☆ ᠮᠢᠵᠢᠳᠰᠠᠩᠪᠤ
ᠤᠨᠠᠭᠠᠨ ᠪᠠᠢ᠌ᠭᠠᠯᠢ ᠶᠢᠨ ᠡᠭᠡᠰᠢᠭ᠌
ᠮᠢᠵᠢᠳᠰᠠᠩᠪᠦ ᠶᠢᠨ ᠳᠦᠷᠪᠡᠨ ᠮᠦᠷᠲᠦ ᠶᠢᠨ ᠴᠤᠭᠯᠠᠷᠠᠯ
ᠮᠢᠨᠦ ᠵᠢᠷᠭᠠᠯ
ᠦᠳᠡᠰᠢ ᠶᠢᠨ ᠭᠦᠨ ᠪᠤᠯᠳᠠᠯᠠ ᠪᠢᠴᠢᠵᠤ ᠰᠠᠭᠤᠳᠠᠭ ᠮᠢᠨᠦ ᠵᠢᠷᠭᠠᠯ
ᠦᠨᠳᠦᠰᠦᠲᠡᠨ ᠤ ᠦᠭᠡ ᠬᠡᠯᠡ ᠪᠡᠨ ᠬᠡᠷᠡᠭᠯᠡᠵᠦ ᠪᠠᠢ᠌ᠳᠠᠭ ᠮᠢᠨᠦ ᠤᠮᠤᠭᠰᠢᠯ
ᠡᠳᠦᠷ ᠤᠨ ᠰᠤᠨᠢᠨ ᠤ ᠪᠤᠯᠤᠩ ᠳᠤ ᠵᠤᠬᠢᠶᠠᠯ ᠨᠡᠢ᠌ᠲᠡᠯᠡᠳᠡᠭ ᠮᠢᠨᠦ ᠪᠠᠬᠠᠳᠤᠯ
ᠦᠯᠦ ᠲᠠᠨᠢᠬᠤ ᠬᠦᠮᠦᠨ ᠡᠴᠡ ᠵᠠᠬᠢᠳᠠᠯ ᠬᠤᠷᠢᠶᠠᠳᠠᠭ ᠮᠢᠨᠦ ᠴᠡᠩᠭᠡᠯ
ᠲᠠᠯᠠ ᠶᠢᠨ ᠮᠠᠯᠴᠢᠨ
ᠬᠦᠳᠡᠭᠡ ᠨᠤᠲᠤᠭ ᠲᠤ ᠲᠤᠶᠠᠭᠠᠷᠠᠵᠤ ᠮᠠᠨᠳᠤᠭᠰᠠᠨ ᠬᠦᠷᠳᠦᠨ ᠤᠯᠠᠭᠠᠨ ᠨᠠᠷᠠ
ᠬᠦᠬᠡ ᠤᠭᠲᠠᠷᠭᠤᠢ ᠳᠤ ᠰᠤᠪᠤᠷᠭᠠᠯᠠᠨ ᠪᠤᠰᠤᠭᠰᠠᠨ ᠪᠢᠯᠢᠭᠲᠦ ᠴᠠᠭᠠᠨ ᠡᠭᠦᠯᠡᠰ
ᠬᠦᠮᠡᠯᠢ ᠲᠠᠭᠠᠨᠠ ᠳᠤ ᠠᠮᠲᠠᠷᠬᠠᠨ ᠢᠳᠡᠰᠢᠯᠡᠭᠰᠡᠨ ᠦᠷᠡᠵᠢᠯᠲᠦ ᠪᠠᠶᠠᠨ ᠰᠦᠷᠦᠭ
ᠬᠦᠯᠦᠭ ᠮᠤᠷᠢᠨ ᠳᠤ ᠤᠷᠭᠠ ᠨᠠᠬᠢᠯᠵᠠᠭᠤᠯᠤᠭᠰᠠᠨ ᠲᠠᠯᠠ ᠶᠢᠨ ᠡᠷᠡᠯᠬᠡᠭ ᠮᠠᠯᠴᠢᠳ
ᠨᠠᠨᠳᠢᠨ ᠪᠠᠷᠢᠯᠳᠤᠯᠭᠠ
ᠠᠮᠢ ᠨᠠᠰᠤ ᠶᠢ ᠤᠯᠭᠤᠭᠰᠠᠨ ᠡᠵᠢ ᠶᠢᠨ ᠡᠨᠡᠷᠢᠯ ᠬᠠᠢ᠌ᠷᠠ
