᠳ ᠤᠨ ᠡᠩᠨᠡᠭᠡ ᠦᠰᠤᠨ ᠪᠣᠵᠠᠭᠠᠢ᠌ᠷᠠᠭᠰᠠᠨ ᠶᠢᠡᠷ ᠪᠠᠷᠠᠬᠤ ᠦᠭᠡᠶ ᠰᠢᠯᠦᠭ᠌ ᠪᠢᠴᠢᠭᠦ ᠨᠢ ᠨᠢᠭᠡ ᠵᠣᠢ᠌ᠯ ᠤᠨ ᠣᠬᠠᠮᠰᠠᠷᠳᠤ ᠣᠷᠤᠯᠳᠤᠯᠭᠠ ᠪᠣᠯᠤᠨ ᠬᠤᠪᠢᠷᠠᠵᠤ᠂ ᠣᠷᠢᠳ ᠡᠮᠤᠨᠡ ᠪᠠᠢ᠌ᠭᠠ ᠦᠭᠡᠶ ᠰᠢᠯᠦᠭ᠌ ᠤᠨ ᠶᠡᠭᠡ ᠬᠠᠯᠠᠭᠤᠷᠠᠯ ᠢ ᠠᠪᠴᠢᠷᠠᠭᠰᠠᠨ ᠪᠠᠢ᠌ᠨᠠ᠃ ᠡᠨᠡᠭᠦ ᠬᠠᠯᠠᠭᠤᠷᠠᠯ ᠢ ᠪᠣᠢ ᠪᠣᠯᠭᠠᠭᠰᠠᠨ ᠤ ᠭᠤᠤᠯ ᠵᠠᠩᠭᠢᠯᠭᠠ ᠨᠢ ᠣᠶᠤᠳᠠᠤᠨ ᠤᠨ ᠳᠤᠭᠠ ᠨᠡᠮᠡᠭ᠍ᠳᠡᠵᠤ᠂ ᠰᠤᠶᠤᠯ ᠤᠨ ᠰᠤᠯᠢᠯᠴᠠᠭᠠ ᠴᠢᠩᠭ᠋ᠠᠷᠠᠭᠰᠠᠨ ᠳᠤ ᠪᠣᠢ᠃ ᠡᠨᠡ ᠦᠶᠡ ᠶᠢᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠭᠡᠯᠪᠠᠷᠢ ᠣᠠᠴᠠᠯᠢᠭ ᠴᠢᠯᠦᠭᠡᠳᠡᠢ᠂ ᠭᠡᠪ ᠨᠠᠮᠪᠠ ᠦᠪᠡᠷᠮᠢᠴᠠ ᠣᠯᠠᠨ ᠶᠠᠩᠵᠤ ᠶᠢᠨ ᠪᠣᠯᠤᠨ ᠭᠦᠭ᠍ᠵᠢᠵᠤ ᠰᠠᠨᠠᠭᠠ ᠳᠦᠷᠢ᠂ ᠬᠠᠮ ᠰᠠᠷᠠᠯ᠂ ᠳᠦᠷᠰᠤ ᠬᠤᠪᠢᠷᠠᠭᠠᠬᠤ᠂ ᠬᠤᠯᠪᠤᠨ ᠪᠣᠳᠤᠯᠳᠠ᠂ ᠣᠷᠠᠨ ᠳᠠᠭᠠᠮᠠᠭᠯᠠᠯ ᠵᠡᠷᠭᠡ ᠰᠢᠨᠡ ᠪᠢᠴᠢᠯᠭᠡ ᠶᠢᠨ ᠠᠷᠭᠠ ᠶᠢ ᠣᠷᠠᠨ ᠳᠠᠮᠳᠠᠢ ᠵᠠᠷᠤᠨ ᠭᠠᠳᠠᠷ ᠳᠦᠷᠰᠤᠯᠠᠯ᠂ ᠢᠯᠠ ᠣᠶᠠᠩᠭ᠋ᠠᠯᠠᠯ ᠢ ᠴᠢᠬᠤᠯᠠᠴᠢᠯᠠᠵᠤ ᠪᠠᠢ᠌ᠭᠰᠠᠨ ᠡᠴᠡ ᠪᠠᠨ ᠪᠣᠳᠠᠰ ᠶᠠᠭᠤᠮᠠ ᠶᠢᠨ ᠮᠦᠨ ᠴᠢᠨᠠᠷ ᠢ ᠳᠠᠨᠢᠬᠤ᠂ ᠣᠶᠤᠠᠯᠢᠭ ᠳᠤᠶᠠᠴᠢᠯᠳᠠ ᠭᠢᠭᠦ᠂ ᠳᠤᠳᠤᠭᠠᠳᠤ ᠬᠤᠯᠪᠣᠭᠠ ᠶᠢ ᠵᠠᠳᠠᠯᠬᠤ ᠳᠠᠰᠢ ᠰᠢᠯᠵᠢᠵᠠᠢ᠃ ᠳᠡᠭᠡᠭᠡᠳ ᠳᠤᠭᠠ ᠴᠢᠨᠠᠷ ᠤᠨ ᠳᠠᠯᠠ ᠳᠤ ᠴᠤ ᠮᠡᠳᠡᠭ᠍ᠳᠡᠭᠦᠢᠴᠡ ᠬᠤᠪᠢᠷᠠᠯᠳᠠ ᠭᠠᠷᠴᠤ᠂ ᠰᠤᠨᠢᠨ ᠰᠡᠳᠭᠦᠯ ᠶᠢᠡᠨ ᠭᠠᠳᠠᠭᠰᠢ ᠳᠠᠷᠬᠠᠭᠠᠬᠤ ᠪᠣᠶᠤ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠶᠢᠡᠨ ᠮᠤᠵᠢ ᠶᠢᠨ ᠭᠠᠳᠠᠨᠠᠭᠢ ᠰᠤᠨᠢᠨ ᠰᠡᠳᠭᠦᠯ ᠳᠤ ᠨᠡᠢ᠌ᠳᠡᠯᠡᠭᠦ ᠵᠢᠴᠢ ᠬᠤᠪᠢ ᠭᠦᠮᠤᠨ ᠤ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ ᠭᠠᠷᠭᠠᠬᠤ ᠭᠡᠯᠪᠠᠷᠢ ᠪᠠᠷ ᠣᠷᠤᠨ ᠨᠤᠳᠤᠭ ᠤᠨ ᠭᠢᠯᠢ ᠭᠢᠵᠠᠭᠠᠷ ᠡᠴᠡ ᠳᠠᠪᠠᠨ ᠭᠠᠷᠤᠭᠠᠤᠨ ᠨᠠᠩ ᠦᠷᠭᠡᠨ ᠳᠡᠯᠭᠡᠷ ᠭᠡᠪᠴᠢᠶᠡᠨ ᠳᠤ ᠦᠪᠡᠷ ᠢ ᠪᠠᠨ ᠳᠠᠨᠢᠭᠤᠯᠤᠨ ᠣᠬᠠᠭᠠᠭᠤᠯᠬᠤ ᠶᠢ ᠠᠩᠬᠠᠷᠴᠤ ᠡᠭᠢᠯᠡᠭ᠍ᠰᠡᠨ ᠪᠠᠢ᠌ᠨᠠ᠃ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠳᠤᠮᠳᠠᠴᠢ ᠦᠶᠡ ᠶᠢᠨ ᠰᠢᠯᠦᠭ᠍ᠴᠢᠳ ᠡᠴᠡ「 ᠴᠢ᠊·ᠳᠠᠯᠠᠢ」᠂ ᠰᠡᠴᠠᠨᠭᠦ᠋ᠤ᠂ ᠭᠦᠭᠡᠰᠢᠯᠢ᠂ ᠪᠠᠶᠠᠨ᠂ ᠬᠢ᠊·ᠮᠥᠩᠭᠡᠪᠠᠶᠡᠷ᠂ ᠬᠦ᠊·ᠠᠯᠳᠠᠠᠬᠤᠶᠠᠭ᠂ ᠶ·ᠳᠦᠪᠰᠢᠠᠪᠠᠶᠠᠷ᠂ ᠨᠡᠷᠡᠡᠵᠥᠭ᠌᠂ ᠨ·ᠴᠡᠯᠡᠭᠡᠷ᠂ ᠭᠢᠨᠠᠮᠠᠭᠠᠢ᠂ ᠪᠠ᠊·ᠪᠠᠯᠮᠠᠳᠤᠷᠵᠢ᠂ ᠯ·ᠣᠳᠤᠨ ᠨᠡᠷ ᠢ ᠳᠤᠷᠠᠳᠴᠤ ᠪᠣᠯᠤᠨᠠ᠃
「 ᠴᠢ᠊·ᠳᠠᠯᠠᠢ」 ᠠᠮᠢᠳᠤ ᠶᠠᠪᠣᠭᠰᠠᠨ ᠭᠤᠴᠢᠬᠠᠨ ᠨᠠᠰᠤᠨ ᠳᠤ ᠪᠠᠨ 《ᠡᠭᠡ ᠨᠤᠳᠤᠭ》᠂ 《ᠭᠦᠮᠪᠦᠨ ᠭᠦᠷᠭᠦ ᠳᠠᠩᠴᠢ ᠬᠤᠯᠠ》᠂ 《ᠴᠢ ᠪᠢᠳᠠ ᠬᠤᠶᠠᠷ》᠂ 《ᠳᠡᠭ᠍ᠷᠢ ᠡᠷᠭᠦᠭ᠍ᠰᠡᠨ ᠬᠤᠷᠸᠠ》 ᠵᠡᠷᠭᠡ ᠨᠠᠯᠢᠶᠠᠤᠨ ᠭᠡᠳᠤᠨ ᠴᠢᠨᠠᠷᠯᠢᠭ ᠪᠦᠳᠦᠭᠡᠯ ᠶᠢᠡᠨ ᠮᠠᠨ ᠳᠤ ᠥᠯᠡᠳᠡᠭᠡᠵᠢ᠃ ᠳᠡᠭᠦᠨ ᠤ ᠳᠤᠷᠰᠢᠨ ᠣᠷᠤᠯᠳᠤᠵᠤ ᠪᠠᠢ᠌ᠭᠰᠠᠨ ᠪᠦᠳᠡᠭᠢ ᠴᠢᠯᠦᠭᠡᠳᠤ ᠰᠢᠯᠦᠭ᠌ ᠨᠢ ᠴᠤ ᠳᠤᠬᠠᠢ ᠶᠢᠨ ᠦᠶᠡᠰ ᠣᠯᠤᠰ ᠤᠨ ᠳᠤᠳᠤᠭᠠᠳᠤ ᠭᠠᠳᠠᠭᠠᠳᠤ ᠳᠤ ᠵᠤᠭᠢᠬᠤ ᠨᠥᠯᠦᠭᠡ ᠲᠡᠶ ᠪᠠᠢ᠌ᠭᠰᠠᠨ ᠪᠠᠢ᠌ᠨᠠ᠃ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠲᠤ ᠪᠠᠨ ᠰᠢᠨᠡ ᠰᠡᠪᠠᠭᠦᠨ ᠪᠢᠴᠢᠯᠭᠡ ᠶᠢᠨ ᠠᠷᠭᠠ ᠶᠢ ᠢᠳᠠᠪᠭᠢᠳᠠᠢ ᠭᠡᠷᠡᠭᠯᠡᠨ ᠵᠢᠵᠢᠭ᠌ ᠰᠠᠳᠤᠪ ᠶᠢᠡᠷ ᠳᠤᠮᠤ ᠠᠰᠠᠭᠤᠳᠠᠯ ᠢ ᠬᠠᠷᠠᠭᠤᠯᠬᠤ᠂ ᠢᠯᠠ ᠡᠴᠡ ᠳᠠᠯᠳᠠ ᠶᠢ ᠰᠡᠳᠭᠢᠭᠦᠯᠭᠦ᠂ ᠶᠤᠰᠤ ᠣᠴᠢᠷ ᠢ ᠰᠠᠮ ᠳᠤᠭᠢᠬᠤ ᠪᠣᠯ「 ᠴᠢ᠊·ᠳᠠᠯᠠᠢ」 ᠶ᠋ᠢᠨ ᠰᠢᠯᠦᠭ᠌ ᠤᠨ ᠣᠠᠴᠠᠯᠢᠭ ᠶᠤᠮ᠃ 《ᠬᠠᠮᠢᠭᠠ ᠶᠠᠪᠣᠭᠰᠠᠨ ᠴᠤ ᠠᠳᠠᠯᠢᠬᠠᠨ ᠶᠤᠮ /ᠬᠠᠢ᠌ᠷᠠᠳᠤ ᠊᠊᠊᠊᠊᠊᠊᠊᠊᠊᠊᠊᠊᠊᠊ / ᠡᠭᠡ ᠨᠤᠳᠤᠭ ᠮᠢᠨᠢ ᠡ / ᠬᠠᠷᠠᠭᠠᠨ ᠵᠠᠢ ᠳᠤᠳᠤᠨᠤᠬᠠᠨ ᠦᠨᠦᠰᠴᠤ / ᠬᠠᠮᠤᠭ ᠤᠨ ᠳᠤᠳᠤᠬᠠᠨ ᠨᠠᠮᠢᠷᠠᠬᠤ /ᠲ᠋ᠠᠨ ᠤ ᠪᠠᠷᠠ / ᠬᠤᠯᠠ ᠪᠢᠰᠢ ᠡ》 ᠭᠡᠵᠤ 《ᠡᠭᠡ ᠨᠤᠳᠤᠭ》 ᠭᠡᠮᠡᠭᠦ ᠰᠢᠯᠦᠭ᠌ ᠲᠤ ᠪᠠᠨ ᠰᠢᠯᠦᠭᠯᠡᠯᠡ᠃ ᠳᠤᠯᠤᠭᠠᠢ ᠰᠡᠭᠦᠯ ᠬᠤᠯᠪᠤᠨ ᠡᠩ ᠵᠡᠷᠭᠡᠴᠡᠭᠦᠯᠭᠦ ᠣᠯᠠᠮᠵᠢᠯᠠᠯᠳᠤ ᠮᠤᠩᠭ᠋ᠤᠯ ᠰᠢᠯᠦᠭ᠌ ᠤᠨ ᠪᠢᠴᠢᠯᠭᠡ ᠶᠢᠨ ᠠᠷᠭᠠ ᠶᠢ ᠵᠤᠷᠢᠭᠤᠳᠠ ᠡᠪᠳᠡᠨ ᠳᠠᠭᠢᠷ ᠳᠤᠭᠤᠯᠠᠩ ᠮᠦᠷ ᠪᠠᠳᠠᠭ ᠢ ᠡᠮᠭᠢ ᠵᠠᠮᠪᠠᠷᠠᠭᠠ ᠦᠭᠡᠶ ᠦᠷᠤᠵᠤ᠂ ᠰᠡᠳᠭᠢᠯ ᠤᠨ ᠳᠤᠰᠤᠯᠳᠠ ᠪᠠᠨ ᠳᠠᠭᠠᠷᠠᠭᠤᠯᠤᠭᠰᠠᠨ ᠨᠢ ᠰᠤᠨᠢᠨ᠃ ᠨᠠᠩ ᠴᠤ ᠬᠤᠶᠠᠷ ᠰᠠᠷᠠᠯ ᠤᠨ ᠬᠤᠭᠤᠷᠤᠠᠳᠠᠭᠢ ᠰᠤᠯᠪᠢᠴᠠᠯ ᠶᠢᠡᠷ ᠨᠤᠳᠤᠭ ᠪᠣᠯᠤᠨ ᠰᠡᠳᠭᠢᠯ ᠤᠨ ᠵᠠᠢ ᠶᠢ ᠬᠤᠮᠢᠨ ᠡᠪᠭᠡᠭ᠍ᠰᠡᠨ ᠨᠢ ᠭᠠᠢ᠌ᠬᠠᠯᠳᠠᠢ᠃