ᠠᠶᠤᠯ ᠵᠤᠪᠠᠯᠠᠩ ᠡᠴᠡ ᠴᠢᠯᠦᠭᠡᠯᠡᠭᠰᠡᠨ ᠨᠠᠮ ᠤᠨ ᠠᠴᠢ ᠭᠠᠪᠢᠶᠠ
ᠠᠯᠬᠤᠵᠤ ᠮᠦᠯᠬᠦᠵᠦ ᠲᠤᠮᠤᠭᠠᠵᠢᠭᠤᠯᠤᠭᠰᠠᠨ ᠨᠤᠳᠤᠭ ᠤᠨ ᠠᠯᠳᠠᠨ ᠰᠢᠷᠤᠢ
ᠠᠢ᠌ᠯ ᠡᠷᠦᠬᠡ ᠪᠠᠢ᠌ᠭᠤᠯᠤᠭᠰᠠᠨ ᠠᠮᠠᠷᠠᠭ ᠤᠨ ᠨᠠᠨᠳᠢᠨ ᠪᠠᠷᠢᠯᠳᠤᠯᠭᠠ
ᠪᠤᠰᠠᠨᠢᠵᠤ ᠪᠤᠯᠤᠰᠢ ᠦᠭᠡᠢ ᠰᠤᠶᠤᠯ
ᠠᠪᠤ ᠳᠡᠭᠡᠳᠦ ᠶᠢᠨ ᠦᠮᠴᠢᠯᠡᠵᠦ ᠰᠠᠭᠤᠭᠰᠠᠨ ᠠᠯᠲᠠ ᠪᠠᠷ ᠰᠤᠯᠢᠬᠤ ᠦᠭᠡᠢ ᠨᠤᠲᠤᠭ
ᠠᠴᠢᠷ ᠦᠷᠡᠰ ᠤᠨ ᠦᠪᠯᠡᠵᠦ ᠠᠪᠤᠭᠰᠠᠨ ᠠᠰᠢᠭ ᠶᠢᠠᠷ ᠬᠤᠳᠠᠯᠳᠤᠬᠤ ᠦᠭᠡᠢ ᠤᠷᠤᠨ
ᠪᠤᠭᠳᠠ ᠴᠢᠩᠭᠢᠰ ᠤᠨ ᠡᠭᠦᠳᠴᠦ ᠬᠠᠢ᠌ᠷᠠᠯᠠᠭᠰᠠᠨ ᠪᠤᠰᠤᠭᠠ ᠮᠤᠩᠭᠤᠯ ᠦᠰᠦᠭ
ᠪᠤᠮᠠᠨ ᠦᠶᠡ ᠮᠢᠩᠭᠠᠨ ᠭᠠᠯᠪᠠ ᠳᠤ ᠪᠤᠰᠠᠨᠢᠵᠤ ᠪᠤᠯᠤᠰᠢ ᠦᠭᠡᠢ ᠰᠤᠶᠤᠯ
ᠴᠢᠩᠭᠢᠰ ᠤᠨ ᠬᠤᠢ᠌ᠴᠢᠰ
ᠤᠤᠭᠤᠭᠰᠠᠨ ᠤᠰᠤ ᠪᠠᠨ ᠪᠢᠲᠡᠭᠦᠯᠡᠵᠦ ᠷᠠᠰᠢᠶᠠᠯᠠᠭᠰᠠᠨ ᠡᠵᠢ ᠶᠢᠨ ᠡᠩᠭᠦᠷᠡᠢ ᠪᠤᠳᠤᠯ
ᠤᠨᠠᠭᠰᠠᠨ ᠰᠢᠷᠤᠢ ᠪᠠᠨ ᠪᠠᠵᠠᠵᠤ ᠬᠤᠷᠮᠤᠢ᠌ᠯᠠᠭᠰᠠᠨ ᠠᠪᠤ ᠶᠢᠨ ᠬᠦᠭᠡᠷᠦᠬᠦᠢ ᠰᠡᠳᠬᠢᠯ
ᠠᠭᠤᠯᠠ ᠤᠪᠤᠭᠠ ᠪᠠᠨ ᠰᠢᠲᠦᠵᠦ ᠲᠠᠬᠢᠭᠰᠠᠨ ᠮᠤᠩᠭᠤᠯ ᠤᠨ ᠤᠯᠠᠮᠵᠢᠯᠠᠯᠲᠤ ᠵᠠᠩᠰᠢᠯ