《ᠣᠨᠠᠬᠤ ᠨᠠᠷᠠ ᠶᠢ ᠵᠥᠭᠯᠡᠨ /ᠦᠶᠡ ᠦᠶᠡ ᠶᠢᠨ ᠭᠦᠮᠤᠨ / ᠨᠠᠮ ᠵᠢᠮ/ ᠨᠤᠷᠠᠯᠠ /ᠣᠳᠠᠭᠠᠨ ᠣᠨ ᠤ ᠡᠴᠦᠰ ᠭᠢᠰᠭᠢᠨ/ ᠵᠤᠭᠰᠤᠵᠤ ᠴᠢᠳᠠᠭᠰᠠᠨ/ ᠭᠦᠮᠤᠨ/ ᠨᠢᠭᠡ ᠴᠤ ᠭᠠᠷᠤᠭᠰᠠᠨ ᠦᠭᠡᠶ / ᠭᠦᠮᠪᠦᠨ ᠭᠦᠷᠭᠦ ᠳᠠᠩᠴᠢ ᠬᠤᠯᠠ ᠡ》 ᠳᠠᠭᠠᠪᠣᠷᠢ ᠲᠡᠶ ᠪᠠᠨ ᠨᠡᠢ᠌ᠯᠡᠭᠡᠳ ᠠᠷᠠᠢ ᠭᠤᠴᠢ ᠭᠦᠷᠭᠦ ᠦᠭᠡᠶ ᠥᠭᠡ ᠲᠡᠶ ᠡᠨᠡ ᠣᠬᠤᠷ ᠰᠢᠯᠦᠭ᠌ ᠭᠦᠮᠦᠰ ᠲᠤ ᠣᠯᠠᠨ ᠶᠠᠭᠤᠮᠠ ᠶᠢ ᠰᠠᠮ ᠳᠤᠭᠢᠯᠠ᠃ ᠭᠠᠷᠴᠠᠭ ᠡᠴᠡ ᠪᠠᠨ ᠡᠭᠢᠯᠡᠭᠡᠳ ᠰᠤᠨᠢᠷᠬᠠᠯᠳᠠᠢ ᠰᠠᠨᠠᠭᠳᠠᠵᠤ᠂ ᠣᠩᠰᠢᠭᠴᠢᠳ ᠲᠤ ᠠᠷᠪᠢᠨ ᠶᠠᠭᠤᠮᠠ ᠪᠣᠳᠤᠭᠤᠯᠤᠨᠠ᠃ ᠶᠠᠭᠠᠭᠢᠭᠠᠤᠨ 《ᠭᠦᠮᠪᠦᠨ ᠭᠦᠷᠭᠦ ᠳᠠᠩᠴᠢ ᠬᠤᠯᠠ ᠡ》 ᠭᠡᠰᠡᠨ ᠪᠣᠢ ⁈ ᠭᠦᠮᠤᠨ ᠠᠷᠠᠤᠨ ᠤᠨ ᠰᠡᠳᠭᠢᠯ ᠳᠤ ᠮᠠᠰᠢ ᠤᠢ᠌ᠷᠠᠬᠠᠨ ᠪᠠᠢ᠌ᠳᠠᠭ ᠶᠠᠭᠤᠮᠠ ᠶᠢ 《ᠳᠠᠩᠴᠢ ᠬᠤᠯᠠ》 ᠭᠡᠵᠤ ᠪᠢᠴᠢᠭ᠍ᠰᠡᠨ ᠨᠢ ᠯᠠ ᠣᠴᠢᠷ ᠲᠡᠶ᠃ ᠮᠠᠨᠠᠢ᠌ᠭᠢᠨ ᠭᠡᠳᠤᠨ ᠦᠶᠡ ᠪᠠᠷ ᠮᠦᠷᠭᠦᠯ ᠭᠢᠵᠤ ᠪᠣᠢ ᠭᠡᠳ ᠭᠦᠮᠪᠦᠨ ᠳᠤ ᠣᠴᠢᠨ ᠳᠡᠭᠡᠷᠡ ᠳᠡᠭᠡᠷᠡ ᠡᠴᠡ ᠪᠠᠨ ᠣᠨᠠᠨ ᠨᠤᠷᠠᠭᠠᠤᠨ ᠪᠠᠢ᠌ᠭᠰᠠᠨ ᠡᠴᠡ ᠪᠢᠰᠢ ᠵᠤᠭᠰᠤᠵᠤ ᠴᠢᠳᠠᠭᠰᠠᠨ ᠭᠦᠮᠤᠨ ᠭᠠᠭᠴᠠ ᠴᠤ ᠦᠭᠡᠶ᠃ ᠭᠡᠳᠦᠢ ᠬᠠᠷᠠᠮᠰᠠᠯᠳᠠᠢ ᠪᠣᠢ ⁈ ᠶᠠᠭᠤᠨ ᠳᠤ ᠣᠷᠭᠤᠬᠤ ᠨᠠᠷᠠ ᠶᠢ ᠴᠢᠭᠯᠡᠨ ᠭᠦᠷᠭᠦ ᠶᠠᠭᠤᠮᠠᠨ ᠳᠤ ᠪᠠᠨ ᠶᠠᠪᠣᠵᠤ ᠮᠡᠳᠡᠭᠦ ᠦᠭᠡᠶ᠂ ᠵᠠᠪᠠᠯ ᠣᠨᠠᠬᠤ ᠨᠠᠷᠠ ᠶᠢ ᠵᠥᠭᠯᠡᠨ ᠭᠡᠵᠢᠶᠡ ᠴᠤ ᠭᠦᠷᠴᠤ ᠴᠢᠳᠠᠬᠤ ᠦᠭᠡᠶ ᠬᠤᠭᠤᠰᠤᠨ ᠶᠠᠭᠤᠮᠠ ᠣᠷᠤᠭᠤ ᠣᠴᠢᠨ ᠬᠣᠢ᠌ᠨᠠ ᠬᠣᠢ᠌ᠨᠠ ᠡᠴᠡ ᠪᠠᠨ ᠨᠤᠷᠠᠵᠤ ᠳᠠᠭᠤᠰᠳᠠᠭ ᠪᠢᠯᠠ ⁈ ᠰᠢᠯᠦᠭ᠍ᠴᠢ ᠳᠡᠦᠭᠡ ᠠᠮᠢᠳᠤᠷᠠᠯ᠂ ᠱᠠᠰᠢᠨ ᠰᠤᠶᠤᠯ ᠤᠨ ᠬᠠᠷᠠᠭᠠᠰᠤ ᠡᠴᠡ ᠨᠢᠳᠤᠨ ᠡᠮᠤᠨᠡ ᠣᠷᠤᠰᠢᠵᠤ ᠪᠠᠢ᠌ᠭᠠ ᠪᠣᠳᠠᠳᠤ ᠪᠠᠢ᠌ᠳᠠᠯ ᠳᠤ ᠣᠶᠤᠠᠯᠢᠭ ᠳᠤᠶᠠᠴᠢᠯᠳᠠ ᠭᠢᠵᠤ ᠭᠦᠮᠤᠨ ᠠᠷᠠᠤᠨ ᠶᠢᠡᠨ ᠱᠠᠰᠢᠨ ᠤ ᠮᠤᠩᠬᠠᠷᠠᠯ ᠡᠴᠡ ᠳᠠᠭᠤᠳᠠᠨ ᠰᠡᠷᠢᠭᠡᠭᠦ ᠪᠠᠷ ᠪᠢᠷ ᠪᠠᠭᠡ ᠵᠠᠷᠤᠴᠠᠭᠤᠯᠤᠭᠰᠠᠨ ᠨᠢ ᠦᠨᠡᠳᠠᠢ᠃
「 ᠴᠢ᠊·ᠳᠠᠯᠠᠢ」 ᠶ᠋ᠢᠨ ᠰᠢᠯᠦᠭ᠌ ᠤᠳ ᠣᠬᠤᠷ ᠡᠷᠴᠢᠮᠯᠢᠭ᠌ ᠮᠦᠷᠳᠡᠭᠡᠨ ᠶᠡᠭᠡ ᠭᠦᠨ ᠣᠬᠠᠭᠠᠯᠢᠭ᠃ ᠶᠤᠰᠤ ᠣᠴᠢᠷ ᠢ ᠰᠢᠭᠤᠳ ᠢᠯᠠ ᠳᠤᠭᠠᠴᠢᠨ ᠣᠶᠠᠩᠭ᠋ᠠᠯᠠᠳᠠᠭ ᠪᠣᠰᠤ ᠬᠠᠷᠢᠨ ᠢᠯᠡᠳᠭᠡᠭᠦ ᠭᠡᠰᠡᠨ ᠰᠠᠨᠠᠭᠠ ᠪᠠᠨ ᠥᠭᠡᠷᠡ ᠨᠢᠭᠡ ᠭᠡᠯᠪᠠᠷᠢ ᠪᠠᠷ ᠰᠠᠮ ᠳᠤᠭᠢᠨ ᠭᠠᠷᠭᠠᠳᠠᠭ᠃ ᠡᠨᠡ ᠨᠢ ᠳᠤᠬᠠᠢ ᠶᠢᠨ ᠦᠶᠡᠰ ᠶᠠᠭ ᠢᠳᠠ ᠳᠡᠯᠭᠡᠷᠡᠵᠤ ᠪᠠᠢ᠌ᠭᠰᠠᠨ ᠮᠤᠩᠭ᠋ᠤᠯ ᠴᠢᠯᠦᠭᠡᠳᠤ ᠰᠢᠯᠦᠭ᠌ ᠤᠨ ᠨᠠᠢ᠌ᠳᠠᠮ ᠣᠠᠴᠠᠯᠢᠭ ᠭᠡᠭᠦ ᠳᠤ ᠰᠢᠨᠡ ᠣᠷᠤᠰᠬᠠᠯ ᠢ ᠵᠤᠷᠢᠭ ᠲᠡᠶ ᠰᠤᠷᠢᠨ ᠦᠶᠡ ᠵᠡᠷᠭᠡᠳᠡᠨ ᠶᠢᠡᠨ ᠨᠥᠯᠦᠭᠡᠯᠡᠵᠤ᠂ ᠰᠠᠨᠠᠭᠠᠴᠢᠯᠭᠠ ᠲᠡᠶ ᠪᠠᠷ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠲᠤ ᠰᠢᠨᠡ ᠳᠤᠷᠰᠢᠴᠠ ᠬᠠᠢ᠌ᠯᠳᠠ ᠭᠢᠵᠤ ᠪᠠᠢ᠌ᠭᠰᠠᠨ ᠪᠦᠳᠦᠭᠡᠯᠴᠢ ᠣᠷᠤᠯᠳᠤᠯᠭᠠ ᠨᠢ ᠥᠨᠡᠯᠡᠭᠦᠰᠢᠳᠡᠢ᠃
ᠡᠢ᠌ᠮᠦᠷᠭᠦ ᠣᠯᠤᠰ ᠳᠠᠶᠠᠭᠠᠷ ᠲᠤ ᠢᠳᠠᠪᠭᠢᠳᠠᠢ ᠦᠷᠨᠢᠨ ᠪᠠᠢ᠌ᠭᠰᠠᠨ ᠴᠢᠯᠦᠭᠡᠳᠤ ᠰᠢᠯᠦᠭ᠌ ᠤᠨ ᠨᠥᠯᠦᠭᠡ ᠪᠠᠷ ᠶᠡᠷᠡᠭᠡᠳ ᠣᠨ ᠤ ᠡᠭᠢᠨ ᠶᠢᠡᠷ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠣᠷᠤᠯᠳᠤᠵᠤ ᠪᠠᠢ᠌ᠭᠰᠠᠨ ᠵᠠᠯᠠᠭᠤᠰ ᠤᠨ ᠣᠯᠠᠩᠭᠢ ᠨᠢ ᠣᠯᠠᠮᠵᠢᠯᠠᠯᠳᠤ ᠮᠤᠩᠭ᠋ᠤᠯ ᠰᠢᠯᠦᠭ᠌ ᠤᠨ ᠪᠢᠴᠢᠯᠭᠡ ᠶᠢᠨ ᠠᠷᠭᠠ ᠡᠴᠡ ᠠᠯᠢ ᠪᠣᠯᠬᠤ ᠪᠠᠷ ᠵᠡᠢ᠌ᠯᠡᠰᠭᠡᠵᠤ᠂ ᠣᠬᠠᠮᠰᠠᠷ ᠲᠡᠶ ᠪᠠᠷ ᠰᠢᠨᠡ ᠳᠤᠷᠰᠢᠴᠠ᠂ ᠬᠠᠢ᠌ᠯᠳᠠ᠂ ᠡᠷᠢᠯᠭᠢᠯᠡᠯ ᠭᠢᠵᠤ ᠪᠠᠢ᠌ᠭᠰᠠᠨ ᠨᠢ ᠢᠯᠠ ᠮᠡᠳᠡᠭ᠍ᠳᠡᠨᠡ᠃ ᠳᠡᠭᠡᠭᠦ ᠪᠠᠷ ᠵᠤᠭᠰᠤᠬᠤ ᠦᠭᠡᠶ ᠰᠠᠳᠤᠪ ᠤᠨ ᠭᠦᠷᠢᠶᠡ ᠴᠠᠷᠠ ᠳᠠᠯᠠᠷᠠᠨ ᠳᠡᠦᠭᠡ ᠰᠤᠶᠤᠯ᠂ ᠨᠤᠳᠤᠭ ᠪᠠᠯᠴᠢᠭᠡᠷ ᠤᠨ ᠡᠯᠡᠰᠦᠷᠭᠡᠭ᠍ᠵᠢᠯ᠂ ᠭᠡᠯᠡ ᠰᠤᠶᠤᠯ ᠤᠨ ᠬᠠᠮᠠᠭᠤᠷᠠᠯ ᠳᠤ ᠰᠠᠨᠠᠭᠠᠰᠢᠷᠠᠨ ᠵᠤᠪᠠᠨᠢᠭᠰᠠᠨ ᠭᠤᠨᠢᠭᠯᠠᠩᠭ᠋ᠤᠢ ᠠᠶᠠᠰ ᠪᠦᠭᠦᠢᠯᠡ ᠰᠢᠯᠦᠭ᠌ ᠲᠤ ᠨᠠᠪᠴᠢᠨ ᠣᠷᠤᠵᠤ᠂ ᠵᠥᠪᠭᠡᠨ ᠴᠠᠭ ᠦᠶᠡ ᠭᠢᠭᠡᠳ ᠨᠡᠢ᠌ᠭᠡᠮ ᠤᠨ ᠭᠦᠭ᠍ᠵᠢᠯ ᠬᠤᠪᠢᠷᠠᠯ᠂ ᠡᠭᠡ ᠨᠤᠳᠤᠭ ᠤᠨ ᠥᠩᠭᠡ ᠦᠵᠡᠮᠵᠢ ᠵᠢᠴᠢ ᠠᠭᠤᠷᠬᠠᠢ ᠭᠠᠷᠤᠯᠳᠠ ᠶᠢᠨ ᠡᠯᠪᠠᠭ᠌ ᠪᠠᠶᠠᠨ ᠢ ᠮᠠᠭᠳᠠᠨ ᠣᠶᠠᠩᠭ᠋ᠠᠯᠠᠵᠤ ᠪᠠᠢ᠌ᠭᠰᠠᠨ ᠠᠩᠬᠠᠨ ᠤ ᠦᠶᠡ ᠶᠢᠨ ᠣᠷᠮᠠᠰ ᠰᠡᠳᠬᠢᠯᠭᠡ ᠨᠠᠮ ᠳᠠᠷᠤᠭᠳᠠᠵᠠᠢ᠃ ᠶᠡᠷᠡᠭᠡᠳ ᠣᠨ ᠤ ᠰᠡᠭᠦᠯᠴᠢ ᠪᠠᠷ ᠬᠣᠢ᠌ᠨᠠ ᠬᠣᠢ᠌ᠨᠠ ᠡᠴᠡ ᠪᠠᠨ ᠭᠡᠪᠯᠡᠭ᠍ᠳᠡᠭ᠍ᠰᠡᠨ ᠬᠤᠪᠢ ᠭᠦᠮᠤᠨ ᠤ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ᠊·ᠳᠠᠯᠠᠢ ᠶᠢᠨ 《ᠥᠡᠳᠦᠷᠯᠢᠭ᠌ ᠡᠭᠡ ᠭᠢᠭᠡᠳ ᠨᠠᠷᠠ》᠂ ᠰᠡᠴᠠᠨᠭᠦ᠋ᠤ ᠶᠢᠨ 《ᠨᠠᠷᠠᠨ ᠳᠤ ᠤᠢ᠌ᠷᠠᠬᠠᠨ ᠭᠦᠳᠦᠯ》᠂ ᠪᠠᠶᠠᠨ ᠤ 《ᠰᠡᠳᠭᠢᠯ ᠳᠤ ᠱᠠᠭᠢᠭᠰᠠᠨ ᠪᠣᠷᠤᠭᠠᠨ》 (ᠳᠤᠰ ᠬᠤᠶᠠᠷ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ ᠳᠤ ᠪᠢ ᠨᠢᠮᠭᠡᠨ ᠵᠠᠳᠠᠯᠤᠯᠳᠠ ᠭᠢᠵᠤ 《ᠠᠯᠳᠠᠨ ᠲᠦᠯᠭᠢᠭᠦᠷ》 ᠰᠡᠳᠭᠦᠯ ᠤᠨ 2012 ᠣᠨ ᠤ ᠭᠤᠷᠪᠠᠳᠤᠭᠠᠷ ᠬᠤᠭᠤᠴᠠᠭᠠ ᠪᠣᠯᠤᠨ 2008 ᠣᠨ ᠤ ᠳᠠᠪᠣᠳᠤᠭᠠᠷ ᠬᠤᠭᠤᠴᠠᠭᠠ ᠳᠤ ᠨᠡᠢ᠌ᠳᠡᠯᠡᠭᠦᠯᠵᠡᠢ᠃) ᠭᠦᠭᠡᠰᠢᠯᠢ ᠶᠢᠨ 《ᠵᠠᠪᠠᠭ ᠲᠤ ᠬᠠᠳᠠᠭᠠᠯᠠᠭᠰᠠᠨ ᠪᠦᠷᠦᠢ》᠂ ᠬᠢ᠊·ᠮᠥᠩᠭᠡᠪᠠᠶᠡᠷ ᠤᠨ 《ᠦᠳᠦᠨ ᠴᠠᠭᠠᠨ ᠪᠠᠯᠡᠭ᠌》᠂ ᠨᠡᠷᠡᠡᠵᠥᠭ᠌ ᠤᠨ 《ᠵᠡᠭᠦᠳᠦᠯᠡᠵᠤ ᠬᠤᠨᠤᠭᠰᠠᠨ ᠮᠦᠩᠭᠦᠨ ᠨᠠᠪᠴᠢ》 ᠵᠡᠷᠭᠡ ᠳᠤ ᠳᠡᠭᠡᠷᠡᠭᠢ ᠣᠠᠴᠠᠯᠢᠭ ᠰᠢᠠᠵᠢ ᠳᠤᠳᠤᠬᠠᠨ ᠬᠠᠷᠠᠭᠳᠠᠵᠤ ᠪᠣᠢ᠃