ᠤᠤᠷ ᠰᠤᠶᠤᠯ ᠶᠢᠠᠨ ᠬᠠᠮᠠᠭᠠᠯᠠᠵᠤ ᠬᠦᠭᠵᠢᠭᠦᠯᠦᠭᠰᠡᠨ ᠡᠵᠡᠨ ᠴᠢᠩᠭᠢᠰ ᠤᠨ ᠬᠤᠢ᠌ᠴᠢᠰ
ᠵᠤᠬᠢᠶᠠᠯ ᠲᠤᠭᠤᠷᠪᠢᠬᠤ
ᠠᠯᠮᠠᠰ ᠡᠷᠳᠡᠨᠢ ᠡᠳ᠋ ᠮᠦᠩᠭᠦ ᠶᠢ ᠡᠷᠢᠵᠦ ᠤᠯᠬᠤᠶᠠ ᠬᠢᠯᠪᠠᠷ
ᠠᠢ᠌ᠵᠠᠮᠳᠤ ᠰᠢᠯᠦᠭ ᠦᠯᠢᠭᠡᠷ ᠲᠤᠤᠯᠢᠰ ᠢ ᠵᠤᠬᠢᠶᠠᠨ ᠪᠦᠲᠦᠭᠡᠬᠦᠶᠡ ᠪᠡᠷᠭᠡ
ᠠᠯᠳᠠᠨ ᠪᠤᠳᠢ 《ᠬᠦᠬᠡ ᠰᠤᠳᠤᠷ》᠊ᠤᠨ ᠲᠤᠷᠭᠠᠨ ᠬᠠᠭᠤᠳᠠᠰᠤ ᠶᠢ ᠰᠡᠭᠦᠬᠦᠶᠡ
ᠠᠮᠳᠠᠳᠤ ᠵᠢᠮᠢᠰ ᠤᠶᠠᠩᠭᠠ ᠶᠢᠨ ᠮᠤᠳᠤᠨᠠ ᠠᠶᠠᠨᠳᠠᠭᠠᠨ ᠳᠡᠭᠦᠵᠢᠯᠡᠭᠳᠡᠬᠦ ᠪᠠᠢ᠌ᠯᠭᠦᠢ
ᠲᠩᠷᠢᠯᠢᠭ᠌ ᠰᠤᠶᠤᠯ
ᠪᠤᠭᠤᠷᠤᠯ ᠡᠵᠢ ᠪᠤᠶᠠᠨᠳᠤ ᠠᠪᠤ ᠮᠢᠨᠦ ᠠᠮᠢᠳᠤ ᠶᠢᠨ ᠰᠢᠲᠦᠭᠡᠨ
ᠪᠤᠭᠳᠠ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠮᠢᠨᠦ ᠡᠪᠦᠭᠡ ᠳᠡᠭᠡᠳᠦᠰ
ᠪᠤᠷᠵᠢᠭᠢᠨ ᠤᠪᠤᠭ ᠤᠷᠤᠨ ᠨᠤᠲᠤᠭ ᠮᠢᠨᠦ ᠠᠢ᠌ᠮᠠᠭ ᠤᠭᠰᠠᠭᠠ
ᠪᠤᠰᠤᠭᠠ ᠦᠰᠦᠭ ᠪᠤᠯᠪᠠᠰᠤᠨ ᠬᠡᠯᠡ ᠮᠢᠨᠦ ᠲᠩᠷᠢᠯᠢᠭ᠌ ᠰᠤᠶᠤᠯ
ᠪᠢᠴᠢᠭ᠌ ᠤᠨ ᠴᠡᠴᠡᠨ ᠬᠦᠮᠦᠰ
ᠪᠤᠷᠤᠭᠠᠨ ᠤ ᠳᠠᠷᠠᠭᠠ ᠤᠭᠲᠠᠷᠭᠤᠢ ᠳᠤ ᠳᠠᠲᠠᠭᠰᠠᠨ ᠲᠠᠪᠤᠨ ᠦᠩᠭᠡ ᠶᠢᠨ ᠰᠤᠯᠤᠩᠭᠠ