ᠢᠷᠠᠭᠤ ᠨᠠᠢ᠌ᠷᠠᠭᠴᠢ ᠭᠦᠭᠡᠰᠢᠯᠢ ᠡᠴᠡ《ᠭᠠᠰ ᠤᠨ ᠴᠠᠭᠠᠨ ᠳᠠᠷᠠᠰᠤᠨ》 ᠭᠡᠮᠡᠭᠦ ᠰᠢᠯᠦᠭ᠌ ᠲᠤ ᠪᠠᠨ 《ᠰᠠᠯᠬᠤ ᠦᠶᠡ ᠶᠢᠨ ᠨᠢᠯᠪᠣᠰᠤ /ᠪᠣᠴᠠᠬᠤ ᠦᠶᠡ ᠶᠢᠨ ᠳᠠᠩᠭ᠋ᠠᠷᠢᠭ / ᠬᠠᠭᠠᠴᠠᠬᠤ ᠦᠶᠡ ᠶᠢᠨ ᠰᠢᠷᠤᠢ / ᠰᠠᠨᠠᠬᠤ ᠦᠶᠡ ᠶᠢᠨ ᠠᠯᠳᠠ》 ᠭᠡᠵᠤ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠠᠷᠠᠤᠨ ᠤᠨ ᠳᠠᠭᠤᠤ ᠳᠤ ᠭᠠᠷᠳᠠᠭ 《ᠭᠠᠰ ᠤᠨ ᠴᠠᠭᠠᠨ ᠳᠠᠷᠠᠰᠤᠨ》 ᠳ᠋ᠤ ᠳᠡᠦᠭᠡ ᠦᠨᠡᠨ ᠤ ᠬᠠᠷᠠᠭᠠᠰᠤ ᠡᠴᠡ ᠭᠡᠳᠡᠷᠭᠦ ᠳᠤᠩᠭ᠋ᠠᠭᠠᠯᠳᠠ ᠭᠢᠵᠤ᠂ ᠨᠤᠳᠤᠭ ᠡᠴᠡ ᠪᠠᠨ ᠭᠦᠭᠡᠭᠡᠭ᠍ᠳᠡᠭᠡᠳ ᠰᠢᠬᠠᠭᠳᠠᠭᠠᠤᠨ ᠭᠠᠷᠬᠤ ᠦᠶᠡ ᠶᠢᠨ ᠭᠦᠡᠳᠤ ᠭᠡᠴᠡᠭᠦᠤ ᠬᠠᠷᠠᠮᠰᠠᠯ ᠤᠨ ᠰᠡᠳᠬᠢᠯᠭᠡ ᠶᠢ ᠶᠠᠭ ᠦᠪᠡᠷ ᠶᠢᠡᠨ ᠥᠩᠭᠡᠷᠡᠭᠦᠯᠦᠭ᠍ᠰᠡᠨ ᠰᠢᠭ᠌ ᠭᠤᠮᠤᠳᠠᠨ ᠭᠤᠳᠤᠷᠠᠨ ᠰᠢᠯᠦᠭᠯᠡᠵᠤ ᠪᠠᠢ᠌ᠨᠠ᠃ ᠳᠡᠦᠭᠡ ᠶᠢᠨ ᠵᠤᠷᠢᠭ ᠰᠠᠨᠠᠭᠠ᠂ ᠬᠠᠷᠠᠮᠰᠠᠯ ᠭᠡᠮᠰᠢᠯ᠂ ᠣᠰᠤᠯ ᠡ᠊ᠨᠳᠡᠭ᠍ᠳᠡᠯ ᠢ ᠳᠠᠭᠢᠨ ᠥᠵᠡᠭᠦᠯᠤᠨ ᠣᠶᠤᠠᠴᠢ ᠳᠤᠩᠭ᠋ᠠᠭᠠᠯᠳᠠ ᠭᠢᠵᠤ᠂ ᠦᠨᠳᠦᠰᠦᠳᠠᠨ ᠤ ᠦᠪᠡᠷ ᠪᠠᠶᠠ ᠳᠡᠭᠡᠷᠡ ᠨᠠᠭᠠᠯᠳᠤᠨ ᠪᠠᠢ᠌ᠭᠠ ᠭᠡᠮ ᠠᠯᠳᠠᠭᠳᠠᠯ ᠢ ᠳᠠᠨᠢᠭᠤᠯᠬᠤ ᠭᠡᠰᠡᠨ ᠣᠬᠠᠮᠰᠠᠷᠳᠤ ᠣᠷᠤᠯᠳᠤᠯᠭᠠ ᠭᠤᠤᠯ ᠣᠷᠤᠰᠬᠠᠯ ᠪᠣᠯᠵᠤ ᠪᠣᠢ᠃ ᠢᠷᠠᠭᠤ ᠨᠠᠢ᠌ᠷᠠᠭᠴᠢ ᠨᠡᠷᠡᠡᠵᠥᠭ᠌ ᠤᠨ 《ᠡᠯᠢᠭᠡ ᠬᠠᠯᠠᠭᠤᠨ ᠳᠡᠭᠡᠳᠤ ᠮᠤᠩᠭ᠋ᠤᠯ ᠮᠢᠨᠢ》 ᠭᠡᠭᠦ ᠰᠢᠯᠦᠭ᠌ ᠲᠤ 《ᠰᠠᠢ᠌ᠬᠠᠨ ᠪᠦᠭᠦᠨ ᠢ ᠴᠢᠨᠢ ᠭᠦᠭᠡᠷᠭᠡᠳᠡᠵᠤ / ᠰᠠᠠᠰᠠᠷ ᠲᠤ ᠴᠢᠮᠠ ᠨᠢᠰᠭᠡᠭᠦ ᠳᠤᠷᠠ ᠦᠭᠡᠶ / ᠮᠠᠭᠤᠬᠠᠢ ᠪᠦᠭᠦᠨ ᠢ ᠴᠢᠨᠢ ᠭᠦᠭᠡᠷᠦᠭᠦᠢᠯᠡᠵᠤ / ᠪᠣᠰᠤᠳ ᠲᠤ ᠴᠢᠮᠠ ᠬᠤᠳᠠᠯᠳᠤᠬᠤ ᠰᠠᠨᠠᠭᠠ ᠦᠭᠡᠶ / ᠳᠡᠭᠡᠳᠤ ᠮᠤᠩᠭ᠋ᠤᠯ ᠮᠢᠨᠢ》 ᠭᠡᠰᠡᠨ ᠪᠣᠷᠤᠭᠵᠢᠭᠤᠨ ᠭᠦᠦᠷᠨᠢᠯ ᠪᠣᠢ᠃ ᠰᠠᠢ᠌ᠬᠠᠨ ᠶᠢᠡᠨ ᠪᠠᠷᠳᠠᠮᠨᠠᠭᠠᠤᠨ ᠮᠠᠭᠤᠬᠠᠢ ᠪᠠᠨ ᠨᠢᠭᠤᠳᠠᠭ ᠴᠠᠭ ᠨᠡᠢ᠌ᠭᠡᠮ ᠤᠨ ᠨᠠᠵᠠᠭᠠᠢ ᠰᠤᠷᠳᠠᠯ ᠢ ᠳᠤᠭᠤᠰᠤ ᠮᠠᠨᠠᠷᠠᠳᠠᠯᠠ ᠰᠠᠪᠠᠵᠤ ᠪᠠᠢ᠌ᠨᠠ᠃ ᠵᠢᠩᠭᠢᠨᠢ ᠰᠠᠢ᠌ᠨ ᠢᠷᠠᠭᠤ ᠨᠠᠢ᠌ᠷᠠᠭ ᠭᠡᠭ᠍ᠴᠢ ᠴᠠᠭ ᠨᠡᠢ᠌ᠭᠡᠮ ᠤᠨ ᠬᠤᠭᠤᠰᠤᠨ ᠮᠠᠭᠳᠠᠭᠠᠯ ᠳᠠᠳᠤᠢ ᠪᠢᠰᠢ᠂ ᠬᠠᠷᠢᠨ ᠭᠡᠳᠡᠷᠭᠦ ᠦᠪᠡᠷ ᠢ ᠪᠠᠨ ᠬᠠᠷᠠᠬᠤ ᠳᠤᠯᠢ ᠪᠠᠢ᠌ᠬᠤ ᠶᠤᠰᠤᠳᠠᠢ ︕ ᠢᠷᠠᠭᠤ ᠨᠠᠢ᠌ᠷᠠᠭᠴᠢ ᠶ·ᠳᠦᠪᠰᠢᠠᠪᠠᠶᠠᠷ ᠤᠨ 《ᠪᠠᠶᠠᠨ ᠭᠤᠤᠯ ᠮᠢᠨᠢ》 ᠭᠡᠭᠦ ᠰᠢᠯᠦᠭ᠌ ᠲᠤ 《ᠪᠠᠶᠠᠨ ᠭᠤᠤᠯ ᠮᠢᠨᠢ ᠡ ︕ / ᠰᠢᠷᠬᠠᠨ ᠤ ᠴᠢᠨᠢ / ᠬᠠᠮᠤᠭ ᠡᠮᠵᠡᠭ᠌ ᠰᠤᠷᠪᠢ / ᠰᠤᠬᠤᠷ ᠪᠠᠯᠠᠢ ᠣᠨ ᠵᠢᠯ ᠪᠢᠯᠠ》 ᠭᠡᠮᠡᠭᠦ ᠮᠦᠷ ᠪᠣᠢ᠃ ᠡᠮᠵᠡᠭ᠌ ᠮᠡᠳᠡᠷᠡᠭᠦᠢ᠂ ᠡᠴᠢᠨᠡ ᠰᠢᠷᠬᠠᠯᠠᠯ ᠨᠢ ᠣᠩᠰᠢᠭᠴᠢᠳ ᠶᠢᠡᠨ ᠨᠥᠯᠦᠭᠡᠯᠡᠨ ᠶᠠᠭᠤ ᠨᠢᠭᠡ ᠶᠢ ᠪᠣᠳᠤᠭᠤᠯᠤᠨᠠ᠃ ᠭᠦᠮᠤᠨ ᠪᠦᠭᠦᠨ ᠶ·ᠳᠦᠪᠰᠢᠠᠪᠠᠶᠠᠷ ᠰᠢᠭ᠌ ᠦᠪᠡᠷ ᠪᠢ᠂ ᠦᠨᠳᠦᠰᠦᠳᠠᠨ ᠤ ᠣᠬᠠᠮᠰᠠᠷ ᠳᠡᠭᠡᠷᠡ ᠣᠷᠤᠰᠢᠵᠤ ᠪᠠᠢ᠌ᠭᠠ ᠨᠠᠵᠠᠭᠠᠢ ᠰᠤᠷᠳᠠᠯ ᠢ ᠨᠠᠢ᠌ᠷᠠᠭ ᠤᠨ ᠳᠠᠰᠢᠭᠤᠷ ᠶᠢᠡᠷ ᠳᠠᠰᠢᠭᠤᠷᠳᠠᠵᠤ ᠴᠢᠳᠠᠪᠠᠯ ᠰᠠᠶᠢ ᠪᠢᠷ ᠪᠠᠷᠢᠭᠰᠠᠨ ᠤ ᠦᠨᠡ ᠪᠠᠨ ᠣᠯᠵᠤ ᠪᠠᠢ᠌ᠬᠤ ᠨᠢ ᠳᠠᠷᠠ᠃
《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠳᠤᠮᠳᠠᠴᠢ ᠦᠶᠡ ᠶᠢᠨ ᠰᠢᠯᠦᠭ᠍ᠴᠢᠳ ᠤᠨ ᠢᠯᠡᠷᠭᠡᠢ ᠨᠢᠭᠡᠨ ᠥᠨᠡᠯᠡᠭᠦᠰᠢᠳᠡᠢ ᠳᠠᠯᠠ ᠭᠡᠪᠠᠯ ᠣᠳᠤ ᠪᠣᠯᠳᠠᠯᠠ ᠪᠠᠷᠤᠭ ᠪᠦᠭᠦᠨ ᠶᠢᠡᠷ ᠶᠢᠡᠨ ᠪᠢᠷ ᠶᠢᠡᠨ ᠬᠠᠶᠠᠯ ᠦᠭᠡᠶ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠶᠢᠡᠨ ᠣᠷᠤᠯᠳᠤᠭᠰᠠᠭᠠᠷ ᠪᠣᠢ᠃ ᠡ᠊ᠨᠳᠡ ᠣᠠᠴᠠᠯᠠᠨ ᠳᠡᠮᠳᠡᠭᠯᠡᠭᠦᠰᠢᠳᠡᠢ ᠣᠴᠢᠷ ᠭᠡᠪᠠᠯ ᠮᠤᠩᠭ᠋ᠤᠯ ᠶᠢᠡᠷ ᠪᠢᠴᠢᠵᠤ ᠪᠠᠢ᠌ᠭᠰᠠᠨ ᠡᠴᠡ ᠪᠠᠨ ᠰᠢᠭᠤᠳ ᠭᠢᠳᠠᠤᠨ ᠭᠡᠯᠡ ᠪᠠᠷ ᠳᠤᠷᠰᠢᠨ ᠪᠢᠴᠢᠭᠦ ᠪᠣᠶᠤ ᠡᠰᠡᠭᠦᠯᠡ ᠮᠤᠩᠭ᠋ᠤᠯ ᠭᠢᠳᠠᠤᠨ ᠬᠤᠤᠰ ᠭᠡᠯᠡ ᠪᠠᠷ ᠵᠡᠷᠭᠡ ᠣᠷᠤᠯᠳᠤᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠶ᠋ᠢᠡᠨ ᠨᠠᠩ ᠦᠷᠭᠡᠨ ᠭᠡᠪᠴᠢᠶᠡᠨ ᠳᠤ ᠣᠬᠠᠭᠠᠭᠤᠯᠬᠤ᠂ ᠳᠠᠨᠢᠭᠤᠯᠬᠤ᠂ ᠰᠤᠷᠳᠠᠯᠴᠢᠯᠠᠬᠤ ᠠᠵᠢᠯ ᠳᠤ ᠣᠷᠠ ᠴᠢᠳᠠᠪᠣᠷᠢ᠂ ᠪᠢᠯᠢᠭ᠌ ᠠᠪᠢᠶᠠᠰ ᠶᠢᠡᠨ ᠰᠤᠷᠢᠵᠤ ᠡᠭᠢᠯᠡᠪᠡ᠃ ᠰᠢᠯᠦᠭ᠌ ᠨᠢ ᠶᠠᠪᠣᠬᠤ ᠳᠤᠰᠤᠮ ᠪᠣᠯᠪᠠᠰᠤᠷᠠᠨ ᠭᠠᠷᠰᠢᠵᠤ᠂ ᠶᠢᠷᠳᠢᠠᠴᠤ ᠶᠢᠨ ᠳᠤᠬᠠᠢ ᠦᠵᠡᠯᠳᠠ᠂ ᠦᠨᠳᠦᠰᠦᠳᠠᠨ ᠭᠢᠭᠡᠳ ᠦᠪᠡᠷ ᠪᠢ ᠶᠢᠨ ᠳᠤᠬᠠᠢ ᠳᠠᠨᠢᠯᠳᠠ᠂ ᠠᠮᠢᠳᠤᠷᠠᠬᠤᠢ ᠶᠢᠨ ᠣᠬᠠᠭᠠᠨ᠂ ᠭᠤᠸᠠ ᠮᠡᠳᠡᠷᠡᠭᠦᠢ᠂ ᠣᠷᠮᠠᠰ ᠰᠡᠳᠬᠢᠯᠭᠡ ᠳᠤ ᠳᠤᠩ ᠶᠡᠭᠡ ᠬᠤᠪᠢᠷᠠᠯᠳᠠ ᠭᠠᠷᠴᠤ ᠨᠠᠩ ᠭᠦᠨ᠂ ᠨᠢᠭᠤᠴᠠᠯᠢᠭ᠂ ᠪᠣᠳᠤᠯᠢᠶᠠᠠᠳᠠᠢ ᠵᠣᠢ᠌ᠯ ᠣᠷᠤᠭᠤ ᠵᠤᠷᠢᠯᠭᠠ ᠲᠡᠶ ᠭᠠᠷ ᠳᠦᠷᠦᠭᠦ ᠪᠣᠯᠤᠭᠰᠠᠨ ᠪᠠᠢ᠌ᠨᠠ᠃ ᠡᠭᠦᠨ ᠳᠤ ᠬᠢ᠊·ᠮᠥᠩᠭᠡᠪᠠᠶᠡᠷ ᠤᠨ 《ᠬᠠᠷᠠ ᠨᠢᠳᠤᠨ ᠴᠢ ᠮᠢᠨᠢ᠂ ᠬᠠᠮᠢᠭᠠ ᠪᠠᠢ᠌ᠨᠠ》 (《ᠴᠡᠴᠡᠭ᠍ᠳᠤ ᠴᠠᠢ᠌ᠳᠠᠮ》 2001 ᠣᠨ)᠂ ᠨ·ᠴᠡᠯᠡᠭᠡᠷ ᠤᠨ 《ᠨᠡᠭᠦᠳᠡᠯ ᠤᠨ ᠮᠦᠷ》 (ᠨ·ᠴᠡᠯᠡᠭᠡᠷ ᠤᠨ ᠰᠢᠯᠦᠭ᠌ ᠤᠨ ᠳᠤᠬᠠᠢ ᠪᠢ 《ᠠᠯᠳᠠᠨ ᠲᠦᠯᠭᠢᠭᠦᠷ》 ᠰᠡᠳᠭᠦᠯ ᠤᠨ 2010 ᠣᠨ ᠤ 2 ᠳ᠋ᠤᠭᠠᠷ ᠬᠤᠭᠤᠴᠠᠭᠠᠨ ᠳᠡᠭᠡᠷᠡ ᠦᠨᠡᠯᠠᠵᠤ ᠥᠩᠭᠡᠷᠡᠵᠡᠢ)᠃ ᠪᠠ᠊·ᠪᠠᠯᠮᠠᠳᠤᠷᠵᠢ ᠶᠢᠨ 《ᠨᠢᠭᠤᠴᠠ ᠳᠤᠪᠴᠢᠶᠠᠨ ᠤ ᠦᠷᠭᠦᠯᠵᠢᠯᠡᠯ》 (《ᠦᠨᠢᠷ ᠴᠡᠴᠡᠭ᠌》 2008 ᠣᠨ) ᠯ·ᠣᠳᠤᠨ ᠤ 《ᠮᠤᠩᠭ᠋ᠤᠯ ᠤᠨ ᠥᠡᠳᠦᠷᠯᠢᠭ᠌》 (《ᠦᠨᠢᠷ ᠴᠡᠴᠡᠭ᠌》 2009 ᠣᠨ 2) ᠵᠡᠷᠭᠡ ᠪᠦᠳᠦᠭᠡᠯ ᠢ ᠳᠤᠷᠠᠳᠴᠤ ᠪᠣᠯᠬᠤ ᠶᠤᠮ᠃
ᠢᠷᠠᠭᠤ ᠨᠠᠢ᠌ᠷᠠᠭᠴᠢ ᠬᠢ᠊·ᠮᠥᠩᠭᠡᠪᠠᠶᠡᠷ ᠡᠴᠡ 《ᠬᠠᠷᠠ ᠨᠢᠳᠤᠨ ᠴᠢ ᠮᠢᠨᠢ᠂ ᠬᠠᠮᠢᠭᠠ ᠪᠠᠢ᠌ᠨᠠ》 ᠭᠡᠭᠦ ᠰᠢᠯᠦᠭ᠌ ᠲᠤ ᠪᠠᠨ 《ᠦᠳᠡᠰᠢ ᠶᠢᠨ ᠪᠦᠷᠦᠢ ᠶᠢ ᠬᠤᠮᠢᠨ ᠢᠷᠠᠵᠤ / ᠦᠷᠡ ᠪᠠᠨ ᠪᠦᠪᠠᠢ᠌ᠯᠠᠨ ᠣᠠᠳᠠᠭᠤᠯᠳᠠᠭ / ᠬᠠᠷᠠ ᠨᠢᠳᠤᠨ ᠴᠢ ᠮᠢᠨᠢ᠂ ᠬᠠᠮᠢᠭᠠ ᠪᠠᠢ᠌ᠨᠠ》 ᠭᠡᠮᠡᠭᠦ ᠰᠢᠨᠡᠷᠭᠡᠭ᠌ ᠮᠦᠷ ᠢ ᠰᠠᠳᠭᠢᠮᠵᠢᠯᠠᠯᠠ᠃ ᠦᠳᠡᠰᠢ ᠶᠢᠨ ᠪᠦᠷᠦᠢ ᠶᠢ ᠳᠠᠷᠠ ᠶᠤᠰᠤᠭᠠᠷ ᠨᠢ ᠬᠤᠮᠢᠨ ᠢᠷᠡᠳᠡᠭ᠌ ᠪᠦᠰᠡᠭᠦᠢ ᠭᠦᠮᠤᠨ ᠤ ᠦᠷᠡ ᠳᠤ ᠪᠠᠨ ᠳᠡᠮᠡᠤᠯᠡᠭᠦ ᠬᠠᠢ᠌ᠷᠠ ᠶᠢ ᠶᠠᠮᠠᠷ ᠰᠠᠢ᠌ᠬᠠᠨ ᠳᠦᠷᠰᠦᠯᠡᠭ᠍ᠰᠡᠨ ᠭᠡᠵᠤ ᠰᠠᠨᠠᠨᠠ᠃ ᠳᠠᠯᠳᠠ ᠠᠳᠠᠯᠠ ᠢᠯᠠ᠂ ᠨᠢᠭᠤᠴᠠᠯᠢᠭ ᠭᠡᠳᠡᠯᠡ ᠳᠤᠳᠤ ᠡᠢ᠌ᠮᠦᠷᠭᠦ ᠣᠶᠤᠠᠯᠢᠭ ᠨᠠᠷᠢᠨ ᠮᠠᠳᠠᠷᠠᠮᠵᠢ ᠨᠢ ᠰᠢᠯᠦᠭ᠌ ᠶᠢᠡᠨ ᠨᠠᠩ ᠭᠤᠶᠤ ᠭᠡᠭᠡᠡᠴᠢᠷ ᠪᠣᠯᠭᠠᠵᠠᠢ᠃