ᠪᠤᠳᠤᠯ ᠤᠨ ᠳᠤᠳᠤᠷᠠ ᠤᠶᠠᠩᠭᠠᠷᠠᠨ ᠴᠠᠯᠭᠢᠯᠠᠭᠰᠠᠨ ᠳᠤᠯᠤᠭᠠᠨ ᠦᠭᠡ ᠶᠢᠨ ᠰᠢᠯᠦᠭ
ᠪᠤᠷᠬᠠᠨ ᠤᠩᠰᠢᠭᠴᠢ ᠳᠠᠷᠬᠠᠨ ᠨᠠᠢ᠌ᠷᠠᠭᠤᠯᠤᠭᠴᠢ ᠤᠷᠠᠨ ᠵᠤᠬᠢᠶᠠᠯᠴᠢ ᠶᠢᠨ ᠡᠩᠨᠡᠭᠡ
ᠪᠤᠰᠤᠭᠠ ᠮᠤᠩᠭᠤᠯ ᠤᠨ ᠰᠤᠶᠤᠯ ᠢ ᠳᠡᠯᠭᠡᠷᠡᠭᠦᠯᠦᠭᠴᠢ ᠪᠢᠴᠢᠭ᠌ ᠤᠨ ᠴᠡᠴᠡᠨ ᠬᠦᠮᠦᠰ
ᠪᠠᠶᠠᠷᠲᠤ ᠠᠮᠢᠳᠤᠷᠠᠯ
ᠬᠢᠶᠠᠭ ᠬᠠᠯᠢᠭᠤᠷᠠᠵᠤ ᠴᠡᠴᠡᠭ ᠮᠢᠷᠠᠯᠵᠠᠭᠰᠠᠨ ᠰᠢᠯᠢ ᠶᠢᠨ ᠨᠤᠭᠤᠭᠠᠨ ᠪᠡᠯᠴᠢᠭᠡᠷ
ᠬᠤᠨᠢᠳ ᠪᠡᠯᠴᠢᠵᠤ ᠠᠳᠤᠭᠤᠳ ᠲᠤᠷᠭᠢᠯᠳᠤᠭᠰᠠᠨ ᠭᠤᠪᠢ ᠶᠢᠨ ᠨᠤᠮᠢᠨ ᠪᠦᠷᠢᠳᠦ
ᠬᠠᠮᠠᠷ ᠴᠤᠷᠬᠢᠵᠤ ᠰᠠᠮᠰᠠ ᠰᠡᠩᠭᠢᠨᠡᠭᠰᠡᠨ ᠰᠦ᠋ ᠰᠠᠭᠠᠯᠢ ᠶᠢᠨ ᠦᠨᠦᠷ
ᠬᠠᠳᠠᠭ ᠡᠷᠭᠦᠵᠦ ᠰᠢᠯᠦᠭ ᠤᠶᠠᠩᠭᠠᠷᠠᠭᠰᠠᠨ ᠮᠠᠯᠴᠢᠳ ᠤᠨ ᠪᠠᠶᠠᠷᠲᠤ ᠠᠮᠢᠳᠤᠷᠠᠯ
ᠵᠢᠷᠤᠮ ᠤᠨ ᠬᠤᠯᠪᠤᠭᠠ
ᠠᠭᠳᠠ ᠶᠢᠨ ᠨᠢᠷᠤᠭᠤᠨ ᠳᠤ ᠵᠢᠯᠤᠭᠤ ᠬᠤᠯᠪᠤᠭᠰᠠᠨ ᠵᠠᠮ ᠤᠨ ᠨᠢᠭᠡᠨ ᠬᠠᠨᠢ
ᠠᠯᠤᠰ ᠤᠨ ᠠᠶᠠᠨ ᠳᠤ ᠵᠤᠤᠵᠠᠢ ᠬᠤᠯᠪᠤᠭᠰᠠᠨ ᠰᠡᠳᠬᠢᠯ ᠤᠨ ᠨᠢᠭᠡᠨ ᠨᠦᠬᠦᠷ
ᠳᠤᠭᠤᠨᠤᠳᠤ ᠭᠡᠷ ᠲᠤ ᠲᠤᠯᠤᠭᠠᠢ ᠬᠤᠯᠪᠤᠭᠰᠠᠨ ᠨᠠᠰᠤᠨ ᠤ ᠨᠢᠭᠡᠨ ᠬᠡᠯᠬᠢᠶᠡ
ᠲᠤᠭᠤᠭᠠ ᠲᠠᠢ ᠱᠦᠯᠦ ᠳᠤ ᠬᠤᠰᠢᠭᠤ ᠬᠤᠯᠪᠤᠭᠰᠠᠨ ᠵᠢᠷᠤᠮ ᠤᠨ ᠨᠢᠭᠡᠨ ᠬᠤᠯᠪᠤᠭᠠ
ᠡᠦᠭᠶᠤᠨ ᠮᠦᠴᠢᠷ
ᠴᠠᠰᠤᠨ ᠤ ᠳᠤᠤᠷᠠ ᠡᠴᠡ ᠮᠦᠰᠢᠶᠡᠨ ᠳᠡᠯᠭᠡᠷᠡᠭᠰᠡᠨ ᠳᠡᠷᠢᠭᠦᠯᠡᠭᠴᠢ ᠴᠡᠴᠡᠭ ᠤᠨ ᠬᠡᠯᠲᠡᠰ
ᠴᠠᠪᠴᠢᠮᠠ ᠬᠠᠳᠠᠨ ᠡᠴᠡ ᠴᠢᠳᠬᠤᠯᠠᠨ ᠪᠠᠭᠤᠭᠰᠠᠨ ᠮᠦᠩᠭᠦᠨ ᠬᠦᠷᠬᠢᠷᠡ ᠶᠢᠨ ᠱᠤᠤᠭᠢᠶᠠᠨ
ᠰᠠᠷᠢᠳᠠᠭ ᠬᠠᠢ᠌ᠷᠬᠠᠨ ᠡᠴᠡ ᠰᠡᠪᠢᠯᠵᠡᠵᠦ ᠢᠷᠡᠭᠰᠡᠨ ᠤᠢ ᠶᠢᠨ ᠰᠡᠷᠢᠭᠦᠨ ᠰᠠᠯᠬᠢᠨ
ᠴᠠᠷᠠᠰᠤ ᠮᠠᠢ᠌ᠯᠠᠰᠤᠨ ᠡᠴᠡ ᠡᠩᠬᠡᠳᠡ ᠴᠡᠯᠭᠡᠷᠡᠭᠰᠡᠨ ᠨᠠᠷᠠᠰᠤᠨ ᠤ ᠡᠦᠭᠶᠤᠨ ᠮᠦᠴᠢᠷ
ᠪᠤᠯᠤᠷ ᠪᠦᠮᠪᠦᠭᠡ
ᠪᠤᠯᠪᠠᠷᠠᠢ ᠴᠡᠴᠡᠭ ᠶᠢᠡᠨ ᠮᠦᠴᠢᠷ ᠲᠡᠭᠡᠨ ᠪᠦᠪᠡᠢ᠌ᠯᠡᠭᠰᠡᠨ ᠤᠳᠠ ᠶᠢᠨ ᠨᠢᠭᠡᠨ ᠰᠠᠯᠠᠭᠠ
ᠪᠤᠷᠤᠭᠠᠨ ᠤ ᠰᠢᠮᠡ ᠪᠡᠷ ᠭᠡᠰᠢᠭᠦᠦ ᠪᠡᠨ ᠰᠤᠩᠭᠠᠭᠰᠠᠨ ᠮᠤᠳᠤᠨ ᠤ ᠨᠢᠭᠡᠨ ᠨᠠᠮᠠᠭᠠ
ᠤᠯᠠᠭᠠᠨ ᠰᠠᠷᠨᠠᠢ ᠶᠢᠨ ᠬᠡᠯᠳᠡᠰ ᠲᠤ ᠮᠡᠯᠳᠡᠩᠨᠡᠭᠰᠡᠨ ᠤᠰᠤᠨ ᠤ ᠨᠢᠭᠡᠨ ᠳᠤᠰᠤᠯ
ᠤᠬᠤᠨᠠ ᠰᠢᠪᠳᠤᠷ ᠤᠨ ᠨᠠᠪᠴᠢᠨ ᠳᠤ ᠪᠦᠮᠪᠦᠭᠡᠨᠡᠭᠰᠡᠨ ᠪᠤᠯᠤᠷ ᠨᠢᠭᠡᠨ ᠪᠦᠮᠪᠦᠭᠡ
ᠤᠨᠠᠭᠠᠨ ᠪᠠᠢ᠌ᠭᠠᠯᠢ ᠶᠢᠨ ᠡᠭᠡᠰᠢᠭ᠌
ᠠᠯᠢᠮᠠ ᠵᠢᠮᠢᠰ ᠤᠨ ᠰᠢᠭᠦᠰᠦ ᠳᠤᠰᠤᠯᠠᠭᠰᠠᠨ ᠭᠤᠪᠢ ᠶᠢᠨ ᠨᠤᠮᠢᠨ ᠴᠡᠴᠡᠷᠯᠢᠭ