ᠪᠠ᠊·ᠪᠠᠯᠮᠠᠳᠤᠷᠵᠢ ᠪᠣᠯ ᠶᠤ᠋·ᠮᠥᠩᠭᠡᠪᠠᠭᠡᠳᠦᠷ ᠤᠨ ᠳᠠᠷᠠᠭᠠ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠳᠠᠪᠴᠠᠩ ᠳᠡᠭᠡᠷᠡ ᠠᠭᠠᠵᠢᠮ ᠶᠢᠡᠷ ᠴᠤᠯᠭᠤᠷᠠᠨ ᠭᠠᠷᠤᠭᠰᠠᠨ ᠮᠠᠯᠴᠢᠨ ᠰᠢᠯᠦᠭ᠍ᠴᠢᠨ ᠶᠤᠮ᠃ ᠣᠢ᠌ᠭᠠ ᠦᠭᠡᠶ ᠣᠷᠤᠯᠳᠤᠯᠭᠠ᠂ ᠬᠠᠯᠠᠭᠤᠨ ᠣᠷᠮᠠᠰ᠂ ᠦᠪᠡᠷ ᠪᠢ ᠪᠠᠨ ᠳᠠᠪᠠᠬᠤ ᠭᠡᠰᠡᠨ ᠬᠠᠳᠠᠭᠤ ᠴᠢᠷᠮᠠᠢ᠌ᠯᠭᠠ ᠨᠢ ᠳᠠᠷᠠ ᠭᠤᠸᠠᠢ ᠶᠢ ᠠᠮᠵᠢᠯᠳᠠ ᠡᠴᠡ ᠠᠮᠵᠢᠯᠳᠠ ᠵᠥᠭ᠌ ᠭᠦᠳᠦᠯᠦᠭ᠍ᠰᠡᠭᠡᠷ ᠪᠠᠢ᠌ᠨᠠ᠃ ᠳᠡᠭᠦᠨ ᠤ ᠶᠡᠷᠡᠭᠡᠳ ᠣᠨ ᠤ ᠡᠭᠢᠨ ᠤ ᠰᠢᠯᠦᠭ᠌ ᠲᠤ ᠢᠯᠠ ᠣᠶᠠᠩᠭ᠋ᠠᠯᠠᠯ᠂ ᠰᠢᠭᠤᠳ ᠭᠦᠦᠷᠨᠢᠯ ᠤᠨ ᠬᠠᠵᠠᠭᠤ ᠪᠠᠷ ᠴᠢᠯᠦᠭᠡᠳᠤ ᠰᠢᠯᠦᠭ᠌ ᠤᠨ ᠥᠩᠭᠡ ᠪᠣᠳᠤᠭ ᠮᠠᠷ ᠮᠠᠷ ᠬᠠᠷᠠᠭᠳᠠᠵᠤ ᠪᠠᠢ᠌ᠭᠰᠠᠨ ᠪᠣᠯ ᠰᠢᠨᠡ ᠵᠠᠭᠤᠨ ᠳᠤ ᠣᠷᠤᠵᠤ ᠢᠷᠡᠭᠡᠳ ᠪᠢᠴᠢᠭ᠍ᠰᠡᠨ ᠰᠢᠯᠦᠭ᠌ ᠨᠢ ᠤᠳᠬᠠ ᠰᠡᠳᠦᠪᠯᠡᠭᠦᠨ ᠭᠦᠨ᠂ ᠢᠯᠡᠳᠭᠡᠭᠦ ᠠᠷᠭᠠ ᠶᠢᠨ ᠬᠤᠪᠢ ᠳᠤ ᠰᠢᠨᠡᠷᠭᠡᠭ᠌ ᠰᠡᠪᠠᠭᠦᠨ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠪᠠᠢ᠌ᠨᠠ᠃ ᠳᠠᠷᠠ ᠭᠤᠸᠠᠢ 《ᠠᠳᠤᠭᠤ ᠨᠢ ᠴᠥᠭᠡᠷᠡᠭ᠍ᠰᠡᠨ ᠳᠠᠯᠠ》 ᠭᠡᠮᠡᠭᠦ ᠰᠢᠯᠦᠭ᠌ ᠲᠤ ᠪᠠᠨ 《ᠠᠳᠠᠷ ᠤᠨ ᠡᠯᠢᠭᠡ / ᠠᠶᠠᠭᠠᠨ ᠳᠤᠭᠤᠷᠠᠢ ᠪᠠᠨ ᠠᠯᠳᠠᠵᠤ / ᠠᠷᠭᠠᠮᠵᠢᠶᠠ ᠨᠢ ᠳᠠᠰᠤᠷᠠᠭᠰᠠᠨ ᠭᠠᠳᠠᠰᠤᠨ ᠳᠡᠭᠡᠷᠡ / ᠦᠨᠦᠴᠢᠨ ᠵᠡᠭᠦᠳᠤ ᠮᠢᠨᠢ ᠭᠦᠷᠳᠡᠯᠡ ᠪᠦᠳᠦᠷᠢᠵᠤ ᠤᠢ᠌ᠴᠢᠨᠠ》 ᠭᠡᠮᠡᠨ ᠰᠢᠯᠦᠭᠯᠡᠭ᠍ᠰᠡᠨ ᠨᠢ ᠪᠣᠢ᠃ ᠡ᠊ᠨᠳᠡ ᠡᠵᠡᠨ ᠭᠦᠮᠤᠨ ᠤ ᠣᠬᠠᠮᠰᠠᠷᠳᠤ ᠰᠡᠳᠬᠢᠯᠭᠡ᠂ ᠡᠷᠡ ᠭᠦᠮᠤᠨ ᠤ ᠬᠦᠩᠭᠡᠨ ᠬᠠᠷᠠᠮᠰᠠᠯ ᠰᠢᠯᠦᠭ᠌ ᠤᠨ ᠰᠠᠨᠠᠭᠠ ᠪᠠᠨ ᠠᠮᠢᠯᠠᠭᠤᠯᠤᠨ ᠪᠣᠰᠬᠠᠵᠤ ᠭᠤᠨᠢᠭᠯᠢᠭ ᠥᠩᠭᠡ ᠣᠷᠤᠭᠤᠯᠵᠠᠢ᠃ ᠭᠠᠭᠴᠠᠬᠦ ᠡᠢ᠌ᠮᠤ ᠠᠮᠢᠳᠤᠷᠠᠯ ᠳᠤ ᠪᠠᠶᠠ᠂ ᠰᠡᠳᠭᠢᠯ᠂ ᠵᠢᠷᠦᠭᠡ ᠪᠠᠷ ᠶᠢᠡᠨ ᠠᠭᠤᠰᠤᠨ ᠢᠳᠡᠭᠡᠰᠢᠵᠤ ᠶᠠᠪᠣᠭᠰᠠᠨ ᠨᠡᠭᠦᠳᠡᠯᠴᠢᠨ ᠤ ᠬᠣᠢ᠌ᠴᠢᠰ ᠲᠤ ᠯᠠ ᠪᠠᠢ᠌ᠳᠠᠭ ᠰᠤᠶᠤᠯ ᠰᠡᠳᠭᠢᠭᠦᠢ ᠶᠢᠨ ᠣᠠᠴᠠᠭᠠᠢ ᠮᠠᠳᠠᠷᠠᠮᠵᠢ ᠡ᠊ᠨᠳᠡ ᠪᠠᠶᠠᠯᠠᠯ ᠶᠢᠡᠨ ᠣᠯᠵᠤ᠂ ᠠᠷᠭᠠᠮᠵᠢᠶᠠ ᠨᠢ ᠳᠠᠰᠤᠷᠠᠭᠰᠠᠨ ᠭᠠᠳᠠᠰᠤᠨ ᠳᠡᠭᠡᠷᠡ ᠦᠨᠦᠴᠢᠨ ᠵᠡᠭᠦᠳᠤ ᠶᠢ ᠨᠢ ᠭᠦᠷᠳᠡᠯᠡ ᠪᠦᠳᠦᠷᠢᠭᠡᠨ ᠤᠢ᠌ᠴᠢᠭᠤᠯᠬᠤ ᠳᠤ ᠭᠦᠷᠭᠡᠭᠦᠯᠦᠭ᠍ᠰᠡᠨ ᠪᠠᠢ᠌ᠨᠠ᠃
ᠲ᠋ᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠠᠩᠬᠠᠨ ᠤ ᠦᠶᠡ ᠶᠢᠨ ᠠᠬᠠᠮᠠᠤᠨ ᠰᠢᠯᠦᠭ᠍ᠴᠢᠳ ᠤᠨ ᠰᠢᠭᠤᠳ ᠨᠥᠯᠦᠭᠡ ᠳᠠᠭᠠᠭᠤᠯᠭᠠ ᠪᠠᠷ ᠦᠰᠤᠨ ᠪᠣᠢ᠌ᠵᠢᠭᠰᠠᠨ ᠳᠤᠮᠳᠠᠴᠢ ᠦᠶᠡ ᠶᠢᠨ ᠰᠢᠯᠦᠭ᠍ᠴᠢᠳ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠰᠢᠨᠠᠴᠢᠯᠠᠯ ᠳᠤ ᠵᠤᠭᠢᠬᠤ ᠨᠥᠯᠦᠭᠡ ᠥᠵᠡᠭᠦᠯᠦᠭ᠍ᠰᠡᠨ ᠶᠢᠡᠷ ᠵᠤᠭᠰᠤᠬᠤ ᠦᠭᠡᠶ ᠰᠢᠨᠡ ᠦᠶᠡ ᠶᠢᠨ ᠢᠷᠠᠭᠤ ᠨᠠᠢ᠌ᠷᠠᠭᠴᠢᠳ ᠶᠢᠡᠨ ᠣᠷᠮᠠᠰᠢᠭᠤᠯᠤᠨ ᠳᠠᠭᠠᠭᠤᠯᠬᠤ ᠳᠤ ᠭᠦᠭᠦᠷᠭᠡ ᠶᠢᠨ ᠣᠢ᠌ᠯᠠᠳᠤᠯ ᠥᠵᠡᠭᠦᠯᠦᠭ᠍ᠰᠡᠨ ᠭᠡᠭᠦ ᠳᠤ ᠢᠯᠡᠭᠦᠳᠡᠭᠦ ᠭᠠᠵᠠᠷ ᠠᠯᠠᠭᠠ᠃
ᠳᠦᠷᠪᠡ᠄ ᠰᠢᠨᠡ ᠦᠶᠡ ᠶᠢᠨ ᠢᠷᠠᠭᠤ ᠨᠠᠢ᠌ᠷᠠᠭ
ᠢᠷᠠᠭᠤ ᠨᠠᠢ᠌ᠷᠠᠭ ᠭᠡᠮᠡᠭ᠍ᠴᠢ ᠰᠡᠳᠭᠢᠯ ᠤᠨ ᠬᠤᠷᠠ᠂ ᠣᠶᠤᠨ ᠤ ᠳᠤᠨᠤᠳᠠᠰᠤ ︕ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠶᠢᠡᠷ ᠰᠡᠳᠭᠢᠯ ᠶᠢᠡᠨ ᠠᠷᠢᠭᠤᠰᠬᠠᠵᠤ᠂ ᠣᠶᠤᠨ ᠶᠢᠡᠨ ᠣᠮᠳᠠᠯᠠᠬᠤ ᠭᠡᠭ᠍ᠴᠢ ᠨᠢᠭᠡ ᠶᠤᠰᠤᠨ ᠤ ᠵᠢᠷᠭᠠᠯ ᠪᠣᠯᠠᠢ᠃ ᠰᠢᠨᠡ ᠵᠠᠭᠤᠨ ᠤ ᠰᠢᠷᠭᠠᠯ ᠦᠷ ᠥᠡᠳᠦᠷᠯᠢᠭ᠌ ᠤᠨ ᠵᠤᠯᠠᠢ ᠦᠨᠦᠰᠤᠨ ᠥᠡᠳᠡᠢ᠌ᠭᠦ ᠲᠡᠶ ᠵᠡᠷᠭᠡ ᠡᠭᠡ ᠰᠤᠶᠤᠯ ᠤᠨ ᠠᠷᠢᠭᠤᠨ ᠰᠢᠮᠠ ᠪᠠᠷ ᠳᠡᠩᠭᠡᠭᠡᠷᠡᠨ ᠪᠣᠢ᠌ᠵᠢᠭᠰᠠᠨ ᠨᠢᠭᠡ ᠪᠦᠯᠦᠭ᠌ ᠵᠠᠯᠠᠭᠤᠰ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠮᠥᠩᠭᠡ ᠳᠡᠭ᠍ᠷᠢ ᠳᠤ ᠪᠢᠯᠢᠭ᠌ ᠶᠢᠡᠨ ᠰᠤᠷᠢᠨ ᠳᠡᠭᠦᠯᠢᠨ ᠭᠠᠷᠴᠤ ᠢᠷᠠᠯᠠ᠃ ᠨᠡᠢ᠌ᠭᠡᠮ ᠤᠨ ᠭᠦᠭ᠍ᠵᠢᠯᠳᠡ᠂ ᠰᠤᠶᠤᠯ ᠤᠨ ᠳᠦᠷᠢᠯᠳᠠ ᠨᠢ ᠨᠡᠭᠦᠳᠡᠯ ᠠᠮᠢᠳᠤᠷᠠᠯ ᠤᠨ ᠪᠠᠢ᠌ᠭᠠᠯᠢᠯᠢᠭ ᠰᠡᠳᠭᠢᠭᠦᠢ ᠲᠡᠶ ᠬᠠᠷᠰᠢᠯᠳᠤᠵᠤ᠂ ᠪᠠᠢ᠌ᠭᠠᠯᠢ ᠣᠷᠴᠢᠨ ᠭᠢᠭᠡᠳ ᠰᠤᠶᠤᠯ ᠤᠨ ᠠᠮᠢ ᠠᠬᠤᠢ ᠶᠢᠨ ᠪᠣᠭᠢᠷᠳᠤᠯ ᠨᠢ ᠡᠳᠡᠭᠡᠷ ᠵᠠᠯᠠᠭᠤᠰ ᠤᠨ ᠣᠶᠤᠠᠯᠢᠭ ᠮᠠᠳᠠᠷᠠᠮᠵᠢ ᠶᠢ ᠭᠦᠡᠳᠡᠨ ᠰᠤᠶᠤᠯᠯᠢᠭ ᠣᠬᠠᠮᠰᠠᠷ ᠢ ᠨᠢ ᠥᠳᠦᠭᠡᠨ ᠡᠮᠵᠡᠭᠯᠡᠭᠦᠯᠦᠭ᠍ᠰᠡᠨ ᠨᠢ ᠦᠵᠡᠳᠠᠯᠠ ᠢᠯᠠ᠃ ᠠᠬᠠᠮᠠᠤᠨ᠂ ᠢᠳᠠᠷ ᠰᠢᠯᠦᠭ᠍ᠴᠢᠳ ᠤᠨ ᠶᠢᠡᠨ ᠠᠯᠳᠠᠨ ᠮᠦᠷ ᠢ ᠭᠢᠰᠭᠢᠨ ᠳᠠᠪᠢᠨ ᠭᠠᠷᠴᠤ ᠢᠷᠡᠭ᠍ᠰᠡᠨ ᠰᠢᠨᠡ ᠭᠠᠷᠴᠤᠳ ᠮᠠᠨᠢ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠪᠦᠷᠢᠶᠡᠰᠤ ᠶᠢ ᠰᠢᠨᠡᠳᠭᠡᠨ ᠳᠤᠭᠤᠷᠭᠠ ᠶᠢ ᠬᠠᠪᠣᠯᠴᠠᠯᠠ᠃ ᠦᠷᠭᠦᠯᠵᠢ ᠣᠷᠤᠯᠳᠤᠨ ᠨᠡᠢ᠌ᠭᠡᠮ ᠳᠡᠭᠡᠷᠡ ᠵᠤᠭᠢᠬᠤ ᠨᠥᠯᠦᠭᠡ ᠲᠡᠶ ᠶᠠᠪᠣᠭᠠ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠰᠢᠨᠡ ᠦᠶᠡ ᠶᠢᠨ ᠰᠢᠯᠦᠭ᠍ᠴᠢᠳ ᠡᠴᠡ ᠪᠠ᠊·ᠪᠦᠷᠭᠦᠤᠨ᠂ ᠬᠠᠰᠭᠢᠷᠤᠯ᠂ ᠪᠠ᠊·ᠷᠠ᠊·ᠡᠷᠳᠡᠨᠢᠮᠦ᠋ᠩᠭᠡ᠂ ᠯᠧ᠊·ᠮᠥᠩᠭᠡ᠂ ᠼ·ᠣᠯᠠᠭᠠ᠊ᠤ᠋ᠳᠤ᠂ ᠤᠯᠠᠭᠠᠡᠭᠡᠷᠡᠯ᠂ ᠳᠡᠯᠡᠢ᠌ᠭᠦ᠋ᠤ᠂ ᠡ᠊·ᠭᠦᠳᠡᠭᠡ᠂ ᠤᠳᠦᠡᠭᠦ᠋ᠤ᠂ ᠰᠢᠨᠠᠪᠣᠳᠤᠯ᠂ ᠮ·ᠰᠢᠪᠣᠰᠤᠨ᠂ ᠮᠦ᠋᠊·ᠠᠰᠬᠠ ᠨᠡᠷ ᠢ ᠳᠤᠷᠠᠳᠴᠤ ᠪᠣᠯᠬᠤ ᠶᠤᠮ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠪᠠᠰᠠ ᠨᠤᠮ ᠳᠠᠪᠳᠠᠷ ᠭᠡᠪᠯᠡᠭᠦᠯᠦᠭ᠍ᠰᠡᠨ᠂ ᠣᠳᠠᠭᠠᠨ ᠵᠢᠯ ᠪᠢᠷ ᠪᠠᠷᠢᠭᠰᠠᠨ ᠪᠣᠶᠤ ᠶᠠᠭ ᠪᠢᠷ ᠡᠭᠢᠯᠡᠨ ᠪᠠᠷᠢᠵᠤ ᠪᠠᠢ᠌ᠭᠠ᠂ ᠮᠤᠩᠭ᠋ᠤᠯ ᠰᠦᠯᠵᠢᠶᠠᠨ ᠳᠡᠭᠡᠷᠡ ᠡᠳᠦᠷ ᠠᠯᠤᠰᠯᠠᠨ ᠰᠢᠨᠡ ᠪᠦᠳᠦᠭᠡᠯ ᠶᠢᠡᠨ ᠨᠠᠢ᠌ᠳᠠᠯᠠᠵᠤ ᠪᠠᠢ᠌ᠭᠠ ᠪᠢᠯᠢᠭ᠌ ᠠᠪᠢᠶᠠᠰ ᠲᠡᠶ᠂ ᠰᠤᠶᠤᠯ ᠳᠤ ᠪᠠᠨ ᠬᠠᠢ᠌ᠷᠳᠠᠢ ᠣᠶᠤᠳᠠᠨ᠂ ᠺᠠᠳ᠋ᠷ᠂ ᠮᠠᠯᠴᠢᠨ ᠵᠠᠯᠠᠭᠤᠰ ᠭᠡᠰᠡᠭ᠌ ᠪᠠᠢ᠌ᠭᠠ ᠶᠢ ᠡ᠊ᠨᠳᠡ ᠨᠢᠭᠡᠳ ᠨᠢᠭᠡ ᠪᠠᠷ ᠳᠡᠮᠳᠡᠭᠯᠡᠭ᠍ᠰᠡᠨ ᠦᠭᠡᠶ᠃ ᠭᠡᠪᠠᠴᠤ ᠨᠠᠯᠢᠶᠠᠤᠨ ᠣᠷᠣᠢ᠌ᠳᠠᠭᠠᠤᠨ ᠪᠢᠷ ᠪᠠᠷᠢᠭᠰᠠᠨ ᠳᠦᠭᠦᠷᠰᠦ᠋ᠷᠦᠩ ᠭᠤᠸᠠᠢ ᠪᠣᠯᠤᠨ ᠮᠠᠯᠴᠢᠨ ᠡᠪᠦᠭᠡᠨ ᠭᠤ᠋·ᠮᠥᠩᠭᠡ ᠬᠤᠶᠠᠷ ᠢ ᠳᠤᠷᠠᠳᠬᠤ ᠶᠤᠰᠤᠳᠠᠢ᠃ ᠡᠳᠡ ᠬᠤᠶᠠᠭᠤᠯᠠ ᠭᠡᠳᠥᠢᠪᠠᠷ ᠵᠢᠭᠠᠬᠠᠨ ᠣᠷᠣᠢ᠌ᠳᠠᠭᠠᠤᠨ ᠪᠢᠷ ᠪᠠᠷᠢᠭᠰᠠᠨ ᠪᠣᠯᠪᠠᠴᠤ ᠦᠨᠳᠦᠰᠦᠳᠠᠨ ᠭᠢᠭᠡᠳ ᠭᠡᠯᠡ ᠰᠤᠶᠤᠯ ᠳᠤ ᠪᠠᠨ ᠬᠠᠠᠳᠤᠭᠰᠠᠨ ᠬᠠᠷᠢᠭᠤᠴᠠᠯᠭᠠᠳᠤ ᠰᠡᠳᠬᠢᠯᠭᠡ ᠵᠢᠴᠢ ᠰᠤᠶᠤᠯ ᠤᠨ ᠵᠤᠷᠢᠭ ᠰᠠᠨᠠᠭᠠ ᠶᠢ ᠨᠢ ᠣᠮᠳᠤᠭᠠᠢ᠌ᠯᠠᠵᠤ ᠦᠯᠦ ᠪᠣᠯᠤᠨᠠ᠃ ᠳᠦᠭᠦᠷᠰᠦ᠋ᠷᠦᠩ ᠭᠤᠸᠠᠢ ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠰᠢᠨᠡ ᠦᠶᠡ ᠶᠢᠨ ᠰᠢᠯᠦᠭ᠍ᠴᠢᠳ ᠡᠴᠡ ᠬᠤᠴᠤᠷᠤᠯ ᠦᠭᠡᠶ ᠮᠦᠷᠤ ᠵᠡᠷᠭᠡᠴᠡᠨ ᠪᠣᠰᠴᠤ᠂ ᠣᠬᠤᠷᠬᠠᠨ ᠭᠡᠳᠤᠨ ᠵᠢᠯ ᠤᠨ ᠬᠤᠭᠤᠷᠤᠠᠳᠤ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠶᠢᠡᠷ ᠶᠢᠡᠨ ᠣᠩᠰᠢᠭᠴᠢᠳ ᠲᠡᠶ ᠪᠠᠨ ᠳᠠᠨᠢᠯᠴᠠᠭᠰᠠᠨ ᠪᠦᠭᠡᠳ ᠨᠢᠭᠡ ᠳᠤᠤᠷᠠ ᠬᠤᠶᠠᠷ ᠴᠤ ᠨᠤᠮ ᠭᠡᠪᠯᠡᠭᠦᠯᠪᠡ᠃ ᠭᠢᠳᠠᠯ ᠠᠯᠳᠠᠬᠤ ᠳᠤ ᠪᠠᠨ ᠭᠢᠭ᠍ᠰᠡᠨ ᠢᠯᠡᠭᠦᠴᠡ ᠠᠵᠢᠯ ᠯᠠᠪ ᠪᠢᠰᠢ ᠡ᠂ ᠨᠢᠳᠤᠨ ᠡᠮᠤᠨᠡ ᠨᠢ ᠥᠵᠡᠭ᠍ᠳᠡᠨ ᠪᠠᠢ᠌ᠭᠠ ᠭᠡᠯᠡ ᠰᠤᠶᠤᠯ ᠤᠨ ᠬᠠᠮᠠᠭᠤᠷᠠᠯ᠂ ᠨᠤᠳᠤᠭ ᠪᠠᠯᠴᠢᠭᠡᠷ ᠤᠨ ᠪᠣᠭᠢᠷᠳᠤᠯ ᠳᠠᠷᠠ ᠭᠤᠸᠠᠢ ᠶᠢᠨ ᠰᠡᠳᠭᠢᠯ ᠣᠶᠤᠨ ᠡᠴᠡ ᠨᠢᠳᠤᠷᠤᠭᠠᠤᠨ ᠦᠨᠡᠨ ᠨᠠᠮ ᠰᠠᠭᠤᠯᠭᠠᠭᠰᠠᠨ ᠪᠠᠢ᠌ᠬᠤ ᠦᠭᠡᠶ᠃ ᠡ᠊ᠨᠳᠡ ᠮᠤᠩᠭ᠋ᠤᠯ ᠰᠤᠶᠤᠯ ᠤᠨ ᠡᠮᠤᠨᠡ ᠡᠴᠡ ᠡᠳᠡᠨ ᠳᠤ ᠬᠠᠳᠠᠭ ᠪᠠᠷᠢᠵᠤ ᠪᠠᠢ᠌ᠨᠠ᠃
ᠲ᠋ᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠰᠢᠨᠡ ᠢᠷᠠᠭᠤ ᠨᠠᠢ᠌ᠷᠠᠭ ᠤᠳᠬᠠ ᠰᠡᠳᠦᠪᠯᠡᠭᠦᠨ᠂ ᠢᠯᠡᠳᠭᠡᠭᠦ ᠠᠷᠭᠠ ᠪᠠᠷᠢᠯ᠂ ᠣᠷᠮᠠᠰ ᠰᠡᠳᠬᠢᠯᠭᠡ᠂ ᠣᠬᠠᠮᠰᠠᠷᠳᠤ ᠭᠦᠭᠡᠭᠡᠴᠡᠯᠳᠦᠯ ᠵᠢᠴᠢ ᠦᠪᠡᠷᠮᠢᠴᠠ ᠰᠤᠶᠤᠯ ᠰᠡᠳᠭᠢᠭᠦᠢ ᠶᠢᠨ ᠬᠤᠪᠢ ᠳᠤ ᠦᠪᠡᠷ ᠦᠪᠡᠷ ᠤᠨ ᠣᠠᠴᠠᠯᠢᠭ᠂ ᠦᠨᠦᠷ ᠠᠮᠳᠠ ᠲᠡᠶ ᠪᠣᠯᠤᠭᠰᠠᠨ ᠳᠠᠳᠤᠢ ᠦᠭᠡᠶ ᠦᠨᠳᠦᠰᠦᠳᠠᠨ ᠤ ᠬᠤᠪᠢ ᠵᠠᠶᠠᠭᠠ᠂ ᠪᠣᠳᠠᠳᠤ ᠠᠬᠤᠢ᠂ ᠦᠪᠡᠷ ᠪᠢ ᠶᠢᠨ ᠣᠷᠤᠰᠢᠬᠤᠢ ᠶᠢᠨ ᠳᠤᠬᠠᠢ ᠰᠢᠨᠡ ᠳᠠᠨᠢᠯᠳᠠ ᠲᠡᠶ ᠪᠣᠯᠵᠤ᠂ ᠭᠤᠳᠤᠷᠠᠯ ᠤᠨ ᠳᠤᠮᠳᠠ ᠡᠴᠡ ᠪᠠᠶᠠᠷ ᠪᠠᠶᠠᠰᠤᠯ᠂ ᠮᠤᠬᠤᠷᠳᠠᠯ ᠤᠨ ᠭᠦᠨ ᠡᠴᠡ ᠢᠳᠡᠭᠡᠯ ᠭᠦᠰᠡᠯ ᠤᠨ ᠭᠡᠷᠡᠯ ᠢ ᠣᠯᠬᠤ ᠭᠡᠮᠡᠨ ᠪᠢᠷ ᠪᠠᠷᠢᠭᠰᠠᠨ ᠨᠢ ᠬᠠᠢ᠌ᠷᠠᠯᠠᠯᠳᠠᠢ᠃ ᠰᠡᠳᠭᠢᠯ ᠤᠨ ᠳᠠᠷᠤᠭᠠᠰᠤ ᠨᠡᠮᠡᠭ᠍ᠳᠡᠨ ᠰᠤᠶᠤᠯ ᠤᠨ ᠳᠡᠨᠦᠭᠦᠴᠢᠯᠡᠯ ᠰᠢᠷᠦᠭᠦᠰᠭᠦ ᠶᠢ ᠳᠠᠭᠠᠯᠳᠤᠨ ᠣᠶᠤᠨ ᠤ ᠳᠤᠨᠤᠳᠠᠰᠤ ᠪᠣᠯᠤᠭᠰᠠᠨ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠨᠢ ᠴᠤ ᠭᠢᠯᠢ ᠶᠢᠨ ᠳᠡᠭᠡᠰᠤ ᠣᠭᠳᠤᠯᠤᠨ ᠳᠡᠯᠡᠭᠡᠢ ᠶᠢᠨ ᠬᠠᠷᠠᠭᠠᠨ ᠳᠤ ᠳᠡᠯᠭᠡᠭ᠍ᠳᠡᠭᠦ ᠨᠥᠭᠦᠴᠡᠯ ᠪᠣᠯᠤᠮᠵᠢ ᠶᠢ ᠪᠣᠢ ᠪᠣᠯᠭᠠᠯᠠ᠃
ᠵᠠᠯᠠᠭᠤ ᠢᠷᠠᠭᠤ ᠨᠠᠢ᠌ᠷᠠᠭᠴᠢ ᠪᠠ᠊·ᠪᠦᠷᠭᠦᠤᠨ ᠦᠪᠡᠷ ᠤᠨ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠶᠢᠡᠷ ᠶᠢᠡᠨ ᠮᠤᠩᠭ᠋ᠤᠯ ᠣᠯᠤᠰ᠂ ᠳᠡᠯᠡᠭᠡᠢ ᠶᠢᠨ ᠰᠤᠨᠤᠷ ᠲᠤ ᠭᠦᠷᠳᠡᠯᠡ ᠳᠠᠨᠢᠭᠳᠠᠭᠰᠠᠨ ᠶᠢᠡᠷ ᠵᠤᠭᠰᠤᠭᠰᠠᠨ ᠦᠭᠡᠶ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠶ᠋ᠢᠡᠨ ᠳᠡᠯᠡᠭᠡᠢ ᠨᠠᠢ᠌ᠳᠠ ᠳᠤ ᠳᠠᠨᠢᠭᠤᠯᠬᠤ ᠭᠡᠵᠤ ᠭᠡᠮᠵᠢᠶᠡ ᠲᠡᠶ ᠴᠠᠭ ᠶᠢᠡᠨ ᠰᠢᠬᠠᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠢᠷᠠᠭᠤ ᠳᠠᠭᠤᠨ》 (2006 ᠣᠨ) ᠭᠡᠮᠡᠭᠦ ᠺᠢᠷᠢᠯ ᠦᠰᠦᠭ᠌ ᠤᠨ ᠠᠩᠬᠠᠳᠤᠭᠴᠢ ᠨᠤᠮ ᠢ ᠭᠡᠪᠯᠡᠭᠦᠯᠤᠨ ᠳᠠᠷᠬᠠᠭᠠᠵᠤ᠂ ᠠᠷᠤ ᠮᠤᠩᠭ᠋ᠤᠯ ᠪᠣᠯᠤᠨ ᠳᠡᠭᠡᠳᠤ ᠮᠤᠩᠭ᠋ᠤᠯ ᠬᠤᠭᠤᠷᠤᠠᠳᠤ ᠪᠠᠨ ᠰᠤᠶᠤᠯ ᠤᠨ ᠰᠤᠯᠢᠯᠴᠠᠭᠠ ᠦᠷᠨᠢᠭᠦᠯᠭᠦ ᠳᠤ ᠪᠣᠶᠠᠨ ᠤ ᠬᠠᠭᠠᠯᠭᠠ ᠶᠢ ᠡᠭᠢᠯᠡᠨ ᠨᠡᠭᠡᠭᠡᠵᠡᠢ᠃
ᠪᠠ᠊·ᠪᠦᠷᠭᠦᠤᠨ ᠤᠨ ᠰᠢᠯᠦᠭ᠌ ᠨᠤᠳᠤᠭᠰᠢᠭ ᠪᠣᠷᠤᠭᠵᠢᠭᠤᠨ᠂ ᠭᠡᠯᠡ ᠬᠤᠷᠴᠠ᠂ ᠰᠠᠳᠭᠢᠮᠵᠢ ᠣᠷᠠᠨ᠂ ᠤᠶᠠᠩᠭᠠ ᠰᠡᠳᠬᠢᠯᠭᠡ ᠪᠢᠯᠬᠠᠮᠠ᠃ ᠳᠡᠭᠦᠨ ᠤ 《ᠣᠪ ᠣᠯᠠᠭᠠᠨ ᠰᠠᠷᠠᠨᠠᠢ》 (ᠺᠢᠷᠢᠯ ᠦᠰᠦᠭ᠌ ᠤᠨ) ᠭᠡᠭᠦ ᠰᠢᠯᠦᠭ᠌ ᠤᠨ ᠡᠭᠢᠨ ᠳᠤ 《ᠮᠢᠨᠤ ᠳᠦᠷᠦᠭ᠍ᠰᠡᠨ ᠨᠤᠳᠤᠭ ᠲᠤ / ᠣᠪ ᠣᠯᠠᠭᠠᠨ ᠰᠠᠷᠠᠨᠠᠢ ᠣᠷᠭᠤᠭᠠ ᠦᠭᠡᠶ / ᠮᠢᠩᠭ᠋ᠠᠨ ᠴᠡᠴᠡᠭᠡᠰ ᠤᠨ ᠰᠤᠯᠤᠩᠭ᠋ᠠᠨ ᠳᠤᠮᠳᠠ / ᠭᠠᠭᠴᠠᠬᠠᠨ ᠥᠩᠭᠡ ᠨᠢᠭᠤᠭᠳᠠᠭᠠ ᠦᠭᠡᠶ》 ᠭᠡᠮᠡᠭᠦ ᠪᠣᠷᠤᠭᠵᠢᠭᠤᠨ ᠣᠶᠠᠩᠭ᠋ᠠᠯᠠᠯ ᠪᠣᠢ᠃ ᠦᠩᠭᠡᠨ ᠳᠠᠯᠠ ᠡᠴᠡ ᠨᠢ ᠠᠪᠤᠨ ᠥᠵᠡᠭᠦ ᠳᠤ ᠭᠡᠨ ᠴᠤ ᠭᠡᠳ ᠪᠢᠴᠢᠴᠢᠭᠡᠮᠡᠷ ᠠᠮᠠᠷᠬᠠᠨ ᠰᠠᠳᠤᠪ᠂ ᠭᠡᠳᠡᠯᠡ ᠳᠡᠭᠦᠨ ᠳᠤ ᠠᠭᠤᠯᠤᠭᠳᠠᠨ ᠪᠠᠢ᠌ᠭᠠ ᠰᠤᠶᠤᠯ ᠰᠡᠳᠭᠢᠭᠦᠢ ᠶᠢᠨ ᠦᠪᠡᠷᠮᠢᠴᠠ ᠬᠠᠷᠠᠭᠠ᠂ ᠬᠠᠢ᠌ᠷᠠ ᠳᠤᠷᠠᠯᠠᠯ ᠤᠨ ᠳᠤᠬᠠᠢ ᠴᠠᠪᠠᠷ ᠣᠢ᠌ᠯᠠᠭᠠᠯᠳᠠ᠂ ᠶᠠᠰᠤ ᠴᠢᠮᠦᠭᠡᠨ ᠳᠤ ᠰᠢᠩᠭᠡᠭ᠍ᠰᠡᠨ ᠣᠶᠤᠠᠯᠢᠭ ᠮᠠᠳᠠᠷᠠᠮᠵᠢ᠂ ᠬᠠᠯᠠᠭᠤᠨ ᠣᠷᠮᠠᠰ ᠰᠢᠯᠦᠭ᠌ ᠤᠨ ᠰᠢᠠᠳᠠᠰᠤᠨ ᠳᠤ ᠨᠢ ᠨᠢᠭᠤᠭᠳᠠᠨ ᠪᠠᠢ᠌ᠭᠠ᠃ ᠠᠮᠠᠷᠬᠠᠨ ᠣᠢ᠌ᠯᠠᠭᠠᠭᠳᠠᠬᠤ ᠵᠣᠢ᠌ᠯ ᠢ ᠳᠠᠷᠠ ᠶᠠᠩᠵᠤ ᠪᠠᠷ ᠨᠢ ᠪᠢᠴᠢᠭᠦ ᠦᠭᠡᠶ ᠬᠠᠷᠢᠨ ᠣᠷᠠᠯᠢᠭ ᠤᠨ ᠪᠣᠳᠤᠭ ᠶᠢᠡᠷ ᠥᠩᠭᠡᠯᠡᠨ ᠰᠡᠳᠬᠢᠯᠭᠡ ᠶᠢᠨ ᠭᠡ ᠳᠠᠭᠠᠷᠠᠭᠤᠯᠵᠤ᠂ ᠣᠩᠰᠢᠭᠴᠢᠳ ᠤᠨ ᠰᠤᠨᠢᠷᠬᠠᠯ ᠳᠤ ᠭᠦᠷᠭᠡᠭ᠍ᠰᠡᠨ ᠨᠢ ᠵᠢᠭ᠍ᠳᠡᠢ᠃ ᠳᠡᠭᠡᠭᠡᠳ ᠨᠢᠭᠡᠯᠡ ᠭᠦᠮᠤᠨ ᠳᠤ ᠳᠤᠷᠠᠯᠠᠭᠠᠤᠨ ᠳᠡᠯᠭᠡᠷᠡᠳᠡᠭ᠌ ᠳᠤᠷᠠᠯᠠᠯ ᠤᠨ ᠴᠡᠴᠡᠭ᠌ ᠢ ᠭᠠᠵᠠᠷ ᠪᠣᠯᠭᠠᠨ ᠳᠤ ᠳᠡᠯᠭᠡᠷᠡᠳᠡᠭ᠌ ᠦᠭᠡᠶ ᠣᠪ ᠣᠯᠠᠭᠠᠨ ᠰᠠᠷᠠᠨᠠᠢ ᠪᠠᠷ ᠵᠥᠢᠷᠯᠡᠭ᠍ᠰᠡᠨ ᠨᠢ ᠣᠴᠢᠷᠳᠠᠢ ︕
ᠪᠠ᠊·ᠷᠠ᠊·ᠡᠷᠳᠡᠨᠢᠮᠥ᠋ᠩᠭᠡ ᠶᠢ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠳᠠᠪᠴᠠᠩ ᠳᠡᠭᠡᠷᠡ ᠰᠢᠨᠡ ᠪᠠᠷ ᠴᠤᠯᠭᠤᠷᠠᠨ ᠭᠠᠷᠴᠤ ᠪᠠᠢ᠌ᠭᠠ ᠵᠠᠯᠠᠭᠤ ᠮᠠᠯᠴᠢᠨ ᠰᠢᠯᠦᠭ᠍ᠴᠢᠨ ᠭᠡᠵᠤ ᠪᠣᠯᠬᠤ ᠶᠤᠮ᠃ ᠳᠦᠷᠤᠯᠭᠢ ᠶᠢᠨ ᠰᠤᠨᠢᠨ ᠠᠪᠢᠶᠠᠰ᠂ ᠳᠤᠷᠭᠠᠨ ᠮᠠᠳᠠᠷᠠᠮᠵᠢ᠂ ᠳᠤᠰᠤᠨ ᠭᠡᠯᠡ᠂ ᠳᠤᠷᠠ ᠰᠤᠨᠢᠷᠬᠠᠯ ᠨᠢ ᠳᠡᠭᠦᠨ ᠢ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠳᠠᠳᠠᠯᠬᠤ ᠶᠢᠨ ᠭᠡᠴᠡᠭᠦᠤ ᠣᠢ᠌ᠯᠠᠨ ᠳᠤ ᠳᠠᠰᠬᠠᠭᠰᠠᠭᠠᠷ ᠪᠣᠢ᠃ ᠳᠠᠷᠠ ᠮᠠᠯ ᠤᠨ ᠬᠠᠵᠠᠭᠤ ᠳᠤ ᠰᠢᠯᠦᠭ᠌ ᠤᠨ ᠮᠢᠯᠠᠭᠠ ᠪᠠᠷᠢᠭᠰᠠᠨ ᠡᠳᠦᠷ ᠡᠴᠡ ᠨᠠᠮ ᠦᠭᠡᠶ ᠠᠷᠪᠢᠨ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠪᠢᠴᠢᠵᠤ᠂ ᠰᠤᠨᠢᠨ ᠰᠡᠳᠭᠦᠯ ᠳᠤ ᠨᠡᠢ᠌ᠳᠡᠯᠡᠭᠦᠯᠦᠭ᠍ᠰᠡᠨ ᠶᠢᠡᠷ ᠪᠠᠷᠠᠬᠤ ᠦᠭᠡᠶ ᠬᠤᠪᠢ ᠪᠠᠷ ᠶᠢᠡᠨ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ ᠭᠡᠪᠯᠡᠭᠦᠯᠦᠭᠡᠳ ᠠᠮᠵᠢᠵᠠᠢ᠃ ᠭᠠᠳᠠᠨᠠ ᠪᠠᠨ ᠢᠳᠡᠭᠦ ᠮᠠᠯ ᠲᠡᠶ᠂ ᠭᠠᠷ ᠲᠤ ᠪᠠᠨ ᠪᠠᠷᠢᠬᠤ ᠵᠤᠭᠤᠰ ᠲᠡᠶ ᠪᠣᠯᠤᠭᠰᠠᠨ ᠦᠨᠦᠳᠤᠷ ᠤᠨ ᠮᠠᠯᠴᠢᠳ ᠮᠠᠨᠢ ᠵᠠᠪ ᠯᠠ ᠭᠠᠷᠤᠭᠰᠠᠭᠠᠷ ᠮᠠᠵᠢᠶᠠᠩ ᠨᠠᠢ᠌ᠷ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠠᠢ᠌ᠳᠠᠭ ᠶᠢᠡᠨ ᠭᠦᠪᠢᠳᠡᠭ᠌ ᠪᠣᠯᠤᠭᠰᠠᠨ ᠪᠠᠢ᠌ᠬᠤ ᠳᠤ ᠪᠠ᠊·ᠷᠠ᠊·ᠡᠷᠳᠡᠨᠢᠮᠥ᠋ᠩᠭᠡ ᠳᠡᠭᠡᠭᠡ ᠦᠭᠡᠶ᠃ ᠳᠠᠷᠠ ᠶᠠᠮᠠᠷ ᠵᠤᠭᠤᠰ ᠦᠭᠡᠶ ᠳᠤ ᠪᠠᠨ ᠪᠢᠰᠢ᠂ ᠬᠠᠷᠢᠨ ᠰᠤᠶᠤᠯ ᠶᠢᠡᠨ ᠭᠡᠰᠡᠨ ᠬᠠᠷᠢᠭᠤᠴᠠᠯᠭᠠᠳᠤ ᠰᠡᠳᠭᠢᠯ᠂ ᠬᠠᠯᠠᠭᠤᠨ ᠣᠷᠮᠠᠰ ᠨᠢ ᠳᠡᠭᠦᠨ ᠳᠤ ᠵᠦᠪ ᠵᠠᠮ ᠵᠢᠭᠠᠵᠤ ᠥᠭ᠍ᠴᠡᠢ᠃
ᠲ᠋ᠡᠭᠦᠨ ᠤ ᠰᠢᠯᠦᠭ᠌ ᠲᠤ ᠴᠠᠪᠠᠷ ᠰᠢᠯᠤᠭᠤᠨ ᠳᠦᠷᠰᠤᠯᠠᠯ᠂ ᠭᠡᠭᠡᠮᠰᠦᠭ᠌ ᠣᠷᠠᠨ ᠰᠠᠨᠠᠭᠠ᠂ ᠠᠮᠢᠳᠤ ᠪᠣᠷᠤᠭᠵᠢᠭᠤᠨ ᠭᠡᠯᠡ ᠨᠢ ᠭᠡᠷ ᠤᠨ ᠵᠥᠭᠡᠯᠡᠨ ᠳᠠᠷᠠᠭ ᠰᠢᠭ ᠬᠠᠯᠠᠭᠤᠨ ᠪᠦᠯᠢᠶᠡᠨ᠂ ᠭᠦᠷᠦᠩᠭᠡ ᠬᠤᠴᠢᠯᠭᠠ ᠨᠢ ᠳᠠᠭᠠᠷᠠᠨ ᠪᠦᠷᠢᠯᠳᠦᠭᠡᠳ ᠱᠠᠩᠳᠠᠭᠤᠨ ᠪᠦᠭᠡᠳ ᠠᠮᠳᠠᠷᠬᠠᠭ᠃ ᠳᠠᠷᠠ 《ᠪᠢ ᠬᠤᠯᠠ ᠶᠠᠪᠣᠨᠠ》 ᠭᠡᠭᠦ ᠰᠢᠯᠦᠭ᠌ ᠲᠤ ᠪᠠᠨ 《ᠭᠦᠯ ᠭᠦᠷᠭᠦ ᠦᠭᠡᠶ ᠦᠨᠳᠦᠷ ᠲᠤ ᠮᠦᠷ ᠶᠢᠡᠨ ᠭᠠᠷᠭᠠᠬᠤ ᠪᠠᠷ ᠬᠤᠯᠠ ᠶᠠᠪᠣᠨᠠ / ᠭᠡᠯᠡ ᠭᠦᠷᠭᠦ ᠦᠭᠡᠶ ᠬᠤᠯᠠ ᠳᠤ ᠨᠠᠷᠠ ᠪᠠᠨ ᠥᠯᠡᠳᠡᠭᠡᠭᠦ ᠪᠠᠷ ᠬᠤᠯᠠ ᠶᠠᠪᠣᠨᠠ / ᠭᠡᠭᠡ ᠳᠤᠰᠬᠤ ᠦᠭᠡᠶ ᠬᠠᠷᠠᠩᠭ᠋ᠤᠢ ᠳᠤ ᠰᠡᠭᠦᠳᠡᠷ ᠶᠢᠡᠨ ᠥᠯᠡᠳᠡᠭᠡᠭᠦ ᠪᠠᠷ ᠬᠤᠯᠠ ᠶᠠᠪᠣᠨᠠ》 ᠭᠡᠮᠡᠨ ᠣᠩᠰᠢᠭᠰᠠᠨ ᠭᠦᠮᠤᠨ ᠢ ᠳᠠᠭᠠᠭᠠᠤᠨ ᠳᠡᠷᠪᠠᠭᠦᠯᠦᠮᠡ ᠭᠦᠭᠡᠷᠦᠭᠦᠨ ᠣᠶᠩᠭ᠋ᠠᠯᠠᠳᠠᠭ᠃ ᠳᠡᠭᠦᠨ ᠤ ᠡᠨᠡ ᠰᠢᠯᠦᠭ᠌ ᠡᠴᠡ ᠰᠢᠨᠡ ᠴᠠᠭ ᠤᠨ ᠮᠠᠯᠴᠢᠳ ᠤᠨ ᠭᠦᠰᠡᠯ ᠪᠣᠳᠤᠯ᠂ ᠦᠷᠳᠡᠭ᠌ ᠤᠨ ᠦᠵᠡᠯᠳᠠ᠂ ᠰᠤᠶᠤᠯᠯᠢᠭ ᠣᠬᠠᠮᠰᠠᠷ ᠢ ᠵᠤᠭᠢᠬᠤ ᠭᠡᠮᠵᠢᠶᠡ ᠪᠠᠷ ᠦᠵᠡᠨ ᠭᠠᠷᠴᠤ ᠪᠣᠯᠤᠨᠠ᠃ ᠮᠤᠩᠭ᠋ᠤᠯ ᠤᠨ ᠥᠭᠡᠨ ᠳᠤ 《ᠡᠷᠡ ᠭᠦᠮᠤᠨ ᠭᠡᠷ ᠲᠤ ᠳᠦᠷᠦᠭᠡᠳ ᠭᠡᠭᠡᠷᠡ ᠥᠭᠦᠳᠡᠭ᠌》 ᠭᠡᠭᠦ ᠭᠡᠯᠡᠴᠡ ᠪᠣᠢ᠃ ᠪᠠ᠊·ᠷᠠ᠊·ᠡᠷᠳᠡᠨᠢᠮᠥ᠋ᠩᠭᠡ ᠶᠢᠨ ᠰᠢᠯᠦᠭ᠌ ᠡᠨᠡ ᠭᠦᠨ ᠣᠬᠠᠭᠠᠯᠢᠭ ᠶᠤᠰᠤ ᠲᠡᠶ ᠠᠭᠠᠷ ᠠᠮᠢᠰᠬᠤᠯ ᠨᠠᠢ᠌ᠯᠠᠨ ᠢᠷᠠᠵᠤ ᠪᠠᠢ᠌ᠭᠠ ᠨᠢ ᠯᠠᠪ ᠭᠡᠨᠡᠳᠲᠡ ᠶᠢᠨ ᠲᠤᠬᠢᠶᠠᠯᠳᠤᠯ ᠪᠢᠰᠢ ᠡ᠃ ᠵᠠᠯᠭᠠᠭᠠᠤᠨ 《ᠵᠤᠪᠠᠯᠠᠩ ᠢᠯᠡᠭᠦᠳᠡᠭ᠍ᠰᠡᠨ ᠴᠠᠭ ᠲᠤ ᠵᠢᠷᠭᠠᠯ ᠡᠷᠢᠵᠤ ᠬᠤᠯᠠ ᠶᠠᠪᠣᠨᠠ / ᠵᠤᠭᠤᠰ ᠶᠢᠡᠷ ᠵᠢᠷᠤᠭᠠᠯᠠᠭᠰᠠᠨ ᠨᠡᠢ᠌ᠭᠡᠮ ᠢ ᠵᠢᠷᠦᠭᠡᠨ ᠳᠤ ᠪᠠᠨ ᠵᠢᠭ᠍ᠰᠢᠵᠤ ᠬᠤᠯᠠ ᠶᠠᠪᠣᠨᠠ》 ᠭᠡᠮᠡᠨ ᠦᠨᠡᠨ ᠰᠠᠨᠠᠭᠠ ᠪᠠᠨ ᠢᠯᠠ ᠪᠣᠯᠭᠠᠯᠠ᠃ ᠨᠠᠮ ᠣᠶᠠᠷᠠᠭᠤᠨ ᠰᠡᠳᠬᠢᠯᠭᠡ᠂ ᠦᠨᠡᠨ ᠥᠭᠡ᠂ ᠵᠥᠭᠡᠯᠡᠨ ᠳᠠᠰᠢᠭᠤᠷᠳᠠᠯ ᠨᠢ ᠰᠢᠯᠦᠭ᠌ ᠤᠨ ᠬᠤᠪᠢ ᠶᠢᠨ ᠵᠢᠩ ᠢ ᠦᠯᠦ ᠮᠡᠳᠡᠭ᠌ ᠭᠦᠡᠳᠦᠷᠡᠭᠦᠯᠦᠯᠡ᠃