ᠠᠢ᠌ᠷᠠᠭ ᠳᠠᠷᠠᠭ ᠤᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠰᠢᠯᠢ ᠶᠢᠨ ᠨᠤᠭᠤᠭᠠᠨ ᠳᠡᠨᠵᠢ
ᠴᠡᠩᠬᠡᠷ ᠭᠤᠷᠤᠬᠠ ᠶᠢᠨ ᠤᠷᠤᠰᠬᠠᠯ ᠤᠨ ᠱᠤᠤᠬᠢᠶᠠ ᠤᠶᠠᠩᠭᠠ ᠨᠠᠢ᠌ᠷᠠᠯ ᠬᠦᠭᠵᠢᠮ
ᠴᠡᠯᠡᠭᠡᠷ ᠲᠠᠯᠠ ᠶᠢᠨ ᠴᠡᠭᠴᠡᠦᠬᠡᠢ ᠶᠢᠨ ᠵᠢᠷᠭᠢᠭᠡᠨ ᠤᠨᠠᠭᠠᠨ ᠪᠠᠢ᠌ᠭᠠᠯᠢ ᠶᠢᠨ ᠡᠭᠡᠰᠢᠭ
ᠤᠷᠢᠬᠠᠨ ᠬᠠᠪᠤᠷ ᠤᠨ ᠮᠡᠳᠡᠭᠡ
ᠠᠭᠯᠠᠭ ᠠᠭᠤᠯᠠᠨᠠ ᠪᠤᠭᠤ ᠤᠷᠤᠮᠳᠠᠵᠤ ᠬᠦᠬᠦᠭᠡ ᠰᠢᠪᠠᠭᠤ ᠳᠤᠩᠭᠤᠳᠤᠷᠤᠨ
ᠠᠲᠠᠷ ᠬᠡᠭᠡᠷᠡ ᠬᠦᠬᠡᠷᠡᠨ ᠨᠤᠭᠤᠭᠠᠷᠠᠵᠤ ᠤᠨᠠᠭᠠ ᠳᠠᠭᠠ ᠳᠠᠪᠬᠢᠯᠳᠤᠮᠤᠢ
ᠠᠷᠢᠭᠤᠨ ᠤᠷᠤᠰᠬᠠᠯ ᠭᠤᠷᠴᠢᠬᠢᠨᠠᠨ ᠤᠷᠤᠰᠴᠤ ᠤᠳᠠᠨ ᠮᠦᠴᠢᠷ ᠨᠠᠬᠢᠶᠠᠯᠠᠷᠤᠨ
ᠠᠶᠠᠰ ᠤᠨ ᠰᠠᠯᠬᠢᠨ ᠢᠯᠪᠢᠨ ᠰᠡᠷᠴᠢᠬᠢᠨᠡᠵᠦ ᠤᠷᠢᠬᠠᠨ ᠬᠠᠪᠤᠷ ᠢ ᠮᠡᠳᠡᠭᠡᠯᠡᠮᠤᠢ
ᠵᠤᠬᠢᠶᠠᠭᠴᠢ᠄ ᠮᠢᠵᠢᠳᠰᠠᠩᠪᠤ
ᠢᠷᠡᠯᠲᠡ᠄ ᠵᠤᠬᠢᠶᠠᠭᠴᠢ ᠡᠴᠡ ᠬᠠᠩᠭᠠᠪᠠ
ᠬᠠᠷᠢᠶᠠ᠄
ᠰᠢᠯᠦᠭᠳᠠᠷᠤᠮ᠄ 73146
ᠴᠠᠭ᠄ 2018 ᠤᠨ ᠤ 04 ᠰᠠᠷᠠ ᠶᠢᠨ 02
ᠨᠠᠢ᠌ᠷᠠᠭᠤᠯᠤᠭᠴᠢ᠄ ᠪᠦᠬᠡᠡᠷᠳᠡᠨᠢ