ᠰᠢᠨᠡ ᠵᠠᠭᠤᠨ ᠤ ᠴᠠᠪᠠᠷ ᠠᠭᠠᠷ ᠠᠮᠢᠰᠬᠤᠨ ᠮᠤᠩᠭ᠋ᠤᠯ ᠰᠤᠶᠤᠯ ᠤᠨ ᠠᠯᠳᠠᠨ ᠭᠠᠳᠠᠰᠤᠨ ᠳᠡᠭᠡᠷᠡ ᠡ᠊·ᠭᠦᠳᠡᠭᠡ᠂ ᠤᠳᠦᠡᠭᠦ᠋ᠤ᠂ ᠰᠢᠨᠠᠪᠣᠳᠤᠯ᠂ ᠮ·ᠰᠢᠪᠣᠰᠤᠨ᠂ ᠮ·ᠠᠰᠬᠠ ᠭᠡᠮᠡᠭᠦ ᠭᠠᠯ ᠵᠠᠯᠠᠭᠤ ᠨᠠᠢ᠌ᠷᠠᠭ ᠤᠨ ᠰᠢᠪᠠᠭᠤᠳ ᠵᠢᠷᠭᠢᠨ ᠪᠠᠭᠤᠪᠠ᠃ ᠡᠳᠡᠨᠡᠷ ᠪᠣᠯ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠮᠦᠩᠭᠦᠨ ᠳᠤᠯᠭᠠᠨ ᠳᠤ ᠪᠢᠯᠢᠭ᠌ ᠤᠨ ᠰᠥ᠋ ᠡᠷᠭᠦᠭᠦ ᠰᠢᠨᠡ ᠣᠳᠤᠳ ᠭᠡᠮᠡᠨ ᠢᠳᠡᠭᠡᠵᠤ ᠪᠠᠢ᠌ᠨᠠ᠃ 2012 ᠣᠨ ᠳᠤ ᠡ᠊·ᠭᠦᠳᠡᠭᠡ᠂ ᠤᠳᠦᠡᠭᠦ᠋ᠤ᠂ ᠰᠢᠨᠠᠪᠣᠳᠤᠯ ᠭᠤᠷᠪᠠ ᠶᠢᠨ ᠰᠢᠯᠦᠭ᠌ ᠤᠨ ᠨᠤᠮ ᠣᠩᠰᠢᠭᠴᠢᠳ ᠲᠡᠶ ᠵᠤᠯᠭᠠᠯᠠ᠃ ᠣᠶᠤᠳᠠᠨ ᠶᠠᠪᠣᠭᠠ ᠨᠠᠰᠤᠨ ᠳᠤ ᠪᠠᠨ ᠠᠪᠣ ᠡᠵᠢ ᠶᠢᠨ ᠶᠢᠡᠨ ᠦᠭᠭᠦᠭ᠍ᠰᠡᠨ ᠭᠡᠮᠵᠢᠶᠡ ᠲᠡᠶ ᠵᠢᠭᠠᠬᠠᠨ ᠮᠦᠩᠭᠦ ᠶᠢ ᠠᠷᠪᠢᠯᠠᠨ ᠪᠠᠢ᠌ᠵᠤ ᠨᠤᠮ ᠳᠠᠪᠳᠠᠷ ᠭᠠᠷᠭᠠᠨᠠ ᠭᠡᠳᠡᠭ᠌ ᠠᠮᠠᠷ ᠦᠭᠡᠶ᠃ ᠮ·ᠰᠢᠪᠣᠰᠤᠨ᠂ ᠮ·ᠠᠰᠬᠠ ᠡᠭᠡᠴᠢ ᠳᠡᠭᠦᠤ ᠬᠤᠶᠠᠭᠤᠯᠠ (ᠮᠠᠯᠴᠢᠨ ᠰᠢᠯᠦᠭ᠍ᠴᠢ ᠭᠣ᠊·ᠮᠥᠩᠭᠡ ᠶᠢᠨ ᠬᠡᠦᠬᠡᠳ) ᠴᠤ ᠠᠪᠣ ᠲᠡᠶ ᠪᠠᠨ ᠭᠤᠷᠪᠠᠭᠤᠯᠠ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ ᠪᠠᠨ ᠭᠠᠷᠭᠠᠨᠠ ᠭᠡᠳ ᠶᠠᠭᠠᠷᠠᠵᠤ ᠶᠠᠪᠣᠭᠠ ᠰᠤᠷᠠᠭ ᠲᠡᠶ᠃
ᠰᠠᠨᠠᠭᠠᠨ ᠡᠴᠡ ᠭᠠᠳᠠᠭᠤᠷ ᠳᠡᠭ᠍ᠵᠢᠨ ᠰᠠᠨᠠᠭᠠ᠂ ᠳᠡᠪᠠᠷᠡᠩᠭᠦᠢ ᠰᠡᠳᠬᠢᠯᠭᠡ ᠲᠡᠶ ᠭᠦᠭᠡᠷᠦᠭᠦᠨ ᠰᠢᠯᠦᠭ᠌ ᠤᠳ ᠰᠠᠷᠠᠯ ᠤᠨ ᠥᠵᠦᠭᠦᠷ ᠡᠴᠡ ᠴᠢᠮᠭᠢᠵᠤ᠂ ᠰᠡᠳᠭᠢᠯ ᠤᠨ ᠣᠭ ᠡᠴᠡ ᠣᠭᠵᠤᠷᠠᠬᠤᠨ ᠣᠷᠭᠢᠳᠠᠭ ᠨᠢ ᠰᠤᠨᠢᠷᠬᠠᠯᠳᠠᠢ᠃ ᠳᠡᠭᠡᠭᠡᠳ ᠵᠠᠯᠠᠭᠤ ᠨᠠᠰᠤᠨ ᠤ ᠭᠦᠭ᠍ᠰᠡᠯ ᠭᠡᠢ᠌ᠷᠭᠡᠯ᠂ ᠦᠬᠢᠨ ᠣᠯᠤᠰ ᠤᠨ ᠡᠮᠵᠡᠭ᠌ ᠳᠤᠷᠭᠠᠨ ᠮᠡᠳᠡᠷᠡᠭᠦᠢ᠂ ᠭᠤᠸᠠ ᠰᠠᠢ᠌ᠬᠠᠨ ᠤ ᠳᠠᠭᠠᠰᠢᠶᠠᠯ᠂ ᠵᠢᠷᠦᠭᠡᠨ ᠳᠤ ᠭᠦᠷᠦᠮᠡᠷ ᠬᠤᠯᠪᠤᠨ ᠪᠣᠳᠤᠯᠳᠠ ᠵᠢᠴᠢ ᠣᠷᠠᠨ ᠰᠠᠨᠠᠭᠠ ᠨᠢ ᠶᠠᠭᠠᠭᠢᠬᠤ ᠠᠷᠭᠠ ᠦᠭᠡᠶ ᠰᠢᠯᠦᠭ᠌ ᠤᠨ ᠳᠤᠳᠤᠷ ᠭᠠᠳᠠᠨᠠ ᠪᠠᠨ ᠵᠠᠰᠠᠨ ᠴᠢᠮᠡᠭᠯᠡᠭᠡᠳ ᠰᠢᠯᠦᠭ᠌ ᠠᠮᠳᠠᠯᠠᠬᠤ ᠶᠢᠨ ᠬᠠᠪᠣ ᠴᠡᠩᠭᠡᠯ ᠣᠯᠭᠤᠵᠤ ᠪᠠᠢ᠌ᠨᠠ᠃ ᠪᠢᠷ ᠶᠢᠡᠨ ᠬᠠᠶᠠᠯ ᠦᠭᠡᠶ ᠡᠨᠡ ᠶᠠᠩᠵᠤ ᠪᠠᠷ ᠶᠢᠡᠨ ᠣᠷᠤᠯᠳᠤᠳᠠᠭ ᠪᠣᠯ ᠭᠦᠷᠳᠡᠭ᠍ᠰᠡᠨ ᠭᠦᠮᠦᠵᠢᠯ᠂ ᠰᠤᠷᠤᠭᠰᠠᠨ ᠮᠡᠳᠡᠯᠭᠡ᠂ ᠣᠷᠠ ᠠᠪᠢᠶᠠᠰ ᠨᠢ ᠳᠠᠳᠠᠨ ᠳᠤ ᠰᠠᠢ᠌ᠨ ᠰᠢᠯᠦᠭ᠍ᠴᠢᠳ ᠭᠠᠷᠬᠤ ᠨᠥᠭᠦᠴᠡᠯ ᠪᠣᠯᠤᠮᠵᠢ ᠶᠢ ᠪᠦᠷᠢᠨ ᠣᠯᠭᠤᠵᠤ ᠪᠠᠢ᠌ᠨᠠ᠃ ᠭᠡᠪᠠᠴᠤ ᠠᠩᠬᠠ ᠡᠭᠢᠯᠡᠨ ᠰᠢᠯᠦᠭ᠌ ᠨᠠᠢ᠌ᠷᠠᠭ ᠣᠷᠤᠯᠳᠤᠵᠤ ᠪᠠᠢ᠌ᠭᠠ ᠵᠠᠯᠠᠭᠤ ᠣᠯᠤᠰ ᠤᠨ ᠬᠤᠪᠢ ᠳᠤ ᠠᠯᠳᠠᠭᠠ ᠦᠭᠡᠶ ᠭᠡᠪᠠᠯ ᠠᠷᠠᠢ ᠪᠣᠷᠤᠭᠤ᠃ ᠰᠢᠷᠭᠠᠭᠠᠯᠳᠠ ᠮᠠᠭᠤᠳᠠᠭᠰᠠᠨ ᠡᠴᠡ ᠰᠤᠠᠵᠤᠷᠠᠭᠰᠠᠨ ᠥᠭᠦᠯᠡᠪᠦᠷᠢ᠂ ᠳᠠᠪᠬᠤᠴᠠᠭᠰᠠᠨ ᠰᠠᠨᠠᠭᠠ᠂ ᠢᠯᠡᠭᠦᠴᠡ ᠥᠭᠡ᠂ ᠪᠣᠷᠤᠭᠤ ᠦᠰᠦᠭ᠌ ᠳᠠᠭᠠᠪᠣᠷᠢ ᠮᠠᠷ ᠮᠠᠷ ᠬᠠᠷᠠᠭᠳᠠᠵᠤ ᠪᠣᠢ᠃ ᠶᠠᠪᠣᠭᠠᠨ ᠳᠤ ᠪᠠᠨ ᠯᠠᠪ ᠵᠠᠯᠠᠷᠠᠭᠤᠯᠵᠤ ᠠᠪᠣᠨᠠ ᠪᠢᠵᠠ ⁉
ᠰᠤᠶᠤᠯ ᠤᠨ ᠵᠤᠭᠰᠤᠴᠠ ᠡᠴᠡ ᠭᠡᠯᠡᠭᠦ ᠳᠤ ᠪᠦᠳᠦᠭᠡᠯᠴᠢ ᠣᠷᠤᠯᠳᠤᠯᠭᠠ᠂ ᠰᠤᠶᠤᠯ ᠤᠨ ᠵᠤᠷᠢᠭ ᠰᠠᠨᠠᠭᠠ ᠨᠢ ᠪᠢᠰᠢᠷᠠᠯᠳᠠᠢ᠃ 《ᠵᠠᠯᠠᠭᠤ ᠭᠦᠮᠤᠨ ᠤ ᠵᠠᠮ ᠤᠨ ᠭᠦᠵᠦᠭᠦᠤ ᠣᠷᠳᠤ》 ᠭᠡᠳᠡᠭ᠌ ᠪᠢᠯᠠ ᠦᠦ᠂ ᠡ᠊ᠨᠳᠡ ᠡᠳᠡᠨᠦᠰ ᠤᠨ ᠰᠢᠯᠦᠭ᠌ ᠲᠤ ᠳᠡᠩᠳᠡᠭᠦᠤ ᠡᠷᠳᠡ ᠦᠨᠡᠯᠠᠯᠳᠠ ᠦᠭᠭᠦ ᠶᠢ ᠲᠦᠷ ᠳᠠᠳᠠᠭᠠᠯᠵᠠᠯᠠ᠃
ᠡᠯᠡ ᠴᠠᠭ ᠦᠶᠡ ᠳᠤ ᠪᠢᠴᠢᠭ᠍ᠳᠡᠭ᠍ᠰᠡᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠊ᠤᠨ ᠰᠤᠶᠤᠯ ᠤᠨ ᠭᠦᠷᠦᠰᠤ ᠰᠢᠷᠤᠢ ᠵᠤᠵᠠᠭᠠᠨ᠂ ᠡᠭᠢᠯᠡᠯᠳᠡ ᠶᠢᠨ ᠴᠡᠭ᠌ ᠦᠨᠳᠦᠷ᠂ ᠦᠨᠳᠦᠰᠦ ᠭᠦᠨ᠂ ᠭᠦᠷᠢᠶᠡ ᠴᠠᠷᠠ ᠦᠷᠭᠡᠨ᠂ ᠰᠠᠳᠤᠪ ᠰᠢᠨᠡᠷᠭᠡᠭ᠌᠂ ᠭᠡᠯᠪᠠᠷᠢ ᠪᠢᠴᠢᠯᠭᠡ ᠴᠢᠯᠦᠭᠡᠳᠡᠢ᠂ ᠴᠠᠭ ᠦᠶᠡ ᠣᠷᠤᠨ ᠨᠤᠳᠤᠭ ᠤᠨ ᠥᠩᠭᠡ ᠪᠣᠳᠤᠭ ᠳᠤᠳᠤᠷᠬᠠᠢ᠂ ᠬᠤᠷᠢᠶᠠᠯᠳᠠ ᠡᠯᠪᠠᠭ᠌᠂ ᠢᠷᠡᠭᠡᠳᠦᠢ ᠰᠠᠷᠠᠭᠤᠯ ᠭᠡᠮᠡᠨ ᠦᠨᠡᠯᠠᠵᠤ ᠪᠣᠯᠤᠨᠠ᠃ ᠭᠡᠪᠠᠴᠤ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠲᠤ ᠳᠤᠳᠠᠭᠳᠠᠯ ᠲᠡᠶ ᠳᠠᠯᠠ ᠮᠦᠨ ᠣᠷᠤᠰᠢᠵᠤ ᠪᠣᠢ᠃ ᠡᠩ ᠳᠡᠷᠢᠭᠦᠨ ᠳᠤ ᠰᠢᠷᠭᠠᠭᠠᠯᠳᠠ ᠮᠠᠭᠤᠳᠠᠵᠤ ᠪᠠᠢ᠌ᠨᠠ᠃ ᠮᠠᠨᠠᠢ᠌ᠭᠢᠰ ᠨᠢᠭᠡ ᠶᠠᠭᠤᠮᠠ ᠮᠤᠤᠬᠠᠨ ᠪᠢᠴᠢᠪᠠ ᠰᠠᠴᠠᠭᠤ ᠬᠤᠷᠳᠤᠨ ᠨᠡᠢ᠌ᠳᠡᠯᠡᠭᠦ ᠪᠠᠨ ᠪᠣᠳᠤᠭᠠᠤᠨ ᠰᠢᠯᠦᠭ᠌ ᠶᠢᠡᠨ ᠭᠢᠨᠠᠬᠤ᠂ ᠵᠠᠰᠠᠬᠤ᠂ ᠴᠢᠨᠠᠷᠵᠢᠭᠤᠯᠬᠤ ᠶᠢ ᠣᠮᠳᠤᠭᠠᠢ᠌ᠯᠠᠬᠤ ᠪᠣᠯᠵᠠᠢ᠃ ᠢᠯᠠᠩᠭ᠋ᠤᠶᠠ ᠮᠤᠩᠭ᠋ᠤᠯ ᠰᠦᠯᠵᠢᠶᠠ ᠭᠠᠷᠤᠭᠰᠠᠨ ᠡᠴᠡ ᠪᠦᠷ ᠭᠠᠯ ᠠᠪᠳᠠᠭ ᠪᠣᠯᠤᠯᠠ᠃ ᠡᠳᠦᠷ ᠪᠦᠷᠢ ᠰᠢᠯᠦᠭ᠌ ᠪᠢᠴᠢᠨ ᠨᠠᠢ᠌ᠳᠠᠯᠠᠵᠤ ᠯᠠ ᠪᠠᠢ᠌ᠨᠠ᠂ ᠭᠡᠳᠡᠯᠡ ᠪᠢᠴᠢᠭ᠍ᠰᠡᠨ ᠰᠢᠯᠦᠭ᠌ ᠨᠢ ᠨᠢᠭᠡ ᠣᠷᠤᠨ ᠳᠤ ᠪᠠᠨ ᠰᠠᠭᠤᠭᠠ ᠲᠡᠶ᠃ ᠠᠶᠠ ᠦᠭᠡᠶ ᠪᠣᠯ ᠭᠡᠳᠡᠷᠭᠦ ᠣᠬᠤᠷᠢᠬᠤ ᠬᠠᠠᠳᠤᠰᠢ ᠲᠡᠶ ᠪᠣᠯᠵᠤ ᠪᠣᠢ᠃ ᠵᠠᠭᠤᠨ ᠰᠢᠯᠦᠭ᠌ ᠪᠢᠴᠢᠯᠠ ᠭᠡᠳ ᠭᠠᠭᠴᠠ ᠰᠠᠢ᠌ᠨ ᠰᠢᠯᠦᠭ᠌ ᠪᠢᠴᠢᠭᠦ ᠦᠭᠡᠶ ᠪᠣᠯ ᠰᠢᠯᠦᠭ᠍ᠴᠢ ᠭᠡᠮᠡᠨ ᠬᠤᠭᠤᠰᠤᠨ ᠣᠩᠭᠢᠷᠠᠭᠠᠤᠨ ᠳᠤᠰᠠ ᠦᠭᠡᠶ ︕ ᠳᠠᠷᠠᠭᠠ ᠳᠤ ᠨᠢ ᠮᠠᠨᠠᠢ᠌ᠭᠢᠰ ᠤᠨ ᠮᠡᠳᠡᠯᠭᠡ ᠶᠢᠨ ᠭᠦᠷᠢᠶᠡ ᠭᠡᠪᠴᠢᠶᠡ᠂ ᠰᠠᠳᠤᠪ ᠤᠨ ᠰᠤᠩᠭ᠋ᠤᠯᠳᠠ ᠢᠪᠴᠠᠤᠳᠠᠵᠤ ᠪᠠᠢ᠌ᠨᠠ᠃ ᠵᠥᠪᠭᠡᠨ ᠨᠢᠳᠤᠨ ᠡᠮᠦᠨᠡᠭᠢ ᠪᠠᠨ ᠬᠠᠷᠠᠭᠠᠤᠨ᠂ ᠨᠢᠭᠡ ᠪᠢᠴᠢᠭ᠍ᠰᠡᠨ ᠶᠢᠡᠨ ᠳᠠᠭᠢᠨ ᠳᠠᠭᠢᠨ ᠪᠢᠴᠢᠭᠡᠳ ᠭᠠᠭᠴᠠᠬᠠᠨ ᠰᠠᠳᠤᠪ ᠶᠢᠡᠷ ᠣᠯᠠᠨ ᠰᠠᠨᠠᠭᠠ ᠭᠠᠷᠭᠠᠬᠤ ᠪᠢᠰᠢ ᠬᠠᠷᠢᠨ ᠣᠯᠠᠨ ᠰᠠᠳᠤᠪ ᠶᠢᠡᠷ ᠭᠠᠭᠴᠠᠬᠠᠨ ᠰᠠᠨᠠᠭᠠ ᠭᠠᠷᠭᠠᠬᠤ ᠭᠡᠵᠤ ᠣᠢ᠌ᠯᠠ ᠪᠠᠨ ᠦᠵᠡᠵᠤ ᠪᠠᠢ᠌ᠨᠠ᠃ ᠢᠩᠭᠢᠵᠤ ᠰᠢᠯᠦᠭ᠌ ᠣᠷᠤᠯᠳᠤᠨ ᠪᠠᠶᠠ ᠪᠠᠨ ᠵᠤᠪᠠᠭᠠᠭᠰᠠᠨ ᠤ ᠦᠨᠡ ᠪᠠᠢ᠌ᠨᠠ ᠦᠦ ⁉ ᠬᠠᠮᠤᠭ ᠰᠡᠭᠦᠯ ᠳᠤ ᠭᠡᠯᠡᠭᠦ ᠳᠤ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠢᠷᠠᠭᠤ ᠨᠠᠢ᠌ᠷᠠᠭ》 ᠲᠤ ᠣᠷᠴᠢᠭᠤᠯᠭᠠ ᠳᠤᠳᠠᠭᠳᠠᠵᠤ ᠪᠠᠢ᠌ᠨᠠ᠃ ᠪᠢᠳᠠ ᠦᠪᠡᠷ ᠤᠨ ᠶᠠᠭᠤᠮᠠ ᠪᠠᠨ ᠵᠥᠪᠭᠡᠨ ᠦᠪᠠᠰᠤᠪᠠᠨ ᠥᠵᠡᠭᠡᠳ᠂ ᠥᠨᠡᠯᠡᠭᠡᠳ᠂ ᠰᠡᠳᠭᠢᠯ ᠬᠠᠨᠤᠭᠠᠤᠨ ᠰᠠᠭᠤᠵᠤ ᠪᠣᠯᠬᠤ ᠦᠭᠡᠶ᠃ ᠬᠠᠷᠢᠨ ᠨᠠᠩ ᠣᠯᠠᠨ ᠭᠡᠯᠡᠨ ᠳᠤ ᠣᠷᠪᠠᠭᠤᠯᠵᠤ᠂ ᠴᠢᠳᠠᠪᠠᠯ ᠳᠡᠯᠡᠭᠡᠢ ᠳᠠᠶᠠᠭᠠᠷ ᠲᠤ᠂ ᠡᠰᠡ ᠴᠢᠳᠠᠪᠠᠯ ᠣᠯᠤᠰ ᠤᠨ ᠳᠤᠳᠤᠭᠠᠳᠤ ᠳᠤ ᠴᠤ ᠭᠡᠰᠡᠨ ᠴᠢᠯᠦᠭᠡᠳᠡᠢ ᠰᠠᠴᠤᠬᠤ ᠨᠢ ᠳᠠᠭᠠᠷᠠᠨᠠ᠃ ᠢᠩᠭᠢᠪᠠᠯ ᠰᠠᠶᠢ ᠦᠪᠡᠷ ᠤᠨ ᠭᠡᠯᠡ ᠰᠤᠶᠤᠯ ᠤᠨ ᠭᠦᠭ᠍ᠵᠢᠯᠳᠡ᠂ ᠦᠨᠡ ᠦᠷᠳᠡᠭ᠌ ᠢ ᠨᠠᠩ ᠣᠯᠠᠨ ᠭᠦᠮᠦᠰ ᠲᠤ ᠣᠬᠠᠭᠠᠭᠤᠯᠵᠤ᠂ ᠳᠠᠨᠢᠭᠤᠯᠵᠤ᠂ ᠥᠨᠡᠯᠡᠭᠦᠯᠵᠤ᠂ ᠮᠡᠳᠡᠷᠡᠭᠦᠯᠵᠤ᠂ ᠪᠢᠰᠢᠷᠡᠭᠦᠯᠵᠤ ᠴᠢᠳᠠᠨᠠ᠃
ᠠᠰᠢᠭᠯᠠᠭᠰᠠᠨ ᠨᠤᠮ ᠪᠣᠯᠤᠨ ᠰᠡᠳᠭᠦᠯ
⒈ 《ᠮᠤᠩᠭ᠋ᠤᠯ ᠣᠷᠠᠨ ᠵᠤᠬᠢᠶᠠᠯ ᠤᠨ ᠳᠡᠦᠭᠡ》᠂ ᠯᠢᠶᠤᠤᠨᠢᠩ ᠤᠨ ᠦᠨᠳᠦᠰᠦᠳᠠᠨ ᠤ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (1995 ᠣᠨ)᠃
⒉《ᠤᠢ᠌ᠷᠠᠤᠨ ᠮᠤᠩᠭ᠋ᠤᠯ ᠤᠨ ᠣᠳᠤ ᠦᠶᠡ ᠶᠢᠨ ᠣᠷᠠᠨ ᠵᠤᠬᠢᠶᠠᠯ ᠤᠨ ᠳᠡᠦᠭᠡ》᠂ ᠰᠢᠠᠵᠢᠶᠠᠩ ᠤᠨ ᠠᠷᠠᠤᠨ ᠤᠨ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (1999 ᠣᠨ)᠃
⒊ 《ᠣᠳᠤ ᠦᠶᠡ ᠶᠢᠨ ᠮᠤᠩᠭ᠋ᠤᠯ ᠣᠷᠠᠨ ᠵᠤᠬᠢᠶᠠᠯ ᠤᠨ ᠵᠠᠭᠤᠨ ᠳᠡᠭᠡᠵᠢ》᠂ ᠯᠢᠶᠤᠤᠨᠢᠩ ᠤᠨ ᠦᠨᠳᠦᠰᠦᠳᠠᠨ ᠤ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (1997 ᠣᠨ)᠃
⒋ᠡᠷᠳᠡᠨᠢᠪᠢᠯᠢᠭ᠌ ᠪᠣᠯᠤᠨ ᠯ·ᠦᠰᠦᠷᠦᠩᠭᠦᠢ ᠶᠢᠨ ᠨᠠᠢ᠌ᠷᠠᠭᠤᠯᠤᠭᠰᠠᠨ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠠᠷᠠᠤᠨ ᠤᠨ ᠠᠮᠠᠨ ᠵᠤᠬᠢᠶᠠᠯ ᠤᠨ ᠰᠤᠳᠤᠯᠤᠯ》᠂ ᠦᠨᠳᠦᠰᠦᠳᠠᠨ ᠤ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (2008 ᠣᠨ)
⒌ ᠳᠡᠭᠡᠳᠤ ᠮᠤᠩᠭ᠋ᠤᠯ ᠣᠷᠠᠨ ᠵᠤᠬᠢᠶᠠᠯ ᠤᠨ ᠠᠩᠬᠠᠨ ᠤ ᠳᠡᠭᠦᠪᠦᠷᠢ 《ᠡᠷᠳᠡᠨᠢᠳᠤ ᠬᠤᠳᠤᠭᠤᠷ》 (ᠳᠤᠳᠤᠭᠠᠳᠤ ᠭᠡᠪᠯᠡᠯ 1984 ᠣᠨ)᠃
⒍ᠲ᠋ᠡᠭᠡᠳᠤ ᠮᠤᠩᠭ᠋ᠤᠯ ᠣᠷᠠᠨ ᠵᠤᠬᠢᠶᠠᠯ ᠤᠨ ᠬᠤᠶᠠᠳᠠᠭᠴᠢ ᠳᠡᠭᠦᠪᠦᠷᠢ 《ᠥᠡᠳᠦᠷᠯᠢᠭ᠌ ᠤᠨ ᠴᠤᠤᠷᠢᠶᠠ》᠂ ᠦᠨᠳᠦᠰᠦᠳᠠᠨ ᠤ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (1994 ᠣᠨ)᠃
⒎ 《ᠳᠡᠭᠡᠳᠤ ᠮᠤᠩᠭ᠋ᠤᠯ ᠤᠨ ᠣᠳᠤ ᠦᠶᠡ ᠶᠢᠨ ᠣᠷᠠᠨ ᠵᠤᠬᠢᠶᠠᠯ ᠤᠨ ᠰᠤᠩᠭ᠋ᠤᠮᠠᠯ》 (ᠭᠤᠷᠪᠠᠳᠠᠭᠴᠢ ᠳᠡᠭᠦᠪᠦᠷᠢ)᠂ ᠦᠪᠣᠷ ᠮᠤᠩᠭ᠋ᠤᠯ ᠤᠨ ᠠᠷᠠᠤᠨ ᠤᠨ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (2009 ᠣᠨ)᠃
⒏ ᠴᠢ᠊·ᠳᠠᠯᠠᠢ ᠶᠢᠨ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ 《ᠥᠡᠳᠦᠷᠯᠢᠭ᠌ ᠡᠭᠡ ᠭᠢᠭᠡᠳ ᠨᠠᠷᠠ》᠂ ᠦᠨᠳᠦᠰᠦᠳᠠᠨ ᠤ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (1999 ᠣᠨ)᠃
⒐ ᠪᠠ᠊·ᠪᠦᠷᠭᠦᠤᠨ ᠤᠨ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ 《ᠪᠢ ᠣᠷᠤᠰᠢᠬᠤ ᠦᠭᠡᠶ》 (ᠺᠢᠷᠢᠯ ᠦᠰᠦᠭ᠌᠂ ᠮᠤᠩᠭ᠋ᠤᠯ ᠣᠯᠤᠰ 2009 ᠣᠨ)᠃
⒑ ᠡ᠊·ᠭᠦᠳᠡᠭᠡ ᠶᠢᠨ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ 《ᠦᠨᠳᠦᠷ ᠭᠠᠵᠠᠷ ᠤᠨ ᠰᠠᠯᠭᠢ》᠂ ᠦᠪᠣᠷ ᠮᠤᠩᠭ᠋ᠤᠯ ᠤᠨ ᠰᠤᠶᠤᠯ ᠤᠨ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (2012 ᠣᠨ)᠃
⒒ᠤᠳᠦᠡᠭᠦ᠋ᠤ ᠶᠢᠨ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ 《ᠪᠣᠳᠤᠭᠤᠨ ᠤ ᠳᠠᠪᠠᠭ》᠂ ᠦᠪᠣᠷ ᠮᠤᠩᠭ᠋ᠤᠯ ᠤᠨ ᠰᠤᠶᠤᠯ ᠤᠨ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (2012 ᠣᠨ)᠃
⒓ᠰᠢᠨᠠᠪᠣᠳᠤᠯ ᠤᠨ ᠰᠢᠯᠦᠭ᠌ ᠤᠨ ᠳᠡᠭᠦᠪᠦᠷᠢ 《ᠨᠤᠮᠤᠬᠠᠨ ᠭᠤᠤᠯ ᠤᠨ ᠬᠠᠴᠢᠷ》᠂ ᠦᠪᠣᠷ ᠮᠤᠩᠭ᠋ᠤᠯ ᠤᠨ ᠰᠤᠶᠤᠯ ᠤᠨ ᠭᠡᠪᠯᠡᠯ ᠤᠨ ᠬᠤᠷᠢᠶᠠ (2012 ᠣᠨ)᠃
⒔ 《ᠠᠯᠳᠠᠨ ᠲᠦᠯᠭᠢᠭᠦᠷ》 ᠰᠡᠳᠭᠦᠯ ᠤᠨ 2011 ᠣᠨ ᠤ 2 ᠳ᠋ᠤᠭᠠᠷ ᠬᠤᠭᠤᠴᠠᠭᠠ ᠪᠣᠯᠤᠨ 2012 ᠣᠨ ᠤ 3 ᠳ᠋ᠤᠭᠠᠷ ᠬᠤᠭᠤᠴᠠᠭᠠ᠃
⒕ 《ᠴᠡᠴᠡᠭ᠍ᠳᠤ ᠴᠠᠢ᠌ᠳᠠᠮ》 ᠰᠡᠳᠭᠦᠯ ᠤᠨ 2008 ᠣᠨ ᠤ 1 ᠳ᠋ᠤᠭᠡᠷ ᠬᠤᠭᠤᠴᠠᠭᠠ ᠪᠣᠯᠤᠨ 2010 ᠣᠨ ᠤ 2 ᠳ᠋ᠤᠭᠠᠷ ᠬᠤᠭᠤᠴᠠᠭᠠ᠃
ᠵᠤᠬᠢᠶᠠᠭᠴᠢ ᠶᠢᠨ ᠬᠠᠶᠢᠭ ᠄ ᠬᠦᠬᠡᠨᠠᠭᠤᠷ ᠮᠤᠵᠢ ᠶᠢᠨ ᠣᠯᠠᠭᠠᠨ ᠰᠢᠶᠠᠨ ᠤ ᠮᠤᠩᠭ᠋ᠤᠯ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ
ᠵᠤᠬᠢᠶᠠᠭᠴᠢ᠄ ᠯ·ᠣᠳᠤᠨ
ᠢᠷᠡᠯᠲᠡ᠄ ᠢᠷᠡᠭᠦᠯᠦᠭᠰᠡᠨ ᠡᠬᠡ ᠪᠢᠴᠢᠭ᠌
ᠬᠠᠷᠢᠶᠠ᠄
ᠥᠭᠥᠯᠡᠯ ᠰᠢᠭᠦᠮᠵᠢᠳᠠᠷᠤᠮ᠄ 66335
ᠴᠠᠭ᠄ 2013 ᠤᠨ ᠤ 06 ᠰᠠᠷᠠ ᠶᠢᠨ 09
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